ITINI toni masasifoday a hekal, cowa ka dolo a ira ko rihaday, soˈlin towa iraay ko rihaday ita ano han i, cowa ka halafin. Hay, sasamaan a milifok to midaˈocay a rihaday hani? Misamaan padama to tao milifok to soˈlinay a rihaday hani? Nengnengen ita samaanay ko sowal no Fangcalay Cudad.

Ano saka iraaw ko soˈlinay rihaday, dadipayal, rarihaday ko kemod no falocoˈ wangaˈ, hanaca ira ko ngaˈayay a widang pacafay kitanan. Nawhani, patirengen ita ko tangongolay noka lawidang ato Kawas ngaˈ, ira ko midaˈocay a rihaday. Wa misamaan to demak hani?

Ano mitoor kita to moecelay limoˈot ato safalod ni Yihofa, patahekelay to mitiˈeray kita to Kawas, ciharatengay to saka ngaˈayaw ko kalalaˈed ato Kawas. (Yirimiya 17:7, 8; Yakop 2:22, 23) Ano mihakelong kita to Kawas, ngangataen no Kawas kita, palemed kitanan, sinowayen ko kemod no falocoˈ ita. Isaya 32:17 sanay ko sowal: “Nawhani, o mamangaˈay ko demak no tamdamdaw a maemin itiya. O mamidaˈoc a rihaday a mangaˈay ko ˈorip nangra.” Ano kifalocoˈen ita midofdof ci Yihofa i, o kemod no falocoˈ, o sasoˈlin a rihadayen.​—Isaya 48:18, 19.

Pafeliay ko Wama ikakarayan to fangcalay saocor malo sapaamid kitanan, padama kitanan palahad to rihaday, milifok to midaˈocay a dipayal.​—Dmak 9:31.

Tarokos ci Pawlo parayrayan to saka tolo a heci no ‘fangcalay saocor’ koni rihaday. (Kalatiya 5:22, 23) O heci no fangcalay saocor ko rihaday, hakelongen ita ko sakayat no fangcalay saocor, wa ngaˈ mapalahad koni rihaday a capeling. Tosaay ko hapakayraan no fangcalay saocor, padama to tamdaw palahad to rihaday, nengnengen ita koni tosa hapakayraan.

Saka cecay, mararid a miˈosi to Kimad no  Kawas. (ˈOlic 1:2, 3) Ano misimsim kita to lalakaw no Fangcalay Cudad i, papadama ko fangcalay saocor kitanan, cipinang to kapinengneng ni Yihofa to demak. Patinakoen, o mamaasip ita i Fangcalay Cudad, hano maolah ci Yihofa to rihaday, hano misakareteng to rihaday Cingra. Ano kalasaka dademaken ita i kaˈorip ko sifanaˈ no Fangcalay Cudad i, o mamalifok ko kadofahay a rihaday.​—Taneng 3:1, 2.

Saka tosa, tolonen ita ko Kawas pafeli to fangcalay saocor. (Luka 11:13) Mikiˈokay ci Yihofa, ano ngitangiten ita Cingra, “ta oya ikakaay no niharatengan no tamdaw a nano Kawas a rihaday ko mamisimaw to falocoˈ ato harateng [ita] pakayni i nika lacecay [ita] aci Kristo.” (Filipi 4:6, 7) Ano rariden ita mingitangit ci Yihofa to fangcalay saocor i, o paparihadayen Ningra ko kemod no falocoˈ ita, o matiniay a rihaday, edengan oya misawidangay to Kawas ko mamilifok.​—Loma 15:13.

O roma tamdaw, kalasaka dademakan i nokaˈorip ko sapalimoˈot no Fangcalay Cudad, mifalic to niyah, teloc i, milifokay to midaˈocay rihadayay a kalalaˈed ato Kawas, makangaˈay ato tao, rihadayen ko kemod no falocoˈ. Misamaanay a pakalifok cangra hani?

Itini i lalomaˈ no kasakopang no Krisciyang, iraay ko hinaketeray isaˈayaw, kawra mafalicay, o siniˈadaayto, cisidaˈiayto, kodaitayto a tamdaw, madoloayto a kalacafayen. * (Taneng 29:22) Nengnengen ita ko tosa nalifetan no salikaka, hinaketeray cangra itiyaho, ikor micadaay to sapadama a mifalic to niyah, nohatini rihadayayto ko kalalaˈed ato tao.

Ci Tafong mariˈangay isaˈayaw, caedesay ko sowal to tao. ˈAyaw no malo Krisciyang cingra, mananamay a milalikaf to tao, midokaˈ ko sowal to paro no lomaˈ. Ikor, mahapinangay ningra toha mamifalic cingra, mala kangaˈay ato tao. Misamaanay a misaˈicel cingra hani? Sanay ko sowal ni Tafong: “Kalasaka dademakan ako ko safalod no Fangcalay Cudad i nokaˈorip, telocto i, mangaˈayayto ko kalalaˈed ato paro no lomaˈ.”

Ci Miciyang, o nika lomahad ningra mifiyoray to waywayan ningra. Sanay ko sowal: “O paro no lomaˈ ako marariday a malapoyiˈ, oha mamisaˈicel kako wangaˈ, pakaˈmet to  keter.” Misamaanay cingra mitafo to rihaday hani? Sanay ko sowal ningra: “Marariday kako mitolon, mingitangit to sapadama no Kawas.”

Ano kalasaka dademaken ita ko safalod no Fangcalay Cudad, mingitangit to fangcalay saocor no Kawas a padama kitanan, mamalifok ko rihaday, matira ci Tafongan aci Miciyangan. Soˈliˈlin matomesay ko mafirangay ato ˈintehay itini toni hekal, nikawrira o ngangaˈay milifok kita to rihaday, makala ngaˈay ato paro no lomaˈ, ato Krisciyang a salikaka. Mitokelay ci Yihofa kitanan, “pisaˈicel kamo to sakararihaday namo ato tamdamdaw,” sanay. (Loma 12:18) Misarihaday to polong a tamdaw, o mamatoor han? O maanan a ngaˈayay epoc ano mihaen to demak hani?

Mitosil kita to tamdaw, pasowal cangranan to lihaf no Hongti Kitakit, sapipadamaaw cangranan milifok to rihaday. (Isaya 9:6, 7; Matay 24:14) Mahemekay maˈaraw ita ko ˈalomanay tamdaw micada to lihaf no Hongti Kitakit, cato ka matoled ko falocoˈ, cato ka maketer toni hekal. Nohatini iraayto ko makapahay tokel tono ikoran, hanaca “kao saka rarihaday ko safalocoˈen a misaˈicel.”​—ˈOlic 34:14.

Nikawrira, pakatengil to lihaf no Hongti Kitakit ko tamdaw, cowa ka saheto saan mangaˈay ko kapicada. (Yohani 3:19) Kawra, pakayni i sapadama no fangcalay saocor, ngaˈayay rihadayen kangodoen ita a mitenak to ngaˈayay lihaf, ano mihaen kiso o mitooray to sapalimoˈot ni Yis. Itini i Matay 10:11-13, sanay ko sowal ni Yis: “Ano icowaay a lomaˈ ko nicomodan namo a milisoˈ i, ngaˈayho han koya lomaˈ. Ano ngaˈay koya lomaˈ i tamowanan i, itira toya lomaˈ koya nitolonan namo a pipalemed [rihaday]. Ano caay ka ngaˈay koya lomaˈ i tamowanan i, patikol i tamowanan koya nitolonan namo a pipalemed [rihaday].” Mihaen to demak kita, ano miliyas tora lomaˈ i, cowa ito ko mamafiyor nora tatiihay a waywayan no tao, matafoho ko rihaday no falocoˈ, mitala toha toki noikor miliyaw a mitosil cangranan.

O romaroma mikowanay no kitakit, soˈlin misafelitay kitanan, kawra ano kangodoen ita cangra, o ngangaˈay paira to rihaday. Itini i Afrika a kitakit, misakakinihay kitanan ko mikowanay, caka kahi papipatireng to kasaˈopoan. Toha sapadamaaw to salikaka rihaday a misaysay toni demak, miocoran no Congpo ko cecay faˈinayan salikaka, tayra milisoˈ to tarokos no kitakit i Ikok, o Tase hananay (no Kowaping a sowal). Oniya faˈinayan salikaka, na malo milakowitay to riyar a misakafahay i Afrika a kitakit, mitadtadan no salikaka kora Tase, o demak no Misawacayay Tamdaw ni Yihofa micowatay to rihaday itira tora kitakit. Samaanayto ko teloc hani?

Sanay ko sowal noni faˈinayan salikaka: “Tangasa kako i Tasekowan (no Kowaping, katayalan no Tase), iraay ko cecay militemohay fafahiyan, maˈaraw ko caˈedong ningra, tangsolay mafanaˈ kako to maanan finacadan cingra, na mafanaˈay kako to sowal nora finacadan, tano ninian a sowal pasowal kako. Fahekaˈay kora fafahiyan, milicay o maanan ko araaw ako tayra, mikangodoan ako pasowal cingra, sapiˈarawaw kako to Tase. Irato ko Tase i, o nowina a sowal ningra a pasowal takowanan. Mitadtadan ako cingra, o demak niyam micowatay to rihaday no kitakit, misongilaˈay cingra a mitengil.”

Mikangodoan no salikaka a mitadtad kora Tase, palahedaw to pisatatiih a misakakinih kitanan. Ikor to cowa ka halafin, oniya Afrika a kitakit, cowa ito piconged to mipatirengay a demak ita. Mahemekay ko salikaka toni teloc no demak! Mikangodo to tao soˈlinay adihay ko epoc, ngaˈayho a matafo ko rihaday, paira to dipayal.

Anini, o tamdaw ni Yihofa milifokay to rihaday i noˈdingoan a lakoing. Ano palahad kita to hatiniay capeling i nokaˈorip, oniya heci no fangcalay saocor i, o papacowat kiso to rihaday i noˈadingoan a lakoing. O masaka limelaan i, papalemeden ni Yihofa kiso, itini i faelohay hekal milifok to kadofahay midaˈocay a rihaday.​—2 Pitiro 3:13, 14.