1, 2. (1) Itiniay i cowa ka olah to soˈlinay kimad a kilac mitosil a salikaka, patirengay to maanan a taˈarawan hani? (Nengnengen ko satapangan coka.) (2) Itini i “niyaroˈ” mitosil, mansanay ko sowal ni Yis hani? (Nengnengen ko ilaenoay safanaˈ.)

CI SARESIAW aci Alinta o mararamoday a misakafahay, mataˈlifayto ko 80 mihecaan nangra, itiniay i Padaka ko kitiraan. Nohatini, adadaay ko ooˈ nangra, cowato ka ngaˈay ko rakat. Kawra, kamayan cangra tayra i kakahaday a potal to papacem, ˈalomanay ko tamdaw itira. Pito ko toki tahiraayto cangra toni kakahaday a potal, padotocay to pina poloˈ miheca mihaen to demak. Mipiliˈay cangra to mingataay to ciyataw no faso, palilam to cudad no Fangcalay Cudad i tamdaw. Soˈlin cowa ka olah ko ˈalomanay tamdaw to soˈlinay kimad, oniya mararamoday kamayan matawa ko pising i mitaˈlifay a tamdaw. Tahira i kalahokan, micedengay cangra a romakat minokay, pito ko toki to papacem miliyaw a tayra mitosil. Oniya madimadiay mararamoday, cecay lipay enemay romiˈad itini milasil to lihaf no Kitakit no Kawas.

² Toniya hekal ˈalomanay ko madimadiay a salikaka, mahecaday ci Saresiaw aci Alintaan, soˈlin cowa ka olah to soˈlinay kimad ko tamdaw  i kilac, kamayan cangra padotoc a mitosil. Ano misiˈayaw kiso to mahecaday a pakayraan, o fanekfekay a harateng iso citodongay to papakahemeken. * Tanektek kiso a mihodop ci Yihofaan, pakalalokay to ˈalomanay tamdaw, ano o adihayay ko milifetan a mitosilay micadaay to sapakalalok. Mihaenay ko kasakilac a kantok pasowal: “Ano kalacafay to madimadiay a salikaka mitosil i, mapakalalokay kako to ngaˈayay taˈarawan nangra.” “Maˈaraw ko taˈarawan no salikaka mitemeray to falocoˈ ako.” “Paihekal ko salikaka to madimadiay a capeling, padamaay takowanan padotoc tanektek i katayalan, paihekal to timolo.”

3. (1) Oniya lalakaw mamilengo to maanan a tolo a salicay? (2) Milengo toniya tolo salicay mamilifok kita to maanan a haepoc?

³ Sapaˈicelaw to pisaˈosi no falocoˈ ita, misongilaˈ milaheci to patorodan ni Yis a mitosilay demak, wa milengo kita to tolo a salicay: Tolatekay hano matoled ko falocoˈ ita hani? O maanan ko tatodong no ciheciay? Wa ngaˈay kita misamaan ‘mihadidi a ciheci’?

4. (1) ˈAlomanay Yutaya tamdaw cowa ka olah to soˈlinay kimad, samaanay ko harateng ni Pawlo hani? (2) Hano ira ko hatiniay a harateng ni Pawlo hani?

⁴ Itini cowa ka olah to soˈlinay kimad a kilac mitosil, ano matoled ko falocoˈ iso, wa ngaˈay haratengen ko milifetan ni Pawlo. Maedeng 30 miheca ci Pawlo mirienang to mitosilay demak, ˈalomanay ko padamaan a tamadaw malo Krisciyang. (Dmak 14:21; 2 Korinto 3:2, 3) Kawra, ˈalomanay Yutaya tamdaw cowa ka malo Krisciyang, manaˈayay ko roma tamdaw, mipalakay cingranan ko roma tamdaw. (Dmak 14:19; 17:1, 4, 5, 13) Samaanay ko harateng ni Pawlo toniya Yutaya tamdaw hani? Mihaiyay cingra: “Soˈlinay ko sowal ako. O ni Kristo kako . . . Tadamararom kako a paˈayaw to finacadan ako . . . Saka, mararid a makesem ko falocoˈ ako.” (Loma 9:1-3) Mihaen ko sowal ni Pawlo samanen misarocoday ko falocoˈ ningra to mitosilay a demak, tada ciharatengay cingra to Yutaya tamdaw, mansa mitosil cangranan. Kawra manaˈayay ko Yutaya tamdaw to sidaˈitay a sadama no Kawas, tada makesemay ko falocoˈ ni Pawlo.

5. (1) O maanan ko miocoray kitaanan a mitosil i tamdaw? (2) Nolatekay hano matoled ko falocoˈ ita hani?

⁵ Mitosil kita to tamdaw mahecad ci Pawloan, samanen ciharatengay kita cangranan. (Matay 22:39; 1 Korinto 11:1) Mikitini milifetan no niyah mahapinangay ita, ano misaˈosi ko tamdaw mihodop to Kawas, wa milifok to adihayay saka lipahak. Ano maharateng ita ko tamdaw i kilac, wa pasowal to niyah: “Nanay mafanaˈ cangra to soˈlinay kimad, hoeca ka lawa ko adihayay a sapalemed!” Mihaenay, wa padotoc kita a pakalalok cangranan minanam to pakayniay ci Yihofaan a soˈlinay kimad, ato araaw Ningra to tamdaw. Mitosilay kita to tamdaw mahecaday o pasowalay cangranan: “Sapafeliaw kako tisowanan to ngaˈayay a sapatelong.” Ano manaˈay cangra toniya sapatelong i, tada mamakesem ko harateng no mita. Ira ko hatiniay harateng ita, cowa ko cangoˈotay ko pakasoˈlin no falocoˈ, pakayniay pisamacay no falocoˈ ita to mitosilay a demak. Soˈlin tahalifa kita to katoledan a pakayraan, wa kamayan kita mitafo to kodaitay. Fafahiyan salikaka ci Alina mataˈlifay ko 25 miheca misakafah, mahecaday ko harateng ningra kitaanan, sanay cingra: “Soˈlin cowa ko madoloay ko mitosilay, kawra awaay ko pakaliniay a demak to mitosilay,” sanay.

6. Pakayni i mitosilay a demak, wa ira ko maanan a salicay ita halatek?

⁶ Hano ngaˈay pakasoˈlin kita, ano icowato kita a mitosil, wa ira ko ngaˈayay minaroˈan hani? Mikitini masowalay ni Yis a tosa sapatinako mahela ita ko caˈof, oniya tosa sapatinako wa mitadtad o  kalimelaan ko ciheciay. (Matay 13:23) O saka cecay pakayniay fadisosoˈ a kilang a sapatinako.

7. (1) Itini sapatinako ni Yis, o “maomahay (palahaday) tamdaw”, “soˈlinay fadisosoˈ a kilang” ato “caˈang” mitaypiway cimaanan? (2) Manan salicayan ko papacaˈofen hani?

⁷ ˈOsien ko Yohani 15:1-5, 8. Pasowalan ni Yis ko nisawawaan: “Ano adihay ko heci namo i, mapahemek ko Wama ako. Onini ko sapahapinang namo to nika o nisawawaan ako kamo.” Sowal ni Yis, “o soˈlinay fadisosoˈ a kilang kako,” ci Yihofa o “maomahay (palahaday) a tamdaw”, o “caˈang” ko nisawawaan. * O nisawawaan ni Yis wa ciheci to maanan a heci hani? Cowa ka ihekel ci Yis mitadtad to o maanan ko mitoroˈan noniya heci, kawra mikitini nano sowal ni Yis, wa padama kitaanan mikilim to caˈof.

8. (1) Misamaanay itini fadisosoˈ a tinako, o heci cowa ko faelohay a nisawawaan ko mitoroˈan? (2) O masamaanay a demak ko saali ni Yihofa kitaanan hani?

⁸ Masowal ni Yis ko Wama ningra i, sanay ko sowal: “O caay ka ciheci a caˈang ako a maemin i, ketonen no Wama a mifalah.” Sakoniya sowal, caciheci kita, mihaen o sikawdan Ako wa saan ci Yihofa a minengneng kitaanan. (Matay 13:23; 21:43) Tokel no mita nanay padama to tamdaw malo Krisciyang, kawra itini sapatinako, ora heci no mita cowa ko faelohay nisawawaan ko mitoroˈan. (Matay 28:19) Itini cowa ka olah to soˈlinay kimad a kilac, o roma Krisciyang awaay ko mapadamaay a tamdaw malo Krisciyang, ano o faelohay nisawawaan ko mitoroˈan no heci, oniya madimadiay a Krisciyang mahecaday oya cowa ka ciheci a caˈang. Cowa ka mahaen ko harateng ni Yis! Cowa ko papacieci kita to tamdaw malo Krisciyang, hanaca oya sidaˈitay a Yihofa cowa ka pacieci to sikawdan midemak to cowa ko mamadangar a demak nangra. O saali ni Yihofa kitaanan oyaan mamadangar ita a demak.—Limoˈot 30:11-14.

9. (1) Midemak kita to maanan ngaˈay a ciheci hani? (2) Dotoc mamilengo to maanan a sapatinako hani? Misamaanay?

⁹ Ano hatiraay i, ora heci ita o masamanay a heci hani? O saali ni Yihofa kitaanan a heci o mamadangar no mita a demak. O maanan a demak ko mamadangar ita, paihekal to “ciheciay” ko niyah hani? O patenakay to ngaˈayay ratoh no Kitakit no Kawas. * (Matay 24:14) O mifolesakay to sapaloma a tinakoan, paihekalay to mahecaday harateng, dotoc wa milengo kita toniya sapatinako.

10. (1) O mifolesakay a tinakoan, o sapaloma ato sera mitaypiyaway to maanan hani? (2) O cecay emi wa ciheci to maanan hani?

¹⁰ ˈOsien ko Luka 8:5-8, 11-15. Itini mifolesakay a tinakoan, o sapaloma, o ‘sowal no Kawas’ anca, o lihaf no Kitakit no Kawas, o sera, mitaypiyaway to falocoˈ no tamdaw. O mifolesakan no maomahay, ano o sapaloma no emi, matefaday i ngaˈayay sera ko sapaloma, cilamit, cicengoˈ lomahad malo emi. Ciheci ko emi to ‘simoˈotay a heci,’ kawra o heci no emi o maanan a heci hani? O lomahaday a emi han? Cowa, ora heci, o faelohay a sapaloma, lomahad ko sapaloma malo emi. Itini sapatinako, o cecay sapaloma ciheciay to simoˈot a sapaloma. O mitadtadan no sapatinako samaanay milingat to mitosilay a demak ita hani?

11. (1) O mifolesakay a tinakoan samaanay milingat to mitosilay a demak hani? (2) Sasamaan kita a ciheci to faelohay sapaloma no Kitakit no Kawas hani?

¹¹ Sapitadtadaw toniya sapatinako, ngaˈayay haratengen ita ko pakayraan no niyah, halatek ˈayaw no pina miheca, o Misawacayay Tamdaw ni Yihofa ato Krisciyang wama wina ita palomaay to sapaloma no soˈlinay kimad kitaanan, mahemekay cangra micada kita to lihaf no Kitakit no Kawas. Ano micada kita a mikelec midofdof to kimad no Fangcalay Cudad, mahecad i sapatinako ni Yis materekay ko sapaloma i ngaˈayay a sera. Ikorto, cilamitay ko sapaloma no soˈlinay kimad  i falocoˈ no mita, lomahaday, mahecad malo emi ko sapaloma, mangataayto a ciheci. Mahaen o heci no emi, cowa ko malengaway a emi, o faelohay a sapaloma, mahecaday onini, o minaroˈan no heci ita, cowa ko faelohay a nisawawaan, o faelohay a sapaloma no Kitakit no Kawas. * Sasamaan kita a ciheci to faelohay sapaloma no Kitakit no Kawas hani? Ano patenak kita to lihaf no Kitakit no Kawas, o mifolesakay to sapaloma i falocoˈ no mita. (Luka 6:45; 8:1) Mihaenay, o mifolesakay a sapatinako pasifanaˈay kitaanan, ano padotoc kita patenak to lihaf no Kitakit no Kawas, mahecaday o ‘mihadidiay a ciheci.’

12. (1) Mikitini fadisosoˈ a kilang ato mifolesakay a tinakoan mananamay ita ko maanan hani? (2) Cipinang to tatodong no sapatinako, wa ira ko maanan a haepoc no miso?

¹² Mikitini fadisosoˈ a kilang ato mifolesakay a tinakoan mananamay ita ko maanan hani? Mikitini toni tosa a tinakoan pacipinangay kitaanan, saka ngaˈay no Krisciyang a ciheci, cowa ko pitosilan a kilac ko piˈarawan, pakayniay ka madimadi ci Yihofaan. Paihekalay ci Pawlo to mahecaday a harateng, sanay ko sowal ningra: “O nitayalan no kahacecacecay ko piˈarawan no Kawas a palifon.” (1 Korinto 3:8) Milifok kita to sapalifon pakayniay nano roray a mitosil, cowa ko minaroˈan no pitosil. Misakafahay to 20 miheca a fafahiyan salikaka ci Matireta, sanay cingra: “Mafanaˈ to papalifonen ni Yihofa ko pisaˈicel ako, tada pakahemekay takowanan konini.”

13, 14. Pakayni i Loma 10:1, 2, misamaanay hano padadotoc fanekfek a mitosil ci Pawlo to Yutaya tamdaw hani?

¹³ O maanan ko papadama kitaanan ‘mihadidi a ciheci’ hani? Mahaen o masowalay iˈayaway a fatac, ci Pawlo pakayni caka olah no Yutaya tamdaw to lihaf no Kitakit no Kawas matoleday ko falocoˈ. Kawra, cowa ka sawaden ni Pawlo cangra. Pakayni i pinengneng ni Pawlo to Yutaya tamdaw, sanay ko sapatikami ningra to Lomaay a Krisciyang: “Salikakaaw, o longoc no falocoˈ ako a mitolon i Kawas to saki Israil i, o sapaˈoripaw no Kawas cangraan. Mipawacay kako to lalok nangra to saki Kawas.” Nikawrira, caay ko nano fanaˈ nangra konini a lalok. (Loma 10:1, 2) Misamaanay  hano ngaˈay padadotoc fanekfek a mitosil ci Pawlo hani?

¹⁴ Saka cecay, padotocay a mitosil ci Pawlo to Yutaya tamdaw, samanen, “o longoc no falocoˈako a mitolon,” sanay cingra. Nai falocoˈay cingra a mitokel to sakalidongaw no Yutaya tamdaw. (Loma 11:13, 14) Saka tosa, patadoay ci Pawlo to Yutaya tamdaw ‘micangacang to Kawas,’ milongoc to Kawas padama to Yutaya tamdaw micada to lihaf no Kitakit no Kawas. Saka tolo, sanay ko sowal ni Pawlo: “Mipawacay kako to lalok nangra to saki Kawas.” Maˈaraway ningra ko ngaˈayay no Yutaya tamdaw, pasoˈlin cangranan ano micada to matatodongay sakayat, wa ngaˈay malo fanekfekay a Krisciyang, samanen mahecaday ko pakayraan ni Pawlo.

15. Sasamaan kita mitodong to taˈarawan ni Pawlo hani? Patinakoen hena.

¹⁵ Sasamaan kita mitodong to taˈarawan ni Pawlo hani? Saka cecay, fanekfek kita mikilim to ‘citatodongay milifok to tahadaˈocay ˈorip’ a tamdaw. Saka tosa, mitolon kita milongoc to Kawas padama toniya tamdaw makahi micada to soˈlinay kimad. (Dmak 13:48; 16:14) Fafahiyan salikaka ci Silefana mangataayto ko 30 miheca misakafah, sanay ko sowal: “ˈAyaw no mingata kako to cecay lomaˈ a mitosil i, milongoc kako ci Yihofaan padama takowanan, ira ko tawlikay a haratengan.” O roma, milongocay kami to Kawas miocor to coyoh mikayat tamiyanan, mahela ko ngaˈayay ko falocoˈ a tamdaw. (Matay 10:11-13; Paˈarawan 14:6) Ci Lopote mataˈlifay ko 30 miheca misakafah, sanay cingra: “Mafanaˈay ko coyoh to pakayraan no mitosilan ita a tamdaw, ngaˈay malacafay to coyoh a mitosil tada pakahemekay takowanan.” Saka tolo, misaˈicelay kami mikilim to kangaˈayan no cilomaˈay. Ci Kalo mataˈlifay ko 50 miheca micada to inoˈ a malohemay malitengay, sanay ko sowal: “Sapihapinangaw to ngaˈayay ko falocoˈ no cilomaˈay, sinanoten a minengneng kora tamdaw, masediay ko pising, sidaˈitay minengneng anca mikifalocoˈay mihadak to salicay hokira.” Todongen ita ci Pawlo, wa ngaˈay ‘mihadidi a ciheci.’

16, 17. (1) Ngaˈay naitini kita i Patnakay 11:6 minanam to maanan hani? (2) Sowalen hena, o mifolesakay to sapaloma a tayal ita pakayni i mihapinangay kitaanan a tamdaw, wa ira ko masamaanay a pilingat alatek?

¹⁶ Ano cowa ka olah ko cilomaˈay to lihaf no Kitakit no Kawas, cowa ka ngaˈay kita misakahemaw to pilingat no mitosilay a demak. (ˈOsien ko Patnakay 11:6.) Soliˈlin caka olah ko ˈalomanay tamdaw to patenakan ita a lihaf, kawra, mihapinangay cangra to sasowalan ato waywayan ita. Maˈaraw nangra sanengseng ko caˈedong ita, ira ko mangodongay ato masediay a pising, ikorto, wa mahapinang nangra to mararaway ko pinengneng no niyah to Misawacayay Tamdaw ni Yihofa alatek. Masowalay i satapangan no lalakaw ci Saresiaw aci Alinta iraay ko mahecaday a milifetan.

¹⁷ Sanay ko sowal ni Saresiaw: “Cecay liyad, adadaay kami hato cowa ka tayra kakahaday potal mitosil. Tiya miliyaw kami tayra kakahaday potal i, milicayay ko mitaˈlifay tamiyanan: ‘Ngaˈayayho kamo han? Maˈiwilay kami tamowanan.’” Matawaay ci Alinta a pasowal: “Mikawihay ko palakatay to faso tamiyanan, o roma palakatay mikitira i faso miowaw tamiyanan: ‘Tada kasemeranto kamo!’ Misaaliayho cangra to casi tamiyanan!” Kawra, o kafahekaˈan noniya matoˈasay mararamoday i, o cecay faˈinayan tayraay i sapisawacay a paliding nangra, pafeliay to hana, miakoˈid to mitosilay a demak nangra.

18. Hano misetek ko falocoˈ iso ‘mihadidi a ciheci’ hani?

¹⁸ Itini mifolesakay to sapaloma no Kitakit no Kawas a demak, ano eca paselaˈ ko kamay ita, wa ngaˈay mihadak to ˈicel palaˈosi to “o mamapatenakho ko ngaˈayay a ratoh i polong no hekal” a demak. (Matay 24:14) Tada kalimelaan i, mahemekay kita milifok ko niyah to hemek no Kawas, samaanen maolahay Cingra to polong ‘mihadidiay a ciheci’ a tamdaw!