1. Ikor no mitowakang ci Atam aci Ifa, paihekalay ci Yihofa to maanan a demak pakayni toniya ˈada hani?

MAFANAˈAY ci Atam to cowa ka ngaˈay caciyaw ko ˈoner, tiya mafanaˈ ci Atam to pasowalay ko cecay ˈoner ci Ifaan i, pakaynian no coyoh i ˈoner mihaen to demak sanay cingra miharateng. (Satapangan 3:1-6) Cowa ka fanaˈ ci Atam aci Ifa toniya coyoh, kawra kamayan misaˈosi ci Atam midama toniya tatiihay a coyoh, malacafay a mitowakang to sidaˈitay a wama i kakarayan. (1 Timoti 2:14) Ikor no mitowakang ci Atam aci Ifa, kalikiay ci Yihofa paihekal to pakayniay toniya ˈada a demak, hanaca mikiˈok to papalaˈafoen koniya tatiihay a ˈada. Somowalayho to mamiˈodis koniya tatiihay coyoh to polong maolahay to Kawas a tamdaw.​—Satapangan 3:15.

2, 3. Misamaanay ˈayaw no ira ci Misiya, i Fangcalay Cudad hano cowa ka adihay ko milengoay ci Satanan?

² Cowa ka pifanaˈ ci Yihofa kitanan to manan ko ngangan noniya mitowakangay a coyoh. * Mataˈlif ko 2,500 mihecaan to mifekad ko mitowakangay  a demak i Itin, pasifanaˈ sanayho ko Kawas to cima koniya coyoh. (Yopu 1:6) Itini i Hipray Sowal a Fangcalay Cudad, edeng o saka 1 Rayray, Yopu ato Cikariya tolo a cudad ko milengoay ci Satanan, tatodong noniya ngangan i, “Misaˈadaay.” ˈAyaw no ira ci Misiya, hano caka rarid ko Fangcalay Cudad milengo ci Satanan hani?

³ Cowa ka ciharateng ci Yihofa malo samacayen ci Satan, mihaenay mikitini i Hipray Sowal a Fangcalay Cudad cowa ka adihay ko milengoay ci Satanan ato nano demak ningra. Papitiliden ni Yihofa ko tamdaw to Hipray Sowal a Fangcalay Cudad, ho ngaˈay mahapinang no tamdaw to o cima ci Misiya, halo padama to finawlan no Kawas mikotod ci Misiyaan. (Luka 24:44; Kalatiya 3:24) Irato ci Misiya i, saka dademaken ni Yihofa cingra ato nisawawaan ningra a paihekal to adihayay pakayniay ci Satanan ato mitowakangay a coyoh. * Mihaen ko demak ni Yihofa tada matatodongayto, samanen wa paikenen Ningra ci Yis ato mapasimalay a Krisciyang mipalaˈafo ci Satanan ato tatiihay a coyoh.​—Loma 16:20; Paˈarawan 17:14; 20:10.

4. Hano hamaan pakidem ko katalaw ita ci Akomaan hani?

⁴ Milengo ci Pitiro ci Akoma Satan “o miletohay a layong,” pangangan ci Yohani ci Satanan o “ˈoner” ato “kangic” sanay. (1 Pitiro 5:8; Paˈarawan 12:9) Kawra, hamaan pakidem ko katalaw ita ci Akomaan, samanen citolasay ko ˈicel ningra. (ˈOsien ko Yakop 4:7.) Ci Yihofa, ci Yis ato madimadiay a coyoh wa padama kitaanan. Tiˈeren ita ko sadama nangra, wa ngaˈay miconged to ˈada. Kawrira, kalimelaan ko kafanaˈ ita to caˈof no tolo a salicay: Hakowaay ko ˈicel ni Satan a mifiyor? Ciharatengay cingra tano maanan a pakayraan mifiyor kitaanan? O maanan a demak ko cowa mamadangal ni Satan? Wa kilimen ita ko caˈof noniya salicay, wa milengoho to o maanan ko mamananam no mita.

5, 6. Hano awaay ko cecacecay a mirikecay to ngangaˈay mifalic to pakayraan, a mirenec to saali no tamdamdaw hani?

⁵ Adihayay ko coyoh kalacafayay ci Satanan a mitowakang to Kawas. ˈAyaw no Taˈangayay Lenlen, mikayhidan ni Satan ko roma coyoh madadiˈi to fafahiyan no tamdaw. Tano tahapinangan a pakayraan ko pilengo no Fangcalay Cudad to pikapot noniya coyoh ci Satanan. Somowalay ko sinael to miasikan no wikol no kangic ko cecay no kalitolo a fuˈis, mifahekol i cikiw. (Satapangan 6:1-4; Yuta 6; Paˈarawan 12:3, 4) Tiya miliyas koniya coyoh to taˈangayay paro no lomaˈ no Kawas i, paihekalay cangra to mikapotay ci Satanan. Kawra, oniya mitowakangay a coyoh iraay ko lekakawa. Ano ci Satan iraay ko mahecaday o Hongti Kitakit no Kawas a lekakawa, o hongti noniya lekakawa cingra. Ci Satan itini kitiraan noˈadingo milekakawaay to tatiihay a coyoh, pafeli to fadangalan i tatiihay a coyoh, papikowan cangranan toniya hekal.​—Ifiso 6:12.

⁶ Pakaynian ni Satan i noˈadingoan a lekakawa ningra mionting ko mirikecay no tamdaw. Mikitini pikayhid ni Satan ci Yisan wa ngaˈay cipinang kita, Paˈarawan ni Satan ci Yis to “polong no kitakit no hekal,” sanay pasowal: “Papikowanen ako Kiso tonini a tadamaanay a kitakit a maemin. Nawhani o mapatorodayto i takowanan konini a maemin. Ano cima ko kangalayan ako a pafeli i, pafelien ako koya tamdaw.” (Luka 4:5, 6) O adihayay a mirikecay soˈlin misaˈicelay palemed to tamdaw, o roma ˈaˈideman soˈlinay ko falocoˈ sapadamaaw to tamdaw, kawra awaay ko cecacecay a mirikecay ato ˈaˈideman to ngangaˈay misongilaˈ mifalic to pakayraan, a mirenec to saali no tamdamdaw.​—ˈOlic 146:3, 4; Paˈarawan 12:12.

7. Ci Satan cowa ko pisaka dademak aca to mirikecay, samanayho misaka dademak to mararaway pidoyongan ato lekakawa no misasingdiay a miorat to tamdamdaw? (Nengnengen ko satapangan coka.)

⁷ Ci Satan ato tatiihay coyoh cowa ko pisaka  dademak aca to mirikecay, misaka dademakayho to mararaway pidoyongan ato lekakawa no misasingdiay a miorat to “polong no tamdaw i hekal.” (Paˈarawan 12:9) Misaka dademakan ni Satan ko mararaway pidoyongan miresap to pakayniay ci Yihofaan a kaniw. O roma, sapihimedaw ci Satan to ngangan no Kawas. (Yirimiya 23:26, 27) Telocto, o soˈlinay ko harateng a tamdaw midokoay ko niyah to Kawas sanay, ˈarawhan o midokoay to tatiihay a coyoh. (1 Korinto 10:20; 2 Korinto 11:13-15) Pakaynianho ni Satan i lekakawa no misasingdiay miresap to kaniw. Tinakoen, micangacang to hafay wa ira ko hemek sanay papiharateng to tamdaw ko lekakawa no misasingdiay. (Taneng 18:11) Pakasoˈlinay ko ˈalomanay tamdaw toniya kaniw, hakelong no ˈorip malakoliay no “hafay,” eca ka pihodop to Kawas. (Matay 6:24) Telocto, soˈlin na maolahay ko tamdaw to Kawas, o maolahay to hafay a falocoˈ, “miˈcoay” to maolahay to Kawas a falocoˈ.​—Matay 13:22; 1 Yohani 2:15, 16.

8, 9. (1) Mikiniti kita i pitowakang ni Atam, Ifa ato coyoh to Kawas a maˈoningay wa mananam ko tosa maanan a sapasifanaˈ hani? (2) Mafanaˈ kita to hakowaay ko ˈicel ni Satan a mifiyor, wa ira ko maanan a haepoc no mita hani?

⁸ Mikiniti kita i pitowakang ni Atam, Ifa ato coyoh to Kawas a maˈoningay wa mananam ko tosa kalimelaan a sapasifanaˈ. Saka cecay, wa misaˈosi kita madimadi ci Yihofaan, anca midama ci Satanan. (Matay 7:13) Saka tosa, ano tamdawto anca o coyoh, ano mikapot ci Satanan cowa ko mamilifok to tahadaˈocay a epoc. Ci Atam aci Ifa iraay ko toki patireng to ngaˈayay tatiihay palinian no niyah, oya mitowakangay a coyoh milifokay to fadangalan a mionting to mirikecay no tamdaw. (Satapangan 3:22) Kawraan, o sapafeli ni Satan a epoc tahadaˈoc, cowa ko papakalini to misadakan nangra a ˈicel.​—Yopu 21:7-17; Kalatiya 6:7, 8.

⁹ Mafanaˈ kita to hakowaay ko ˈicel ni Satan a mifiyor,wa ira ko maanan a haepoc no mita hani? Ano mafanaˈay to caˈof noniya salicay, wa ira ko matatodongay pinengneng no mita to mirikecay, papadama kitanan matongal ko fanekfek a mitosil. Tokel ni Yihofa kitaanan mikangodo to cifadangalay a mirikecay. (1 Pitiro 2:17) Ano cowa ka sasongtol ko sarikec no mirikecay ato palinian no Kawas, wa midofdof kita to sarikec. (Loma 13:1-4) Kawraan, wa mitafo kita to misatenokay, eca ka pidama to yofayof anca ˈaˈideman no mirikecay. (Yohani 17:15, 16; 18:36) O roma, mafanaˈay kita to sapihimedaw ci Satan to ngangan ni Yihofa, mipalak to ngangan Ningra, mihaenay makalimay kita sapadamaaw to tamdaw mafanaˈ to Kawas. Malitaˈangay kita malo Misawacayay Tamdaw ni Yihofa, misawacay to ngangan no Kawas. Mafanaˈay kita, o malifokay a sapalemed a maolah to Kawas ikakaay ko kaadihay to epoc no hafay ato dafong.​—Isaya 43:10; 1 Timoti 6:6-10.

10-12. (1) Na misangaˈay ci Satan to maanan a talakal, mikayhid to coyoh hani? (2) Mikitini no kakayhid no coyoh a demak wa mananam ita ko maanan?

¹⁰ Ciepocay ko pakayraan ni Satan a mifiyor to tamdaw, tinakoen saka dademakan ningra ko kalo a demak malo sapaririˈ a mikayhid to tamdaw midemak to tatiihay demak, saka dademakayho cingra to pakidemay sapalak pacieci to tamdaw.

¹¹ Haratengen hena, na misangaˈay ci Satan to talakal, malaˈosi ko pikayhid to ˈalomanay a coyoh. Maedeng halafinay cingra a mihapinang to coyoh, cipinangto toniya coyoh, kayhidento cangra a mihakelong cingranan. O roma a coyoh makayhiday, tayni i cikiw madadiˈi to fafahiyan, telocto mahofoc to mariˈangay a teloteloc. (Satapangan 6:1-4) Cowa ko malafoay aca a demak ko sapikayhid ni Satan to coyoh, pafeliayho to fadangalan no coyoh a mikowan to tamdaw. O nihalakaan ni Satan, o sapicongedaw to kasadak no ‘teloc no fafahiyan.’ (Satapangan 3:15) Ano samaanto i, mitefadan ni Yihofa ko Taˈangayay a Lenlen itiya, palakisaw to nihalakaan ni Satan ato tatiihay coyoh.

¹² Mikitini no kakayhid no coyoh a demak wa mananam ita ko maanan? O malafoay a demak ato misatakalaway a harateng taˈangayay ko pifiyor to tamdaw. Oya mikotoday ci Satanan a coyoh, na mihodopay to Kawas to walwalan a miheca, soˈlin ngaˈayay ko kitiraan nangra, kawra pakihater hananay ko mararaway a coos cilamit i falocoˈ. Mahecaday, o cecay Krisciyang pinaayto polo miheca a dademak i likakawa no Kawas, soˈlin itiniay makoracay noˈadingoan a kitiraan cingra, o cikaditay a coos wa cilamit i falocoˈ haratek. (1 Korinto 10:12) Mihaenay, wa padotoc kita mikinsa to falocoˈ no niyah, mifalah to malafoay a harateng ato misatakalaway a waywayan!​—Kalatiya 5:26; ˈosien ko Kolosay 3:5.

13. (1) O roma misangaˈan ni Satan a talakal o manan hani? (2) Sasamaan kita ngaˈ eca ka lefong i talakal hani?

¹³ O roma misangaˈan ni Satan a talakal o kafahekaˈ no tamdaw to misakawasay a ˈicel. Anini, cowa ko mararaway aca a pidoyongan ko sapikayhid ni Satan to tamdaw a maolah to demak no tatiihay coyoh, kala saka dademakan ningra ko lawla a milenaf to misakawasay a ˈicel. Tinakoen, o ika, tasalamaan no tingnaw misakapahay tono misakawasay a ˈicel. Sasamaan kita ngaˈ eca ka lefong i talakal hani? Itini pipiliˈ to salama, cowa ko ngangaˈay kita milongoc to mamihadak ko likakawa no Kawas to tahapinangan, pasifanaˈ to tamdaw to o maanan a salama ko ciepocay, o maanan a salama ko tatiihay. O papahatatanamen ita ko ngaˈayay falocoˈ no niyah, mafanaˈ mitoor to safalod no Fangcalay Cudad a mipiliˈ to salama. (Hipray 5:14) O roma, sowal no tarokos ci Pawlo, o olah ita to Kawas “aka kao misamangahay,”  saka dademaken ita koniya limoˈot wa ngaˈay inaneng ko misaˈosian. (Loma 12:9) Ngaˈayay licayen ita ko niyah: “O mipiliˈan ako a salama paihekalay to misamangahay ko niyah han? Ano mafanaˈ ko pacekiwan anca milisoˈan a tamdaw to mipiliˈan ita a salama, o misaka dademakay kako to sapasifanaˈ no Fangcalay Cudad wa saan cangra miharateng han? Ano saka dademaken ita ko mitenakan no niyah a soˈlinay kimad, wa madoloto a miliyas to talakal ni Satan.​—1 Yohani 3:18.

14. Wa samaan ci Satan tano sapalak a pacieci kitanan? Wa samaan kita miremo toniya sapalak?

¹⁴ Saka dademakayho ci Satan to pakidemay sapalak pacieci kitaanan ecato ka madimadi ci Yihofaan. Tinakoen, saka dademaken ningra ko mirikecay milalang to mitosilay a demak no mita, anca tano cafay matayal, cafay micudad a milikaf to pihakelongan ita ato pakayraan a maˈorip. (1 Pitiro 4:4) Mifiyoran ni Satan ko salawina ita, misawi kitaanan ecato pirienang to saˈopo. (Matay 10:36) Ano tahalifa kita to hatiniay pasangaray wa samaanto hani? Saka cecay, haratengen mamilood ci Satan kitaanan, miˈodis cingra kitaanan o kafanaˈanto ita a demak. (Paˈarawan 2:10; 12:17) Saka tosa, cacipinang kita to tatodong noniya pasangaray a demak. Sowal ni Satan, itini aca i kadepocan no tamdaw ngaˈ mihodopay to Kawas, ano tahalifa to sapalifet wa miliyas to Kawas sanay. (Yopu 1:9-11; 2:4, 5) Saka tolo, wa mitiˈer kita to ˈicel ni Yihofa a miremo to sapalifet, aka mapawan, cowa ko mamiliyas ci Yihofa kitaanan.​—Hipray 13:5.

15. Wa ngaˈay ci Satan pacieci to tamdaw mitoor to harateng ningra a midemak han? Tadtaden.

¹⁵ Awaay ko pakayraan ni Satan pacieci to tamdaw mitoor to harateng ningra a dademak. (Yakop 1:14) Anini, cowa ka fanaˈ ko ˈalomanay tamdaw to pahecaday to harateng ni Satan ko demak no niyah. Kawraan, ikor no minanam cangra to soˈlinay kimad, wa misaˈosi to mamihodop to Kawas, anca midama ci Satanan. (Dmak 3:17; 17:30) Ano saˈosien ita ko falocoˈ midofdof to araaw no Kawas, awa ko pakayraan ni Satan papisawad to madimadi no mita.​—Yopu 2:3; 27:5.

16, 17. (1) Iraayho ko maanan cowa ko mamadangal ni Satan ato tatiihay coyoh a demak? (2) Misamaanay hano cowa ko cacalemcem kita mihadak to nafalocoˈan a sowal i satolon?

¹⁶ Iraayho ko maanan cowa ko mamadangar ni Satan ato tatiihay coyoh a demak hani? Cowa, cowa ka somowal ko Fangcalay Cudad to mafanaˈay ci Satan ato tatiihay coyoh to nafalocoˈan a harateng no tamdaw, edeng ci Yihofa aci Yis ko ngaˈayay mihaen to demak. (1 Samuil 16:7; Marko 2:8) Ano mahaenay i, ano hadaken ita ko nafalocoˈan a harateng i satolon, wa calemcem kita to sasaka dademaken ni Akoma ato tatiihay coyoh ko matengilay a lalakaw miˈodis kitaanan han? Hamaan calemcem kita. Haratengen hena, wa maˈaraw ni Akoma ko kadademak ita i Kawas, matalawto a midemak han? Mahecaday onini, soˈlin matengilay ni Akoma ko satolon ita, wa kamayan a timolo kita a mihadak to sowal. Itini Fangcalay Cudad adihayay ko maˈoningay to taˈangayay ko ngiha no sikawdan no Kawas a mitolon, awaay ko sinael to paihekalay to calemcemay ko madimadiay a sikawdan to katengilan ni Akoma (1 Hongti 8:22, 23; Yohani 11:41, 42; Dmak 4:23, 24) Ano misaˈicel kita itini sasowalan ato waywayan pahecad to araaw no Kawas, wa ngaˈay pakasoˈlin to cowa ko hahayen ni Yihofa ci Akoma paira to tahadaˈocay a dokaˈ no mita.​—ˈOsien ko ˈOlic 34:7.

¹⁷ Pafeselen ita ko pinengneng to nisahalakaan ni Satan, kawra cowa ko mamatalaw cingranan. Iraay ko sadama ni Yihofa, soˈlin o cowa ka lefot a tamdaw wa ngaˈay pakalowid ci Satanan. (1 Yohani 2:14) Ano coˈayen ita ci Akoma, wa miliyas cingra kitaanan a milaliw. (Yakop 4:7; 1 Pitiro 5:9) Anini, o kaemangay tamdaw ko mikiriwiˈan ni Satan a miˈodis. O kaemangay tamdaw wa samaan ngaˈay macoˈay ko saˈodis ni Akoma hani? O dotoc a lalakaw wa milengo toniya salicay.