1. O Kimad no Kawas papaira to manan a sapadama kitanan?

CI YIHOFA o Satadamaanay a Singsi ita, padama kitanan misiˈayaw to maamaan a pasangar. (Isaya 30:20, 21) O Kimad Ningra mikayatay kitanan, “ta masongilaˈ a mapatala ko mamatayal no Kawas ta maedeng cangra a midemak to masamaamaanay a ngaˈayay a demak.” (2 Timoti 3:17) Miowingay ko tamdaw to ‘taneng no hekal’, kawra ano tooren ita ko Fangcalay Cudad a maˈorip i, mikikakaay ko nika citaneng i cangranan.​—1 Korinto 3:19; ˈOlic 119:97-100.

2. Oniya lalakaw mamitadtad to manan?

² O taneng no hekal miowingay to tamdaw papirenecay to coos no falocoˈ, mankora pasangaray kita micoˈay, madoloayto matiya o hekal a tamdaw ko demak. Orasaka patalipaˈelalay ko Fangcalay Cudad kitanan: “Pinaˈon kamo to sakaecaaw ka saˈfit a mapalit no awaay ko epoc a noharatengan a fanaˈ. O nano tatoˈasan a nika tatorotorodan a lekakawa ato lisin a demak no hekal konini.” (Kolosay 2:8) Onini lalakaw o mamitadtad to tosa mararaway a harateng to misamaanay misaˈfit to tamdaw, mamaˈarawho ita, to hano o maapaay han ko taneng no hekal, o taneng no Kawas mikikakaay to taneng no hekal.

3-4. Isaka 1920 mihecaan misatapang, itini i Padaka, samaanay ko noka falic no palinian no tamdaw hani?

³ Isalakatay no saka 20 hahekalan a Padaka, taˈangayay ko kafailc no palinian no ˈalomanay. Iti:yaho, edengan aca o mararamoday ngaˈ ngaˈayay a madadiˈi, hanaca cowa ka ngaˈay milengo  toniya demak i papotal. Kawra ikorto i, mifalahay ko ˈalomanay tamdaw toniya palinian, patelas sato ko waywayan.

⁴ Isaka 1920 mihecaan misatapang, polong a hekal mafiyoray no taˈangayay a noka falic. Sanay ko sowal no mikakingkiway tamdaw: “O ika, cohi, radiw, tawcikel ato kanpang, kowangkaw to sapahemekaw to ˈalomanay, sahtoay o madadiˈiyay ko lalangilan.” O sakakero no tamdaw itiya, maˈotimaˈotitay, o caˈedong kamotoˈkamotoˈay. Matiya to sapairasol no Fancalay Cudad, o tamdaw ikakaay ko ‘olah to lawla’.​—2 Timoti 3:4.

5. Isaka 1960 a mamihecaan, samaanay ko noka falic no palinian no polong a hekal hani?

⁵ Isaka 1960 a mamihecaan, pakayraan no malalikongay, tongsinlien, caho ka raramod a matatekoto a demak, adihay adihay. Aniniay a kamok maolahay masasowal to madadiˈiyay a demak. Toniya pina a 10 miheca, matiniay malafoay a waywayan pairaay to manan a teloc hani? Malengoay no cecay mitatiliday, samanen cowato pitoor ko tamdaw to fangcalay a palinian, mansa adihayay ko paliwasakay to paro no lomaˈ, o wamato anca o wina aca ko midipotay to wawa, madokaˈay ko falocoˈ, ato mahiyanayto to makakalonaay a kaacekan a lalakaw. O roma i, icowacowa iraay ko AIDS (Aicepin) ato hatiniay a midengaay a adada. O tatiihay a teloc ihkalay a misawacay, tada maapaay ko taneng no hekal.—2 Pitiro 2:19.

6. O palinian noni hekal malingaday ko kaperar, misamaanay hano mahemekay ci Satan minengneng hani?

⁶ O palinian no hekal malingaday ko kaperar. Mahemekay ci Satan minengneng to tamdaw patelas sa madadiˈi, misaloyaˈ to limasmas no raramod, maedeng lipahakay ci Satan. (Ifiso 2:2) O maˈodangay waywayan cowa aca pisaloyaˈ to sapafeli no Kawas a ˈicel no tamdaw ciwawa, mamalahdaw ko midaˈocay a ˈorip.​—1 Korinto 6:9, 10.

7-8. O palinian no Fangcalay Cudad to madadiˈiyay demak, hano pairaay to sanengseng no mita, soˈlinay ciepoc kitanan?

⁷ O romaroma tamdaw matawaay to makoracay palinian no Fangcalay Cudad, cowa ka tatodong ko palinian no Fangcalay Cudad sanay cangra. Mihaenay cangra misalalicayan: “Ano pafelian no Kawas ko tamdaw to sakadadiˈiyaw, hano kecengenho ko tamdaw a misalo toni saali hani?” Saka pihaen a milicay cangra, samanen ngaˈayay sao haratengay  saan ko tamdaw sanay. ˈArawhan cowa ka lecad ko pinengneng no Fangcalay Cudad. Pasifanaˈay ko Fangcalay Cudad papiˈimer to mararaway coos, hongaˈ sanengseng ko nika ˈorip no mita. (Kolosay 3:5) O sapatelong no Kawas ko raramod, ano madadiˈi ko mararamoday pairaay to lipahak. (1 Korinto 7:8, 9) Dengan o mararamoday ko ngangaˈay masalo to madadiˈiay, ho eca ka picada to kaadayayan a teloc.

⁸ Cowa ka lecad to taneng no hekal, o makoracay palinian no Fangcalay Cudad soˈlinay ciepoc to tamdaw. Sowal no Fangcalay Cudad, o madadiˈiyay no kalalaˈed no mararamoday pairaay to lipahak sanay. (Taneng 5:18, 19) Sowal no Fangcalay Cudad: “Kamo o mararamoday, kao fangcalay, makoracay ko falocoˈ namo a mararamod. Aka ka matiya o mafokilay to Kawas a roma a finacadan a pakonira to ˈanof no tireng a miolatek a mikalona.”​—1 Tisalonika 4:4, 5.

9. (1) Salakatay no saka 20 hahekalan, samaanay ci Yihofa padama to tamdaw Ningra, midoedo to Fangcalay Cudad a citaneng ko nikaˈorip? (2) Itini i saka 1 Yohani 2:15, 16 palimoˈotay kitanan to manan hani? (3) Pakayni i Loma 1:24-27, oha mamiliyas kita to manankaacekan a waywayan hani?

⁹ Salakatay no saka 20 hahekalan, o tamdaw ni Yihofa cowa ka malipalaw no ‘awaayto ko mangodongay a falocoˈ’ a tamdaw, padadotocay cangra midoedo to ˈakawangay a palinian ni Yihofa. (Ifiso 4:19) No Padaka Mikecolay 1926/5/15 sanay ko sowal: “Itini i haratengan ato waywayan oha mamitafo to makoracay, mangalefay ano kalacafay ko faˈinayan ato fafahiyan.” Ano masamaanto ko nika falic noni hekal, o midokoay ci Yihofaan a tamdaw oha mamidoedo to Kimad no Kawas a citaneng ko nikaˈorip. (ˈOsien ko 1 Yohani 2:15, 16.) Tada miakoˈiday kita to Kawas pakayniay i Kimad Ningra a mikayat kitanan! Miakoˈiday kita pakaynian ni Yihofa i mitepangan cudad no Fangcalay Cudad, itini i matatodongay a tatokian patalipaˈelal kitanan, ho caka mafiyor no malafoay a kaacekan a palinian no hekal tamdaw, masaˈfit no taneng no hekal. *—ˈOsien ko Loma 1:24-27.

10-11. Patalipaˈelalay ko Fangcalay Cudad kitanan, itini salikoray a romiˈad, samaanay ko kafalic no tamdaw hani?

¹⁰ Patalipaˈelalay ko Fangcalay Cudad kitanan, itini salikoray romiˈad, ‘misamacay maolah to niyah’ ko tamdaw sanay. (2 Timoti 3:1, 2) Anini, o misatekeday waywayan misaˈakawangan no tamdaw. O cecay hakacudad sanay ko sowal, itini i 1970 mamihecaan “pakowaday to niyah a cudad no hekal matongalay ko nika adihay”, pakalalokay kora cudad “mafanaˈ to o masamaanay tamdaw ko niyah, hamaan sapifalicaw to niyah” sanay. Patinakoen, sanay pasowal: “Edengan kiso ko samakapahay toniya hekal, kasemeran no tao, citodongay to kakaolahen no tamdaw.” Oniya tilid miowingay to misakareteng maolah to niyah a waywayan, ngaˈayay sano falocoˈan sa ato kahemekan no niyah a misaˈosi to demak sanay.

¹¹ Hato na matengilay ko hatiraay a sowal han? Ci Satan, mihaenay a miowing ci Ifaan, pasowal cingranan to “mamatiyato o Kawas kamo, maedeng kamo a mihapinang to ngaˈayay ato tatiihay.” (Satapangan 3:5) Anini, o ˈalomanay miharateng awaay ko cimacima to citatodongay pasowal cangranan to manan ko ngaˈayay manan ko tatiihay, ano o Kawasto cowa ko mamihaen sanay. Pakayni to kapinengneng nangra to raramod paihkalay to matiniay misatekeday to niyahan a waywayan.

12. Pakayni to mararamoday, miowingay ko taneng no hekal to masamaanay a harateng hani?

 ¹² O faˈinay ato fafahi makakangodo, mitoor to miketonan sowal to raramod sanay ko Fangcalay Cudad. Mamisetek to falocoˈ tahadaˈoc a malacafay, matiya Satapangan 2:24: “Liyasen no tamdaw ko wama ato wina ningra, malacecay ato fafahi ningra, malacecayto ko tireng nonini a tatosaay.” ˈArawhan, oya micadaay to taneng no hekal a tamdaw cowa ka hatira, o faˈinay ato fafahi o mamisamacay to saali no niyah sanay cangra. O cecay milengoay to malalikongay a cudad sanay ko sowal: “Iti:yaho miketon to sowal ko mararamoday ‘hakelong no ˈorip’ cowa ko mamalacinowas kita sanay. ˈArawhan nohatini ‘ano makakaolahho kita’, cowa ko mamalacinowas kita sanayto ko sowal.” O misakahmaw to raramod mipalakay to paro no lomaˈ, madokaˈ ko falocoˈ. O kapinengneng no hekal pakayni raramod tada maapaay.

13. Hano ˈinteh ci Yihofa to malataˈangay a tamdaw hani?

¹³ Sowal no Fangcalay Cudad: ‘ˈIntehay ci Yihofa to malataˈangay a tamdaw.’ (Taneng 16:5) Hano ˈinteh ci Yihofa to malataˈangay tamdaw hani? Samanen pakinali a misakareteng to niyah, malataˈangay a haratengan mahecaday ci Satanan. Haratengen hena, pakaynian ni Yihofa ci Yisan misangaˈ ko maamaan i paro no kakarayan, ˈarawhan tataˈongen ni Yis kako saan a miharateng ci Satan! (Matay 4:8, 9; Kolosay 1:15, 16) O matiniay malataˈangay a haratengan tada maapaay i noka pinengneng no Kawas!

14. Samaanay padama ko Loma 12:3 kitanan ira ko matatodongay noka pinengneng to niyahan?

¹⁴ Padamaay ko Fangcalay Cudad ira ko matatodongay noka pinengneng to niyahan. Sowal sa ci Yis: ‘Matiraen o niyah a maolah to tao.’ (Matay 19:19) Ano patatodongen a ciharateng to niyahan, misalo to saali no niyah cowa ko mararaway. Kawra ikakaay ko nika masaka limlaan ako to tao aka ka saan. Sowal no Fangcalay Cudad: “Ano o maamaanto a demak  i, aka kao misatekeday, aka kao mipasenengay ko demak namo. Kao misapoeneray ko falocoˈ namo. Ikakaay no mako ko tao.”—Filipi 2:3; ˈosien ko Loma 12:3.

15. O taneng no Fangcalay Cudad hano pairaay to soˈlinay a epoc i kitanan hani?

¹⁵ Anini, misao citanengay noni hekal matawaay to noka pinengneng no Fangcalay Cudad, ano ikakaay ko tao to niyahan ano han i, mamasamsam no tao sanay. Kawriraan, misatekeday a waywayan noni hekal pairaay to manan a telocan hani? Ano nengnengen iso, o misatekeday a tamdaw soˈlinay lipahak cangra han? Iraay ko rahekeray a paro no lomaˈ, iraay ko soˈlinay widang han? Iraay ko makedecay no kalalaˈed nangra ato Kawas han? Samaanay ko harateng no miso, mitiˈer to taneng no hekal anca taneng no Fangcalay Cudad, icowaay ko soˈlinay milifok to epoc hani?

16-17. Hano aakoˈiden ita ci Yihofa hani?

¹⁶ Oya mihakelongay to misao citanengay tamdaw noni hekal, malecaday o mafokilay to lalan a tamdaw milicayayto mafokilay to lalan a tamdaw to pakacowa a romakat. Sanay somowal ci Yis toya misao citanengay i lintad ningra, sowal sa: “O mapohaway a mikeriday cangra. Ano keriden no mapohaway ko mapohaway i, o mamatefad i refong a tatosa.” (Matay 15:14) O taneng no hekal o maapaay sanay ko pinengneng no Kawas.

¹⁷ Sapalimoˈot no Fangcalay Cudad ‘o pasifanaˈay, mirikecay, misalofay, sahtoay o ciepocay a maemin.’ (2 Timoti 3:16) Tada aakoˈiden ita ko likakawa ni Yihofa a midipot kitanan, hato cowato ka masaˈfit no taneng no hekal! (Ifiso 4:14) O sapasifanaˈ no Kawas mitongalay to ˈicel ita a mitafo to palinian no Fangcalay Cudad. Malayap ita ko sakayat no Fangcalay Cudad, ira ko soˈlinay taneng, tada o lipahakay a tamdaw kita!