1 Pakayni ˈOlic 5:4-6, samaanay ko pinengneng ni Yihofa to tatiihay demak hani?

TADA ˈINTEHAY ci Yihofa to kihcod tatiihay a demak. (ˈOsien ko ˈOlic 5:4-6.) O miˈodangay to kaemangay a waywayan, o kaˈintehan ni Yihofa, samanen o kaacekan a raraw konini. Kita o Misawacayay Tamdaw ni Yihofa, wa mitodong Cingranan a miˈinteh to hatiniay kaacekan a waywayan, cowa ko pakihateren ko hatiniay a raraw i kasakopang.​—Loma 12:9; Hipray 12:15, 16.

2-3. Misamaanay o miˈodangay to kaemangay, o misafelitay to Rikec ni Kristo?

² Ano samaanto, o pasemsemay to kaemangay a pakayraan i, sahto o pakidemay a raraw halo mitowakangay to Sarikec ni Kristo. (Kalatiya 6:2) Mahecad i saˈayaway a lalakaw, o Rikec ni Kristo mahawpay ko waywayan ato sasowalen ningra a sapasifanaˈ kitaanan, oniya rikec o olah ko taˈeneran, ato iraay ko malefotay a masadafdafay. Mitooray ko soˈlinay a Krisciyang to Rikec ni Kristo, mansa, ano micada to kaemangay i, wa paira cangra to olah ato rihaday. O miˈodangay to kaemangay a waywayan, tada o misaloay to coos no niyah, o misatekeday a awaywayan koni, cowa ko masadafdafay a waywayan, o hatiniay a demak wa palahdaw to rihadayay falocoˈ no kaemangay, hato awaay ko maolahay cangranan saan ko harateng.

³ Ka adayayan i, miˈodangay to kaemangay a demak, mifekaday icowacowa, o roma salikaka ita makariˈangay a madokaˈ. Misamaanay hani? O aniniay a hekal matomesay ko ‘mariˈangay a tamdaw ato misaˈfitay a tamdaw’, mitakaway cangra a  micomod i kasakopang. (2 Timoti 3:13) Roma sai, roma Krisciyang cowa pakaˈmet to mararaway a coos, midemak to miˈodangay to kaemangay a raraw. Dotoc mamilengo kita to, miˈodang to kaemangay hano o pakidemay a rawraw, ano iraay ko salikaka miˈodangay to kaemangay, wa sasamaan ko malohemay malitengay a misaysay toniya demak. Saikor, wa milengoho kita, sasamaan midipot to wawa ko wama wina a tamdaw. *

4-5. O miˈodangay to kaemangay hano pakidemay a raraw hani?

⁴ O falocoˈ no mikaˈodangan a kaemangay, halafinay ko adada nangra, coko tireng aca ko adadaay, o falocoˈ nangra madokaˈay, paro no lomaˈ ato salikaka mahecaday a madokaˈ. O miˈodangay to kaemangay a waywayan, tada o pakidemay a raraw kora.

⁵ O pidokaˈ to mikaˈodangan a kaemangay: * Oniya raraw pairaay to taˈangayay a adada ato semsem no falocoˈ. Dotoc a lipay a lalakaw wa mitadtad to miˈodangay to kaemangay a tamdaw, hano taˈangayay ko pidokaˈ hani. Misaˈfitay cangra milipalaw to wawa, palahdaw to rihaday no falocoˈ no wawa cidangocto ko hakelong no kaˈorip nangra. Mihaenay i, sasongilaˈen ita midipot ko wawa, sasayaren ato padamaen koya madokaˈay a tamdaw.​—1 Tisalonika 5:14.

6-7. (1) O miˈodangay to kaemangay, hano o mipalakay to ngangan no kasakopang hani? (2) O miˈodangay to kaemangay a tamdaw, hano mamicada to sasayfang no mirikecay no hekal hani?

⁶ O pidokaˈ to kasakopang: Ano ira ko miˈodangay to kaemangay i kasakopang, wa mipalak to ngangan no kasakopang. (Matay 5:16; 1 Pitiro 2:12) Pakayni i madimadiay a Krisciyang tada cowa ko masadafdafay konini! (Yuta 3) O midemakay to hatiniay a raraw a tamdaw mipalakay to ngangan no kasakopang, ano eca ka pasasiyor cangra, cowa ko mamihai kita materek cangra i kasakopang.

⁷ O miˈodangay to kaemangay o misafelitay to holic no hekal a waywayan: O mamidofdof ko Krisciyang to “mikowanay to kitakit”, mihaenay o mamidofdof kita to holic no hekal. (Loma 13:1) Ano ira ko salikaka midemakay to miˈodangay to kaemangay a tatiihay demak, o misafelitay to holic no hekal konini . (Nengnengen ko Dmak 25:8.) Soˈlin awaay ko fadangalan no malohemay malitengay a misayfang to mararaway tamdaw, kawra cowa ko papaˈading cangranan, o papaikenen ko mikowanay a misayfang cangranan. (Loma 13:4) O mamicada to tatiihay a teloc no niyah ko mararaway tamdaw.​—Kalatiya 6:7.

8. Ano midokaˈ ko tamdaw to tao, samanay ko pinengneng ni Yihofa hani?

⁸ O miˈodangay to kaemangay o pakararaway ci Yihofaan a waywayan: Ano midokaˈ ko tamdaw to tao, o pakararaway ci Yihofaan. (Satapangan 39:9) Tooren ko Rikec ni Mosi, miˈafas anca misaˈfit ko tamdaw to finawlan, o ‘pakararaway ci Yihofaan, midemakay to cowa ka madimadi a demak’. (Lifi 6:2-4) Ano miˈodang ko salikaka to kaemangay, miˈafas to rihaday no wawa, mangalefay o cowa ka madimadi to Kawas. Oniya tamdaw pakaditay to fangcalay ngangan ni Yihofa, pakidemay ko pakararaw to Kawas, o mamicada to sasawkit.

9. Pakayni i miˈodangay to kaemangay a demak, mihadakay ko likakawa no Kawas to manan a lalakaw hani? Misamaanay?

 ⁹ O likakawa ni Yihofa mihadakay to misalalangiay to Fangcalay Cudad a lalakaw, tinakoen, na milengoay ko Mikecolay ato Katalipaˈelal!, sasamaan mihinom to mikaˈodangan a tamdaw, o roma tamdaw samaan padama ato pakalalok cangranan, halo wama wina sasamaan midipot to wawa. O likakawa no Kawas pafeliay to malohemay malitengay to mikitiniay Fangcalay Cudad a sakayat ato sapahatatanam, pasifanaˈ cangranan samaan misaysay to miˈodangay to kaemangay a demak. Roma i, pakayni sapitooraw to saali no Rikec ni Kristo ko pisaysay no malohemay malitengay, o likakawa ni Yihofa wa padotoc a ciharateng sasamaan misaysay to hatiniay a demak.

10. Ano misaysay ko malohemay malitengay to pakidemay ko raraw a demak i, o haharateng nangra ato sasimsimen ko maanan hani?

¹⁰ Ano misaysay ko malohemay malitengay to pakidemay ko raraw a demak i, o haharateng nangra a mitoor ko Rikec ni Kristo, tano sidaˈitay ato masadafdafay a pakayraan micada to salikaka. Mihaenay, ano mafanaˈ ko malohemay malitengay to iraay ko midemakay to pakidemay raraw a tamdaw i, mamisongilaˈ a misimsim. Salakatay haharatengen nangra o sapaˈadingaw to fangcalay ngangan no Kawas. (Lifi 22:31, 32; Matay 6:9) Wa midipotho cangra to kalalaˈed no salikaka aci Yihofa, hanaca makalim a padama to mikaˈodangan a tamdaw.

11-12. Pakayni i Yakop 5:14, 15 sinael, sasaˈicelen no malohemay malitengay midemak to maanan hani?

¹¹ Ano o salikaka kora mararaway tamdaw, sasaˈicelen no malohemay malitengay a padama a mitapid to kalalaˈed ningra aci Yihofaan. (ˈOsien ko Yakop 5:14, 15.) Ano eca ka pakaˈmet ko Krisciyang to mararaway a coos midemak to taˈangayay raraw, paihkalay konini to tatiihay ko kalalaˈed ningra aci Yihofaan, malecaday o pakidemay ko adada. * Malecaday o ising ko malohemay malitengay, wa misaˈicel a padama toniya ‘adadaay a tamdaw’ patikol a ngaˈay. Ano soˈlin a pasasiyor ko mararaway tamdaw, mikitini i Fangcalay Cudad ko malohemay malitengay misadak to salimoˈot, wa ngaˈay padama cingranan miliyaw a ngaˈay ko kalalaˈed ato Kawas.​—Dmak 3:19; 2 Korinto 2:5-10.

¹² Tada aretengay ko ˈinorong no malohemay malitengay, wa misongilaˈ a midimokos to patorodan no Kawas cangranan a masafelaway siri. (1 Pitiro 5:1-3) O karihadayan no salikaka a kitiraan ko kasakopang, mihaenay ano mafanaˈ to iraay ko midemakay to pakidemay a raraw, mahawpay ko miˈodangay to kaemangay, wa tangsol ko malohemay malitengay a misaysay. Itini satapangan no  saka 13,  15,   17 fatac mihadakay to pina salicay, wa hacecayen ita a milengo.

13-14. Ano ira ko mifanaˈay to miˈodangay to kaemangay a demak, o mamidofdof ko malohemay malitengay to milingatay a holicno hekal han? Tadtaden hena.

 ¹³ Ano ira ko mifanaˈay to miˈodangay to kaemangay a demak, o mamidofdof ko malohemay malitengay to milingatay a holic no hekal han? Hai. Ano ira ko hatiniay a holic o dadofdofen. (Loma 13:1) O hatiniay a holic cowa pisafelit to palinian no Kawas. (Dmak 5:28, 29) Mihaenay, ano ira ko mifanaˈay to miˈodangay to kaemangay a demak, tatangsol cangra milicay to Fenpo cipinang to sasamaan mitoor to holic a mifanaˈ to dimeng.

¹⁴ O fafanaˈen no malohemay malitengay ko mikaˈodangan, ato wama wina ningra anca o mafanaˈay toni demak a tamdaw, wa ngaˈay cangra mipadimeng. Ano o salikaka kora mararaway, mamafanaˈto ko ˈalomanay tamdaw,  wa samaanto hani? Wa calemcem ko Krisciyang to mamipalak to ngangan ni Yihofa a eca ka padimeng han? Cowa ko cacalemcem cangra, samanen o mipalakay to ngangan no Kawas oyaan mararaway a tamdaw.

15. Tooren ko saka 1 Timoti 5:19, ˈayaw no mamisawkit a miiing ko malohemay malitengay, hano misaali to tatosaay a misawacayay tamdaw hani?

 ¹⁵ ˈAyaw no mamisawkit a miiing ko malohemay malitengay, hano misaali to tatosaay a misawacayay tamdaw hani? Oniya saali mitooray to masadafdafay a palinian no Fangcalay Cudad. Ano eca pihai koya miekoan a tamdaw to raraw, misaaliay to tatosa tamdaw misawacay, mihaen ngaˈ misawkit a miiing ko malohemay malitengay. (Limoˈot 19:15; Matay 18:16; ˈosien ko 1 Timoti 5:19.) Soˈlin awa ko tatosaay misawacayay tamdaw, o malohemay malitengay anca roma tamdaw wa ngaˈay padimengen ko hatiniay mararaway a waywayan.

16. Ano mafanaˈ ko malohemay malitengay iraay ko salikaka miˈodangay to kaemangay, wa samaan ko hademak nangra hani?

¹⁶ Ano mafanaˈ ko malohemay malitengay iraay ko salikaka miˈodangay to kaemangay, wa midofdof to saˈosi no holic, dotoc wa mitoor to safalod no Fangcalay Cudad a mitiyawca. Ano eca pihai ko miekoan a tamdaw to raraw, tatengilen no malohemay malitengay ko sowal no misawacayay tamdaw. Ano tatosaay ko misawacayay tamdaw, o cecay o mifanaˈay, o roma ngaˈayay misawacay anca mafanaˈay to na midemakay koniya miekoan to malecaday a raraw, papatireng ko malohemay malitengay to misawkitay a iingkay. * Soˈlin awa ko saka tosa misawacayay tamdaw, misakaniway koya mifanaˈay tamdaw cowa kasaan. Soˈlin awa ko tatosaay misawacayay tamdaw eca kangaˈay patireng to misawkitay a iingkay, haharatengen no malohemay malitengay, iraay ko pakidemay ko raraw a tamdaw alatek, o tataˈangay ko pidokaˈ to tao. Mihaenay, papadotoc ko malohemay malitengay padama to mikaˈodangan a tamdaw, wa misinanotho toya miˈodangay to kaemangay a tamdaw, ho madipot ko kasakopang eca ka tahacada to katalawan.​—Dmak 20:28.

17-18. O maanan ko ˈinorong no misawkitay a iingkay?

 ¹⁷ O misawkitay a iingkay iraay ko maanan a ˈinorong? Oniya iingkay iraay ko ‘misawkit’ sanay a tatodong, o cangra ko misaˈosi to sasayfangen no mirikecay no hekal, cowa ka saan. Wa paikenen nangra ko mirikecay no hekal misaˈosi to sasamaan misayfang toya miˈodangay a tamdaw, cowa ko mamicapid ko malohemay malitengay. (Loma 13:2-4; Titus 3:1) O ˈinorong no malohemay malitengay, wa misaˈosi toniya mararaway tamdaw ngaˈayho materek i kasakopang no Krisciyang hokira.

¹⁸ O kaciharatengan no misawkitay a iingkay ko kalalaˈed no mararaway tamdaw aci Yihofa, ato kalalaˈed no salikaka. Wa tooren nangra ko safalod no Fangcalay Cudad mihapinang to pasasiyoray koniya miˈodangay to kaemangay a tamdaw hokira. Ano eca pasasiyor koniya tamdaw o mamafalah, wa fanaˈen nangra ko kasakopang cowato ko Misawcayay Tamdaw ni Yihofa cingra. (1 Korinto 5:11-13) Ano pasasiyor koniya mararaway, wa ngaˈay materek i kasakopang no Krisciyang, kawra fafanaˈen no malohemay malitengay koniya tamdaw, awato ko tatodong ningra i kasakopang malo dama sikawdan anca malohemay malitengay. Roma i, pakayni midipot to wawa i kasakopang, o malohemay malitengay wa itini tekedan patalipaˈelal to iraay ko kaemangay a wama wina, ano ira koya miˈodangay a tamdaw i, tongalen  ko pisinanot to wawa. Nikawrira, cowa ko ngangaˈay mihadak to o cima ko mikaˈodangan.

 19-22. Sasamaan ko wama wina midipot to wawa? (Nengnengen ko papotalay coka.)

¹⁹ Midipot to wawa o nima a ˈinorong hani? Sakakaay ono wama wina a ˈinorong. * Sowal no Fangcalay Cudad, o wawa ko ‘sapafeli ni Yihofa a hafay’, o kalimlaan a sapatelong no Kawas. (ˈOlic 127:3) Mihaenay, iraay ko ˈinorong no wama wina misongilaˈ a midipot to wawa. Sasamaan ko hademak no wama wina hani?

²⁰ Salakat, cacipinang ko wama wina samaan midipot to wawa ho eca ka makaˈodang. O mamafanaˈ cangra masamanay a tamdaw ko mikaˈodanagay to kaemangay, ato o maanan a pakayraan ko sapilipalaw nangra. O mamisinanot ko wama wina to kihcod a katalawan. (Taneng 22:3; 24:3) Haharatengen, ˈalomanay miˈodangay to kaemangay a tamdaw, oya kafanaˈan ato pakasoˈlinan no wawa a tamdaw.

²¹ Saka tosa, ceriden masasowal to wawa. (Limoˈot 6:6, 7) Sinanoten no wama wina mitengil to sowal no wawa. (Yakop 1:19) O mikaˈodangan a wawa cowa ka kahi pasowal to malifaay a demak, calemcemay cangra awa ko pakasoˈlinay cangranan, anca paˈangian no miˈodangay a tamdaw cangra, matalawayto a pasowal. Ano mahapinang no wama wina cowa ka lecad ko waywayan no wawa, damsayen a milicay to mifekaday ko maanan a demak, dotoc mihadidi a mitengil to sapacaˈof nangra.

²² Saka tolo, pasifanaˈen ko wawa. Tooren no wama wina ko mihecaan no wawa a pasifanaˈ to madadiˈiyay a sifanaˈ. Roma i, pasifanaˈen ko wawa, ano ira ko patelasay mikama to tireng nangra, sasamaan ko hasowal ato hademak. Kalasaka dademaken ko likakawa no Kawas a lalakaw, minanam to sasamaan midipot to wawa.—Nengnengen ko sapatongal lalakaw “ Kalacafayen ko Wawa Iso a Minanam.”

23. (1) Samanay ko pinengneng no Misawacayay Tamdaw ni Yihofa to miˈodangay to kaemangay a waywayan hani? (2) O dotoc a lalakaw wa milengo to maanan a salicay?

²³ Miharateng ko Misawacayay Tamdaw ni Yihofa, miˈodangay to kaemangay o pakidemay a raraw kora, tada kaacekan a waywayan. Midofdof kita to Rikec ni Kristo, cowa ko papaˈading to miˈodangay to kaemangay a tamdaw. Roma i, sasamaan kita padama to mikaˈodangan hani? Dotoc a lalakaw wa milengo toniya salicay.