“NGAˈAYHO! Ngaˈayho kiso han?”

Marariday kita tanoniya sowal paratoh to tamdaw, mimamet to kamay anca matatakec. Soˈlin cowa ka hahecad ko pinangan ato paratoh no kasa niyaroˈ, kawraan mahecaday ko pakayraan a paratoh. Soˈlinay i, ano caka paratoh to tamdaw, o awaay ko ngodo ato olah.

Cowa ka saheto sa ko tamdaw, makahi talaˈayaw paratoh to tao, o roma tamdaw kalingodoay, anca awaay ko timolo mihaen. Harateng no roma tamdaw, pasangaray pasayra i cowa ka hecad ko finacadan, serangawan, ato saaroˈan a tamdaw miparatoh. Soˈlin mahaen, micerid a paratoh wa ira ko ngaˈayay a minaroˈan alatek.

Mihaen ko harateng iso alatek: “Paratoh to tamdaw ira ko maanan a epoc hani? Pakayni piparatoh, mikitini Kimad no Kawas, wa mananam ita ko maanan hani?”

Ci Kornilius, o saka cecay cowaho picada to kerit, mikapotayto kasakopang no Krisciyang a ˈlafang a tamdaw, mahemekay ci Pitiro a militemoh cingranan, saan ko sowal: “Caay ko misakakinihay ko Kawas.” (Dmak 10:34) Ikorto masowalay ni Pitiro, tokel no Kawas “mangalay Cingra to sakasasiyoraw no falocoˈno tamdaw a maemin a miliyas to raraw.” (2 Pitiro 3:9) Ano miˈosi kita toniya sinael i, o pacekiwan tamdaw ko maharatengay alatek, kawra palimoˈotay ci Pitiro to Krisciyang saan: ‘Kangodoen ko masakenaay a tamdaw. Kaolahen ko kasacefang no salikaka.’ (1 Pitiro 2:17) Mihaenay, pakayni caka hecad ko finacadan, serangawan, ato lalengawan a tamdaw, hemeken a militemoh, talaˈayaw a paratoh cangranan, mihaen o paihekalay to olah ato pikangodo cangranan.

O tarokos ci Pawlo pakalalokay to kasakopangay a Krisciyang, makaciharateng a paratoh, sanay cingra: “Kasasilitemoh kamo a mihamham a matiya o pihamham ni Kristo i tamowanan.” (Loma 15:7) Itini tikami ni Pawlo mikiriwiˈay masowal ni Pawlo ko ‘patanektekay’ cingranan a salikaka. Anini, ikakaay ko saali no mita to saka cecay hahekalan a Krisciyang to sapaˈicel, samanen matongalay ko piˈodis ni Satan to finawlan no Kawas.​—Kolosay 4:11; Paˈarawan 12:12, 17.

O laenoay tinakoan no Fangcalay Cudad, papadama kitaanan cipinang, ano paratoh o mahemekay militemoh saan ko piharateng no tamdaw, adihayay ko epoc.

ˈAyaw no linahen no Kawas ko ˈorip no wawa Ningra, patayra itiyad ni Mariya i, miocoray to coyoh miˈaraw ci Mariyaan, saan ko sowal cingranan: “Malemeday a fafahiyan, ngaˈayho. Mikapot [ci Yihofa] i tisowanan.” Calemcemay ci Mariya, samanen cowa ka fanaˈcingra, hano pasowal ko coyoh cingranan. Padotocay ko coyoh pasowal: “Mariyaaw, aka ka talaw, nawhani tada o kaolahan no Kawas kiso.” Dotoc, mitadtadan no coyoh ci Mariya, papalaˈosien no Kawas ko araaw, wa mahofoc ci Mariya ci Misiyaan. Maherek mitengil, malahedaway ko calemcem no falocoˈni Mariya, misapoeneray to falocoˈa somowal: “O matayalay [ni Yihofa] a fafahiyan kako. Nanay, mato sowal iso a malaheci i takowanan konini a demak.”​—Luka 1:26-38.

Mitaypiyaway to Kawas koniya coyoh a palihaf, o kalikoan a demak konini, samanen o papalihaf cingra to cowa ka lefot a tamdaw, o patefaday to saaroˈan cato ka pidemak cowa ka saan a miharateng cingra, damsayay a paratoh ci Mariyaan. O maanan ko mananamay ita hani? O tatalaˈayaw kita a miratoh ato pakalalok to tao. Kamotoˈay a sowal, wa ngaˈay patanektek to tamdaw, pasoˈlin to masa lalomaˈay no taˈangayay paro no lomaˈno Kawas, ko niyah saan cangra miharateng.

Adihayay ko kafanaˈan ni Pawlo a Krisciyang i Aciya ato Iwropa, itini tikami paratohay to papina salikaka. Tinakoen itini Loma saka 16 fedengan, miratohan  ni Pawlo ci Foypi, pangangan cingranan to ‘fafahiyan salikaka ako’, halo pasowal to faˈinayan salikaka: “Ono mitooray to Kawas a falocoˈko falocoˈnamo a mihamham i cingraan. Ano o maan ko kacangoˈotan ningra i, padangen cingra.” Paratohan ni Pawlo ci Priskila aci Akuila, somowal to miakoˈiday ko niyah cangranan, “halo polong no saˈopo no mitooray a roma a finacadan a miahowid i cangraan.” Itini paratohan ni Pawlo a tamdaw, mahaopay ko cowa ka rarid matengil ita a ngangan, tinakoen oya “kaolahan ako a tamdaw ci Ipanitus”, oya marorayay i tatapangan ci “Trifaina aci Trifosa”. Mahapinangay ita, makahiay ci Pawlo a miratoh to tao.​—Loma 16:1-16.

Oya tahacadaay to saratoh a tamdaw maedeng mahemekay a miharateng ci Pawlo cangraanan, hanaca o hatiniay a piratoh matongalay ko kaolah nangra ci Pawloan ato salikaka. Ano matengil no romaroma Krisciyang ko hatiniay nai falocoˈay a piratoh i, taˈangayay ko pakalalok ato matongal ko tanektek i pihakelongan. O piratoh paihekalay to kaciharateng ato pipakahemek ita to roma tamdaw, hanaca micowatay to makelecay i kalalaˈed no sikawdan no Kawas, mitongal to kalawidang no salikaka.

Tiya tahira i Putiuliay a minato, mamilingad ci Pawlo tayra i Loma i, nai kaˈamisay a salikaka tayra minengneng cingraan. Maˈaraw ni Pawlo cangra naira:ay, “mapaˈicel ko falocoˈningra, kansiya sa cingra to Kawas.” (Dmak 28:13-15) Nolatekay, masedi kita anca mikawing to kamay a paratoh, wa ngaˈay paˈicel to matoleday a tamdaw miliyaw a tanektek.

Isaka cecay hahekalan, romaroma Krisciyang cowa piliyas to hekal, maˈodangay i noˈadingoan a demak. (Yakop 4:4) Mihaenay, nisawawaan ci Yakop maedesay a mirikec cangranan. Kawraan, nengnengen ko tikami ni Yakop mansanay ko sowal ningra.

Yakop 1:1 sanay: “Ngaˈayho ko namo o maliwasakay icowacowa no hekal a finawlan no Kawas. Ci Yakop kako, o koli no Kawas ato Tapang.” Isatapangan no tikami misapoeneray mihayi ci Yakop o niyah ato salikaka sahetoay o koli no Kawas, nai falocoˈay miratoh cangraanan, mihaenay wa madolo cangra a micada to rikec no tikami. Mahecaday, ano milengo to kalimelaan a demak i, misapoener miratoh to tao taˈangayay ko sapadama.

Micerid paratoh ira ko maanan a epoc hani? O kamotoˈay soˈlinay a piratoh wa ngaˈay paihekal to kaciharateng no mita, taˈangayay ko milingat to tamdaw. (Matay 22:39) Itini i Aielan, o cecay fafahiyan salikaka mamisatapang ko saˈopo i, caloh sanay micomod i kasaˈopoan. Itiya, o cecay faˈinayan salikaka pasayraay cingranan a masedi, sanay pasowal: “Ngaˈayho kiso, mahemekay maˈaraw kiso.” Cowa pacaˈof koya fafahiyan salikaka, tangsol sanay a maroˈ.

Ikor no pina lipay, pasowalay koniya salikaka tora faˈinayan salikaka, matoleday cingra itiya, cowa saka hadakaw. Sanay cingra: “Toya dadaya, cowa ka kapah ko falocoˈako, hato cowa saka lingadaw misaˈopo. Mapawanay ko kimad no saˈopo, kawra maharatengayho ko picada iso takowanan, o piratoh iso tada padihkoay takowanan, koˈidayto kiso.”

Cowa ka harateng noya salikaka, o piratoh taˈangayay ko epoc. Sanay ko sowal ningra: “Pasowalay koya fafahiyan salikaka takowanan, soˈlin o kantangay a piratoh ako, taˈangayay ko epoc cingraanan. Mahemekay kako mihaen ko demak itiya, palipahakay konini takowanan!”

Sanay ko mitilidan ni Solomon: ‘Kosamen ko kakaenen i fafekang no nanom, noikor wa ira ko sapatodong.’ (Patnakay 11:1) Micerid kita miratoh to tamdaw, mangalef ko piratoh to salikaka, mihaen to demak, wa matongal ko ngaˈayay a kalawidang to salikaka. Mihaenay, aka a mapawan, micerid a paratoh, wa ira ko taˈangayay a epoc.