1. O maanan a lalangian ko saka hemek no mita hani?

MAHEMEKAY kita pakaˈaraw to katongal no finawlan ni Yihofa. Lalomiheca, mataˈlifay ko 1,000 ˈofad ko pacekiwan no Misawacayay Tamdaw ni Yihofa. Itiniay mahapinang, pataengaday ko sikawdan no Kawas to likat nangra! Roma i, masaˈofaday maolahay to Fangcalay Cudad a tamdaw, mirienangay to Piharatengan to Kapatay ni Yis a Saˈopo. Mikitini saˈopo mahapinangay nangra, o sapatefoc o sapaihekal no Kawas to ciolahay falocoˈ.—1 Yohani 4:9.

2, 3. (1) Soˈlin masiˈayaw ita ko maanan a pasangar, kamayan ‘mahecad o likat pataengad i ˈaˈayaw no tamdamdaw’ hani? (2) Oniya lalakaw wa milengo to maanan?

² Anini, soˈlin cowa ka hahecad ko sowal no finawlan ni Yihofa, kamayanay makelec a malacecay pakahemek ci Yihofaan. (Paˈarawan 7:9) Ano o maanto ko sowal ita, icowa ko kitiraan, wa ngaˈay ‘mahecad o likat pataengad i ˈaˈayaw no tamdamdaw.’—Filipi 2:15.

 ³ Misarocod kita a mitosil, micowat to kakelec, padotoc a mikecol, wa ngaˈay paˈdil ci Yihofaan. Oniya lalakaw wa milengo, wa ngaˈay kita misamaan pataengad to likat no niyah i ˈaˈayaw no tamdamdaw.​—ˈOsien ko Matay 5:14-16.

4, 5. (1) Ano mitosil kita i, samaan ko demak ngaˈay pataengad to likat no niyah hani? (2) Mitosil kita damsay ko waywayan, wa paira to maanan a ngaˈayay minaroˈan hani? (Nengnengen ko satapangan coka.)

⁴ Itini Mikecolay 1925/6/1 (no Padaka) lalakaw, “O Likat i Toˈman”, milengoay: “Edeng misaˈicel ko tamdaw pataengad to likat no niyah . . . ano eca i, awa ko pakayraan a madimadi to Tatapangan i salikoray romiˈad.” Sanay midotoc ko sowal no lalakaw: “Oha mamilasil cingra to ngaˈayay lihaf i kalo a kitakit kasafinacadan, romakat i ˈodingaray a lalan.” Mihaenay, sapataengadaw to likat no niyah a pakayraan, o mamilasil to ngaˈayay lihaf ato padama to tamdaw malo Krisciyang. (Matay 28:19, 20) O roma pakayraan tano ngaˈayay waywayan a paˈdil ci Yihofaan. Ano mitosil i, o cilomaˈay ato i lalanay tamdaw mihapinangay kitaanan, mikitini matawaay pising no mita, wa mahapinang to masamaanay a tamdaw kita, ato o masamaanay a Kawas ko midokoan no mita.

⁵ Pasowalan ni Yis ko nisawawaan: “Ano icowaay a lomaˈ ko nicomodan namo a milisoˈ i, ngaˈayho han koya lomaˈ.” (Matay 10:12) Itini pitosilan ni Yis ato tarokos a kilac, mihamhamay ko tamdaw to kafahalan a tamdaw, tayni i lomaˈ no niyah, anini adihayay pala awaayto ko mahaenay a nanaman. Kawra, tano damsayay, ngaˈayay a waywayan ko pitadtad iso to araaw, makahiyay a micada ko cilomaˈay, eca ka mapiliˈ mitengil. Itiniay kaˈalomanan misawacay a salikaka mihaiyay tonini, masedi ko pising ngaˈayay masasowal to tamdaw. Mahapinangay ita halatek tano hatiniay pakayraan ko pisawacay ita, ano matawa ko pising, madaˈmaˈ ko sowal, ngaˈayay ko picada no tamdaw to palilaman a cudad, makahiyay a malalengo kitaanan.

6. O cecay matoˈasay mararamoday samaanay malalok a mitosil hani?

⁶ Itini i Ikok, cecay matoˈasay mararamoday tatiihay ko tireng, cowa ka ngaˈay pakalomalomaˈ a mitosil, misaˈosiay cangra itini kaˈayaw no lomaˈ pataengad to likat no niyah. Itiniay i ngata no picudadan ko kitiraan nangra, ano militemoh ko wama wina to wawa panokay i, mitelian nangra ko kaolahan no wama wina a cudad i cokowi. ˈAlomanay ko mialaay to Salicay no Kapah—Iraay ko Ciepocay a Caˈof, saka 1 ato saka 2 a cudad, ato roma kihepicay cudad. O cecay misakafahay fafahiyan salikaka, mahecaday ko kasakopang toniya matoˈasay mararamoday, ikor kalacafayay cangranan i kaˈayaw no lomaˈ a mitosil. O ngaˈayay waywayan noniya salikaka ato kalim sapadamaaw to tamdaw a harateng noniya matoˈasay mararamoday, masolotay ko cecay tamdaw makahi a minanam to Fangcalay Cudad.

7. Sasamaanen iso padama ko malinahay tayni kitakit no miso a tamdaw hani?

⁷ Lalomaˈ no pina miheca, adihayay ko miliyasay to pades a tamdaw malinahay i roma kitakit. Samaanay kita padama cangranan mafanaˈ ci Yihofaan ato araaw Ningra hani? Isalakat ngaˈay kita minanam to ngaˈayho, sanay a sowal nangra. JW Language o ngaˈayay saka dademaken a lalosidan. Ano mafanaˈ kita to kamotoˈay a sowal, wa mifekad ko kalim nangra sakafanaˈaw halatek, wa ngaˈayto siwkayen to nangra a sowal a ika ato cudad i jw.org a wangcan.​—Limoˈot 10:19.

8, 9. (1) Itini i Mitosilay ato Nikaˈorip a Saˈopo, mananamay ita ko maanan hani? (2) O wama wina a tamdaw sasamaan padama to wawa fafanekfek pacaˈof i saˈopo hani?

⁸ Sidaˈitay ci Yihofa, misaday to Mitosilay ato Nikaˈorip a Saˈopo, padama kitaanan macakat i  mitosilay a demak. Itini saˈopo mananamay ita ko adihayay ciepocay sapaini, saka ngaˈay no mita itini pilisoˈ ato pipacekiw a matongal ko pakasoˈlin.

⁹ Maˈaraway no ˈalomanay satapangayho mirienang to saˈopo a tamdaw, halo fanekfekay ko wawa no Misawacayay Tamdaw ni Yihofa pacaˈof i saˈopo. Mihaenay, malo wama winaay, pasifanaˈen ko wawa tano niyah a harateng a pacaˈof, ho mapataengad ko likat nangra. Latekay, o kantangay, nai falocoˈay a caˈof no wawa, mitemeray to falocoˈ no tamdaw a micada to soˈlinay kimad.​—1 Korinto 14:25.

10. O pakalomaˈay pidoko samaanay micowat to makelecay no paro no lomaˈ hani?

¹⁰ O roma sapataengad to likat no niyah a pakayraan i, i lomaˈ ato kasakopang micowat to makelecay. Wa samaan ko demak no wama wina hani? Limasmasen ko masaˈosiay a toki mirienang to pakalomaˈay midoko. Adihayay paro no lomaˈ mipiliˈay to cecay toki to folafoladan minengneng to kamok no JW Tilifi. Maherek minengneng, malalengo ko paro no lomaˈ to sasamanen misaka dademak ko kalimelaan no kamok. Ano misikay to pakalomaˈay pidoko i, haratengen no wama wina, o saali no kaemangay ato kapah a sakayat cowa ka hecad, mihaenay ano sapairaaw to haepoc no paro no lomaˈ mikitini pakalomaˈay pidoko, o wama wina mamisaˈicel padama to kahacecay tamdaw misaka dademak to mananamay i kaˈorip no niyah.​—ˈOlic 148:12, 13.

11-13. Sasamaan kita micowat to kakelec no kasakopang, halo padama to tao ngaˈ ngaˈay pasadak to likat hani?

¹¹ O kaemangay tamdaw wa ngaˈay misamaan micowat to makelecay no kasakopang, halo pakalalok to roma tamdaw pasadak to likat hani? Ngaˈayay patireng kiso to patosokan, misawidang to matoˈasay tamdaw, tengilen ko pilomal nangra to malifetay i pihodop ci Yihofaan. O hatiniay milifetan wa patanektek to pakasoˈlin no falocoˈ iso, mihaen wa matongal ko kalim iso ato matoˈasay sapataengadaw to likat no soˈlinay kimad. O roma, kita mapolong ngaˈay mahemek a militemoh to mirienang to saˈopo a faelohay tamdaw. O mamitongal to makelecay konini, ho makalim cangra micomod i kapot no mita, malacafay a pasadak to likat. Sedien ita ko pising milicay to ngaˈayho, han ko satapangayho mirienang to saˈopo a tamdaw, padama cangranan mikilim to kamaroˈan, siwkayen ko salikaka cangranan,  mihaen to demak ecato ka rawraw ko falocoˈ nangra.

¹² Ano kiso ko manilnilay misikay to ˈayaw mitosil a saˈopo, ngaˈayay miharateng to sasamaan padama to matoˈasay salikaka. O pitosilan a kilac no matoˈasay, matatodongay han? Ngaˈayay kiso tahidangen ko kaemangay pacafay cangranan han? Oya matoˈasayto anca tatiihay ko tireng caka ngaˈay mararid mitosil a tamdaw, wa ngaˈay kiso patado cangranan miharateng han? Ciharateng kiso to salikaka, misinanot to saali nangra, mihaen to demak ano kaemangayto matoˈasayto, adihayay anca mimingay ko malifetay a tamdaw wa fanekfekto a mitosil.​—Lifi 19:32.

¹³ Itiyaho nolitengan, masaˈopo ko Israil a midoko ci Yihofaan, ngaˈayay ko pilingat i kalalaˈed nangra. Mitiliday to ˈOlic, sanay ko sowal: “Ano masasiolah ko malikakaay a rihaday i, tada o malemeday, tada o kalipahakan!” (ˈOsien ko ˈOlic 133:1, 2.) O kakelec no kalalaˈed nangra, mahecaday o simal fangsisay a sinoway. Anini pasinoway kiso to salikaka, micowat to makelecay no kasakopang han? Wa ngaˈay kiso misaˈicel a “misakakahad to falocoˈ”, misawidang to ˈalomanay a salikaka han?​—2 Korinto 6:11-13.

14. Misamaan kiso pataengad to likat no niyah i fiyafiyaw hani?

¹⁴ Misamaan kiso misaˈicel a pataengad to likat no soˈlinay kimad no Fangcalay Cudad i fiyafiyaw hani? Ira ko mangodoay waywayan ato damsay ko sowal, makalim cangra saka cipinangaw to Fangcalay Cudad halatek. Licayen ko niyah: “Minengneng ko fiyaw takowanan, o masamaanay a tamdaw hani? Mikorac kako to taliyok no lomaˈ, ngaˈayay ko pisawacay to fiyafiyaw han? Tala ˈayaway kako a padama to fiyaw han?” Ano masasowal kiso to salikaka i, ngaˈayay licayen cangra, sasamaan tano ngaˈayay waywayan mitemer to falocoˈ no salawina, fiyafiyaw, cafay matayal anca cafay micudad, wa matengil iso ko ngaˈayay milifetan halatek.​—Ifiso 5:9.

15. Misamaanay hano padotoc a mikecol o sakalimelaan hani?

¹⁵ Ano makalimay kita sapatongalaw to likat no niyah, sinanoten ko waywayan no niyah. Kinapinaay ci Yis palimoˈot to nisawawaan ka ‘padotoc a mikecol’. (Matay 24:42; 25:13; 26:41) O ‘taˈangayay padiing’ mala:ayayho, cowa ko aitini romiˈad no mita a ira, ano mahaen cowa ko kacalohan ko mitosilay a demak, wa saanto ko pinengneng no mita. (Matay 24:21) Telocto, awa ko pakayraan ita pataengad to likat i fiyafiyaw, wa sapiyapiyat wa saan, anca mapadengto.

16, 17. Samaan ko demak ngaˈ padotoc a mikecol?

¹⁶ Malingaday ko kaetih noniya hekal, kalimelaan ko padotoc ita a mikecol. Itini matatodongay a toki, o papalaˈafoen ni Yihofa koniya ciraraway a hekal, awaay ko hasasa tonini. (Matay 24:42-44) ˈAyaw nonini, wa mihadidi kita, mitafo to talipaˈelalay, micekiw to Fangcalay Cudad to romiˈamiˈad ato padotoc a mitolon. (1 Pitiro 4:7) Ngaˈayay todongen ita ko taˈarawan no salikaka, padotocay cangra mikecol a pataengad to likat no niyah, mansa taˈangay ko lipahak. Mikecolay 2012/4/15, 18-21 fiedac, matiliday ko milifetan no cecay faˈinayan salikaka, ngaˈayay nanamem no mita, o lalangian i: “Lalomaˈ no 70 Miheca Mikelec a Mikoramet to Kafafang no Yutaya Tamdaw.”

¹⁷ Patomesen ita ko ciepocay noˈadingoan a demak i nokaˈorip, micerid a micawmaˈ to Krisciyang, mihaen o mamatongal ko lipahak hato kalikiay ko toki mataˈlif sanay ko harateng. (Ifiso 5:16) O sikawdan ni Yihofa itini ˈayaway hahekalan malalokay a matayal, adihayay ko malaˈosiay a demak, anini itini sakayat ni Yihofa, ikakaay ko adihay no malaˈosiay a demak. Mipataengaday  kita to likat no niyah, mataˈlifay ko maharatengay no miso.

18, 19. O malohemay malitengay sasamaan padama takowanan, mitafo to patalipaˈelalay ato fanekfekay hani? Patinakoen.

¹⁸ Soˈlin cowa ko malefotay kita, kawrira papihodopan ni Yihofa kita i Cingraan, mafanaˈ tonini taˈangayay ko pakalalok kitaanan. Pakayni sapadamaaw kitaanan, pafeliay to ‘malo sidaˈitay a tamdaw’, o malohemay malitengay no kasakopang, tangongolay ko piakoˈid no mita ci Yihofaan. (ˈOsien ko Ifiso 4:8, 11, 12.) Mihaenay ano miliyaw ko malohemay malitengay milisoˈ tisowanan i, mameten ko toki a minanam cangranan, tengilen ko limoˈot nangra, mihaen to demak wa taˈangay ko macadaay iso a haepoc.

¹⁹ Itini i Ikok, o cecay mararamoday mikitini tatosa malohemay malitengay milifok to sadama. Harateng no fafahi, cowa pikayat ko faˈinay i noˈadingoan sanay, mihaiyay ko faˈinay mafokilay ko niyah a pasifanaˈ, cowa picerid to pakalomaˈay a pidoko. Papiharatengan no malohemay malitengay koniya mararamoday to taˈarawan ni Yis, ciharatengay ci Yis to nisawawaan, misinanot to saali no nisawawaan. Pakalalokan no malohemay malitengay koniya mararamoday pasayra ci Yisan a minanam, pakalalok to fafahiyan salikaka, ira ko mihadidiay, halo paini cangranan samaan malacafay to wawa misikay to pakalomaˈay a pidoko. (Ifiso 5:21-29) Ikorto, oniya faˈinayan salikaka misaˈicelay mikayat to paro no lomaˈ, pakahemekan no malohemay malitengay cingra, pakalalok cingranan padotoc a misaˈicel, halo mitadiˈec to fangcalay saocor no Kawas. O kaciharateng no malohemay malitengay ato sadama mahadakayto ko likat noniya lomaˈ.

20. Ano pataengad kita to likat no niyah wa ira ko maanan ngaˈayay a minaroˈan hani?

²⁰ Romadiway ko mitiliday to ˈOlic: “O tada malemeday ko mangodoay [ci Yihofaan], o tada malemeday ko midoedoay to limoˈot Ningra.” (ˈOlic 128:1) Misarocod kita mitosil, micowat to makelecay, padotoc mikecol, mihaen ngaˈayto pataengad to likat no niyah, hanaca matongal ko hemek to romiˈamiˈad. Maˈaraw no roma tamdaw ko ngaˈayay waywayan ita, wa panokay to ˈdil i kakarayan Wama ci Yihofaan.​—Matay 5:16.