O COKA noniya cudad hato soˈlinay nengnengen, mansa panganganen to idek a cudad, cowa ka walawal ako, mitongalay to kalim ako saka cipinangaw to Fangcalay Cudad.

Tiya macapid ko Intiya to Saka Tosa Lalood no Hekal i, masasiwatikay ko wama wina ako, ikor malacinowasayto. Hato maperaray ko hekal ako, mafalahay no tamdaw kako sanay a miharateng, tada matoleday ko falocoˈ ako. Awaay ko pinang ako, o kaolahan ako a tatosa tamdaw, hano caka kahi malacafay. Edengan a wawa kako, kawra cowa pakalifok to sahinom ato kadihko no falocoˈ.

Itiya, itiniay i Karaci ko kitiraan ako ato wina. Cecay romiˈad, o cecay matoˈasay ising ci Frete Atak, tayniay i lomaˈ ako mitosil. Ci Atak atoya pafeliay to idek a cudad a milakowitay to riyar a misakafahay, mahecaday o Misawacayay Tamdaw ni Yihofa, mitahidangay to wina ako, minanam to Fangcalay Cudad. Soˈlin manaˈayay ko wina, kawra maolah ko wawa halatek sanay. Telocto, saka tosa lipay misatapangay kako aci Atak salikaka, miˈosi to Fangcalay Cudad.

 Ikor no pina lipay, misatapangay kako mirienang to saˈopo no Krisciyang. Itiniay i paisingan ni Atak a masaˈopo, maedeng 12 ko matoˈasay a Misawacayay Tamdaw ni Yihofa itira. Maolahay cangra midipot takowanan, mahecad o wawa nangra, tada dihkoay ko falocoˈ ako. Maharatengayho ako maroˈay cangra i tatihi ako, masasowal takowanan soˈlinay a ciharateng takowanan, misaaliay kako to mahaenay a widang itiya.

Caka halafin, mitahidangay ci Atak takowanan, malacafay cingranan mitosil. Pasifanaˈay cingra misaka dademak to cikongki, pahoni to kamotoˈay a kimad no Fangcalay Cudad. Roma roma a kimad patodicek sanay, soˈlin cowa ka hemek ko cilomaˈay a mitengil, kawra kamayan a mahemek kako a mitosil. Tada maolahay kako to soˈlinay kimad itiya, maolahay a palihaf i tamdaw to soˈlinay kimad no Fangcalay Cudad.

Ikorto, misatapangay ko sofitay no Dipong milood to Intiya, matongalay ko saroero no mirikecay no Ikok to Misawacayay Tamdaw ni Yihofa. 1943 miheca 7 folad, malingatay noniya saroero kako. O ˈaˈideman no picudadan, o misasingsiay no Tingsokiw no Ikok, “o tatiihay ko waywayan” sanay a lalangian, papisawad takowanan a micudad. Pasowalan no siyawcang ko wina, micawmaˈay kako to Misawacayay Tamdaw ni Yihofa, tatiihay ko pifiyor no waywayan ako to roma roma micudaday sanay. Macekokay ko wina, micongeday takowanan padotoc a micawmaˈ to Misawacayay Tamdaw ni Yihofa. Caka halafin, patayraan no wina kako i wamaan, itiniay i kaˈamis no Karaci to 1,370 kongli a Pesawar ko lomaˈ no wama. Awaayto ko noˈadingoan a kakaenen itira, awaay ko pakayraan a micawmaˈ to salikaka. Paselaˈ sanay ko noˈadingoan a demak ako.

1947 miheca, minokay kako i Karaci mikilim to katayalan. Tayraay kako i paisingan ni Atak. Mahemekay cingra militemoh takowanan.

Milicay cingra: “Icowaay ko adadaay iso han?” Harateng no salikaka ci Atak, adadaay ko tireng ako, tayniay paising sanay.

Pacaˈof kako: “Isingaw, coko tireng ako ko adadaay. O noˈadingoan ko adadaay. Makalimay kako miliyaw cipinang to Fangcalay Cudad.”

Milicay cingra:“Wa hacowa kiso misatapang hani?”

Sowal ako: “Ano ngaˈay i, satapang nohatini ngaˈay han!”

Sa lafiiay kami malalengo to Fangcalay Cudad. Hato minokayay i lomaˈ, tayni i tatihi ni Yihofa. Soˈlin kamayan misafelit ko wina takowanan a micawmaˈ to Misawacayay Tamdaw ni Yihofa, kawraan misaˈosiay ko falocoˈ ako midoko to Kawas. 1947 miheca, 8 folad 31 romiˈad, 17 ko mihecaan ako micada to inoˈ, patafang to tireng ci Yihofaan, toya mihecaan misatapang a malo misakafahay.

Sakacecay pisakafahan ako a kilac itiniay i Kuwita, nao kitiraan no sofitay no Ikok konini. 1947 miheca, miperaran ko Intiya, malo tosaay kitakit—o Intiya ato Pakistan. * Mifekaday konini to pakidemay kasasongtol no pidoyongan, sa adihayay milaliway to pades a tamdaw. Maedeng 1,400 ˈofad a tamdaw ko malafelay. O Muslim a tamdaw no Intiya milaliway tayra i Pakistan, o Intiyakiyo ato Sikekiyo no Pakistan, milaliway tayra i Intiya. Masasifoday ko pakayraan itiya, mikitiniay kako i Karaci, mikalic to ciˈacefelay tayra i Kuwita, macekcekay ko tamdaw i paliding, mansa metmet sanay to taatiwan no fawahan, hoeca ka tefad nai ciˈacefelay.

Itini Kuwita malitemohay ako ci Ciwci, o 25 ko mihecaan a mikiriwiˈay a misakafahay cingra. Pafeliay ci Ciwci to matelangay a citingsiya takowanan, patingsiyaay kako, anca kiting hananay ko tingsiya itini macokacokay a kilac mitosil. Tocerid cecayay kako mitosil, itini lalomaˈ no 6 folad, 17 ko mapatirengay a pacekiwan, o roma pacekiwan micadaay to inoˈ. Iraay ko cecay nao tapang no sofitay, ci Satike Masi. Padamaay ci Satike takowanan aci Ciwcian mihongyak to Fangcalay Cudad, malo Uertu a sowal no Pakistan. Caka halafin, malo fanekfekay a mitosilay ci Satike.

Ikorto patikolay kako tayni i Karaci, itira malacafayay to tatosa salikaka micudiyapay i Kiliyat Picudadan a matayal, ci Henri aci Hali. Oni tatosaay salikaka padamaay takowanan i noˈadingoan, micada to hatiniay sapa hatatanam tada ngaˈayayto! Kinacecayay, kako aci Henri malacafayay tayra i kaˈamis a Pakistan mitosil. Itira datadat sanay ko lotok, itini  laeno no lotok adihayay ko mahelaay misapoeneray, makalimay minanam to Fangcalay Cudad a tamdaw, ono Uertu ko sowal nangra. Maedeng ikor no tosa miheca, matahidangay kako mirienang to Kiliyat Picudadan, micudiyap patikolay kako i Pakistan, tano miming a toki malo kasakilac a kantok milisoˈ to kasakopang. Itiya, kako ato tatolo salikaka itiniay Lahae a kitiraan no milakowitay to riyar a mikilomaˈ.

1954 miheca, kalalaˈed no itiniay Lahae a milakowitay to riyar mitosilay pakidemay ko kaetih, mansa mifalican no Fenpo ko pinilnil to salikaka. Cowa ka inaneng kako mipiliˈ to dadamaen a salikaka, telocto micadaay to pakidemay a sapirikec, harateng ako itiya tada pasokiyawayto, hato cowa ko noˈadingoan ko niyah. Patikolay kako malinahay tayra i Karaci, ikor malinahay tayra i Ikok Lonton, ho ngaˈ miliyaw a tanoktok i noˈadingoan, sanay ko tokel ako.

Itini Lonton, ˈalomanay ko matayalay i Pitil a salikaka i kasakopang no mako, iraay ko cecay o sikawdan no Fenpo ci Polayse. Sidaˈitay ci Polayse midipot takowanan. Kinacecayay pasowalay cingra takowanan, na mirikecan noya mikayatay to mitosilay i polong no hekal ci Rosofo cingra sanay. Itiya, cowa ka kahi micada to sarikec, mihadakay to adihayay lalangian midama to niyah, matongal sanay ko poˈi no salikaka ci Rosofo. Fahekaˈay kako milomal ko salikaka ci Polayse toniya demak i, matawaay ko pising. Soˈlin masomaday cingra, kawra ikor mafanaˈay to misaaliay ko niyah to hatiniay a sarikec, mikitini sarikec mahapinangay ko olah ni Yihofa cingraanan. (Hipray 12:6) O sowal ni Polayse taˈangayay ko sasayar takowanan, padama takowanan misalof to harateng, miliyaw a mahemek mihodop to Kawas.

Itiya malinahay ko wina tayni i Lonton, caka halafin misatapangay malalengo to Fangcalay Cudad ato salikaka ci Paer, ci Paer ikor malo Mikayatay Malohemay Malitengay i Congpo. Ngaˈayay ko kacakat no wina i noˈadingoan, itini 1957 miheca micadaay to inoˈ cingra. Ikorto mafanaˈ kako, ˈayaw no mapatay ko wama, na kalacafayay to Misawcayay Tamdaw ni Yihofa a minanam to Fangcalay Cudad.

1958 miheca, mararamoday kako ci Raynaan, maroˈay i Lonton a fafahiyan salikaka cingra. Lalimaay ko wawa niyam, o sakakaay fafahiyan wawa, saka tosa miheca mararamod kami a hofocen, mahemekay kako i Foremo a kasakopang matayal. Kawraan cowa ka ngaˈay ko tireng ni Rayna, harateng niyam malinah tayra i dihkoay a pala, mihaenay itini 1967 miheca, malinahay ko paro no lomaˈ niyam tayra Aterayte no Australia.

Itini Aterayte kasakopang iraay ko 12 matoˈasay a mapasimalay Krisciyang, fanekfekay cangra a mitosil.  Tahira kami i kasakopang i, kalikiay mirienang to kihecod noˈadingoan a tayal.

1979 miheca, o sakalima a wawa ako aci Rayna ci Taniil mahofocayto. Hofochan ci Taniil ciadadaay to Tangsecen *, sowal no ising caka halafin ko ˈorip ningra sanay. Tahanini, pasangaray kako mitadtad to malifetay niyam a roray itiya. Misaˈicelay kami a midipot ci Taniilan, misaˈicelayho eca ka pilawa to saali no roma sasepatay wawa. O falocoˈ ni Taniil tosaay ko ngawaˈ, madoloay cangoˈot ko selaˈ ningra, ano koheting ko pising ningra i, tangsolan niyam paising cingra. Soˈlin cowa ka ngaˈay ko tireng ningra, kawra inanengay mitengilay to sowal, hanaca maolahay ci Yihofaan. Ano mitolon kami ˈayaw no mitaheka i, kelecan ningra mikamet koya mimingay kamay, mitaˈongay to fongoh a pasowal to “Aming!” Ikor ngaˈ satapangay komaen.

4 ko mihecaan ni Taniil i, ciadadaay to macalohay a kohecalay ˈirang. Tada malotayay kako aci Rayna, sakasingkiaw sanayto kako. Cecay dadaya, cowato ka tomeseng kako, kasakilac a kantok ci Niwie salikaka milisoˈay takowanan. Mitakecan ni Niwie kami, malacafay tamiyanan a tomangic. O cecacecay a sowal ningra tada misayaray tamiyanan, macadaay niyam ko olah ato dihko no falocoˈ, tahiraay i kanikaran cingra ngaˈ miliyasay. Ikor, mapatayayto ci Taniil, tada kasomadan i nokaˈorip niyam, kawraan pakasoˈlinay kami awaay ko maanan a demak ko mamiketon to olah no Kawas ci Taniilan, ano o patayto cowa ko ngangaˈay. (Loma 8:38, 39) O hatiniay pasoˈlin padamaay takowanan aci Raynaan milakowit to pasangaray. Makalimay kami pakaˈaraw to patikol ni Taniil maˈorip, malaholol tamiyanan i faelohay hekal.​—Yohani 5:28, 29.

Soˈlin kinatosaay kako a macongfong, kao ngaˈayayho itini kasakopang malo malohemay malitengay. O malifetay isalakat padamaay takowanan mafanaˈ patado miharateng ato siniˈada to tao, mangalef o tahalifaay to pades a tamdaw, cowa pilikaf kako cangranan, licayan ko niyah: “Ira ko mahaenay a demak ato harateng no salikaka, milingatay to malifaay nangra hokira? Samanen pakafanaˈ ko salikaka to ciharatengay kako cangranan? Sasamaanen ako a pakalalok ko salikaka, tano harateng ni Yihofa a dademak hani?” Maolahay kako a milisoˈ to salikaka, ano hinomen ako a pakalalok cangra i, mahinomay ko niyah a mapakalalok.

Mahecaday ko harateng ako to mitiliday to ˈOlic: ‘Yo adihay ko rawraw ato rarom ako i, mihinom ci Yihofa takowanan.’ (ˈOlic 94:19) Ano pakayniay pihakelongan a micada to sapalak, matoled to niyah, anca malonay i nokaˈorip, mahecaday o Wama ci Yihofa, itiniay tatihi ako a kalacafay.