1. Pakayni i Kolosay 2:4, 8, ci Satan tano maanan a pakayraan mionting to harateng no mita hani?

SAPILIPALAWAW ci Satan kitaanan mitowakang to Kawas. Mansa mifiyoray cingra a mionting to harateng no mita. Saka dademaken ningra ko nai falocoˈay a kalim ita, milipalaw kitanan mitoor cingranan.—ˈOsien ko Kolosay 2:4, 8.

2-3. (1) Hano sasinanoten ita ko sarikec i Kolosay 2:8 hani? (2) Oniya lalakaw mamilengo to maanan?

² Wa soˈlin a malipalaw ni Satan kita han? Hay! Haratengen ko sarikec ni Pawlo i Kolosay 2:8, cowa ko ˈalafang a tamdaw ko patikamian ni Pawlo, o mapasimalay Krisciyang ko patikamian ningra. (Kolosay 1:2, 5) Itiyaay a Krisciyang malipalawayho, o kitaho coko mikikakaay ko saali to sapisinanotaw hokira. (1 Korinto 10:12) Nohatini itiniay i ngata no cikiw ci Satan, misaˈicelay cingra milipalaw to madimadiay midoko to Kawas a tamdaw. (Paˈarawan 12:9, 12, 17) O roma i, o lintad ita nohatini mariˈangay a tamdaw ato makaniway ‘matongalay ko tatiih.’—2 Timoti 3:1, 13.

³ Oniya lalakaw wa mitadtad to, sasamaan ci Satan tano ‘awaay ko epoc a sasowalen’ mionting to harateng no mita, wa milengo kita toloay a ‘sapalafo’ ni Satan. (Ifiso 6:11) Anocila lipay mamilengo kita to sasamaan micoˈay to sapifiyor ni Satan a sakayhid. Dotoc salakaten ita minengneng to, ikor no micomod ko Israil tamdaw i Mikiˈokan a Pala, samanay ci Satan milipalaw cangranan.

4-6. Pakayni i Limoˈot 11:10-15, ikor no micomod ko Israil to Mikiˈokan Pala, hano fafalicen ko pakayraan a mawmahay hani?

⁴ Mangilosay ci Satan mikayhid to Israil tamdaw mitaˈong to samiyay. Tano maanan pakayraan hani? Pakayniay i saali no Israil tamdaw to kakaenen. Ikor no micomod to Mikiˈokan Pala, wa mafalic ko pakayraan no Israil tamdaw a mawmah. Itiniho cangra i Icip, o nanom no Nayil ˈAlo ko sapananom to ecan. Kawraan itini Mikiˈokan Pala awaay ko taˈangayay a ˈalo, o ˈorad ato ˈaresing ko sapananom to ecan. (ˈOsien ko Limoˈot 11:10-15; Isaya 18:4, 5) Mihaenay wa minanam cangra to faelohay pakayraan a misaecan. Kawra cowa ko madoloay mihaen, samanen oya mafanaˈay mawmah a tamdaw mapatayayto i kohkohan.

⁵ Pasowalan ni Yihofa ko finawlan Ningra, mafalicayto ko pakayraan nangra. Mihadakay Cingra to sarikec, oniya sarikec hato cowa pilingat to mawmahay a demak, sanay ko sowal ni Yihofa: “Pinaˈon kamo to sakaecaaw ka sawi a miliyas to Tapang a pasayra i roma a kawakawas a mitaˈong.” (Limoˈot 11:16, 17) Milengo ci Yihofa to faelohay pakayraan mawmah i, hano mirikec to Israil tamdaw hamaan midoko to makaniway kawas hani?

⁶ Mafanaˈay ci Yihofa to mamakayhid ko Israil tamdaw, pasayra i ˈalafang minanam to faelohay pakayraan a mawmah. Samanen inanengay a mawmah ko taliyokay a finacadan, o finawlan no Kawas wa mikitira cangranan minanam to inaneng, kawra masakatalawan mihaen. O Kanan tamdaw mitaˈongay ci Paalan, pakasoˈlin to mikowanay to kakarayan ci Paal, ngaˈayay patefad to ˈorad. Cowa ka  ciharateng ci Yihofa malipalaw no hatiniay mararaway a kimad ko finawlan Ningra. Kawra cowa ka pitengil ko Israil tamdaw, misaliyaliyaway midoko ci Paalan. (Saˈosi 25:3, 5; Kakitaan 2:13; 1 Hongti 18:18) Nohatini, nengnengen ita samanay ci Satan mionting to harateng no Israil tamdaw.

7. Micomod ko Israil i Mikiˈokan Pala ikor, misiˈayaway to maanan a sapalifet ko pakasoˈlinay falocoˈ nangra hani?

⁷ Mitokelay ko Israil tamdaw to mamacepaˈ no ˈorad ko sera, o sakacecay a pakayraan ni Satan misaka dademak to matatodongay a kalim nangra. Itini Mikiˈokan a Pala, to mihecahecaan aikor no 4 folad tangasa 9 folad awaay ko ˈorad. Ka 10 folad satapang sanayho a maˈorad, o sakaˈorip no Israil tamdaw, kakadofah ko mipanayan hokira, o ˈorad ko piˈarawan. O ˈalafang tamdaw misalisinay sapicangacangaw to kawas nangra a patefad to ˈorad. Milipalaway ci Satan to Israil tamdaw, papihaen to demak hongaˈ kadofah ko mipanayan. Telocto, o cangoˈotay ko pakasoˈlin ci Yihofaan a Israil tamdaw malipalawayto ni Satan, mihaen to demak hongaˈ ira ko ˈorad sanay miharateng. Orato, misalisinay cangra a midoko ci Paalan.

8. O saka tosa a pakayraan ni Satan o maanan hani?

⁸ O saka tosa a pakayraan ni Satan i, miowingay to Israil misalo to malafoay a coos no tireng. O ˈalafang tamdaw tano kaacekan maˈodangay a lisin ko sapidoko to kawas nangra, mahawpay ko maˈaˈodang to tasalamaan a faˈinayan ato fafahiyan. Pakihater hananay ko tongsinlien ato romaroma maˈodangay waywayan, tada matenakay itira. (Limoˈot 23:17, 18; 1 Hongti 14:24) Pakasoˈlinay ko ˈalafang tamdaw, o hatiniay a lisin o papahafay ko kawas to sera. Makayhiday ko ˈalomanay Israil tamdaw, misatapangto midoko to makaniway kawas, telocto marepetayto ni Satan.

9. Pakayni i Hosiya 2:16, 17, samanan ni Satan miapoh ko Israil eca ka tatodong ko kafanaˈ ci Yihofaan hani?

⁹ O saka tolo a pakayraan ni Satan, miapohay to Israil eca ka tatodong ko kafanaˈ ci Yihofaan. Itini lintad ni Yirimiya, somowalay ci Yihofa misaˈfitay ko makaniway pairasolay to finawlan Ningra ‘pakayni ci Paalan’ a matawal to ngangan Ningra. (Yirimiya 23:27) Tatodong no “Paal” o “Tawki”. Cowato pisaka dademak ko finawlan no Kawas to Yihofa a ngangan, tano “Paal” a ngangan pangangan to Kawas. Orato maapohayto ko kasasiroma ni Yihofa aci Paalan. Telocto masasifoday ko pidoko ci Yihofaan ato pisalisin ci Paalan.—ˈOsien ko Hosiya 2:16, 17.

10-11. (1) Anini tano manan a pakayraan ko sapilipalaw ni Satan hani? (2) Samanay ci Satan miapoh to tamdaw eca ka tatodong ko kafanaˈ ci Yihofaan hani?

¹⁰ Anini, tano mahecaday a pakayraan ko sapilipalaw ni Satan, mahawpay misaka dademak to matatodongay a kalim no tamdaw, ato mikayhid to tamdaw misalo to coos no tireng, ato miapoh to tamdaw eca ka tatodong ko kafanaˈ ci Yihofaan. Dotoc tadtaden ita koniya tolo a pakayraan.

¹¹ Miapoh to tamdaw eca ka tatodong ko kafanaˈ ci Yihofaan. Ikor no mapatay  ko tarokos ni Yis, o misafelitay to kimad a tamdaw patenakay to mararaway a kimad, ecato ka hapinang no tamdaw cima ko soˈlinay a Kawas. (Dmak 20:29, 30; 2 Tisalonika 2:3) Tinakoen, itini Fangcalay Cudad nangra cowato pisaka dademak to ngangan no Kawas, tano “Tapang” a saaroˈan a pangangan to Kawas. Mihaen ko demak nangra miapohay to tamdaw ecato pakahapinang ci Yihofaan ato “Tapang” i Fangcalay Cudad o maanan ko kasasiromaan. (1 Korinto 8:5) Misaka dademakanho nangra ko “Tapang” a saaroˈan pangangan ci Yihofaan aci Yisan, cowato ka fanaˈ ko tamdaw to cowa ka hecad ci Yihofa ato wawa Ningra. (Yohani 17:3) Mihaenay a masadak ko toloay cecayay ko tireng sanay a mararaway a kimad. Telocto, awaayto ko pakayraan no tamdaw a mafanaˈ to Kawas. Tada taˈangayay a mangah konini!—Dmak 17:27.

12. (1) Mararaway pihakelongan miowingay to tamdaw midemak to maanan hani? (2) Pakayni i Loma 1:28-31, samanay mifiyor to tamdaw ko hatiniay demak hani?

¹² Miowing to tamdaw misalo to malafoay a coos no tireng. Itini nolitengan Israil, misaka dademakan ni Satan ko mararaway pihakelongan miowing to tamdaw a maˈodang. Mahecaday ko pakayraan ningra anini. Pakihater sanay ko mararaway pihakelongan to hatiniay waywayan, o matatodongay konini sanay, telocto misao midokoay to Kawas a tamdaw misilikoray to palinian no Kawas. O tarokos ci Pawlo itini Loma cudad, mitadtaday to samanay mifiyor to tamdaw ko hatiniay a demak. (ˈOsien ko Loma 1:28-31.) Kihcod a malafoay waywayan sahtoay o ‘caka tatodong ko demak,’ mahawpay ko tongsinlien. (Loma 1:24-27, 32; Paˈarawan 2:20) O sasinanoten ita a midoedo ko sakayat no Fangcalay Cudad tada kalimlaan konini!

13. O roma sapikayhid ni Satan a pakayraan o manan hani?

¹³ Misaka dademak to matatodongay a kalim no tamdaw. Sapinanaman kita to inaneng a matayal hongaˈay paririˈ to niyah ato paro no lomaˈ, o matatodongay a kalim konini. (1 Timoti 5:8) Itini picudadan wa ngaˈay kita malalok minanam to  inaneng, kawra o maminaˈon kita, itini roma kitakit, cowa ko pasifanaˈ aca to ciepocay a inaneng, pasifanaˈayho tono tamdawan a taneng. Mikayhid to micudaday misakahmaw to Fangcalay Cudad ato cisasa iraay ko Kawas hokira. Pasowalay to edeng o sinkalon ko matatodongay mitadtad to pipowalan no ˈorip sanay. (Loma 1:21-23) O hatiniay kimad misafelitay to ‘taneng no Kawas.’—1 Korinto 1:19-21; 3:18-20.

14. O taneng no tamdaw samaanay mifiyor to tamdaw hani?

¹⁴ O taneng no tamdaw misafelitay to moecelay a palinian no Kawas, cowa ka padama to tamdaw palahad to minaroˈan no fangcalay saocor, mikayhiday to tamdaw paihkal to ‘midoedoay tono hecian a waywayan.’ (Kalatiya 5:19-23) O hatiniay taneng patakaraway to tamdaw, ‘misamacay maolah to niyah.’ (2 Timoti 3:2-4) O hatiniay tatiihay pinangan misafelitay to saali no Kawas, samanen o dadamsay a misapoener ko sikawdan no Kawas. (2 Samuil 22:28) O roma micadaay to ˈakawangay picudadan a Krisciyang, manaholay no hekal ko harateng nangra, cowato kakahi micada to sakayat no Kawas. Nengnengen ita ko tinakoan.

15-16. Pakayni i nalifetan no cecay salikaka, mananamay iso ko maanan hani?

¹⁵ O cecay fafahiyan salikaka 15 miheca miemin to toki misakafah, sanay: “Soˈlin micadaayto kako to inoˈ, mafanaˈay iraay ko katalawan no ˈakawangay picudadan, kawra cowa ka pitengil to sarikec. Cowa ka tatodong takowanan koniya sapaini sanay kako.” Telocto tahalifaay cingra to  maanan pasangaray hani? Sanay: “Adihayay ko mapalakay a toki ato ˈicel, cowato ka lecad kako to saˈayaway misongilaˈ a mitolon to Kawas. Tada malotayay kako itiya, cowato ka hemek a mitosil, cowa pisaday to saˈopo. Ikor talipaˈelalay kako, mahapinang o ˈakawangay picudadan mipalakay to kalalaˈed ako aci Yihofa, setek sanay kako to falocoˈ a misawad.”

¹⁶ O ˈakawangay picudadan samanay mifiyor to harateng noniya salikaka hani? Sanay: “Tada mangodoay kako, o ˈakawangay picudadan mikayhiday takowanan a mikimkim to dangoc no tao, mangalef ko salikaka i kasakopang. Pakidemay ko saali ako cangranan, cowa ka sapicawmaˈaw to salikaka. Ikor, adihayay ko mapalakay a toki misalof to harateng ako. Oniya malifetay mahapinangay ako, misakahmaw to pakaynian ni Yihofa i likakawa Ningra a sarikec, tada katalawanto. Cipinangay ci Yihofa takowanan, nanay tengilen ako i salakat ko sowal Ningra, caka hatini alatek!”

17. (1) Seteken ko falocoˈ ita samaan ko hademak hani? (2) Dotoc a lalakaw wa milengo to maanan?

¹⁷ Seteken ko falocoˈ aka a papiontingen ko ‘pakatamdaway a harateng ato awaay ko epoc a sasowalen’ to harateng iso. Ceriden a micoˈay ko sakayhid ni Satan. (1 Korinto 3:18; 2 Korinto 2:11) Aka a malipalaw ningra, telocto eca ka tatodong ko kafanaˈ ci Yihofaan. Dofdofen ko ˈakawangay palinian ni Yihofa, aka a maorat ni Satan a misakahmaw to sapalimoˈot ni Yihofa. Ano mifiyoray ko harateng no hekal tisowanan i, sasamaanto hani? Dotoc a lalakaw wa milengo, o Kimad no Kawas sasamaan padama kitanan mifalah to ‘cilamitay i falocoˈ’ tatiihay harateng ato nanaman.—2 Korinto 10:4, 5.