1. Mihadakay ko tarokos ci Pawlo i mapasimalay a Krisciyang to maanan a sarikec hani?

PASOWALAN ni Pawlo ko saka 1 hahekalan a Krisciyang: ‘Aka a madenga noniya hekal.’ (Loma 12:2) Hano mihadak cingra toniya kalimlaan a sarikec i mapasimalay a Kriciyang hani?—Loma 1:7.

2-3. (1) O maanan ko pakayraan ni Satan miowing kitanan mitowakang ci Yihofaan? (2) O maanan ko papadama kitanan mifalah to cilamitay i kemod no falocoˈ a harateng hani?

² Calemcemay ci Pawlo, samanen manaholay no harateng no hekal ni Satan ko roma Krisciyang. (Ifiso 4:17-19) Ano aninito mamafiyor kita alatek. Ci Satan ko mikowanay toniya lekakawa, tano masakenaay a pakayraan cingra minahol kitanan, miowing kitanan mitowakang ci Yihofaan. Ano ira ko misatakaraway falocoˈ ato saka cinganganaw a harateng ita i, mamadolo a makayhid ni Satan. Saka dademakan ningra ko serangawan, milifetan maˈorip ato mananamay i picudadan, mikayhid kitanan midoedo to harateng ningra a midemak.

³ Wa ngaˈay kita mifalah to cilamitay i kemod no falocoˈ a harateng no niyah han? (2 Korinto 10:4) Sinanoten ko sowal ni Pawlo: ‘Palasawaden ita ko masakenaay a mararaway kimad, ato masakenaay pacoliay to sifanaˈ no Kawas a misatakaraway a sasowalen, hanaca paliten to kihcod a harateng papitoor ci Kristoan.’ (2 Korinto 10:5) Ira  ko sapadama ni Yihofa, o ngangaˈay kita a mifalah to masakenaay mararaway a harateng. O Kimad no Kawas mahecaday o sapifasaw a cemel, ngaˈay mifalah to sapiwarak no hekal ni Satan kitanan.

4. ˈAlomanay tamdaw i lalomaˈ ita na mifalicay to maanan hani?

⁴ Tikolen miharateng, tiya minanam kiso to Kimad no Fangcalay Cudad misetek to falocoˈ midoko ci Yihofaan, o maanan ko mifalican. Pakaynien i ˈalomanay a tamdaw, o mamisalof to mararaway a waywayan alatek. (1 Korinto 6:9-11) Padamaay ci Yihofa kitanan a misalof, tada miakoˈiday kita Cingranan!

5. Pakayni i Loma 12:2, o maanan a tosa demak ko dademaken ita?

⁵ Soˈlin iraayto ko kafalic ita, aka a malataˈang. Soˈlin cowato ka hecad kita to ˈayaw no micada to inoˈ a pakidem ko raraw, oha maminaˈon a miliyas to mamikayhid kitanan, sapiliyawaw a mararaw ko demak. Sasamaan ko hademak ita hani? Sowal ni Pawlo: ‘Aka a madenga noniya hekal, safaelohen ko harateng a mifalic to niyah.’ (Loma 12:2) Mihaenay tosaay ko hademak ita: Saka 1, ‘aka a madenga’ noniya hekal, aka a mafiyor noniya hekal. Saka 2, pakaynien i pisafaeloh to harateng a ‘mifalic to niyah.’

6. Itini i Matay 12:43-45, mitadtaday ci Yis to maanan a kimad?

⁶ O misowalan ni Pawlo a kafalic, cowa ko maˈaraway aca no tao a demak, mahawpay ko i kemoday a falocoˈ a demak. (Nengnengen ko sapatongal lalakaw “ Misongilaˈ a Mafalic anca Mihimed to Niyah?”) Sasongilaˈen ita misafaeloh ko harateng, mahawpay ko pifalic to i kemoday no falocoˈ a waywayan, nafalocoˈan ato kalim. Lalicayen ko niyah: “Pakayni  i sakala Krisciyangaw, na misaˈicelay kiso mifalic to maanan? O papotal aca ko mafalicay han? Anoca, halo i kemoday no falocoˈ iso ko mafalicay?” Taˈangayay ko kasasiroma nonini. Itini i Matay 12:43-45 (ˈOsien.) pasowalay ci Yis kitanan to cecay kalimlaan a kimad: O pifalah aca to mararaway harateng cangoˈotayho, o tatomesen ita i ponoˈ ko mihaydaan no Kawas a harateng.

7. Samaan ko demak ngaˈ ngaˈay mafalic ko i kemoday a falocoˈ?

⁷ Wa soˈlin ngaˈay kita mifalic to i kemoday a falocoˈ ato pakayraan miharateng han? Sowal no Fangcalay Cudad: ‘Safaelohen ko falocoˈ namo. Caˈedongen ko faelohay a capeling, oya mihecaday to capeling no Kawas a masangaˈay. Mapahapinang ko moecel ato madimadiay.’ (Ifiso 4:23, 24) O ngangaˈay mafalic ko i kemoday a falocoˈ, kawra cowa ko madoloay. Cowa ko piˈimer aca to mararaway a coos, misawad to mararaway a waywayan, oha sasafaelohenho ita ko i kemoday a falocoˈ, o pakayraan ita a miharateng. Sapifalicaw to kalim no i kemoday a falocoˈ, harateng ato araaw no falocoˈ, o papadadotoc a misaˈicel ngaˈ ngaˈay.

8-9. O milifetan no cecay salikaka samanay mitadtad to kalimlaan ko pifalic to i kemoday a falocoˈ hani?

⁸ Nengnengen ita ko tinakoan no cecay faˈinayan salikaka. Oniya salikaka nao mariˈangay a tamdaw, sapitooraw to palinian micada to inoˈ, cowato ka hinalasang ato malatiˈil cingra. O kafalic ningra ngaˈayay ko pisawacay to fiyafiyaw. Kawra, ikor no micada cingra to inoˈ caka halafin, fahal sanay ira ko sapalifet. Iraay ko cecay malasangay tamdaw itini fawahan no lomaˈ ningra, sapisetiˈaw cingranan. Satapang, pakaˈimerayho cingra, kawra, ikorto mitongangan ci Yihofaan koya tamdaw, cowato ka tomeseng cingra, sadak sanay a misetiˈ toya tamdaw. Hano mahaen hani? Soˈlin, pakayni i pinanam to Fangcalay Cudad, pakaˈimeray to mariˈangay harateng to cecay liyad, kawra cowaho ka falic ningra ko i kemoday a falocoˈ.

⁹ Cowa ka pisawad koniya salikaka. (Taneng 24:16) Padamaay ko malohemay malitengay cingranan, padadotocay cingra a macakat. Ikorto malo malohemay malitengay cingra. Cecay dadaya, itini i paputal no kasaˈopoan, misiˈayaway cingra to mahecaday to iˈayaway miheca a sapalifet.O malasangay tamdaw sapisetiˈaw to roma malohemay malitengay. Samanay ko demak ningra hani? Mangodoay cingra masasowal tora tamdaw, mifasaw to harateng ningra, ikor pacafayan ningra a panokay. O waywayan noniya salikaka, hano taˈangay ko kafalic to salakatay hani? Samanen mafalicayto ko i kemoday a falocoˈ ningra, soˈliˈlinay malo lopayˈay misapoeneray a tamdaw. Taˈangayay ko sapakahemek ci Yihofaan!

10. Sapifalicaw to i kemoday a falocoˈ misaaliay to maanan hani?

¹⁰ Sapifalicaw to i kemoday a falocoˈ misaaliay to toki, misadakho to taˈangayay ˈicel. Soˈlin halafinayto kita midoko ci Yihofaan, cowa ko fafahal saan a mafalic. O mamisarocod kita, hanaca pina a mihecaan ngaˈ masongilaˈ a mafalic. (2 Pitiro 1:5) Iraay ko pina kalimlaan a pakayraan, dotoc hacecayen ita a milengo.

11. Mitolon ci Yihofaan, samaan padama kitanan mifalic to pakayraan a miharateng?

¹¹ Salakat i, mitolon. Mahecad kita to mitiliday to ˈolic a mitolon ci Yihofaan, sanay: ‘Kawasaw, nanay sangaˈen Iso ko makoracay a malo falocoˈ ako, telien i falocoˈ ako ko faelohay harateng, ho tanektek ko falocoˈ ako.’ (ˈOlic 51:10) O mamihai kita misaaliay ko niyah to sapifalicaw to pakayraan a miharateng, halo micangacang to sapadama ni Yihofa. Hano mafanaˈ kita to papadama ci Yihofa kitaanan hani? Na pasowalan ni Yihofa ko ˈatekakay ko falocoˈ a Israil tamdaw, i lintad ni Icikil: ‘O papafelien ako cangra to faelohay falocoˈ, miteli i lalomaˈ nangra to faelohay harateng. Papafelien ako cangra to ciheciay a falocoˈ.’ (Icikil 11:19) ‘Ciheciay a falocoˈ’ o makahiay midofdof to sakayat no Kawas a falocoˈ. Ano makahiyay ci Yihofa padama to Israil tamdaw, o mamakahi a padama kitanan.

12-13. (1) Pakayni i ˈOlic 119:59, o haharatengen ita ko maanan? (2) Wa ngaˈay licayen ita ko niyah to maanan a salicay?

¹² Dotoc i, midotim. Ano miˈosi kita to Fangcalay Cudad i, palaken ko toki midotim to maˈosiay a lalakaw, misimsim to o maanan a harateng ato nafalocoˈan ko fafalicen no niyah. (ˈOsien ko ˈOlic 119:59; Hipray 4:12; Yakop 1:25) O hahapinangen ita, mafiyoray no hekal kitanan han, ikor mihai to ira ko dangoc no niyah, halo misaˈicel a misalof.

¹³ Licayen ita ko niyah: “Iraay ko miming a ˈinap no falocoˈ ako hokira?” (1 Pitiro 2:1) ‘Malataˈangay kako to serangawan, mananamay i picudadan ato adihayay hafay no niyah han?’ (Taneng 16:5) ‘Misakahmaway kako to manikaway anca cowa ka hecad ko finacadan a tamdaw han?’ (Yakop 2:2-4) ‘Masolotay no mihadakan no hekal ni Satan a dafong kako han?’ (1 Yohani 2:15-17) ‘Maolahay kako to kaacekan ato malatiˈilay a lawla han?’ (ˈOlic 97:10; 101:3; Amos 5:15) Haharatengen ita koniya salicay, wa mahapinang to icowaay ko papadadotocen ita a misalof. Ano songilaˈen ita mifalah to cilamitay i kemod no falocoˈ a harateng, o papakahemek to kakarayan a Wama.—ˈOlic 19:14.

14. Misongilaˈ mipiliˈ to cacawmaˈen hano masakalimlaan hani?

¹⁴ Oha mamisongilaˈ a mipiliˈ to cima ko cacawmaˈen no mita. Ano samaanto, taˈangayay ko pifiyor no micawmaˈan ita a tamdaw. (Taneng 13:20) Itini picudadan anca katayalan, i taliyokay ita a tamdaw cowa ko papadama kitanan palahad to kaolahan no Kawas a harateng. Kawra mirienang kita to saˈopo no Krisciyang, wa matama ko ngaˈayay a widang, malacafay cangranan, wa ‘mikowad to ciolahay falocoˈ, micowat to ngaˈayay a demak.’—Hipray 10:24, 25.

15-16. Ci Satan tano maanan a pakayraan minahol to harateng ita hani?

¹⁵ Hamaan mapawan kita, ci Satan sapinaholaw to harateng ita. O Kimad no Kawas padamaay kitanan matatodong ko harateng, kawra tano masakenaay a mararaway harateng ko sapiˈodis ni Satan kitanan.

¹⁶ Na milicayan ni Satan ci Ifa i Itin: “Soˈlinay pasowal ko Kawas to . . . ?” (Satapangan 3:1) Anini mahecaday ko pakayraan  ningra. Marariday matengil ko cisasaay to pihakelongan ita a sowal, tinakoen: ‘Soˈlinay milalang ko Kawas to raramod no tongsinlienay han?’ ‘Soˈlinay milalang ko Kawas tisowanan misalisin to kahofocan ni Yis ato kahofocan iso han?’ ‘Soˈlinay miconged ko Kawas tisowanan pacomod to ˈirang han?’ ‘Ciolahay ko Kawas, soˈlinay milalang tisowanan macacawmaˈ to mafalahay i kasakopang a salawina han?’

17. (1) Ano misiˈayaw to hinapec i, sasamaan ko hademak ita? (2) Pakayni i Kolosay 2:6, 7, mihaen ko demak ita wa ira ko maanan ngaˈayay minaroˈan?

¹⁷ O sasaˈosien ita to matatodongay ko pihakelongan no niyah. Ano cisasaay ita i, kawra cowa pikilm to sapacaˈof, wa mifekad ko pakidemay a hinapec. O hatiniay a hinapec o maminahol to harateng ita, mamalahdaw ko pakasoˈlin ita to Kawas. Sasamaan ko hademak ita hani? Sowal no Fangcalay Cudad falicen ko harateng ita, mihaen o ngangaˈay misaˈosi to makapahay ato malefotay ko araaw no Kawas, o papakahemek Cingranan. (Loma 12:2) Micerid kita micekiw, o ngangaˈayto misaˈosi to soˈlinay ko kimad no Fangcalay Cudad, pakasoˈlin to moecelay ko palinian ni Yihofa. Mihaen kita o ngangaˈay ‘tanektek ko pakasoˈlinay falocoˈ’, mahecad o taˈangayay kilang tangongol ko palamit i sera.—ˈOsien ko Kolosay 2:6, 7.

18. Samaan ko demak ita, ecato ka mawarak no harateng no hekal ni Satan?

¹⁸ Edengan o niyah ko ngangaˈay patanektek to pakasoˈlinay falocoˈ no niyah. Mihaenay padadotoc kita a misaˈicel mifalic to i kemoday a falocoˈ no niyah, micerid a mitolon, milongoc ci Yihofaan pafeli to fangcalay saocor, milomal to harateng ato araaw no falocoˈ no niyah, piliˈen ko ngaˈayay padama kitanan a tamdaw misafaeloh to harateng no mita. Mihaen, wa ngaˈayto kita mifalah to misafelitay to palinian no Kawas a harateng, ecato ka mawarak no harateng no hekal ni Satan.—2 Korinto 10:5.