1. Samanen ita mitodong ko sidaˈitay a Wama ci Yihofa hani?

TANGONGOLAY ko olah ni Yihofa kitanan. (Yohani 3:16) Sapitodongaw kita to sidaˈitay a Wama, pairaen ko ‘siniˈada to tao. Ira kono salikaka a olah, siniˈadaay falocoˈ,’ mangalef ko sano ‘paro no lomaˈ’ a salikaka, tatongalen mihaen ko demak. (1 Pitiro 3:8; Kalatiya 6:10) Ano tahalifa cangra to pasangray i, maedeng o mamakalim kita a mihadak to sapadama.

2. Oniya lalalaw mamilengo to maanan hani?

² O masalalomaˈay no taˈangayay paro no lomaˈ ni Yihofa a tamdaw, misiˈayaway to pasangaray ato saroero. (Marko 10:29, 30) Hanaca pakayni i kangata no hererekan noniya lekakawa, mamatongal ko mamalifa ita a sapilifet alatek. Sasamaan kita masasipadama hani? Dotoc mamilengo to, wa ngaˈay kita mikitini i malifetay ni Loto, Yopu aci Naomi minanam to maanan. Wa milengoho to masiˈayaway no salikaka anini a pasangaray, ato sasamaan kita a padama cangranan.

3. (1) Pakayni i saka 2 Pitiro 2:7, 8, midemakay to maanan mafolaay a saˈosi ci Loto hani? (2) Oniya saˈosi mikayatay to maanan a teloc hani?

³ Mipiliˈay ci Loto kalacafay to malafoay ko waywayan a Sotom tamdaw, tada mafolaay a saˈosi konini. (ˈOsien ko 2 Pitiro 2:7, 8.) Soˈlin cihafayay ko Sotom, kawra ˈakawangay ko mihadakan ni Loto a sapiˈaca. (Satapangan 13:8-13; 14:12) Tiya tefaden no Kawas ko namal i, o fafahi ni  Loto tangoˈolay to Sotom a niyaroˈ ato itiraay a tamdaw, cowa ka pidoedo to sowal ni Yihofa, malahdaway ko ˈorip. O tatosaay fafahiyan wawa ni Loto samanay hani? O hafaˈinay nangra mapatayay i Sotom. Cowa ko omah ato hafay aca ko malahdaway ni Loto, ka adayayan i, malahdaway ko fafahi ningra. (Satapangan 19:12-14, 17, 26) Tahalifa ci Loto toniya pasangaray i, mihadidiay ci Yihofa a micada cingranan.

4. Samaanay ci Yihofa mihadidi micada ci Lotoan hani? (Nengnengen ko papotal coka.)

⁴ Soˈlin pakayni i pipiliˈ ni Loto itini i Sotom a maroˈ tahalifa to pasangaray. Kawra kamayan siniˈada ci Yihofa cingranan, miocor to coyoh milidong cingranan ato paro no lomaˈ. Nikawrira, cowa ka tangsol ci Loto midofdof to sarikec no coyoh, ‘minayaray caka romakat.’ Orato tengteng hananay no coyoh ko kamay nangra, mikerid cangranan miliyas toya niyaroˈ, palimoˈot cangranan milaliw tayra i lotok. (Satapangan 19:15, 16) Kawra cowa ka sakatayraaw ci Loto, milongocay ci Yihofaan milaliw tayra i ngata a niyaroˈ. (Satapangan 19:17-20) Mihadidiay ci Yihofa a mitengil to pilongoc ni Loto, mihai to saali ningra a midemak. Ikor matalaway ci Loto, malinahay tayra i misaˈosian ni Yihofa i salakat a lotok. (Satapangan 19:30) Tada mihadidiay ci Yihofa ci Lotoan! Sasamaan kita mitodong ci Yihofaan hani?

5-6. Sasamanen ita mitoor to sowal no saka 1 Tisalonika 5:14 a midemak hani?

⁵ Alatek iraay ko salikaka mahecaday ci Lotoan, mararaw ko misaˈosian ira ko tatiihay a teloc. Ano mifekad ko hatiniay a demak, wa samaan ko demak ita hani? Sakahatini no demak, o cingra ko mifekaday wasa ko harateng ita alatek. (Kalatiya 6:7) Soˈlinay i, o tatodongen ita ko pakayraan ni Yihofa a padama ci Lotoan.

⁶ Cowa ko piocor aca ni Yihofa to coyoh a mirikec ci Lotoan, padamaayho cingranan milaliw to Sotom. Mahecaday, ano mahapinang ita o papaira to pasangaray ko demak no salikaka, o rarikecen ita cangra, hanaca misarocod a padama cangranan. Soˈlin caka tangsol ko salikaka mitoor to safalod no Fangcalay Cudad a midemak, pairaen ita ko mihadidiay, padadotoc padama cangranan, mahecad o pipadama no coyoh ci Lotoan. (1 Yohani 3:18) Latekay, o papadamaen ita ko salikaka a mitoor to sapaini a midemak.—ˈOsien ko 1 Tisalonika 5:14.

7. Sasamaan kita mahecad ci Yihofaan minengneng to tao hani?

⁷ Mikitini i saka 2 Pitiro wa mahapinang ita, cowa ka pisamacay ci Yihofa to dangoc ni Loto, o moecelay a tamdaw sanay ko pinengneng cingranan. Makahiyay ci Yihofa misodod to tamdaw, tada masayaray ko falocoˈ ita! (ˈOlic 130:3) Wa ngaˈay kita mahecad ci Yihofaan a minengneng to tao. Ano samacayen ita ko kangaˈayan no salikaka, wa matongal ko pihadidi cangranan, mihaen o mamakahi cangra micada to sapadama ita.

8. Samaan ko demak ita ngaˈ, soˈliˈlin siniˈada to salikaka hani?

⁸ Ci Yopu aci Loto cowa ka hecad, o roray ni Yopu cowa ko niyah ko mifekaday. Kawra malifaay ni Yopu ko pakidemay a pades, o hafay, saaroˈan, tanektek no tireng ningra sahtoay malahdawayto maemin. Ka adayayan i, o wawa ningra mapatayayto maemin. Oya tatoloay makadaway a widang mapoˈiayho cingranan.  Oniya tatoloay hano caka pisayar ci Yopuan, patado a miharateng hani? Samanen manengnengay nangra i, o potalay aca a demak, mansa tangsol sa mipoˈi ci Yopuan. Wa samaan ko demak ita ngaˈ caka mahecad ko raraw hani? Haharatengen, cowa ko mamahecad kita ci Yihofaan a cipinang to kihcod a demak. Mansa songilaˈen ita mitengil ko sowal no tahapadesay a tamdaw, patado a miharateng ngaˈ, soˈliˈlin siniˈada to salikaka.

9. Ano iraay ko patadoay miharateng a falocoˈ ita i, cowa ko mamidemak to maanan hani? Misamaanay?

⁹ Ano iraay ko patadoay miharateng a falocoˈ i, manengneng ita ko tahalifaay to pasangaray a tamdaw, cowa ko pakasowal to sanaysanay a sowal. O sanaysanay a sowal, cowa ko mamicowat to kakelec no kasakopang, wa miperar to kakelec no kasakopang. (Taneng 20:19; Loma 14:19) O hatiniay a waywayan tada awaay ko siniˈada, o misakahmaway to tamdaw a demak, o sasowalen ningra patongalay to dokaˈ no tahalifaay to pasangaray a tamdaw. (Taneng 12:18; Ifiso 4:31, 32) Mansa, songilaˈen ita mikilim to kangaˈayan no tao, haratengen sasamaan padama cingranan miremo to sapalifet.

10. Mikitini i Yopu 6:2, 3, mananamay ita ko maanan hani?

¹⁰ ˈOsien ko Yopu 6:2, 3. Na ‘calohsa patelas ko sowal’ ni Yopu, ikorto mihayay to raraw no niyah. (Yopu 42:6) Alatek o roma Krisciyang mahecaday ci Yopuan, pakayni saroero a patelas ko sasowalen ikorto makesem ko falocoˈ. Ano tahalifa to hatiniay a pakayraan, sasamanen ita midemak hani? Pairaen ko siniˈadaay a harateng hamaan milikaf cingranan. Ci Yihofa cowa ka ciharateng to sapicadaaw ita to pasangaray ato saroero  i noka ˈorip no mita, mansa ano pasowal ko cecay madimadiay salikaka to mararaway a sowal i, ngaˈay kita cipinangto hano mahaen cingra. Ano rorohen ningra ci Yihofaan anca kita i, hamaan tangsol mangolaw a milikaf to mararaway ko sowal ningra.—Taneng 19:11.

11. Ano mihadak to limoˈot ko malohemay malitengay i, sasamaan a mitodong ci Ilihoan hani?

¹¹ Alatek oya tahalifaay to pasangaray a tamdaw misaaliay to sapalimoˈot ato sapirikec. (Kalatiya 6:1) O malohemay malitengay sasamaan ko hademak hani? Todongen ko taˈarawan ni Iliho. Siniˈadaay ci Iliho ci Yopuan, songilaˈay cingra mitengil to sowal ni Yopu. (Yopu 33:6, 7) Cipinangayho cingra to harateng ni Yopu ngaˈ, misadakay to limoˈot. Mihaenay haw i, songilaˈen no malohemay malitengay a mitengil, misaˈicel a cipinang to pakayraan no tamdaw ngangaˈay. Mihaen ngaˈ, mamatemer ko falocoˈ ningra makahi a micada to mihadakan no malohemay malitengay a limoˈot.

12. Mapatayay ko faˈinay ato tatosaay faˈinayan wawa ni Naomi ikor, samaanay ko harateng ningra hani?

¹² O madimadiay midoko to Kawas a fafahiyan ci Naomi, ikor mapatayay ko faˈinay ato tatosaay faˈinayan wawa ningra, mifalican ko ngangan ningra malo “Mara”, tatodong i, o “Roray” sanay. (Rucu 1:3, 5, 20, 21) Tahalifa cingra to roray i, kalacafayan no kadafo ci Rucu. Midipot ci Rucu to kaˈorip ni Naomi halo pasowal to misayaray cingranan a sasowalen. Soˈlin amotoˈay ko sowal ni Rucu, kawra nai falocoˈay ko sowal ningra, paihkal to tangongolay a olah ato sadama.—Rucu 1:16, 17.

13. O mapatayay ko raramod a Krisciyang hano misaaliay to sapadama no mita?

¹³ Ano mapatay ko ramod no cecay Krisciyang, misaaliay cingra to sapadama no mita. O mararamoday mahecaday o malacafayay lomahad a kilang, mataˈlifay ko pinapina a mihecaan i, mafedfeday ko lamit noya tosa a kilang. Ano faˈenoten ko cecay a kilang i, wa pakidem ko dokaˈ no roma a kilang. Mahecaday, ano mapatay ko ramod i, o dokaˈ no cecay ramod wa halafin a caka adah. Mapatayay ko faˈinay ni Pawla, * sowal sa cingra: “Awaayto ko ngaˈayay a widang ako, sasifod sanay ko nokaˈorip ako. Adihayay ko sasowalen ako to faˈinay, ano mahemek kako mahemekay cingra, ano mararom kako i, paingiday cingra to ˈafala a mitengil to katomangic ako. Mapatay cingra i, hato maˈariay ko falocoˈ ako.”

14-15. Samaan kita misayar to mapatayay ko ramod a tamdaw hani?

¹⁴ Sasamaan kita misayar to mapatayay ko ramod a tamdaw hani? Salakat, masasowal cingranan, soˈlin cowa ka fanaˈ kiso to o maanan ko hasowal, haenenho ko demak ngangaˈay. Sanay ko sowal ni Pawla: “Mafanaˈay kako cowa ka olah ko ˈalomanay somowal to pakayniay kapatay no faˈinay ako a demak, samanen calemcemay cangra mararaw ko sowal. Kawra pakaynien i takowanan, mararaw ko sowal ikakaay to kaeca pasowal ko ngaˈay.” O masomaday ko falocoˈ a tamdaw, cowa pilongoc sapitengilaw to tangongolay a kimad. Sanay ci Pawla: “O kantangay a sowal ‘mahecaday a masomad kako’, taˈangayayto ko sasayar takowanan.”

¹⁵ ˈAyaw no pina miheca mapatayay ko fafahi ni Wilim, sanay cingra: “Maolahay  kako pakahemek ko tao to fafahi ako, mafanaˈ to maolahay ko tao cingranan, mikangodo cingranan. O kalimlaan i nokaˈorip ako ko fafahi, Mansa mihaen cangra tada masayaray ko falocoˈ ako.” Mapatayay ko faˈinay ni Pianka, sanay cingra: “Malacafayay ko salikaka takowanan a mitolon, paˈaraw to pina sinael, misayaray takowanan. Milengoay cangra to faˈinay ako, makahiyay mitengil to pilomal ako to demak ningra, mihaen ngaˈayay ko harateng ako.”

16. (1) O mapatayay ko ramod a tamdaw, misaaliay to manan a sadama hani? (2) Pakayni i Yakop 1:27, iraay ko maanan a ˈinorong no mita hani?

¹⁶ Malecad ci Rucuan pacafay i tihi ni Naomi, wa padadotoc kita a padama to mapatayay ko ramod a tamdaw. Sanay ko sowal ni Pawla: “Tiya mapatay ko faˈinay ako i, ˈalomanay ko padamaay takowanan, mataˈlif ko cecay liyad, patikolay to salakatay ko kaˈorip no ˈalomanay, kawra taˈangayay ko kafalic no kaˈorip ako. Soˈlinay i, mapatayay ko ramod a tamdaw pinato a folad anca pina miheca, kamayan misaali to sapadama, ano cipinang kita tonini, tataˈangay ko sasayar to mapatayay ko ramod a tamdaw.” Manaokaniw, kahnayay mananam ko roma tamdaw to faelohay no kaˈorip, kawra o roma tamdaw, na kalacafayay to ramod a midemak, mifekaday to kasomadan a harateng. Cowa ka lecalecad ko kahacecay tamdaw, mihaenay haharatengen ita, ciharateng to mapatayay ko ramod a tamdaw o ˈinorong no Krisciyang, o papakahemek ci Yihofaan.—ˈOsien ko Yakop 1:27.

17. O mifalahan no ramod a tamdaw, hano misaali to sadama ita hani?

 ¹⁷ O mifalahan no ramod a tamdaw misiˈayaway to taˈangayay a adada ato saroero. O cecay fafahiyan salikaka ci Ciyawis, faˈinay ningra pakayniay i roma fafahiyan a mifalah cingranan, sanay cingra: “Ano pakayniay i kafahalan a demak anca o adada ko sakapatay no faˈinay ako, cowa ko hahatini ko karoray ako, samanen cowa ko padetengay cingra a miliyas takowanan. Kawra mariˈangay cingra a mifalah takowanan, tada masomaday a maketer kako.”

18. Samaanen ita padama toya malahdaway ko ramod a tamdaw hani?

¹⁸ Patado kita to malahdaway ko ramod a tamdaw midemak to mimingay demak, wa macada nangra ko kaciharateng ita cangranan, samanen tada misaaliay cangra nohatini to kalacafay no ngaˈayay widang. (Taneng 17:17) Sasamaan kiso a ciharateng cangranan hani? Ngaˈayay tahidangen iso cangra tayni i lomaˈ komaen, malacafay cangranan a milawla, anca malacafay cangranan a mitosil. Latekay tahidangen cangra malacafay to pakalomaˈay pidoko. Mihaen ko demak iso, wa mahemek ci Yihofa, samanen ci Yihofa miingiday to “makesemay ko falocoˈ a tamdaw,” halo ciharateng to malahdaway ko ramod a tamdaw.—ˈOlic 34:18; 68:5.

19. Sasamaan kita misaka dademak to sowal i saka 1 Pitiro 3:8 hani?

¹⁹ O Hongti Kitakit no Kawas, wa kaliki mikowan to polong a hekal, cowato ka milomal to kasomadan a demak, “o mamatawalto ko iˈaya:way a demak a maemin.” (Isaya 65:16, 17) Hinatalaay kita to kaira noniya romiˈad! ˈAyaw nonini i, masasidama kita, pakayni i sasowalen, waywayan paihkal to maolahay kita to paro no lomaˈ ni Yihofa a cecacecay a tamdaw.—ˈOsien ko 1 Pitiro 3:8.