1. O kihcod hano sahtoay oni Yihofa hani? (Nengnengen ko satapangan coka.)

O KIHCOD sahtoay oni Yihofa, “o kakarayan ato paro no kakarayan ato hekal ato ilalomaˈay no hekal a maamaan i,” o Ningra maemin. (Limoˈot 10:14; Paˈarawan 4:11) O tamdaw, ci Yihofa ko misangaˈay, mihaenay o tamdamdaw sahtoay oni Yihofa. (ˈOlic 100:3) Kawraan, itini likisi no tamdaw, mikiriwiˈay ko Kawas mipiliˈ to roma tamdaw malo Ningra.

2. Mipiliˈan ni Yihofa ko samaanay a tamdaw malo tamdaw Ningra hani?

² Itini ˈOlic 135 fedengan somowalay, o midokoay ci Yihofaan a Israil tamdaw iti:yaho, o ‘mikiriwiˈay a hafay’ Ningra. (ˈOlic 135:4) Pairasolay ci Hosiya wa ira ko ˈalafang a tamdaw malo finawlan ni Yihofa. (Hosiya 2:23) Samaanay matatodong ko sapairasol ni Hosiya hani? Mipiliˈan ni Yihofa ko ˈalafang a tamdaw, pafeli cangranan to hatokel kalacafay ci Kristoan a mala hongti. (Dmak 10:45; Loma 9:23-26) O mapasimalay no fangcalay saocor a tamdaw masalalomaˈay no “fangcalay a finawlan”, o ‘mikiriwiˈay a hafay’ ni Yihofa cangra. (1 Pitiro  2:9, 10) Anini adihayay ko madimadiay a Krisciyang iraay ko tokel itini i cikiw tahadaˈoc a maˈorip, samaanay ko pinengneng ni Yihofa cangranan hani? Panganganan ni Yihofa cangra to ‘finawlan’ Ningra, o ‘mipiliˈan’ Ningra a tamdaw.​—Isaya 65:22.

3. (1) O cima ko kalimlaan ni Yihofa a finawlan nohatini hani? (2) Oniya lalakaw wa milengo to maanan?

³ Anini, iraay ko tokel tayra i kakarayan ‘mimingay ˈopo a siri’ ato iraay ko tokel i fafekang no sera tahadaˈoc maˈorip a ‘roma lopayˈay siri’ malo ‘cecayay ˈopo’, sahtoay o kalimlaan ni Yihofa a finawlan cangra. (Luka 12:32; Yohani 10:16) Miakoˈiday kita ci Yihofaan ira ko ngaˈayay kalalaˈed ita Cingranan. Oniya lalakaw wa milengo, wa ngaˈay kita misamaan miakoˈid ci Yihofaan ira ko sakaliko a malo finawlan Ningra.

4. (1) Samaan ko pakayraan ita miakoˈid ci Yihofaan hani? (2) Samaanay ci Yis paihkal to mahemekay cingra midofdof to araaw no Kawas hani?

⁴ Miakoˈiday kita ci Yihofaan, mansa patafang to niyah Cingranan. Pakayni i nanom micada to inoˈ, pakapapotalay kita a paihkal to oni Yihofa ko niyah, makahi a midofdof Cingranan. (Hipray 12:9) Paihkalay ci Yis to mahecaday a harateng, o picada ningra to inoˈ mahecaday o pasowalay ci Yihofaan: “Kawasaw ako, tada maolah kako a midoedo to [araaw] Iso.” (ˈOlic 40:7, 8) Hofochan ci Yis masalalomaˈayto no patafangay to Kawas a finawlan, kawra kamayan cingra patafang to niyah ci Yihofaan, midoedo to araaw Ningra.

5, 6. (1) Samaanay ko pipacaˈof ni Yihofa to picada ni Yis to inoˈ hani? (2) O kihcod oni Yihofa maemin, hano mahemekho Cingra patafang kita to kaˈorip Cingraanan hani? Patinakoen hena.

⁵ Samaanay ko pipacaˈof ni Yihofa to picada ni Yis to inoˈ hani? Sanay ko sowal no Fangcalay Cudad: “Maherek ci Yohani a painoˈ ci Yisan i, tangsol sa ci Yis a macakat nai nanom. Itiya i, mafawah ko kakarayan. Maˈaraw ni Yis ko nika epod no [fangcalay saocor] a matiya o topi. Itiya i, ira ko ngiha nai kakarayan. Sowal sa, ‘O kakaolahan Ako a wawa konini. O kakahemekan Ako cingra.’” (Matay 3:16, 17) Soˈlin ono kakarayan Wama ci Yis, kawra mahemekay ci Yihofa pakaˈaraw to wawa makahi misarocod to falocoˈ ato harateng midofdof to araaw Ningra. Patafangen ita ko niyah ci Yihofaan, wa mahecad a mahemek Cingra, wa palemed kitaanan.​—ˈOlic 149:4.

⁶ O kihcod oni Yihofa maemin, o maanan ko sapafeli ita Cingranan hani? Ngaˈayay tano sapatinako a mitadtad tonini. O cecay faˈinayan i omah no niyah palomaay to adihayay makapahay a hana. Cecay romiˈad, o kaemangayho fafahiyan a wawa ningra mipitinay to cecay hana, patelong toniya hana cingranan. Oniya hana ono nini a faˈinayan, wa samaan a malo sapatelong hani? Kawra, cowa ko mamahaen ko piharateng no sidaˈitay a wama, mahemekay cingra milayap toniya sapatelong, samanen oniya hana o wacay to maolahay koniya wawa cingraanan. Pakaynien toniya wama i, masakalimlaan ko sapafeli no wawa a hana mikikakaay to i omahay a hana. Mahecaday ci Yihofa toniya wama, mahemekay Cingra makahi kitaanan patafang to kaˈorip Cingraanan.​—Kasadakan 34:14.

7. Mikitini i Malaki 3:16, samaan ko pinengneng ni Yihofa to makahiay a mihodop Cingranan a tamdaw hani?

⁷ ˈOsien ko Malaki 3:16. Ano cowaho patafang to tireng a micada to inoˈ kiso, haratengen hano kalimlaan mihaen to demak. Misatapang ira ko ˈorip iso, oni Yihofato kiso. Kawra, ano mihai kiso to saˈakawangay sapikowan a fadangalan ni  Yihofa, makahi patafang to niyah midofdof to araaw Ningra, o mamahemek ci Yihofa! (Taneng 23:15) Mafanaˈay ci Yihofa to makahiay mihodop Cingranan a tamdaw, hanaca mitilidan ko ngangan nangra i powa Ningra.

8, 9. Ano makalimay kita matilid ko ngangan no niyah i powa ni Yihofa, wa mitoor to maanan a palinian hani?

⁸ Ano makalimay kita matilid ko ngangan no niyah i powa ni Yihofa, wa mitoor to pina palinian. Ihekalay ci Malaki a mifanaˈ, oha ‘mamangodo kita ci Yihofaan’ ato ‘miharateng’ to ngangan Ningra. Kawra, ano midoko kita to roma kawas ato dafong, o papadengen ko ngangan ita mikitini powa ni Yihofa.​—Kasadakan 32:33; ˈOlic 69:28.

⁹ Mihaenay, patafang to tireng ci Yihofaan cowa ko piketon aca to sowal midofdof to araaw Ningra, halo picada to inoˈ, samanen o cecayay aca liyad koniya demak, kahenayay mataˈlif. Midopo kita ci Yihofaan, nohatini tahadaˈoc wa midofdof Cingranan, hakelong no ˈorip ono Ningrato kita.​—1 Pitiro 4:1, 2.

10. O maanan ko kasasiromaan no mihodopay to Kawas a tamdaw ato cowa pihodop to Kawas a tamdaw hani?

¹⁰ I kaˈayaw a lalakaw, malengoay ita ci Kain, Solomon ato iti:yaay Israil tamdaw i Fangcalay Cudad. Soˈlin midokoay kami ci Yihofaan saan cangra, kawra cowa pisacecay a maolah to Kawas. O milifetan nangra mananamay ita, soˈlinay oni Yihofa a tamdaw wa maolah to moecelay, ˈinteh to tatiihay demak. (Loma 12:9) Mahaen o sowal ni Yihofa, wa mahapinang no tamdaw ko ‘kasasiroma no moecelay tamdaw ato tatiihay tamdaw, mihodopay to Kawas a tamdaw ato cowa pihodop to Kawas a tamdaw’.​—1 Malaki 3:18.

11. Hano pakafanaˈen ko tao to o madimadiay ci Yihofaan kita hani?

¹¹ Wa ngaˈayho kita samaan miakoˈid ci Yihofaan to noka ngaˈay ita malo finawlan Ningra hani? Itini i noˈadingoan, o mamahapinang no “ˈalomanay ko nika cakat” no mita. (1 Timoti 4:15; Matay 5:16) Wa ngaˈay licayen iso ko niyah: “Wa mahapinang no tao to misarocoday kako a madimadi ci Yihofaan  han? Makalimay kako sakafanaˈaw no tamdaw to o Misawacayay Tamdaw ni Yihofa ko niyah han?” Mipiliˈan ni Yihofa kita malo finawlan Ningra, ano matalaw kita mafanaˈ ko tao to ono Kawas kita, maedeng mamasomad ci Yihofa.​—ˈOlic 119:46; ˈosien ko Marko 8:38.

12, 13. O roma Misawacayay Tamdaw ni Yihofa, hano cowa ka hapinang no tao to mihodopay to Kawas a tamdaw cangra hani?

¹² Ka adayayan, o roma Misawacayay Tamdaw ni Yihofa mafiyoray no ‘saocor no hekal’, telocto cowato ka sasiroma cangra to cowa pihodop to Kawas a tamdaw. (1 Korinto 2:12) O saocor no hekal papisamacayay to tamdaw i “coos no tireng’. (Ifiso 2:3) O likakawa no Kawas itini caˈedong soˈlin adihayay ko mihadakan a limoˈot, o caˈedong no roma tamdaw oyaanho caka sanengseng. Cirikoˈay cangra to kincoay ato kamotoˈay a rikoˈ, mangalef itini i saˈopo no Krisciyang mahaenay ko caˈedong. Ano fokes nangra pakidemay a mikalisanga to tamdaw. (1 Timoti 2:9, 10) Telocto, ano kalacafay cangra to hekal a tamdaw i, cowato ka hapinang to o Misawacayay Tamdaw ni Yihofa cangra.​—Yakop 4:4.

¹³ O roma Misawacayay Tamdaw ni Yihofa itini roma pakayraan mafiyoray no hekal. Tinakoen, o kero nangra i picawmaˈan ato waywayan, cowa ka tatodong to Krisciyang. O roma tamdaw itini picawmaˈan a wangcan paketingay to sasing no niyah ato miterek to sowal, ora paketingan nangra a lalakaw paihkalay to midoedoay ko harateng no niyah tono hecian. O hatiniay tamdaw cowa ka pidemak to pakidemay a raraw hato cowa ka rikecen no kasakopang halatek, kawra o waywayan nangra tatiihay ko pilingat toya misaˈicelay midofdof to palinian no Fangcalay Cudad a salikaka.​—ˈOsien ko 1 Pitiro 2:11, 12.

14. Ano sakacaaw ka palak no kalawidang ci Yihofaan i, wa samaan ko hademak ita hani?

¹⁴ Oniya hekal miowingay to ‘coos no tireng, coos no mata, pahiyoay to dafong a waywayan.’ (1 Yohani 2:16) Kawra, oni Yihofa kita, mihaenay patalipaˈelalay ko Fangcalay Cudad kitaanan ‘falahen ko caka ngodo a falocoˈ ato coos no hekal, toni lekakawa matatodong ko harateng, moecel, mangodo ko kaˈorip.’ (Titus 2:12) O pakayraan ita a maˈorip, mahaopay ko  sasowalen, komaen ato nanaman komaen to epah, o caˈedong, waywayan ato matayal, papahapinangen ko tao to misacecayay kita maolah ci Yihofaan.​—ˈOsien ko 1 Korinto 10:31, 32.

15. Misamaanay hano papaihkal kita to sidaˈitay ato masasiolah to salikaka hani?

¹⁵ Ano miakoˈid kita ci Yihofaan ngaˈay malo widang Ningra, wa misangaˈay to salikaka i kasakopang, samanen oni Yihofa cangra. Ano maharateng ita konini, wa paihkal to sidaˈit ato olah cangranan. (1 Tisalonika 5:15) Sanay ko sowal ni Yis: “Ano masasiolaolah kamo i, pakayni tonini ko sakafanaˈ no tamdamdaw to nika o nisawawaan ako kamo.”​—Yohani 13:35.

16. Pakayni i Sarikec ni Mosi, samaanay mahapinang ita to salimlaan ni Yihofa ko finawlan Ningra hani?

¹⁶ Pakayni pisangaˈay to salikaka i kasakopang, haratengen ko laenoay tinakoan: O lalosidan i fangcalay sefi mikiriwiˈay to sasaka dademaken i pidoko ci Yihofaan, tooren ko Sarikec ni Mosi, o tatooren no tamdaw ko saˈosi ni Yihofa a misaka dademak toniya lalosidan, ano eca i o papatayen. (Saˈosi 1:50, 51) Ano misaaretengay ci Yihofa toniya sapidoko a lalosidan, coko aikaka ko pisalimla Ningra to madimadiay midoko Cingranan a tamdaw han? Masowal ko finawlan Ningra i, sanay ko sowal ni Yihofa: ‘O mikamaay tamowanan i, mahecaday o mikamaay to ˈamamosa Ako.’​—Cikariya 2:8.

17. ‘Misinanotay mitengil’ ci Yihofa to maanan a demak hani?

¹⁷ Masowalay ni Malaki ano masasowal ko finawlan no Kawas i, ‘misinanotay mitengil’ ci Yihofa. (Malaki 3:16) Soˈliˈlinay ci Yihofa mafanaˈ to tamdaw Ningra. (2 Timoti 2:19) Ihekalay a mafanaˈ Cingra to o maanan ko sowal ita, midemakay to maanan. (Hipray 4:13) Ano caka sidaˈit kita micada to salikaka, ‘misinanotay mitengil’ ci Yihofa. Kawra, makahi kita misodod to tamdaw, hinapaladaˈ ato sidaˈit, wa maˈaraw ni Yihofa a maemin.​—Hipray 13:16; 1 Pitiro 4:8, 9.

18. Sasamaan kita miakoˈid ci Yihofaan ngaˈay malo finawlan Ningra kita hani?

¹⁸ Miakoˈiday kita ci Yihofaan ngaˈay malo finawlan Ningra kita. Cipinangay kita to inanengay a saˈosi ko pipatafang to tireng ci Yihofaan. Soˈlin ‘itini ciraraway cowa ka moecel a tamdaw’ a maˈorip kita, sapahapinangaw kita to tamdaw to o ‘awaay ko rarikecen, makoracay . . . mahecad o likat a pataengad’. (Filipi 2:15) Misetek ko falocoˈ ita eca ka pidemak to kaˈintehan no Kawas a demak. (Yakop 4:7) Wa maolah kita to salikaka, mikangodo cangranan, samanen oni Yihofa cangra.​—Loma 12:10.

19. Wa samaan ci Yihofa palemeden to ono Ningra a finawlan hani?

¹⁹ Mikiˈokay ko Fangcalay Cudad kitaanan: ‘Cowa ko mamifalah ci Yihofa to finawlan Ningra.’ (ˈOlic 94:14) Ano O mananto ko masiˈayaway ita a pades, wa tooren ni Yihofa ko sakiˈok Ningra. Ano o patayto cowa ko mamiconged to olah ni Yihofa kitaanan. (Loma 8:38, 39) Sowal i Loma 14:8 sanay: “O sapalipahak [ci Yihofaan] ko nika ˈorip ita ato nika patay ita. Orasaka, ano nika ˈoripto, ano nika patayto ita i, [oni Yihofato] kita.” Hinatalaay kita maraod ko toki sapatikolaw ni Yihofa paˈorip to madimadiay a widang. (Matay 22:32) Ano aninito, milifokay kita to adihayay sapalemed, mahecad o sowal no Fangcalay Cudad: ‘O Kawas niyam ci Yihofa sanay a kitakit tada malemeday! O nipiliˈan no Kawas a finacadan tada malemeday!’​—ˈOlic 33:12.