1, 2. (1) Midopo ci Yihofaan hano o citanengay a waywayan hani? (2) Oniya lalakaw wa milengo to maanan hani?

PAKAYNIEN i midokoay ci Yihofaan a tamdaw, madimadi ci Yihofaan o ˈinorong nangra. Awaay ko mikikakaay ko ˈicel, taneng ato ciolahay falocoˈCingranan, mihaenay makalimay kita sapidopoaw Cingranan. (ˈOlic 96:4-6) Kawra, o roma midokoay to Kawas a tamdaw itini pidopoan ci Yihofaan a toki i, cisasaay ko harateng.

² Oniya lalakaw wa milengo to tinakoen no tamdaw itini Fangcalay Cudad, midopoay ci Yihofaan sanay cangra, kawra midemakayho to kaˈintehan no Kawas a demak. Oniya maˈoningay mahaopay ko kalimlaan a limoˈot, ngaˈay padama kitanan padotoc a misarocod to falocoˈa madimadi ci Yihofaan.

3. Hano rikecen ni Yihofa ci Kain hani? O maanan ko sowal Ningra ci Kainan?

³ Haratengen ko tinakoan ni Kain. Soˈlin ci Yihofa aca ko midokoan ni Kain, cowa pidoko to roma kawas, kawra cowa pihai ko Kawas to pidoko ningra. Misamaanay hani? Samanen palahadan ningra ko tatiihay harateng i falocoˈ. (1 Yohani 3:12) Mirikecan  ni Yihofa ci Kain, pasowal cingranan: “Nawiro maketer kiso saw? Nawiro saˈosnget sa ko pising iso saw? Ano . . . midemak kiso to caay ko dademaken a demak saka, misaˈimerto ko raraw i fawahan iso. O mamakowan no raraw kiso.” (Satapangan 4:6, 7) Mahecaday o pasowalan ni Yihofa ci Kain: “Ano pasasiyor kiso a midopo Takowanan, wa mikapot Kako tisowanan.”

4. Iraay ko toki ni Kain midopo ci Yihofaan, kawra samaanay ko demak ningra hani?

⁴ Ano salofen ni Kain ko harateng, wa miliyaw ci Yihofa micada cingranan. Kawra cowa ka pitengil ci Kain to sapalimoˈot, mafiyoray no mararaway harateng ato misatekeday a harateng cingra, telocto midemakay to tatiihay a demak. (Yakop 1:14,15) Kaemangho ci Kain cowa ka harateng to mamisaˈada ko niyah ci Yihofaan, kawra ikorto misafelitay cingra to Kawas, mipatay to safa no niyah!

5. O maanan a harateng wa palahdaw to kahemek ni Yihofa kitanan hani?

⁵ Anini, wa mahecad ko Krisciyang ci Kainan halatek, midokoay ko niyah ci Yihofaan saan, kawra midemakay to kaˈintehan ni Yihofa a demak. (Yuta 11) Tinakoen, tawlikay ko cecay Krisciyang mirienang to mitosilay ato micerid masaˈopo, kawra pakiyadi han ningra ko malafoay harateng i falocoˈ, maˈanof, anca ˈinteh to salikaka. (1 Yohani 2:15-17; 3:15) O hatiniay mararaway harateng wa miocor cingranan midemak to tatiihay a demak halatek. O maanan ko miharatengan anca midemakan ita, cowa ka fanaˈko tao, kawra mafanaˈay ci Yihofa, ihkalay cipinang Cingra to misarocoday kita a midopo cingranan hokira.​—ˈOsien ko Yirimiya 17:9, 10.

6. Ano misetek kita to falocoˈmidopo to Kawas i, sasamaan Cingra padama kitaanan ‘pakalowid’ to mararaway a coos hani?

⁶ Soˈlin mararaw kita, cowa ka ranikay ci Yihofa a misawad kitaanan. Sanay ko sowal ni Yihofa to miliyasay to moecelay lalan a tamdaw: “Pipasasiyor kamo a pasayni i Takowanan, ta pasayra Kako i tamowanan.” (Malaki 3:7) Ano miremo kita to dangoc no niyah i, mitokelay ci Yihofa kitaanan misetek to falocoˈaka a pidemak to tatiihay demak. (Isaya 55:7) Mihaen ko demak ita, o dadamaen ni Yihofa kita, itini noˈadingoan, no falocoˈan, no tirengan milifok to haˈicel no mita, ngaˈay ‘pakalowid’ to mararaway a coos.​—Satapangan 4:7.

7. Hano cowato ko widang ni Yihofa ci Solomon hani?

⁷ Mikitini tinakoan ni Solomon wa adihayay ko mananamay ita. Kaemangho cingra i micangacangay to sakayat ni Yihofa, mansa pafelian ni Yihofa cingra to tadamaanay a taneng, minilnil cingranan patireng to fangcalay sefi i Yirusalim. Ka adayayan i, ikor cowato ko widang ni Yihofa ci Solomon. (1 Hongti 3:12; 11:1, 2) Ihkalay ko saˈosi no sarikec no Kawas, “aka ka ˈaloman ko fafahi no hongti, to sakaecaaw ka sawi a miliyas to [moecelay a lalan].” (Limoˈot 17:17) Cowa pidofdof ci Solomon toniya limoˈot, 700 ko fafahi. Cowa ka hatini aca, iraayho ko 300 fafahiyan ningra. (1 Hongti 11:3) ˈAlomanay fafahi ningra cowa ko Israil tamdaw, hanaca midokoay to makaniway kawas. Mihaenay, misafelitay ci Solomon to roma a sarikec no Kawas, cowa ka ngaˈay mararamod to ˈalafang a fafahiyan.​—Limoˈot 7:3, 4.

8. Ci Solomon midemakay to maanan a pakararaway ci Yihofaan a demak hani?

⁸ Palidlid sanay ci Solomon miliyas to sarikec ni Yihofa, salikor midemakay to pakidemay a raraw. Patirengay cingra to pipatafangan a cadada noya fafahiyan kawas ci Astartan ato makaniway kawas ci Kimos, hanaca kalacafayay toya ˈalomanay fafahi ningra midoko to makaniway kawas.  Na patirengay ci Solomon i Yirusalim to fangcalay sefi ni Yihofa, kawra ikorto patirengay to pipatafangan a cadada no makaniway kawas i ˈaˈayaway a lotok no Yirusalim! (1 Hongti 11:5-8; 2 Hongti 23:13) Halatek milipalawan ni Solomon ko niyah, ano padotoc itini fangcalay sefi a patafang, o sasododen ni Yihofa ko misafelitay a waywayan ningra sanay a miharateng.

9. Misakahmaway ci Solomon to limoˈot no Kawas, samaanay ko teloc?

⁹ Nikawrira, cowa ko mamisodod ci Yihofa to tatiihay demak. Sowal no Fangcalay Cudad: ‘Mangolaway ci Yihofa ci Solomonan, samanen miliyasay ko falocoˈningra toya kinatosaay paˈaraw cingranan a Kawas no Israil ci Yihofa. Na palimoˈotan no Kawas cingra aka pikotod to roma kawas, kawra cowa pidoedo cingra to limoˈot ni Yihofa.’ Malahdaway ni Solomon ko hemek ato sadama no Kawas. Telocto, cowato ka ngaˈay ko teloteloc ningra mikowan to polong a Israil kitakit, tahalifaayho to adihayay roray ato pades.​—1 Hongti 11:9-13.

10. O maanan a waywayan mamipalak to ngaˈayay kalalaˈed ita ato Kawas hani?

¹⁰ Mikitini tinakoan ni Solomon o maanan ko mananamay ita? Ano micerid micawmaˈto cowa ka cipinang ato cowa ka ngodo to palinian ni Yihofa a tamdaw, wa mipalak to noˈadingoan ita. Oniya tatiihay ko pifiyor kitaanan a tamdaw, halatek o micawmaˈay to kasakopang, kawra malonayay i noˈadingoan a tamdaw, anca oya cowa pidoko ci Yihofaan a salawina, fiyaw, cafay matayal, cafay micudad. Ano samanayto, o ngaˈayay a widang ita ano cowa ka pisaareteng to palinian ni Yihofa, o mamipalak to ngaˈayay kalalaˈed no mita ato Kawas alatek.

11. Ano mipiliˈto cacawmaˈen a tamdaw i, haharatengen ita ko maanan hani?

¹¹ ˈOsien ko 1 Korinto 15:33. ˈAlomanay cowa ko Krisciyang a tamdaw hato ngaˈayay ko waywayan nangra, cowa ka pidemak to mararaway a demak. Kawrira, wa ngaˈay kiso misawidang to hatiniay a tamdaw han? Haratengen mararid a micawmaˈto hatiniay a tamdaw wa samaan ko pilingat to kalawidang iso aci Yihofa. Wa padama cingra tisowanan matongal ko ngaˈayay kalalaˈed iso ato Kawas han? O maanan ko misaaretengan nangra hani? O sasowalen nangra sahtoay o nanaman no hekal, payci, tingnaw a dafong, lawla anca pakadafongay a demak hokira? Marariday cangra milikaf to tao anca somowal to kaacekan a sowal han? Mihadakay ci Yis to sarikec: “Ano masamaanay ko falocoˈnoya tamdaw i, hatiraay ko masadakay i ngoyos ningra.” (Matay 12:34) Ano mahapinang iso ko micawmaˈan iso a tamdaw, mamipalak to ngangan iso i ˈaˈayaw ni Yihofa, lowanen ko kacacawmaˈcangranan a toki, ano ngangaˈay i, hawad han a misawidang cangra.​—Taneng 13:20.

12. (1) Ikor no miliyasay ko Israil tamdaw nai Icip caka halafin, milasilay ci Yihofa to maanan? (2) Pakayni saali ni Yihofa o maanan ko caˈof no Israil hani?

¹² Wa ngaˈay kita mikitini mifekaday a demak tiya miliyas ko Israil tamdaw to Icip caka halafin a minanam to kalimlaan a kimad. Itiya, itiniay cangra laeno no Sinay Lotok a masaˈopo, ci Yihofa tano kafahkaˈan a pakayraan paihkal to kaira no Niyah. Maˈaraway no Israil tamdaw ko toˈem, fitiliˈ, ˈacfel, matengilayho ko kakeleng ato padotocay a soni no laepa. (Kasadakan 19:16-19) Dotocto, milasilay ci Yihofa to Israil tamdaw to Niyah, ‘o misaaliay to misacecayay maolah a Kawas’, halo pikiˈok to mamadimadi to maolahay Cingranan ato midofdofay to limoˈot Ningra a tamdaw. (ˈOsien ko Kasadakan 20:1-6.) Mahecaday o pasowalay ci Yihofa to finawlan Ningra: “Ano midopo kamo Takowanan, wa kalacafayen Ako kamo.” Ano iraay kiso itiya, wa samaan ko sapacaˈof iso ci Yihofaan hani? Maedeng mamahecad kiso to Israil tamdaw, malacecay a pacaˈof: ‘O kihecod a sowal ni Yihofa, makahi kami a midofdof.’ (Kasadakan 24:3) Caka halafin, o cecay cowa ka harateng a demak palifetay to madimadi no Israil tamdaw.

13. O kamadimadi no Israil tamdaw hano micada to sapalifet hani?

¹³ Maˈaraw no Israil tamdaw tano toˈem, fitiliˈato roma kaciˈangian a demak paihkal ci Yihofa to ˈicel no Niyah, matalaway cangra, mansa mitahidang ci Mosian patado cangranan a pasowal ci Yihofaan. (Kasadakan 20:18-21) Macokacok ci Mosi tayra i Sinay Lotok, halafinay materek itira. Malahdawayto ko ˈaˈideman niyam sanay ko Israil tamdaw, wa marofo i kohkoh sanay. Ano nengnengen i, pakidemay ko pitiˈer nangra ci Mosian. Rawraw sanay a pasowal ci Aronan: “Caay ka fanaˈkita to nika o talacowaayto ci Mosi o mikriday i titaanan a pasadak nai Icip. Saka, sangaˈen ko mamalo mamikrid i titaanan a kawas,” han nangra.​—Kasadakan 32:1, 2.

14. (1) Samaanay misakaniw ko Israil tamdaw to niyah hani? (2) Samaanay ko harateng ni Yihofa ko waywayan nangra hani?

¹⁴ Mafanaˈay ko Israil tamdaw to pakidemay a raraw ko mitaˈongay to samiyay, kawrira misatapangay cangra nohatni a mitaˈong to ekim a kolong! (Kasadakan 20:3-5) Mafanaˈay ko Israil tamdaw to cowa ko midofdofay mihaen to demak, misakaniway to niyah to midopoay ci Yihofaan konini, mangalef o ‘misalisinay ci Yihofaan’ ko mitaˈongay to ekim a kolong, sanay ko sowal ni Aron. Samaanay ko harateng ni Yihofa to hatiniay a waywayan nangra hani? O misafelitay cangra sanay ko harateng Ningra. Pasowalan ni Yihofa ci Mosi, “kasimelangan ko demak nangra,” “miliyasto cangra to limoˈot [Ningra.]” ‘Mangolaway cangranan’ ci Yihofa, sapalaˈafoaw toniya faelohay a kitakit.​—Kasadakan 32:5-10.

15, 16. Samaanay ci Mosi aci Aron paihkal to midopoay ci Yihofaan ko niyah hani? (Nengnengen ko satapangan coka.)

¹⁵ Ikorto, cowato ka palaˈafoen ni Yihofa ko Israil tamdaw, ho ira ko toki no madimadiay tamdaw paihkal to fanekfekay ko niyah midopo Cingranan. (Kasadakan 32:14) Malikelon ci Mosi i lotok, maˈaraw ko finawlan—i ˈaˈayaw no ekim kolong maacang a mawaho, romadiw makero—todohan ningra koya kolong miilang pala ponpon. Sataˈangay sa to ngiha ci Mosi a pasowal: ‘Cima ko midopoay ci Yihofaan? Katayni takowanan!’ Teloc, ‘masaˈopoay ko Lifi tamdaw tayra cingranan.’—Kasadakan 32:17-20, 26.

¹⁶ Soˈlin misangaˈay ci Aron to ekim a kolong, kawra soˈlinay a pasasiyor cingra a kalacafay  to Lifi tamdaw midopo ci Yihofaan. Oniya madimadiay tamdaw miliyasay to misafelitay a tamdaw, paihkal to kalacafayay ko niyah ci Yihofaan. Tada inanengay mihaen to demak, samanen toya romiˈad pinaay patek a tamdaw pakayni pitaˈong to samiyay ko saka patay. Oya midopoay to Kawas a tamdaw, mikiˈokan no Kawas to papalemeden cangra.​—Kasadakan 32:27-29.

17. Mikitini i sarikec ni Pawlo, wa mananam ita ko manan?

¹⁷ Milengoay ci Pawlo to ekim a kolong halo pisadak to sarikec: “O sakaira nonini a demak i, o sapalimoˈotaw i titaanan to . . . Aka ka matiya o romaroma nangra kamo a mitaˈong to samiyay. O sakapitilid tonini i, o sapalimoˈotaw i titaanan. . . . o tanektekayto ko nika tomireng ako, yasanay ko harateng a tamdaw i, naˈonen ko demak to sakacaaw ka tefad.” (1 Korinto 10:6, 7, 11, 12) Mihaen o sowal ni Pawlo, o midokoay to Kawas a tamdaw wa midemak to tatiihay a demak alatek. Oniya marefongay i sakayhid a tamdaw mihaydaay ci Yihofa cangranan sanay miharateng. Kawrira, o piharateng aca no tamdaw misawidang ci Yihofaan, anca madimadiay ko niyah to Kawas saan ko sowal, cowa pitaypiyaw konini to milifokay ko niyah to hemek no Kawas.​—1 Korinto 10:1-5.

18. O maanan ko mamikidat kitanan miliyas to Kawas hani? Wa paira to maanan a teloc hani?

¹⁸ Pakayni kanayar ni Mosi i Sinay Lotok marawraway ko Israil tamdaw, o Krisciyang anini pakayni kanayar no pisawkitan romiˈad ato faelohay hekal wa marawraw alatek, wa halafinho a malaˈosi koniya makapahay tokel, anca cowa ko mamalaˈosi, saan miharateng. Ano caka falahen ita ko hatiniay harateng, wa pasayrato i no dafongan a micangacang halatek, misakahmaw to araaw ni Yihofa. Palidlid sato kita a miliyas to Kawas alatek, salikor midemak to nacowaho ka harateng no niyah a demak.

19. Haratengen ita ko maanan hani? Miharateng toni hano o kalimlaan hani?

¹⁹ Haratengen ita, misaaliay ci Yihofa to finawlan Ningra misarocod to falocoˈmidofdof ato misacecay a maolah Cingranan. (Kasadakan 20:5) Ano eca ka pidofdof kita to araaw no Kawas, wa mitoor to harateng ni Satan a dademak, salikor ka adayayan a teloc. Patalipaˈelalay ci Pawlo kitaanan: “Tona minanom kamo to takid [ni Yihofa] saka, caayto ka ngaˈay kamo a minanom to takid no palafoay a kawas. Tona mikapot kamo i tahka [ni Yihofa] saka, caayto ka ngaˈay kamo a mikapot i tahka no palafoay a kawas.”​—1 Korinto 10:21.

20. Samaan ci Yihofa padama to mararaway a tamdaw hani?

²⁰ O sasinanoten i, ci Kain, ci Solomon ato i Sinay Lotok a Israil tamdaw, iraay ko toki nangra pasasiyor, patatikol. (Dmak 3:19) Cowa ka ranikay ci Yihofa a misawad to mararaway a tamdaw, tinakoen, misododan ni Yihofa ci Aron. Anini, patalipaˈelalay ci Yihofa kitaanan, pakaynian Ningra i Fangcalay Cudad, mitepangan cudad, sidaˈitay a limoˈot no Krisciyang a padama kitaanan. Tengilen ita ko limoˈot, wa ngaˈay pasoˈlin tatano sidaˈitay ko sapicada ni Yihofa kitaanan.

21. Wa misetek kita to falocoˈmidemak to maanan hani?

²¹ O mikiriwiˈay a sidaˈit ni Yihofa ngaˈayay palaˈosi to makapahay araaw Ningra. (2 Korinto 6:1) Oniya sidaˈit pairaayto toki ita ‘mifalah to cowa ka ngodo a falocoˈato coos no hekal’. (ˈOsien ko Titus 2:11-14.) Ano itiniho kita toniya lekakawa a maˈorip, o pisacecay a maolah ci Yihofaan wa tahacada to sapalifet alatek. Nanay fanekfek kita midopo ci Yihofaan, misetek to falocoˈ, mihodop ato madimadi Cingranan!​—Limoˈot 10:20.