Minanam Siniˈada to “Polong a Tamdaw”
PAKAFANAˈAY ci Yis to nisawawaan samaanan patenak to ngaˈayay a lihaf i, cowa ka sahto sa makahi mitengil ko ˈalomanay to lihaf no Hongti Kitakit. (Luka 10:3, 5, 6) Anini mitosilay kita i, malitemohay ko tatiihay ko waywayan ato mariˈangay a tamdaw alatek. Malitemoh ko hatiniay a tamdaw i, alatek pasangaray a padotoc paihkal to siniˈadaay a falocoˈ cingraanan.
O cisiniˈadaay ko falocoˈ a tamdaw, cipinangay to o maanan ko saali no tao, tahalifaay to maanan a pasangar. Sidaˈitay cingra toniya tamdaw, sapidamaaw cangranan. Ano cato ka siniˈada kita to mitosilan i, o fanekfekay mitosil a falocoˈ wa malahdawto, wa awato ko ngaˈayay a minaroˈan. Kawra, ano minanam kita to siniˈadaay to tamdaw i, wa padotoc ko fanekfekay a falocoˈ mitosil, mahecad o kasoy ngaˈay marengreng ko namal.—1 Tisalonika 5:19.
Ano caka olah ko matosilan i, wa samaan kita palahad to siniˈadaay a falocoˈ hani? Dotoc lengoen ita ko taˈarawan ni Yihofa, Yis, ato tarokos ci Pawlo.
TODONGEN CI YIHOFA SINIˈADA TO TAO
Mapakangodoay ko fangcalay ngangan ni Yihofa, pakayni toni i pinaay to patek a miheca ko piemem Ningra. Kawra, padadotocay Cingra a misangaˈay to “sidaˈit ko Kawas i mafokilay to siniˈada ato tatiihay a tamdaw.” (Luka 6:35) Samaanan no Kawas misangaˈay cangra hani? Mihadidian cangra. O tokel Ningra i, “polong no tamdaw” o hangangaˈay a malidong o sanay. (1 Timoti 2:3, 4) Soˈlin ˈintehay ko Kawas to tatiihay a demak, kawra limlaay Cingra to kahacecay a tamdaw, cowa ka kahi malaˈafo ko tamdaw.—2 Pitiro 3:9.
Ihkalay mafanaˈ ci Yihofa, misakaniwan ni Satan ko cowa pakasoˈlin to kimad a ˈalomanay. (2 Korinto 4:3, 4) Iraay ko ˈalomanay tamdaw, kaemangho minanamay to mararaway a pihakelongan, ato tatiihay a waywayan, mansa, pasangaray a micada to soˈlinay kimad. Nikawrira, ciharatengay ci Yihofa to sapadamaaw to hatiniay a tamdaw, hano mihaen ko sowal hani?
Nengnengen no mita samanay ko harateng ni Yihofa to Ninifi a tamdaw. Mariˈangay ko waywayan no Ninifi a tamdaw, kawra pasowalan ni Yihofa ci Yona: “Caay ka ikaka ko nika limla Ako a adayay tonini a tataˈangay a niyaroˈ no Ninifi saw? Nawhani ira itini tonini a niyaroˈ ko tosa ko safaw a ˈofad (120,000) a mafokilayho to raraw . . . adihayay a pinaˈorip.” (Yona 4:11) Mafanaˈay ci Yihofa, o Ninifi a tamdaw cowa ka fanaˈ Cingranan, cowa cipinang to soˈlinay kimad, mansa sidaˈitay cangraanan, palimoˈotan ci Yona a malingad mirikec cangraanan.
Todongen ita ci Yihofa, misalimla to cecacecay a tamdaw, misaˈicel a padama to makahiay a mitengil to ngaˈayay lihaf a tamdaw, soˈlin isatapang cowa ka olah cangra, aka a sawaden no mita.
TODONGEN CI YIS SINIˈADA TO TAO
Mahecaday ci Yis to ikakarayan a Wama, manengneng ko misaaliay to noˈadingoan a tamdaw, siniˈadaay cangraanan. Matay 9:36 sanay ko sowal: “Nengneng sa ci Yis to finawlan i, saadayay sa cingra, nawhani marawraw cangra a matiya o malafelay a siri to awaay ko pakaenay.” Mahapinangay ni Yis, oniya mitengilay to sapakafanaˈ ningra a tamdaw, macahiway itini noˈadingoan, samanen, itiya o ˈaˈideman no pihakelongan cowa pakafanaˈ cangranan to moecelay a kimad, cowa ka sangaˈayen cangra. Soˈlin mafanaˈay ci Yis, o roma a tamdaw alatek pakayniay i sacona caka pihakelong cingraanan, kamayan cingra ‘pakafanaˈ cangraanan to adihayay a damak.’—Marko 4:1-9.
Misatapang ano caka olah ko tamdaw, hamaan matoled ko falocoˈ no mita
Ano mafalic ko pakayraan no tamdaw, wa ira ko coka hecad a pinengneng to soˈlinay kimad alatek
Anini ora mitosilan no mita cowa ka olah tora ngaˈayay lihaf, misaˈicel kita cipinang hano mapiliˈ cangra. Alatek pakayniay i tatiihay waywayan no misa o Krisciyang a tamdaw, pairaayto tatiihay no kapinengneng to Fangcalay Cudad ato Kristokiyo? Alatek matengilay nangra ko sapaoraf a sowal pakayni kitaanan? Anca, matalaway micada to pihakelongan no mita, a matawa ko paro no lomaˈ ato fiyafiyaw?
O roma a tamdaw alatek tahalifaay to kararoman isaˈayaw madokaˈay ko falocoˈ, mansa cato ka olah mitengil to lihaf no Fangcalay Cudad. O cecay ci Kimmi a milakowitay to riyar a misakafahay, sanay ko sowal ningra: “Itira pitosilan a kilac, ˈalomanay a tamdaw pakayniay i mafafolaway awaayto ko maamaan, masomaday cangra, awaay ko hanoikor a nonoˈ, cowa pakasoˈlin to cimacima a tamdaw. Itini kami mitosil maceriday macada ko safelit, maˈodisay no tamdaw i pitosilan kako.”
Soˈlin macada ni Kimmi ko mariˈangay, siniˈadaayho cingra to mitosilan a tamdaw, samaanay ko piremo ningra to pidemak hani? O sowal ni Kimmi: “Ano tatiih ko tamdaw takowanan i kilac i, patalipaˈelalen ako ko niyah toya sowal i Taneng 19:11, sanay ko sowal no sinael: ‘O citanengay a tamdaw i, caay ka narikay a maketer.’ Maharatengay ako mahalifaay a demak nangra, wa madolo to a siniˈada cangraanan. Itini cowa ka sahto sa ko tamdaw a misaˈada tamiyanan, o roma tamdaw mahemakay mitengil, ngaˈayay kami padadotoc a milisoˈ cangraanan.”
Wa ngaˈay haratengen no mita: “Ano mahecaday ko pakayraan ako tora mitosilan a tamdaw, wa samaan ko harateng ako to lihaf no Hongti Kitakit hani?” Ano tatengil han ita ko tatiihay a sowal pakayni i Misawacayay Tamdaw ni Yihofa, alatek cato sapitengilaw to lihaf no Fangcalay Cudad. Ano mihaen i, misaaliay kita to siniˈada no mitosilay. Masowalay ni Yis, ano o maan a demakan no tao ko kaolahan no mita i, mahecad ko pakayraan to tao. Ano haratengen no mita ko sapalimoˈot ni Yis, itini i pasangaray a pakayraan wa madolo siniˈada to tao.—Matay 7:12.
TODONGEN CI PAWLO SINIˈADA TO TAO
Tarokos ci Pawlo itini tora pakidemay misafelit cingraanan a tamdaw i, kamayan ira ko siniˈadaay a falocoˈ. Hano ngaˈay cingra mihaen to demak hani? Samanen, maharatengay ningra ko nano demak no niyah, sanay ko sowal ningra: “Talacowa nano milokesay, o mikariˈangay, o misamsamay kako Cingraan, nikawrira, siniˈada ko Kawas takowanan. Nawhani caho pipasoˈlin kako Cingraan itiya. Caay ka fanaˈ kako to tatodong no nidemakan ako.” (1 Timoti 1:13) Mafanaˈay ci Pawlo, ci Yihofa aci Yis, siniˈadaay cingraanan, alatek i mitosilan a tamdaw maˈaraway ningra ko isaˈayaway a niyah, mansa ngaˈay cingra a siniˈada to tao.
Mitosil ci Pawlo i, tahalitemohay to tangongol ko pakasoˈlin to mararaway a kimad a tamdaw. Samaanay to cingra hani? Masowalay itini Dmak 17:16, itiniay ci Pawlo i Atinan “maˈaraw ningra ko nika adihay no samiyay toya niyaroˈ. Saka, mararom ko falocoˈ ningra.” Soˈlin hatira, sakadademakan ni Pawlo ko mitaˈongay to samiyay a sasowal, ciepoc ko pisawacay cangraanan. (Dmak 17:22, 23) Samaanay ko malitemohay ni Pawlo a mitosil, misalofan ko pakayraan a mitosil, ora araaw i, “sapipaˈoripaw to papinapina nangra.”—1 Korinto 9:20-23.
Mafanaˈay kita ano mitosil wa malitemoh ko tatiihay ko waywayan ato pakasoˈlinay to mararaway kimad a tamdaw, wa ngaˈay kita minanam ci Pawloan, misaka dademak to cowa ka hecad a pakayraan mipatenak to ‘ngaˈayay lihaf no makapahay demak’. (Isaya 52:7) O cecay ci Torosi fafahiyan salikaka sanay: “Itini pitosilan niyam a kilac, maˈdesay ko Kawas sanay ko ˈalomanay tamdaw, patelas sanay misawkit to raraw no tamdaw sanay. Ano pakasoˈlin ko tamdaw to iraay ko Kawas wa pakahemeken ita cingra, dotocto papisinanoten cingra to sowal no Fangcalay Cudad o sidaˈitay a Kawas ci Yihofa, paˈarawenho cingra to misadakay ko Kawas to maanan a sakiˈok pakayni hanoikor a tokel.”
“KAO NGAˈAYAY KO SAPILOWID TO TAIIHAY”
Itini ‘salikoray romiˈad’ maˈorip, mingata mingata kita to salikoray noni lekakawa, wa maˈaraw ko waywayan no roma tamdaw ‘matongal ko tatiih’ to ngaˈayay lihaf. (2 Timoti 3:1, 13) Kawraan, hamaan pakayni tatiihay waywayan no tamdaw, malahdaw ko siniˈadaay falocoˈ ato lipahak. Wa pafeli ci Yihofa to ˈicel kitaanan, ho ngaˈay kita “kao ngaˈayay ko sapilowid to tatiihay.” (Loma 12:21) O cecay misakafahay fafahiyan salikaka ci Cisika, sanay ko sowal: “Marariday malitemoh ako ko misatakalaway a tamdaw, macangalay cangra kitaanan, cowa ko kalimlaan ko patenakan ita a lihaf sanay, tatiihay ko harateng ako. Misatapang a masasowal i, mitolonayho kako ci Yihofaan, micangacang Cingranan padama takowanan tano Ningra a harateng minengneng to mitosilan a tamdaw. Mihaen to demak padamaay takowanan hamaan misamacay to harateng no niyah, sasamacayen ko harateng i papadamaen a tamdaw.”
Wa padotoc kita a mikilim to ‘citatodongay milifok to tahadaˈocay ˈorip a tamdaw’
Mihadidi kita a mitosil to tamdaw, salikor wa ira ko ngaˈayay harateng no tamdaw halatek
O roma, wa miharateng kita to sasamaan pakalalok to cafay ita a mitosil. Sanay ko sowal ni Cisika: “Ano mitosil i, ira ko tatiihay a malifaay no cecay tamdaw, cowa ka pilomal kako toniya demak. Oya tawlikay a lalangian ko misowalan ako, tinakoen, soˈlin malitemoh ko tatiihay ko waywayan a tamdaw, kamayan ira ko ngaˈayay a minaroˈan niyam a mitosil.”
Ihkalay ci Yihofa mafanaˈ to malifaay ita a pasangaray i pitosilan, mihaenay ano maˈaraw ningra ko pitodong ita Cingranan siniˈada to tao, maedeng o tataˈangay ko hemek. (Luka 6:36) Kawra, cowa ko aawa ko tolas ni Yihofa a siniˈada to tamdaw, itini matatodongay a toki wa palahdawen Ningra koniya ciraraway a lekakawa. ˈAyaw no maraod koya romiˈad, macalohay ko mitosilay a demak. (2 Timoti 4:2) Mihaenay, wa padotoc kita fanekfek a mitosil, siniˈada to “polong a tamdaw”.
