ITINI Fangcalay Cudad adihayay ko ‘malecaday kitaanan ko harateng,’ a tamdaw. (Yakop 5:17) Tinakoen, ci Pawlo itini i Loma 7:21-24 pasowalay to harateng no niyah: ‘Sapidemakaw kako to ngaˈayay a demak i, iraay ko mararaway harateng misifeday takowanan. . . . Tada marorayayto kako!’ Mafanaˈ to malecaday kitaanan ko harateng ni Pawlo, cowato ko mamatoled kita.

Nikawrira pasoˈlinay ci Pawlo to cecay demak, sanay cingra: ‘Maolahay [ko wawa no Kawas] takowanan, pakayni takowanan mifalah to niyah.’ (Kalatiya 2:20) Malecaday ci Pawloan ko pinengneng iso han? Latekay, cowa ka haen ko piharateng iso.

Pakayni raraw ita i salakat, awaay ko tatodong no niyah kaolahen ato sododen ni Yihofa, sanay miharateng, awaayho ko tatodong micada to sapatefoc a sapatelong. Wa ngaˈay kita miharateng: Tokel ni Yis takowanan o pinengneng to sapatefoc, o sapatelong takowanan han? Sasamaan ngaˈ mahaen ko pinengneng ako hani? Dotoc lengoen ita koniya tosa salicay.

Tokel ni Yis o pinengneng ita to kinafalah ningra, o sapatelong to kahacecay a tamdaw. Hano pakasoˈlin kita tonini hani? Haratengen ita ko Luka 23:39-43. Itihiay ni Yis a faˈinayan, taˈangayay ko raraw mansa mipacekan i pisemseman a hecek. Pasayraay ci Yisan mihayi to raraw no niyah, halo pingitangit a pasowal: ‘Micada kiso to fadangalan no hongti i, nanay haratengen kako.’

Samaanay ci Yis pacaˈof hani? Haratengen sapalaliyocaw ci Yis to fongoh minengneng tora tamdaw, tada adadaayto, misaˈicelayho a masedi ko pising, mikiˈok cingranan: ‘Soˈlinen ako pasowal kiso anini, wa kalacafay kiso takowanan i Lakoing.’ Na ngangaˈay pasowal ci Yis toya mararaway tayni cingra i hekal, o ‘papatafang to ˈorip, malo sapatefoc no tamdamdaw.’ (Matay 20:28) Cowa pihaen ci Yis, pasowalay ci Yis to kinafalah no niyah. Madaˈmaˈay a somowal to “kiso” ato “kako,” somowalayho wa itini fafekang no sera a lakoing koya tamdaw a maˈorip.

Sapasifanaˈaw ci Yis toniya mararaway tamdaw, o sapatefoc o sapafeli cingranan a sapatelong. Soˈlin awaayho ko toki pasasiyor cingra, kawra mitokelay ci Yis mihaen ko pinengneng ningra to sapatefoc. Ano hatiraay i, coko mamitokel ci Yis to pasasiyorayto micadaay to inoˈ a Krisciyang, mihaen ko pinengneng to kinafalah ningra han? Ano pakayniay i salakatay a raraw ko katoled iso, sasamaan a pakasoˈlin kiso to o sapatelong tisowanan ko kalimlaan a sapatefoc hani?

Mikitini mitosilay a demak mahapinangay ni Pawlo to samanay ko kalalaˈed no niyah to sapatefoc,  sanay cingra: “Mikansiya kako to Tapang ita ci Yis Kristoan. Nawhani o paˈicelay cingra i takowanan. Matatodongay a nengnengen ningra kako saka, toroˈen ningra kako a pakatayal to tayal ningra. Talacowa nano milokesay, o mikariˈangay, o misamsamay kako i cingraan.” (1 Timoti 1:12-14) Patorodan ni Yis ko mitosilay a ˈinorong ci Pawloan, mahapinangay ningra to maolahay, misododay, pakasoˈlinay ci Yis cingraanan. Anini, miocoray ci Yis kitaanan midemak to mitosilay. (Matay 28:19, 20) Oniya tayal o papadama kitaanan pakasoˈlin to o sapatelong kitaanan ko sapatefoc han?

O cecay ci Apote a salikaka 34 miheca a mafalah, caka halafin patatikolay i likakawa ni Yihofa, sanay: “Marariday maharateng ako ko raraw no niyah, kawra, ano mitosil kako i, hato malecaday ci Pawloan, manilnilay ni Yis a mitosil. Mihaen ko harateng cowato ka matoled ko falocoˈ ako, iraay ko tawlikay a harateng to hano ikor a kaˈorip.”—ˈOlic 51:3.

Cecay salikaka ci Alan, ˈayaw no minanam to Fangcalay Cudad, o hinatiˈilay cingra, adihayay ko raraw. Sanay: “Maharatengayho ako ko tatiihay a demak no niyah. Latekay matoleday kako. Kawra mahareteng ko pisakadademak ni Yihofa takowanan a patenak to ngaˈayay lihaf, tada miakoˈiday kako Cingranan. Mikitini i picada no tao to ngaˈayay lihaf mahapinangay ako, soˈlinayto a ngaˈay ato ciolah ci Yihofa, mahapinangayho pakaynien Ningra takowanan a padama ko tao, mahawpay koya malecaday takowanan ko kalomahadan a tamdaw.”

O mitosilay a tayal, padamaay kitaanan misamacay to ciepocay a demak, iraay ko tawlikay a harateng. Mahapinangay ita, ci Yis maolahay, misododay, pakasoˈlinay kitaanan.

Itini ˈayaw no malaˈafo ko ciraraway a lekakawa ni Satan, wa pakayniho kita i raraw i salakat a masomad. Sasamaan kita a miremo to mahaenay harateng hani?

O cecay ci Cian fafahiyan salikaka kaemangho misamangahay ko kaˈorip, pakayni i raraw no niyah kamayanho a makesem ko harateng ningra, sanay ko sowal ningra: “Maolahay kako to ‘ikakaay no falocoˈ ita ko Kawas’ sanay a sowal.” (1 Yohani 3:19, 20) Alatek pakidem ko pirikec ita to niyah, kawra mafanaˈay ci Yihofa aci Yis to cowa ka lefot kita, wa tano matatodongay a pakayraan ko pinengneng kitaanan. Haharatengen ita, sidaˈitay ci Yihofa a milimasmas ci Yisan kinafalah to ˈorip, cowa ko malefotay tamdaw ko lalidongen, oya pasasiyoray a ciraraway tamdaw ko lalidongen.—1 Timoti 1:15.

Songilaˈen ita miharateng samanay ko picada ni Yis to cowa ka lefot a tamdaw, ato misaˈicel midemak to mitosilay a demak, mihaen o papakasoˈlin to o sapatelong kitaanan ko sapatefoc. Wa ngaˈay pakasoˈlin kita, malecad ci Pawloan ko sowal, ci Yis “maolahay takowanan, pakayniay takowanan kinafalah to niyah.”