1-2. (1) Pakayni i Matay 28:18-20, o manan ko sakakaay a tayal no kasakopang no Krisciyang hani? (2) Oniya lalakaw papacaˈof to maanan a salicay hani?

PATIKOL a maˈorip ci Yis i, palimoˈotay cingra to tarokos tayra i lotok a masasoˈaraw cingranan, hinatalaay ko tarokos mamifekad ko maanan a demak. (Matay 28:16) Itiya iraay ko “lima a soˈot” a salikaka itira alatek. (1 Korinto 15:6) Hano palisopsopen ni Yis ko nisawawaan hani? Samanen papafelien ni Yis cangra to kalimlaan a ˈinorong, sowal sa cingra: “Katayra kamo a palanisawawaan ako to polong no kasafinawlan.”—ˈOsien ko Matay 28:18-20.

² Ikor oniya nisawawaan masalalomaˈay no saka 1 hahekalan a kasakopang no Krisciyang, o sakakaay a tayal nangra papalanisawawaan ni Kristo to ˈalomanay tamdaw *. Anini i polong no hekal iraay ko 11 emang a kasakopang, mahecad o saka 1 hahekalan a kasakopang ko ˈinorong, o kalimlaan a tayal ita i, o papadama to tamdaw malo Krisciyang. Oniya lalakaw papacaˈof to sepatay a salicay: Padama to tamdaw malo Krisciyang, hano o masaka limlaan hani? Samanen ita midemak hani? Cecacecay a Krisciyang sahto mamidemak toniya tayal han? Oniya tayal hano misaaliay to mihadidiay a capeling hani?

3. Mikitini i Yohani 14:6 ato 17:3, padama to tao malo Krisciyang hano o masakalimalaan a demak hani?

³ Padama to tamdaw malo Krisciyang, hano o masaka limlaan hani? Samanen edengan malo Krisciyang ko tamdaw ngaˈ, ngaˈay mala widang no Kawas. O roma i, oya mikotoday ci Yisan a tamdaw, coko lipahak aca ko ˈorip, salikor mamalifok ko tahadaˈocay a ˈorip. (ˈOsien ko Yohani 14:6; 17:3.) Taˈakayay ko ˈinorong ita, kawra, coko inaneng no niyah ko sapilahci toniya tayal, sowal no tarokos ci Pawlo, cingra ato kalacafayay cingranan a matayal sahtoay o ‘kapot no Kawas’. (1 Korinto 3:9) Paikenan ni Yihofa aci Yis ko cowa ka lefot a tamdaw toniya kalimlaan a tayal, tada kalikoan tono mita!

4. Pakayni i nalifetan ni Ifan aci Matilte, mananamay ita ko maanan hani?

⁴ Padama to tamdaw malo Krisciyang tada mahemekay kita, nengnengen ko itiniay i Koronpiya kitakit a nalifetan ni Ifan aci Matilte, cecay romiˈad misawacayan nangra ko cecay kapah ci Tafier, o mifosingkoay ko tayal ni Tafier, caho ka raramod, matatekoay to fafahiyan ci Irika, mihelipayho to etok haliepahay cingra. Sowal sa cingra: “Sapifalicaw kako to kaˈorip, kawra pasangaray a mafalic.” Ikor, misatapangay cingra minanam to Fangcalay Cudad. Sowal ni Ifan: “Maraayay ko lomaˈ ni Tafier, citingsiya kami i maronaronay a lalan to pinapina a toki ngaˈ tahira. Ikor maˈaraway no fafahiyan widang ko kafalic no waywayan ni Tafier, misatapangay ci Irika minanam to Fangcalay Cudad.” Ikor misawaday ci Tafier mihelip to etok ato epah, cowato pifosingko cingra, mitingkiay to raramod aci Irika. Sowal ni Matilte: “Ya micada to ˈino ci Tafier aci Irika i 2016 miheca, matemeray ko falocoˈ tomangicay kami, samanen i saˈayaw pasowalay ci Tafier to ‘Sapifalicaw kako to kaˈorip, kawra pasangaray a mafalic.’” Pakayni toniya tinakoan, mahapinangay ita padama to tamdaw malo Krisciyang tada mahemekayto.

5. Ano sapadamaaw to tamdaw malo Krisciyang i, i salakat midemak kita to maanan hani?

⁵ Ano sapadamaaw to tamdaw malo Krisciyang i, i salakat ‘kilimen’ ita ko makalimay sakafanaˈaw ci Yihofaan a tamdaw. (Matay 10:11) Misawacay kita to malitemohay a tamdaw ngaˈ, o soˈlinay a Misawacayay Tamdaw ni Yihofa. Dofdofen ita ko limoˈot ni Yis a mitosil, misawacay to o soˈlinay a Krisciyang ko niyah.

6. Samaanen ita ngaˈ mamilifok to ngaˈayay a minaroˈan i pitosilan hani?

⁶ O roma tamdaw makalimay minanam to Fangcalay Cudad, kawra malitemohay ita a tamdaw i satapang cowa ka olah minanam. Mansa kidaten ita ko kalim nangra, songilaˈen misimsim a misaday, mihaen ngaˈ milifok to ngaˈayay a minaroˈan i pitosilan. Haratengen o manan a lalangian ko kaolahan no tamdaw, ato sasamanen masasowal toniya lalangian.

7. (1) Samaanen ita malalengo to lalangian no Fangcalay Cudad hani? (2) Songilaˈen mitengil ato mikangodo to tao, hano o masakalimlaan hani?

⁷ Tinakoen, ngaˈay pasowal to: “Ngaˈay tengilen ako ko harateng iso ha? Anini adihayay a pades milingatay to polong a tamdaw, o tamdaw misaaliay to cecay a sifo, misaysay to pades no tamdaw han?” Ikor ngaˈay lengoen ko cilomaˈay to Taniil 2:44 a sinael. Anca licayen to: “Samanen pasifanaˈ ko wawa malo mitengilay to sowal hani?” Ikor ngaˈay lengoen ko Limoˈot 6:6, 7 a sinael. Ano o manan ko milengoan  a lalangian i, haharatengen to samanen padama ko tamdaw mikitini i sinael a milifok to haepoc. Ano masasowal to tamdaw i, songilaˈen a mitengil mikangodo to harateng ningra, mihaen ngaˈ cipinang kita to harateng no tao, o taoto i, mamakahi mitengil to sowal ita.

8. Hano papadadotoc a milisoˈ hani?

⁸ Wa adihay ko mapalakay ita a toki ato ˈicel a milisoˈ to cecay tamdaw, makahito a minanam to Fangcalay Cudad cingra alatek. Samanen awaay i lomaˈ anca awaay ko toki ningra a masasowal kitaanan, wa kinapina masasoˈaraw cingranan, ngaˈ makahi cingra a minanam. Malecaday konini to caceriden a micefos to nanom ko pinaloma ngaˈ lomahaday, o mamicerid kita a malalengo to tamdaw to Fangcalay Cudad, ngaˈ ngaˈay padama cingranan palahad to kaolah ci Yihofaan aci Yisan.

9-10. Ano mahela ko makahiay a mikotod ci Kristoan a tamdaw, hano o ˈicel no kahacecay a Krisciyang hani?

⁹ Sapikilimaw to makahiay mikotod ci Kristoan a tamdaw, o kahacecay Krisciyang wa ngaˈay mihadak to ˈicel. Oniya tayal malecaday to mikilimay to mahidayay a wawa. Hano haenen ko sowal hani? Nengnengen ko cecay soˈlinay nalifetan, o cecay 3 ko mihecaan a faˈinayan wawa mahidayay, 500 ko mikilimay a tamdaw. Ikor no mahiday cingra to 20 tatokian i, mahelaay no cecay mikilimay a tamdaw i ecan no ˈariray cingra. Kawra, o niyah a ˈicel ko sakahela cowa pihaen ko harateng noya pakahelaay, sanay ko sowal “O ˈicel no ˈalomanay ko sakahela noniya wawa.”

¹⁰ Anini, malecaday oniya mahidayay a wawa ko ˈalomanay tamdaw cowa ka fanaˈ to papasicowa ko rakat. Matoleday cangra, misaaliay  to papadamaen. (Ifiso 2:12) Polong no hekal 800 emang a Misawacayay Tamdaw ni Yihofa misaˈicelay mikilim to hatiniay a tamdaw. Cowa ka hela iso ko makahiay minanam to Fangcalay Cudad a tamdaw alatek, kawra mahelaay no roma salikaka i malecaday a kilac. Ano mahela no salikaka ko hatiniay tamdaw a padama cangranan malo Krisciyang i, cowa ko niyah a ˈicel, o polong a Krisciyang wa malecad a lipahak.

11. Soˈlin awaay ko pacekiwan iso a tamdaw, wa ngaˈayho kiso midemak to maanan hani?

¹¹ Soˈlin awaay ko pacekiwan iso a tamdaw, wa ngaˈay mihadak to ˈicel padama to tamdaw malo Krisciyang. Tinakoen, ano ira ko faelohay tamdaw mirienang to saˈopo i, wa ngaˈay kiso mihamham a padama cingranan. Ciharateng kiso cingranan, wa mahapinang ningra iraay ko olah ita, o soˈlinay a Krisciyang. (Yohani 13:34, 35) Roma i, pacaˈof kiso masaˈopo, soˈlin kantangay ko caˈof, o mamafanaˈ ko satapang sanayho mirienang to saˈopo a tamdaw, sasamaan mikitini falocoˈ ato mikangodoay a waywayan paihkal to pakasoˈlinan no niyah. Wa ngaˈayho kiso malacafay to misatapangay mitosil a tamdaw, padama cangranan misaka dademak to Fangcalay Cudad a masasowal to tao. Mihaen ko demak iso, o padamaay cingranan mitodong to taˈarawan ni Yis.—Luka 10:25-28.

12. Ciinaneng kita ngaˈ ngaˈay padama to tao malo Krisciyang han? Tinakoen.

¹² Coko ciinanengay aca a tamdaw ngaˈngaˈay padama to tao malo Krisciyang, nengnengen ko tinakoan ni Fostina, itiniay i Polifia a kitakit cingra, i salakat malitemoh no Misawacayay Tamdaw cingra i, cowa ka fanaˈ to tilid. Ikor cedeng sanay cingra minanam to tilid, kawra cowa ka fanaˈho cingra miˈosi. Ikor micadaay to inoˈ ci Fostina, maolahay cingra pasifanaˈ to tao minanam to Fangcalay Cudad, cecay a lipay misikayay to 5 a pacekiwan. Soˈlin o inaneng ni Fostina coka hecad toya mikingkiway, kawra iraay ko 6 a picekiwan ningra micadaay to inoˈ.—Luka 10:21.

13. Soˈlin ˈifowaay kita, wa ngaˈayho mikitini pisikay to pacekiway milifok to maanan haepoc?

¹³ Sapidimokosaw to kalimlaan a ˈinorong, ˈifowaay ko ˈalomanay Krisciyang, kawra kamayan ngaˈay mihadak to toki a misikay to pacekiway, hanaca mikitini milifok to taˈangayay a lipahak. Itiniay i Alasika ci Milani, misaromiˈaday ko tayal ningra, cowa ko pidipot aca to 8 ko mihecaan a wawa, midimokosayho to ciekangay a wama. Maraayay ko kitiraan ni Milani, cecayay cingra o Misawacayay itira. Makalimay cingra mahela ko makahiay minanam to Fangcalay Cudad a tamdaw, mansa miceriday micangacang ci Yihofaan pafeli to ˈicel, padama cingranan i kasienawan malingad  a mitosil. Cecay romiˈad, mitosilan ni Milani ci Sara, pasifanaˈ cingranan to iraay ko ngangan no Kawas. Tada mahemekay ci Sara itiya, ikor minanamay to Fangcalay Cudad. Sowal ni Milani: “Tahini Pilimaan a dadaya, soˈlin malotayay kako, miˈorongan ako ko wawa malalengo ci Saraan to Fangcalay Cudad, malifokay ako ko adihayay a epoc. Maolahay kako mikilim to lalakaw sapacaˈof to salicay ni Sara. Maˈaraw cingra a malo widang ni Yihofa, tada lipahakay kami.” Salikor, cowa ka talaw ci Sara to safelit, liyas sanay to kiyokay, micada to inoˈ malo Misawacayay Tamdaw ni Yihofa.

14. (1) Padama to tamdaw malo Krisciyang ato mifotingay a tamdaw, o manan ko kalecadan hani? (2) Pakayni i saka 2 Timoti 4:1, 2, mananamay iso ko maanan hani?

¹⁴ Soˈlin awaay mahapinang ko ngaˈayay minaroˈan a mitosil, o papadadotoc kita mikilim to mamalo Krisciyang a tamdaw. Patinakoan ni Yis ko pala nisawawaay a tayal to mifotingay. Adihay ko mapalakay a toki no mifotingay ngaˈ iraay ko malepelay a foting, alatek misalafiiay anca pacelemay cangra a matayal, latekay tayraay i raay a mifoting. (Luka 5:5) Malecaday, sakangaˈayaw mitosil to ˈalomanay tamdaw, o roma Krisciyang itiniay cowa ka lecad a kilac anca toki mihadidi a “mifoting”. Samanen adihayay ko mihadakan a ˈicel, adihayay ko mahelaay no salikaka makalimay minanam to Fangcalay Cudad a tamdaw. Sapikilimaw to ˈalomanay tamdaw, sapitanamaw kiso itini cowa ka lecad a toki ato kitiraan a mitosil han?—ˈOsien ko 2 Timoti 4:1, 2.

15. Pasifanaˈ to pacekiwan hano pairaen ko mihadidi hani?

¹⁵ Pasifanaˈ to pacekiwan to Fangcalay Cudad  hano misaali to mihadidiay hani? Samanen cowa ko padama aca ita to pacekiwan cipinang ato maolah to kimad no Fangcalay Cudad, papadamaenho cangra mafanaˈ ato maolah to pipowalan no Fangcalay Cudad ci Yihofaan. Cowa ko padama aca to pacekiwan mafanaˈ to limoˈot ni Yis, padamaenho cangra minanam a midofdof toniya limoˈot. Pasangaray alatek ko pacekiwan misaka dademak to safalod no Fangcalay Cudad, mansa wa mihadidi kita a padama cingranan. O roma pacekiwan pina folad ngaˈayay to misalof to harateng ato nanaman no niyah, o roma misaaliay to halafinay toki ngaˈ mafalicay.

16. Pakayni i nalifetan no milakowitay to riyar a mitosilay, mananamay iso ko maanan?

¹⁶ Ira ko mihadidiay to pacekiwan wa ira ko maanan ngaˈayay minaroˈan hani? Itiniay i Milo a milakowitay to riyar a mitosilay, iraay ko mahaenay nalifetan, sanay: “O cecay faˈinayan ci Lawer malahciayto ko tosa cudad milengo, adihayayho ko raremoen a pasangaray, tinakoen cowa pakasawad to nanaman a somowal to kaacekan, marariday malacongis to fafahi, cowa pikangodo ko wawa cingranan. Kawra, kamayan micerid mirienang to saˈopo cingra, mansa padadotocen ako padama cingra ato paro no lomaˈ ningra. Ikor no 3 miheca, citatodongayto cingra micada to inoˈ.”

17. Nocila lipay wa milengo to maanan a lalakaw hani?

¹⁷ Palimoˈotay ci Yis kitaanan padama to polong kitakit a tamdaw malo Krisciyang, pakayni sapilahciaw toniya tayal, marariday kita masasowal toya coka hecad ko harateng no mita a tamdaw, mahawpay ko awaay ko pidoyongan anca cowa pakasoˈlin to iraay ko Kawas materek a tamdaw. Nocila lipay a lalakaw wa milengo to sasamaan kita patenak to ngaˈayay a lihaf to hatiniay a tamdaw.