1. Itini roma kilac, samanay ko kafalic no pinengneng no tamdaw to pihakelongan hani?

PINAAY caˈol miheca, ˈalomanay tamdaw iraay ko pihakelongan, kawra ingata no pina miheca taˈangayay ko kafalic, ˈalomanay ko awaay ko pihakelongan. Itini roma kitakit, cowa pakasoˈlin to maamaan. *—Matay 24:12.

2. Hano ˈalomaˈaloman ko awaay ko pihakelongan a tamdaw hani?

² Hano ˈalomaˈaloman ko awaay ko pihakelongan a tamdaw hani? * O roma tamdaw misamacayay to ngaˈayay no kaˈorip, anca cariraway to sakaˈorip. (Luka 8:14) O roma tamdaw cowa pakasoˈlin to Kawas. O roma tamdaw pakasoˈlin to, iraay ko Kawas kawra awaay ko sadama i nokaˈorip no tamdaw sanay, cowa ka tatodong to kakak anca masasongtolay ko kimad no pihakelongan sanay. Alatek matengilay nangra ko sowal no widang, singsi anca o sinpon, cowa ko misangaˈan ko sakaira no ˈorip, cowa ka tengil ko iraay ko Kawas sanay a wacay. O roma tamdaw maacekay to maˈanofay to payci ato fadangalan a kakeridan no pihakelongan. Itini roma kilac, makecengay no mikowanay ko tayal no pihakelongan.

3. Oniya lalakaw wa milengo to maanan?

³ Palimoˈotay ci Yis kitaanan padama to ‘polong a kasakitakit a tamdaw’ malo nisawawaan ningra. (Matay 28:19) Sasamanen  ita padama toya awaay ko pihakelongan a tamdaw, maolah to Kawas malo Krisciyang hani? O picada no tamdaw to ngaˈayay lihaf ora kalomahadan ningra ko piˈarawan. Tinakoen, ano malecad a pakayraan ko sapitosil ita to Iwropa ato Asia a tamdaw, cowa ka lecad ko harateng nangra. Hano mahaen hani? Itini i Iwropa, mafanaˈay cangra to Fangcalay Cudad, ato misangaˈan no Kawas ko kihcod sanay a demak. Kawra itini i Asia, cowa ka fanaˈ ko ˈalomanay to Fangcalay Cudad, cowa pakasoˈlin to iraay ko misangaˈay a Tatapangan. Mansa oniya lalakaw papadama kitaanan, ano samaanto ko kalomahadan no tamdaw anca samanay ko pinengneng to pihakelongan, samaan mitemer to falocoˈ nangra i pitosilan.

4. Hano tatawliken ita ko pinengneng to mitosilan a tamdaw hani?

⁴ Tawliken ko Pinengneng. To mihecahecaan ˈalomanay ko awaay ko pihakelongan a tamdaw malo Misawacayay Tamdaw ni Yhofa. Ilalomaˈ iraay ko ngaˈayay ko waywayan a tamdaw, maacekay to kaniw no misasingsiay no kiyokay. Roma tamdaw malafoay ko waywayan a maˈorip, kawra minanam to Fangcalay Cudad mafalicayto ko tatiihay nanaman. Mansa ngaˈay pakasoˈlin kita, ira ko sadama ni Yihofa, o mamahela ita ko ‘citatodongay milifok to tahadaˈocay ˈorip a tamdaw.’—Dmak 13:48; 1 Timoti 2:3, 4.

5. Samaan ko demak ngaˈ ngaˈay ko harateng no mitosilan hani?

⁵ Sidaˈiten ko Pakayraan. Ngaˈay ko harateng no mitosilan, cowa ko pakayniay i somowalay kita to maanan, ao pakayniay i pakayraan ita a somowal. Madaˈmaˈ, sidaˈit a patado kita miharateng, soˈliˈlin a ciharateng cangranan, wa maolah cangra masasowal kitaanan. Cowa ko papacieci kita to tao mitengil to kimad ita, mamisaˈicel a cipinang to soˈlinay a harateng nangra. Tinakoen, roma tamdaw cowa ka olah masasowal to pihakelongan i kafahalan tamdaw, harateng no roma tamdaw milicay to samanay ko pinengneng to Kawas, o awaay ko mikangodoay sanay. Roma tamdaw cowa ka olah maˈaraw no tao to minengnengay cangra to Fangcalay Cudad, mangalef malacafay to Misawacayay Tamdaw ni Yihofa a minengneng to Fangcalay Cudad. Ano samanayto ko pinengneng no tao, oha papatado kita cangranan a miharateng.—2 Timoti 2:24.

6. (1) Tarokos ci Pawlo samanay mifalic to pakayraan a somowal i mitosilan hani? (2) Sasamaan kita mitodong ci Pawloan?

⁶ Ano mapiliˈay ko mitosilan mitengil to “Fangcalay Cudad,” “Misangaˈ,” “Kawas,” anca “Pihakelongan,” sanay a sowal, sasamaanto hani? Ngaˈayay nanamen ita ko tarokos ci Pawlo, falicen ko pakayraan a mitosil. Mitosil ci Pawlo to Yutaya tamdaw i misaka dademakay to Fangcalay Cudad, kawra itini i Ariopakus mitosil to lomaocay no Krisiya i, o tatodong aca no sinael ko mihadakan. (Dmak 17:2, 3, 22-31) Mikitini ci Pawloan mananam ita ko maanan hani? Ano cowa pihayda ko mitosilan to Fangcalay Cudad i, hamaan tangsol sa mihadak to sinael. Ano cowa ka olah ko cilomaˈay maˈaraw no tao minengnengay to Fangcalay Cudad, ngaˈayay tano pingpan paˈaraw cingranan to Fangcalay Cudad.

7. Mikitini maˈoningay i saka 1 Korinto 9:20-23, wa samaan kita minanam to taˈarawan ni Pawlo hani?

⁷ Cipinang ato Pitengil. O mamisaˈicel kita a cipinang to hano mahaen ko harateng no tao. (Taneng 20:5) Nengnengen ita ko taˈarawan ni Pawlo. O Yutaya tamdaw cingra, ano mitosil cingra to ˈalafang a tamdaw i, o mamisalof to pakayraan a somowal, samanen awaay ko kafanaˈan no ˈalafang tamdaw ci Yihofaan ato Fangacalay Cudad. Mihaenay i, ano saka cipinangaw  to harateng no kilacay a tamdaw, kilimen ita ko kalimlaan lalakaw anca licayen ko iraay ko milifetan a salikaka.—ˈOsien ko 1 Korinto 9:20-23.

8. Tano maanan a pakayraan misatapang masasowal to tamdaw to Fangcalay Cudad hani?

⁸ O patosokan ita mamikilim to citatodongay to ngaˈayay lihaf a tamdaw. (Matay 10:11) Mihaenay, papihadaken ita ko tao to samanay ko pinengneng nangra hanaca misongilaˈ a mitengil. Itini i Ikok, o cecay salikaka milicayay to mitosilan, samaan ngaˈ ira ko lipahakay a raramod, samaan pasifanaˈ to wawa anca samaan misiˈayaw to cowa ka sadafdaf a demak. Maherek misongilaˈ a mitengil cingra to caˈof no tao ngaˈ pacaˈofay, “Itini iraay ko ˈayaw no 2,000 miheca mitilidan a sowal, samanay ko harateng iso?” Cowa ka sowal ningra ko “Fangcalay Cudad”, tangsol hananay paˈaraw to sinael i soci.

9. Ano caka olah ko tao milengo tono Kawas a demak i, sasamanen ita mitosil cangra hani?

⁹ Ano caka olah ko tao milengo to Kawas a demak, ngaˈayay lengoen ko kaolahan nangra a lalangian. Tinakoen, masemeray ko tamdaw to serayan a demak. Haenen ita ko sowal: “Mitodongan no kakakosiya ko dafong no serayan a misangaˈ to faelohay a dafong. O misafacoay to mayko a tamdaw, mikingkiway to pisangaˈan to tangila, misafacoay to kamila a tamdaw mikingkiway to pisangaˈan to mata. Haratengen iso, o dafong no serayan mikicowaay a ira? O niyah sanay masadak, anca iraay ko misafacoay han?” Ikor no misongilaˈ a mitengil to caˈof i, haenen ko sowal: “O pisafaco to tangila ato mata adihayay ko sifanaˈ, oniya sifanaˈ mikicowaay a ira hani? O cecay no litengan a ˈOlic sanay: ‘O misangaˈay to tangila, o cowa pakatengil han? O misangaˈay to mata, o cowa pakaˈaraw han? . . O pafeliay to sifanaˈ a Kawas Cingra!’ Mihaiay ko kakakosiya, oniya kasemeran no serayan, o misafacoan ko sakaira.” (ˈOlic 94:9, 10) Dotoc ngaˈayay paˈarawen cingra to wangcan no jw.org^® “Malicayay ato Nalifetan” ilaenoay a rayray “O Pinengneng Ako to Pipowaran no ˈOrip” kamotoˈay ika. (Keniˈen ko MITEPANGAN > IKA.) Ngaˈayay pafelien ita cingra to kihpicay cudad, “Namisangaˈan ko ˈorip han?” anca “Pipowaran no ˈOrip—Sasimsimen a Lima Salicay.”

10. Ano cowa ka kahi ko tao milengo to pakayniay i Kawas a lalangian i, ngaˈay kita malalengo to manan?

¹⁰ O tamdaw mitokelay to makapahay hano ikor. Kawra, calemcemay to mamalaˈafo ko cikiw, anca mapalak cato ka ngaˈay kilomaˈen no tamdaw. Sanay ko sowal no cecay i Nowiay a  kasakilac kantok, itiraay tamdaw cowa ka sapilengoaw to milingatay to Kawas a lalangian, kawra makahiay milengo to pakayraan no hekal. Ano mitosil i salakatenho mihayda ko tao, dotoc sowalen: “Harateng iso wa malingad a makapah koniya hekal han? O cima ko papafeli to tamdaw to ˈodingaray a hatokel? O sifo, kakakosiya, anca o roma tamdaw hokira?” Songilaˈen a mitengil ko caˈof no tao, ikor saka dademaken ko cecay sinael, mitadtad to iraay ko makapahay hano ikor no tamdaw. Matengil no roma tamdaw cowa ko mamalaˈafo ko cikiw, wa tahadaˈoc a maˈorip ko ngaˈayay tamdaw i sera, satapangayto a maolah to Fangcalay Cudad.—ˈOlic 37:29; Patnakay 1:4.

11. (1) Hano tanamen ita ko masasiromaay a lalangian mitosil hani? (2) Pakayni i Loma1:14-16 taˈarawan ni Pawlo, samanen ita mitodong cingra hani?

¹¹ Tatanamen ita ko masasiromaay a lalangian masasowal to tamdaw. Misamanay hani? Samanen o harateng no tamdaw cowa ka lecad. O roma lalangian misolotay to tamdaw, kawra o roma tamdaw mapiliˈay. Tinakoen makahiay ko roma tamdaw milengo to Kawas anca Fangcalay Cudad, o roma tamdaw maolahay i salakat a miholol to roma demak. Ano samaanto, mameten ita ko toki a mitosil to masakenakenaay a tamdaw. (ˈOsien ko Loma 1:14-16.) Haratengen ita, edengan ci Yihofa ko papalengaw to sapaloma no soˈlinay kimad i falocoˈ no moecelay a tamdaw.—1 Korinto 3:6, 7.

12. O romaroma tamdaw i Asia, coka harateng to iraay ko Misangaˈay a Tatapangan, samaan kita padama cangranan hani?

¹² Itini i cowacowa pala mitosil ko salikaka malitemohay ko Asia tamdaw, o roma tamdaw nai makecengay ko pihakelongan a kilac. O romaroma kitakit no Asia, cowa ka harateng to iraay ko Misangaˈay a Tatapangan. I lalomaˈ nangra iraay ko mafahalay makahiay minanam to Fangcalay Cudad. O roma i, cowa ka olah, sasamanen ita a padama cangra hani? Roma iraay ko milifetan a mitosilay i, salakatay misaholoholol, nai falocoˈ ciharateng to tao, ikor ano iraay ko matatodongay toki, milengo to safalod no Fangcalay Cudad, samanay padama to niyah a misalof to nokaˈorip.

13. Samanen ita mikidat ko kaolah no tao to Fangcalay Cudad hani? (Nengnengen ko papotalay coka.)

¹³ ˈAlomanay Asia tamdaw maolahay to taneng no Fangcalay Cudad. (Patnakay 7:12) Itini i Niwyok, mitosilan no salikaka ko somowalay tono Kowaping a tamdaw, sanay cingra: “Salakatanho ako ciharateng cingra, misongilaˈ mitengil to sowal nangra. Ano caho ka halafin tayni i Padaka, licayen ako: ‘Mananamayto kiso itini han? Mahelaayto ko katayalan han? Ngaˈayay ko itiniay tamdaw tisowanan han?’” Latekay, mihaen a ciharateng ko salikaka, iraayto ko toki milengo to taneng no Fangcalay Cudad. Sanayho cingra a milicay: “Sasamaan malakangaˈay to tao samanay ko miso harateng hani? Paˈarawen ako kiso to cecay sowal no Fangcalay Cudad, ngaˈay han? Sanay itini: ‘ˈAyaw no malecad o nifowahan a nanom ko kacacoli, ˈayaw no mifekad ko cacoli miliyasto.’ Harateng iso matatodongay koniya sowal han?” (Taneng 17:14) Tano hatiniay a pakayraan ko pitosil ita, wa mahapinang ko kalim no cilomaˈay a minanam to Fangcalay Cudad.

14. O cecay salikaka samanay cingra padama toya cowa pakasoˈlin to Kawas sanay a tamdaw hani?

¹⁴ Ano cowa pakasoˈlin to iraay ko Kawas, saan ko sowal no tao, sasamaanto ko hasowal ita hani? Itini i kilac no Kawali no Asia, o cecay salikaka mafanaˈay mitosil to awaay ko pihakelongan a tamdaw, sanay cingra: “Oya misomowal to ‘cowa pakasoˈlin kako to Kawas,’ saan a tamdaw i, o harateng ningra o cowa pidoko tono litengan a kawas o sanay. Mihaenay, i salakatan ako somowal to o tamdaw ko misangaˈay  to adihayay a kawakawas. Ikor ˈosien ko Yirimiya 16:20: ‘Wa misamaan ko tamdaw misangaˈ to kawas hani? Oniya dafong cowa ko kawas.’ Dotoc licayen cingra: ‘O soˈlinay a Kawas ato makaniway kawas, o maanan ko kasasiromaan hani?’ Misongilaˈ mitengil ngaˈ pacaˈof, ikor, ˈosien ako ko Isaya 41:23: ‘Pasowalen kami to mamifekad a demak no ikor, ho mafanaˈ kami to o kawas kamo.’ Dotoc paˈarawen to samaan malaˈosi ko sapairasol ni Yihofa.”

15. O cecay salikaka samanay cingra milisoˈ hani?

¹⁵ Itiniay i roma kilac no Kawali no Asia, cecay salikaka milengoay to samanay milisoˈ ko niyah, sanay: “Mihadakay kako to pina taneng no Fangcalay Cudad, tinako to malaˈosiayto a sapairasol, anca milengo to masieroday koniya dohaw. Pasowal to cilomaˈay o wacay konini to iraay ko citanengay a Misangaˈay Tatapangan. Ano mihayda ko tao, miharateng to iraay ko Kawas, paˈarawen ako cingra to Fangcalay Cudad mitadtad to masamanay a Kawas ci Yihofa.”

16. Pakayni Hipray 11:6, micekiway to Fangcalay Cudad a tamdaw hano palahaden ko pakasoˈlinay a falocoˈ hani? Samanen ita padama cangra hani?

¹⁶ Ano malalengo kita to awaay ko pihakelongan a tamdaw i, padadotocen a padama cangra pakasoˈlin to iraay ko Kawas. (ˈOsien ko Hipray 11:6.) Pasifanaˈenho ita cangra pakasoˈlin to o soˈlinay kimad ko misowalan no Fangcalay Cudad. Mihaenay o mamisaliyaliyaw kita milengo to kalimlaan. Tinakoen, ano minanam to Fangcalay Cudad i, ngaˈayay lengoen ita iraay ko maanan a wacay, paihkalay to pipowaran no Fangcalay Cudad ko Kawas. Ngaˈayay tinakoen ita matatodongay i kakak ato likisi ko Fangcalay Cudad, matatodongay ko kalaˈosi no sapairasol no Fangcalay Cudad, anca ngaˈayay padama ko safalod no Fangcalay Cudad lipahak ko kaˈorip no mita.

17. Ano paihkalen ita ko olah to pitosilan, wa ira ko maanan ngaˈayay a pilingat hani?

¹⁷ Ano iraay anca awaay ko pihakelongan no tao, sapadamaaw cangranan malo Krisciyang, o mamisaˈicel kita a paihkal to olah. (1 Korinto 13:1) Ciharatengay kita cipinang ko pacekiwan, maolahay ko Kawas cangranan, mitokel cangranan tano olah ko sapatikol to olah. To mihecahecaan, ˈalomanay cowa ka olah to pihakelongan a tamdaw, minanamay a maolah to Kawas, micadaay to inoˈ malo Krisciyang. Mihaenay o papadotoc a tawlik kita, ira ko olah a ciharateng to masakenaay a tamdaw, misongilaˈ mitengil, misaˈicel a cipinang to harateng no tao, tano ngaˈayay a taˈarawan no niyah pasifanaˈ to tamdaw malo nisawawaan ni Kristo.