1, 2. (1) Misamaanay hano ngaˈayay kita palahad to faelohay a pinangan? (2) Ya misowalan no Kolosay 3:10-14 a faelohay pinangan, mahawpay ko manan a capeling hani?

O NISOWALAN no Fangcalay Cudad a ‘faelohay pinangan’ hananay, “oya milecaday to pinangan no Kawas a masangaˈay.” (Ifiso 4:24; Kolosay 3:10) Misangaˈ ko Kawas to tamdaw i, paringian Ningra i Cingranan a misangaˈ, mankora oha ngangaˈay kita palahad to matiniay a faelohay a pinangan, patahekal to fangcalay capeling.​—Satapangan 1:26, 27; Ifiso 5:1.

² Naitira ci Ataman aci Ifaan marocokay ita ko cowa ka lefot a ˈorip, madoloay mafiyor no mararaway a harateng ato madoloay a mafiyor no italiyokay a demak. Soˈliˈlin hatira, pakayni i sapadama ni Yihofa, o ngangaˈayho kita malo kahemekan Ningra a tamdaw. Toha sakatooraw toni patosokan, dotoc i, mamilengo  kita to mahawpay no faelohay pinangan a fangcalay capeling. (ˈOsien ko Kolosay 3:10-14.) O roma i, mamilengo kita to sasamaanen patahekal i mitosilay a demak koni capeling.

3. O manan ko cecay a capeling no faelohay pinangan hani?

³ Palimoˈotay ci Pawlo kitanan papicaˈedong to faelohay pinangan, nohatini sowalen ita ko cowa pisakakinih a capeling, sanay ko sowal ningra: “Ano o Krisiyato, ano o Yutayato, ano o makeritayto a tamdaw, ano caayto ka kerit a tamdaw, ano o maapacayto ko ˈorip, ano o kolito, ano caayto ko koli i, awaay ko kasasiroma.” Itini i lalomaˈ no kasakopang, hano cowa ka ngaˈay pafafidaˈ to finacadan, kasakitakit ato saˈaroan no tamdaw hani? Samanen o mala cecayay ko soˈlinay Krisciyang.​—Kolosay 3:11; Kalatiya 3:28.

4. (1) O sikawdan no Kawas mamisamaan a micada to polong a tamdaw? (2) O masamaanay pakayraan mamipalak to nika lacecay no Krisciyang hani?

⁴ O micaˈedongay to faelohay pinangan a tamdaw, mamisakareteng a micada to polong a tamdaw, ano o masamaanayto a finacadan, anca o masamaanayto ko saˈaroan. (Loma 2:11) Kawra itini i romaroma kakitakitan, cowa ko madoloay koni. Itini i Nanfi, iraay ko rikec no kitakit pafafidaˈ to masasi romaay a finacadan, pasiwatikan ko kaitiraan nangra, iraay ko cihafayay a kitiraan, ono kohetingay tamdaw a kitiraan, anca romaroma finacadan. Nohatini, o ˈalomanay i Nanfiay a salikaka, mihaenay a mapafafidaˈ ko aroˈ nangra. Toha sapipakalalokaw to salikaka “misakakahad to falocoˈ”, isaka 2013 miheca ka moetepan folad, Mikayatay a Malohemay Malitengay i Congpo, milimasmasay a pasasoˈaraw to caay ka lecad a finacadan a salikaka, ho matongal ko nika fanaˈ cangranan. (2 Korinto 6:13) Misamaanay koni limasmas hani?

5, 6. (1) Samaanay ko limasmas no likakawa, padama to salikaka makakedec a mala cecay? (Nengnengen ko satapangan coka.) (2) Samaanay ko teloc noni limasmas?

⁵ Oni limasmas i, patatekoan ko tosa masasi romaay finacadan, mala cafay a mitosil, masaˈopo, anca tayra i lomaˈ nangra palafang. ˈAlomanay a kasakopang makalimay a mirienang, macadaay no fenpo ko adihayay a pakahemekay a tikami, ano papotalayto a tamdaw masemeray cangra. O cecay matayalay i kiyokay a tamdaw, sanay ko sowal: “Cowa ko Misawacayay Tamdaw kako, kawra mafanaˈay kako, tada ngaˈayay ko likakawa namo, cowa pafafidaˈ to finacadan, tada makedecay a mala cecay kamo.” Hay, samaanay ko harateng no salikaka toni limasmas hani?

⁶ O cecay sano Kesaay ko sowal a fafahiyan salikaka, ci Noma ko ngangan, isalakat cowa ka timolo mitaaw to kohecalay ko fanges sano Ikokay ko sowal a salikaka tayra i lomaˈ a palafang. Kawra, mikala cafayto ci Noma to kohecalay salikaka mitosil, halo tayra i lomaˈ nangra ikor, lipahak pasowal cingra: “Mahecaday kitanan cangra, o kalo tamdaw cangra!” Ikorto, ci Nomato ko mitahidangay to sano Ikokay ko sowal a salikaka, tayra i lomaˈ a komaen, sanay ko sowal to cecay kohecalay a malohemay malitengay: “Fahekaay kako makahiyay maroˈ cingra i fafekang no paetang.” Padadotocay ko ˈalomanay salikaka, mihaen to demak a misawidang to faelohay widang, misakakahad to falocoˈ, mafanaˈ to naitiniay i masasi romaay finacadan a salikaka.

7. Misamaanay hano papadotoc kita paihekal to siniˈadaay to tao?

⁷ ˈAyaw no malaˈafo ko hekal ni Satan, oha tatahalifaho kita to pasangar. Alatek awa  ko katayalan, maroero no tao, tahapades, kareteng ko adada anca malahedaw ko dafong. Maloka padamadama kita itini i pades, paihekal to siniˈadaay falocoˈ, samanen o siniˈadaay a falocoˈ mamicoroh kitanan sidaˈit a micada to tamdaw. (Ifiso 4:32) Oni tosa capeling no faelohay pinangan, papadama kitanan mitodong to Kawas, mihinom to tao.​—2 Korinto 1:3, 4.

8. Ano paihekal kita ko siniˈada ato sidaˈit to polong a salikaka, wa ira ko manan ngaˈayay a teloc? Sadaken ko tinakoan.

⁸ Samaanen ita paihekal ko sidaˈit to roma finacadan ato mapadesay a tamdaw hani? Sawidangen ita cangra, ho masalalomaˈay no kasakopang kako, wa saan a miharateng cangra. (1 Korinto 12:22, 25) Nengnengen ko nilifetan ni Tenikal, naitiniay i Filiping malinah tayra i Dipong, tona cowa ko itiraay a tamdaw cingra, itini i katayalan misakakinihan no tao. Kina cecayay, mirienangay to saˈopo no Misawacayay Tamdaw ni Yihofa, sanay milomal cingra: “Sahetoay o Dipong a tamdaw itira, kawra mahemekay a militemoh takowanan, hato o halafinayto a widang kako.” Paihekalay ko salikaka to sidaˈit ci Tenikalan, padamaay cingranan a macakat i noˈadingoan. Ikor micadaay to inoˈ ci Tenikal, nohatini o malohemay malitengay cingra. Tada taˈangayay ko pikowad to kasakopang, sanay somowal ko malohemay malitengay ci Tenikalan ato fafahi ci Cinifer, saan ko sowal: “Paisalakatan nangra micangacang ko Hongti Kitakit, mala cafay a misakafah, doloan nangra ko kaˈorip, tada o ngaˈayay taˈarawan no ˈalomanay.”​—Luka 12:31.

9, 10. Ano paihekal kita ko siniˈada to tao i mitosilay a demak, wa paira to manan a sapalemed? Sadaken ko tinakoan.

⁹ Ano paladaˈ to lihaf no Hongti Kitakit i, o ngaˈayay toki “a mipadang to tamdamdaw.” (Kalatiya 6:10) Tona siniˈadaay to pacarcaray a tamdaw, misaˈicelay a minanam tono roma kitakit a sowal ko salikaka. (1 Korinto 9:23) Mapalemeday cangra. Patinakoen itini i Australia, ci Tifani minanamay to sowal no Swahili toha sapadamaaw to itiniay i Prispan a kasakopang. Soˈlin pasangaran nanay ci Tifani a minanam, kawra rahekeray ko kaˈorip ningra. Sanay ko sowal: “Ano hasapi lifetaw kiso to lipahakay a noka pitosil, tayni i iraay ko roma kitakit a sowal a kasakopang, tada o ngaˈayay a papiliˈen koni. Hamaan masadak tayra i roma kitakit, wa ngaˈayto kiso kalacafay to roma finacadan a salikaka, maˈaraw ko nika kakelec no masacefangay a salikakakaka ita.”

¹⁰ Nengnengen ko roma nilifetan no cecay paro no lomaˈ i Dipong. Ci Sakiko, fafahiyan wawa, sanay ko sowal: “Itini isaka 1990 a  mamihecaan, marariday malitemoh ko naitiniay i Pracil a tamdaw. Panengnengan ako tono Portukis sowal a Fangcalay Cudad, matira o Paˈarawan 21:3, 4 ato ˈOlic 37:10, 11, 29, mitengilay cangra, nolatek tahalosaˈay a mitengil.” Onini i Dipongay a paro no lomaˈ tada siniˈadaay to pacarcaray tamdaw, sapipadangaw cangranan mafanaˈ to kimad, hato misatapangayto minanam tono Portukis a sowal. Ikor mipadangay cangra patireng to sano Portukisay a kasakopang. Pinaay miheca, ˈalomanay ko mipadangan a pacarcaray tamdaw malo Misawacayay Tamdaw. Sanay ko sowal ni Sakiko: “Tada misaˈicelay kami, kawra ora malayapay a sapalemed, ikakaay to nisadakan niyam. Tada miakoˈiday kami ci Yihofaan.”​—ˈOsien ko Dmak 10:34, 35.

11, 12. (1) Itini picaˈedong to faelohay pinangan, ira ko ngaˈayay a falocoˈ hano masaka limlaan hani? (2) O manan ko papadama kitanan mitafo to misapoeneray?

¹¹ Micaˈedong kita to faelohay pinangan, samanen sapaˈodingaraw ci Yihofaan, ao cowa ko sapaka hemekaw no tamdaw kitanan. Aka mapawan, na iraay ko cecay malefotay a coyoh, malitaˈangay a mararawto. (Nengnengen ko Icikil 28:17.) O cowa ka lefot a tamdaw, mitafo to misapoeneray caka malitaˈang, tada pasangaray a demak! Nikawrira, o ngangaˈayho kita micaˈedong to misapoeneray. Hay, misamaan to demak kita hani?

¹² Ano hasapi tafoaw to misapoeneray kita i, micerid a miˈosi to Fangcalay Cudad to romiˈamiˈad, midotim a misimsim to maˈosiay a lalakaw wangaˈ. (Limoˈot 17:18-20) Kiriwiˈen ita misinanot ko sapasifanaˈ ni Yis, ato taˈarawan ningra a misapoener. (Matay 20:28) Misapoeneray ci Yis a mipananaw to waˈay no nisawawaan. (Yohani 13:12-17) O roma i, micerid kita mitolon, misaali to fangcalay saocor no Kawas, padama kitanan micoˈay to malitaˈangay a falocoˈ.​—Kalatiya 6:3, 4; Filipi 2:3.

13. Mamilayap to manan a sapalemed ko misapoeneray to falocoˈ a tamdaw?

¹³ ˈOsien ko Taneng 22:4. O mamisapoener kita o polong a Krisciyang, hongaˈ milayap to kadofahay a sapalemed. O mamicowat koni to sakarihaday ato sakakelec no kasakopang, hanaca milifok to mikiriwiˈay a sidaˈit no Kawas. Sanay ko tarokos ci Pitiro: “Caˈedongen ko misapoeneray a falocoˈ a masasi padapadang. Pacolien no Kawas ko misatakaraway ko falocoˈ a tamdaw, palemeden Ningra ko misapoeneray ko falocoˈ a tamdaw.”​—1 Pitiro 5:5.

14. O paihekalay to damsayay ato kodaitay, o cima ko sangaˈayay a taˈarawan?

¹⁴ O malonayay a demak ko damsayay mihadidiay sanay ko ˈalomanay tamdaw miharateng. Cowa ka tatodong ko matiniay noka pinengneng, samanen o fangcalay capeling konini, o naitiniay i saciˈicelay a Kawas ci Yihofaan ko sakaira. O sangaˈayay a taˈarawan no damsayay ato kodaitay ci Yihofa. (2 Pitiro 3:9) Haratengen, ya mitolon ci Apraham aci Loto ci Yihofaan i, samaanay pacaˈof ci Yihofa cangranan. (Satapangan 18:22-23; 19:18-21) Mihadidian ni Yihofa koya maliyangay a Israil finacadan, mataˈlifay ko 1500 mamihecaan.​—Icikil 33:11.

15. Patirengay to manan taˈarawan ci Yis i noka paihekal to damsayay ato kodaitay?

¹⁵ Ci Yis “o damsayay kako”, sanay. (Matay 11:29) Mihadidiay ci Yis to dangoc no nisawawaan, patahekal to kodaitay. Mitosil ci Yis i, miememay to patelasay a noka pakokot no tamdaw. Samaamaanen mitafoay cingra to damsayay ato kodaitay, tangasa i patay. Mapacek i pisemseman a tektek cingra i, adadadada cingra mitolonayho  mingitangit to sasodod no Kawas, sowal sa: “Mafokil cangra to tatodong no nidemakan nangra,” sanay. (Luka 23:34) Tada patirengay ci Yis to mikiriwiˈay a taˈarawan! Soˈliˈlin adadaay a maroero cingra, kamayanay paihekal to damsayay ato kodaitay.​—ˈOsien ko 1 Pitiro 2:21-23.

16. Misamaan kita paihekal to damsayay ato kodaitay hani?

¹⁶ Wa misamaan kita paihekal to damsayay ato kodaitay hani? Somowalay ci Pawlo to cecay pakayraan: “Ano iraira ko katatiihan no falocoˈ no nima namo i cimaanan i, kasasihepol. Haenen o nipihepol [ni Yihofa] to raraw namo ko nika sasihepol namo to raraw.” (Kolosay 3:13) O sasoˈlinen ita mitafo ko damsayay ato kodaitay, hongaˈ misodod to tao, micowat to sakakelec no kasakopang.

17. Paihekal to damsayay ato kodaitay hano o masaka limlaan hani?

¹⁷ Misaaliay ci Yihofa to cecacecay a Krisciyang, papicaˈedong to damsay ato kodait. Ano ciharatengay to sakaˈoripaw i faelohay hekal i, o mamipaihekal kita to hatiniay a capeling. (Matay 5:5; Yakop 1:21) O kalimelaan i, o papaˈodingar ci Yihofaan koni, oha ngangaˈayho padama to tao mitengil to sapalimoˈot no Fangcalay Cudad.​—Kalatiya 6:1; 2 Timoti 2:24, 25.

18. O olah ato cowa pisakakinih samaanay ko nika rariting?

¹⁸ Ora nisowalan i fafekang a capeling milingatay to olah. Iraay ko papina Krisciyang misaidahiyay to cihafayay tamdaw, misalaenoay to manikaway tamdaw, palimoˈotan ni Yakop cangra. Sanay cingra: “Samatiyaen o nika olah iso to tireng ko nika olah iso to tao,” aka a pisafelit toni sarikec. Sanay ko dotoc a sowal: “Ano misakakinih kamo to tamdaw i, o ciraraway kamo.” (Yakop 2:8, 9) Ano maolahay kita to tao i, cowa ko papakayni i picudadan, finacadan anca saˈaroan no tamdaw a misakakinih cangranan. Cowa ko papotal aca, kifalocoˈen a masadafdaf ko picada to tao.

19. Micaˈedong kita to olah hano o masaka limlaan hani?

¹⁹ O olah hananay “o kodaitay, o kalasiniˈadaay” cowa “misatakaraw ko falocoˈ.” (1 Korinto 13:4) O papaihekal kita to kodait, siniˈadaay ato misapoeneray, ho ngaˈay a padadotoc a mitenak to Hongti Kitakit. (Matay 28:19) O matiniay a capeling papadama kitanan, rihaday makakelec ato polong a salikaka. Ano paihekal kita to olah o manan ko epoc hani? Mihaen to demak o mamitofo to kakelec no kasakopang, paˈodingar ci Yihofaan, halo misolot to tao tayni a minanam to Fangcalay Cudad. Mihaenay haw i, maharek ci Pawlo somowal toni capeling i, sanay paˈicel ko sowal: “Itini tonini a demak a maemin i, pahapinangen ko olah. Nawhani o olah ko misongilaˈay a mipalacecay to falocoˈ no tamdamdaw.”​—Kolosay 3:14.

20. (1) Milicay kita to niyahan to manan a salicay? Misamaanay? (2) Mitala kita to manan a hanoikor?

²⁰ Kita maemin licayen ko niyah, ‘Misamaan kako mihelong to katelangay pinangan, micaˈedong to faelohay pinangan hani?’ ˈIfowaen ita mitolon ko Kawas, misaˈicel miliyas to kaˈintehan no Kawas a tatiihay waywayan. (Kalatiya 5:19-21) Haratengenho ita, ‘Padadotocay kako misafaeloh to falocoˈ han?’ (Ifiso 4:23, 24) Cowa ko malefotay kita, oha mamisaˈicel micaˈedong to faelohay pinangan, padadotoc patahekal to fangcalay capeling. Haratengen hena, o polong a tamdamdaw, itini i lakoing, maka micaˈedongay to faelohay a pinangan, misongilaˈay patahekal to capeling ni Yihofa, tada o kalipahakan a nokaˈorip koni!