PATEMERAN no Kawas ci Pawlo mitilid, itini i sapadama no fangcalay saocor ngaˈayay patahekal ko tamdaw to siwaay a capeling. (Kalatiya 5:22, 23) O heci no fangcalay saocor mahawpay ko kihecod nisowalan ningra a makapahay capeling, o kalimelaan a capeling no faelohay pinangan kora. * (Kolosay 3:10) Matira o kilang ano madimokos, o caciheci, ano kalasaka dademaken ita ko fangcalay saocor i nokaˈorip ita, o caciheci to heci no fangcalay saocor.—ˈOlic 1:1-3.

Saka cecay heci no fangcalay saocor i, o olah. Hakowaay ko nika masaka limelaan hani? Sowal ni Pawlo ano awa ko olah no tamdaw i, “awaay ko epoc”, sanay. (1 Korinto 13:2) O manan ko olah hananay hani? Misamaan kita palahad tonini capeling, itini nokaˈorip patahekal to olah hani?

Soˈlin pasangaray tano tiliden mitadtad ko olah, kawra somowalay ko Fangcalay Cudad, ano ira ko olah no tamdaw i, samaanay ko waywayan. Patinakoen, o ciolahay a tamdaw, “o kodaitay, o kalasiniˈadaay”, “o soˈlinay a demak ko kalipahakan”, “pakahadidi, caay ka lasawad ko pipasoˈlin ningra” hanaca pakaememay to maamaan. Iraay ko tangongolay a olah to tamdaw, ciharatengay to tao, ngaˈayay ko kalalaˈed ato tao. Nikawrira, ano awa ko olah, o papatahekal to maˈinapay, malitaˈangay, misatekeday a pakayraan, pakangodoay to tao, hinaketeray,ˈintehay ko falocoˈ. Aka a patahekal kita to matiniay a pakayraan, palahaden ita ko olah, mamaanan a demakan cowa ko niyah aca ko niharatengan.​—1 Korinto 13:4-8.

Saan no Fangcalay Cudad: “O kasadakan no olah ko Kawas.” (1 Yohani 4:8) O tadacapeling ni Yihofa ko olah, itini i misangaˈan Ningra a maamaan ato pakayraan Ningra, maˈaraway to matomesay ko olah Ningra. O sakakaay a olah Ningra i, micorcoran ci Yis tayni i hekal, kinafalah to ˈorip saki tamdamdaw. Sanay ci Yohani: “Ocoren no Kawas ko dengan a wawa Ningra a patayni itini i hekal. Pakayni i cingraan ko sakaciˈorip ita to midaˈocay a ˈorip. Itini a mahapinang ita ko olah no Kawas i titaanan. Caay kao kita ko maolahay to Kawas. O Kawas ko maolahay titaanan a miocor to wawa Ningra to sakahepol no raraw ita. Onini ko olah hananay.” (1 Yohani 4:9, 10) Tona maolahay ko Kawas, masododay kita, iraay ko hatokel ato midaˈocay ˈorip.

Tangongolay ko olah ni Yis, makalimay midofdof to araaw no Kawas. Sanay ci Pawlo: “Doedoen ni Yis Kristo ko nafalocoˈan no Kawas a pacakat to tireng ningra to kinacecay. Saka, makoracto kita.” (Hipray 10:9, 10) Awaay ko tamdaw to papatahekal to matiniay a olah, sowal ni Yis: “O nika kinafalah no tamdaw to ˈorip no tireng to saki widawidang i, o sakakaay a olah konini i hekal,” sanay. (Yohani 15:13) Cowa ka lefot  a tamdaw ngangaˈay mitodong ci Yihofaan aci Yisan, patahekal to matiniay a olah han? Ngangaˈay! Nengnegen ita sasamaanen ko demak.

Pakalalokay ci Pawlo: “Tona o kakaolahan no Kawas a wawa kamo saka, o tatodongen namo Cingra. Pahapinangen ko olah namo i masamaamaanay a demak namo a matiya o nika olah ni Kristo i titaanan.” (Ifiso 5:1, 2) Samaanen ita “pahapinang ko olah” hani? Itini i maamaan nokaˈorip a patahekal to olah, pairaen ko demak, cowa ko sowal aca. Sanay ci Yohani: “Wawaaw, aka kao ngoyos aca ato sowal ko nipiolah namo to tamdaw. Kao soˈlinay a falocoˈ ato ngaˈayay a demak ko nipiolah namo.” (1 Yohani 3:18) Tona maolahay kita ci Yihofaan ato tao, micorohay ko olah kitanan a mitenak to ngaˈayay lihaf no Hongti Kitakit. (Matay 24:14; Luka 10:27) Pahapinangen ko olah mahawpay to papatahekal to mihadidiay, siniˈadaay halo misodod to tao. Matira o sowal no Fangcalay Cudad: “Haenen o nipihepol [ni Yihofa] to raraw namo ko nika sasihepol namo to raraw.”​—Kolosay 3:13.

Nikawrira, soˈlinay olah hananay, cowa ko makaomiˈay a olah. Patinakoen, ano tomangic ko wawa, sapihimaaw ko wama wina i, patoor sanay to saali no wawa, kawra o soˈlinay olah hananay i, o mamitafo ko wama wina to safalod. Mahecaday, o olah ko Kawas, kawra “o wawa Ako yahananay no Tapang a maemin i, setiˈen Ningra.” (Hipray 12:6) Ano pahapinang kita to olah a dademak i, oha mamirikec a misalof to demak. (Taneng 3:11, 12) Aka mapawan, cowa ko malefotay kita, nolatekay caka dolo a patahekal to olah, mansa o papadotoc kita macakat. Wa misamaan palahad to olah hani? Nengnengen ita ko tolo a hapakayraan.

Saka cecay, tolonen ko Kawas, mingitangit to fangcalay saocor, padama kitanan palahad to olah. O papafeli ci Yihofa to mingitangitay a tamdaw sanay ci Yis. (Luka 11:13) Ano mitolon kita misaali to fangcalay saocor, halo misaˈicel a midofdof to fangcalay saocor a midemak i, o mamadoloto patahekal to olah. (Kalatiya 5:16) Ano o malohemay malitengay no kasakopang kiso, ngaˈayay misaali to Kawas pafeli tisowanan to fangcalay saocor, padama tisowan tano ciolahay pakayraan a misadak to sapalimoˈot no Fangcalay Cudad. Ano ciwawaay kiso, ngitangiten ko Kawas to fangcalay saocor, padama tisowanan maolah a mirikec to wawa, ao cowa ka maketer a misetiˈ to wawa.

Saka tosa, haratengen ko tinakoan ni Yis. Kariˈangen no tamdaw cingra i, kamayanay patahekal to olah. (1 Pitiro 2:21, 23) Ano masakakinih no tao kita, anca kariˈangen no tao i, sinanoten ko taˈarawan ni Yis. Licyen ko niyah itiya: ‘Ano o ci Yis i, mamisamaan cingra hani?’ O cecay ci Alin hananay fafahiyan salikaka somowalay, Milicay to matiniay a salicay padamaay cingranan a dademak. Sanay cingra: “Kina cecayay, o cafay matayal pasadakay to pakasalilanay a tikami to romaroma cafay, mitongangan takowanan to cowa ka ngaˈay ko tayal ako saan, masomaday kako. Kawra milicayay kako takowanan, ‘ano ci Yis i, o sasamaanen ningra ko demak hani?’ Dotimen ako ko taˈarawan ni Yis ikor, cowato ka sikoren ako koni demak. Ikor ngaˈ mafanaˈay kako, misemsemay cingra to adada, hato maharatengay ako to cowa padeteng cingra a midokaˈ takowanan. Midotim to taˈarawan ni Yis, ano masakakinih no tao i, kamayanay maolah kako cangranan.” Mihaenay, ano todongen ita ci Yis, ngangaˈay padadotoc patahekal to olah.

Saka tolo, palahaden ko kinafalahay to niyah a olah, o tahapinangan no soˈlinay Krisciyang ko matiniay a olah. (Yohani 13:34, 35) Pakalalokay ko Fangcalay Cudad kitanan palahad to samatiyaay ni “Kristo ko falocoˈ”. Makalimay cingra tayni i hekal, “sawaden ningra kono tireng a demak”, kinafalah to ˈorip. (Filipi 2:5-8) Ano kiemelen ita mitodong ci Yis patahekal to caay ka ˈidi a olah,  o harateng ato falocoˈ no mita o mamahecad ci Yisan, o mamicoroh kitanan isalakat a miharateng to falocoˈ no tao. Ano palahad to olah, iraay ko manan a epoc hani?

Patahekal to olah iraay ko adihayay a epoc, nengnengen kora tosa ilaenoay:

• KASACEFANG A SALIKAKA I PARO NO KAKARAYAN: Masasi olahay ko Krisciyang, ano talacowato kita, icowaayto a kasakopang, iraay ko salikaka a militemoh kitanan. Itini icowacowa a pala, malifetay ita ko olah no salikaka, tada o taˈangayay a sapalemed koni. (1 Pitiro 5:9) Edengan ilalomaˈ no salikaka, ngaˈ iraay ko matiniay a soˈlinay a olah!

• RIHADAY: “Kasasi olah, kasasi paˈayaw” kita, ano mihaen o rarihaday a makakelec kita. (Ifiso 4:2, 3) Itini i saˈopo no kasakopang ato taykay, maedeng matinakoay iso ko matiniay a rihaday. Anini toniya masasifoday a hekal, rihaked kita to matiniay rihaday, tada o kalimelaan a demak! (ˈOlic 119:165; Isaya 54:13) Ano kiemel kita mararihaday ato tao, o patahekalayto kita to olah i cangranan, o Wama ikakarayan o mamahemek ko falocoˈ.​—ˈOlic 133:1-3; Matay 5:9.

Paˈicelay to tamdaw ko olah sanay ci Pawlo. (1 Korinto 8:1) Itini i saka 1 Korinto 13 fedengan somowalay to lalangian, “o ˈolic no olah” hananay no tamdaw kora sinael. Itira tora sinael, o ciolahay a tamdaw isalakatay miharateng to sakaciepoc no tao sanay. (1 Korinto 10:24; 13:5) Roma i, micorohay ko olah kitanan a siniˈada to tao, ciharateng cangranan, mihadidiay ato sidaˈitay. Ano patahekal kita to olah, o dadiheko ko paro no lomaˈ ato makakelec ko kasakopang.​—Kolosay 3:14.

O nika olah to Kawas o kalimelaan, papaˈicel to tamdaw. Misamaanay hani? Samanen o matiniay a olah, micorohay to masasi romaay finacadan a tamdaw, makakelec a mala cecay, lipahak a “masarocod ko falocoˈ” a midoko ci Yihofaan. (Cifaniya 3:9) Nanay padadotoc kita ceheci to heci no fangcalay saocor, patahakel toni kalimelaan a capeling no olah.