O nitilidan ni Matay pakayni no kaemanganho ni Yis, caka hahecad toni Luka, samanen mikitiniay i masasi romaay a noka pinengneng cangra a mitilid.

Mikitiniay ci Yosifan ko pinengneng ni Matay. Somowalay to samaanay ko noka pitemer ci Yosifan, ta mafanaˈ to mapoyapoyay ci Mariya, ato mitadtadan no coyoh cingra itini i nitiih, samaanay mitoor cingra to sapalimoˈot no coyoh. (Matay 1:19-25) Dotoc somowalay ci Matay micoracoran no coyoh ci Yosif i nitiih papilaliw tayra i Icip, ato papinokay cingranan tayra i Israil, saka ˈorong hanto ningra ko paro no lomaˈ tayra i Nacali a mikilomaˈ. (Matay 2:13,14, 19-23) Itini isaˈayaw a tosa fedengan no Matay a cudad, kina 12 ko ngangan ni Yosif a masadak, kina enemay aca masadak ko ngangan ni Mariya.

Mikitiniay ci Mariyaan ko pinengneng ni Luka. Somowalay to nika pilisoˈ no coyoh ci Kapriil, to noka tayra ni Mariya ci Ilisapican, ato noka pahemek ni Mariya ci Yihofaan. (Luka 1:26-56) Somowalay ci Luka to pasowalan ni Simiyong ci Mariya to mamisemsem ci Yis, ya 12 ko mihecaan ni Yis, mihakelong to paro no lomaˈ tayra i fangcalay sefi i, o nano sowal ni Mariya ko mitilidan, cowa ko sowal ni Yosif. Somowalayho ci Luka, orira demak tangongolay ko noka pifiyor ci Mariyaan. (Luka 2:19, 34, 35, 48, 51) Saˈayaw a tosa fedengan no Luka, kina 15 somowal ci Mriyaan, kawra kina sepatay aca somowal ci Yosifan. Mahapinangay itini, oni Matay a mitilidan i, o harateng ato demak ni Yosif, oni Luka a mitilidan i, o nalifetan ni Mariya.

Masasi romaay ko pitilid to kadadoedo no tatoˈasan ni Yis. Ci Matay mikitiniay ci Yosifan, o nidipotan wawa ni Yosif ci Yis, ci Yosif o teloc ni Solomon wawa no hongti ci Tafiti, ano pakorikecen, ci Yis cifadangalay midotoc ci Tafitian mala hongti. (Matay 1:6, 16) Ci Luka mikitiniay ci Mariyaan, o naitelocay ni Tafiti a hofocen, iraay ko fadangalan ni Yis midotoc ci Tafitian a mala hongti, o aˈirangan a teloc ni Tafiti. (Loma 1:3) Misamaanay hani? Samanen mikitiniay i wawa ni Tafiti ci Natanan ko rayray ni Mariya. (Luka 3:31) Itira tora rayray hano caka somowal to wawa ni Hili ci Mariya, ao wawa ni Hili ci Yosif sa hani? Samanen o matingkiay a rayray o ngangan aca no tawki no lomaˈ ko matiliday, mansa o wawa ni Hili ci Yosif sa ci Luka i, tatodong o kadafo ni Hili ci Yosif o sanay.​—Luka 3:23.

O mitilidan ni Matay aci Luka a kadadoedo no tatoˈasan ni Yis, paihekalay to oyaan paliˈayawan no Kawas a Misiya ci Yis. Mafanaˈay kita to teloc ni Tafiti ci Yis, ano o Farisay ato Satukay mihaiay toninian. O kadadoedo no tatoˈasan ni Yis, paˈicelay to pasoˈlinay falocoˈ ita, halo misawacayay to mamalaˈosi ko nano sowal no Kawas.