1, 2. (1) Wa ihacowa kita a milicay: “Hakowaho ko halafin hani”? (2) O nalifetan nolitengan a madimadiay sikawdan, hano misayaray to falocoˈ no mita hani?

MADIMADIAY a pairasolay ci Isaya aci Hapakuk, na mihaenay milicay: “Tahacowa konini a demak saw?” (Isaya 6:11; Hapakuk 1:2) Ya mitilid ci Tafiti to ˈOlic saka 13 fedengan i, kina toloay a milicay: “Hakowaho ko halafin?” (ˈOlic 13:1, 2) Ya misiˈayaw ci Yis toya caay pasoˈlin a tamdaw, mihaenay a milicay. (Matay 17:17) Mahaenay, ano kitato mamihaen a milicay alatek.

² Itini i masamaanay pakayraan, mihaen a milicay kita: “Hakowaho ko halafin hani?” Alatek ano tahalifa to cowa ka sadafdaf a demak, miemem to nika maliteng, anca adada no tireng, anca itini toni caay ka dolo siˈayawen a ˈawaled, miremo to “masamaamaanay a pades.” (2 Timoti 3:1) Nolatekay, o tatiihay a waywayan no taliyokay a tamdaw, pasangaren kita mihadidi. Kawra ano o mananto ko lalangian, o nolitengan a madimadiay sikawdan ni Yihofa, mihaen a patahekal to cariraw no falocoˈ i, cowa ka rikecen no Kawas cangra, mafanaˈ toninian misayaray to falocoˈ no mita.

3. O manan ko papadama kitanan misiˈayaw to pades hani?

³ Hay, o manan ko papadama kitanan misiˈayaw to masamaamaanay  a pades hani? O safa ni Yis ci Yakop, sanay a mitilid: “Kakodait ko falocoˈ namo tangasa i piliyawan no Tapang a tayni.” (Yakop 5:7) Kita kahacecacecay a tamdaw, o mamihadidi patahekal to kodaitay, kawra oni capeling mahawpay ko manan hani?

4, 5. (1) O kodaitay milingatay to manan? (2) Tano manan a sapatinako mitadtad ci Yakop to mamihadidi a mitala kita? (Nengnengen ko satapangan coka.)

⁴ O cecay a minaroˈan no fangcalay saocor ko kodait sanay ko Fangcalay Cudad. O cowa ko malefotay tamdaw kita, ano awa ko sapadama no Kawas, caay ka dolo patahekal to kodait. O sapatelong no Kawas koni, ano maolahay to Kawas kita, o papatahekal to kodait, hanaca o patahekalay kita to nika olah to tao. Ano caka kodait kita, o mamipalak to nika lalaˈed ato tao. (1 Korinto 13:4; Kalatiya 5:22) O kodaitay milingatay to romaroma kalimelaan a capeling, patinakoen ano tahalifa kita to pasangar i, papadama ko kodait ira ko tawlikay a waywayan. (Kolosay 1:11; Yakop 1:3, 4) O roma i, ano kodait ko tamdaw soˈlinto maparoray, cowa ko mamiˈodis to tao, hanaca i masamaamaanay a pakayraan, cowa ko mamangiyangi. Fangcalay Cudad palimoˈotay kitanan makahi a mitala. Ci Yakop misaˈicelay somowal toninian i Yakop 5:7, 8. (ˈOsien.)

⁵ Misamaanay hano mamakahi kita mitala ci Yihofaan a mitatoy to demak hani? Patatinakoan ni Yakop kita to maomahay tamdaw. O maomahay soˈlinto misaˈicelay a mipaloma, kawra cowa pakaˈimer cingra to faliyos ato kedal, anca misakaliki to lengaw no pinaloma. Mamihadidi a “tala han nangra ko . . . sakatadamaanaw no heci no pinaloma nangra.” Ano mitala kita to sakalaˈosiaw no araaw ni Yihofa i, adihayay ko caay ko mamaˈimer ita a demak. (Marko 13:32, 33; Dmak 1:7) Mihaenay, mamatira kita tora maomahay tamdaw a mihadidi a mitala.

6. Wa ngaˈay kita mikitini ci Mikaan minanam to manan?

⁶ Itini i lintad ni Mika, malecaday to aniniay a pakayraan, itiniay i pikowan noya mariˈangay a hongti ci Ahac, matomesay ko masakenakenaay a manaholay a demak. Sowal no Fangcalay Cudad, o tamdaw itiya, “mafanaˈay a midemak to tatiihay cangra,” sanay. (ˈOsien ko Mika 7:1-3.) Mafanaˈay ci Mika to awaay ko ˈicel no niyah a mifalic tora pakayraan itiya, wa ngaˈay a misamaan cingra hani? Sanay ci Mika: “Kako tono mako i, pasayra kako [ci Yihofaan], mitala kako to Kawas, o paˈoripay a Tapang ako. O mitengilay ko Kawas to pitolon ako.” (Mika 7:7) Haenen ita ci Mikaan, mihadidi a mitala ci Yihofaan.

7. Wa misamaan kita mitala to nika laˈosi no araaw ni Yihofa hani?

⁷ Ano iraay ko matiraay ni Mika a pasoˈlinay falocoˈ, cowa ko mamaceraˈen kita mitala, ao mamakahi a mitala ci Yihofaan. Cowa ka lecad kita tora papatayen a mapalitay tamdaw, mapaciˈeci a mitala tora romiˈad, awa ko manan hatokel, kita i, makahiyay a mitala ci Yihofaan, mitokel a mitala to noikoran, samanen mafanaˈay kita, wa itira i matatodongay a tatokian a palaˈosi Cingra to araaw Ningra, palifon kitanan to midaˈocay a ˈorip! Mihaenay haw i, mihadidi i maamaan a demakan, lipahak a kodait ko falocoˈ. (Kolosay 1:11, 12) Nikawrira, ano mitala kita, ngaliwngiwho to hano caay kaliki ci Yihofa a midemak i, cowa ko mamahemek ko Kawas.​—Kolosay 3:12.

8. Ano miˈosi kita ko nalifetan no nolitengan a sikawdan i, simsimen ita ko manan?

⁸ Madimadiay a nolitengan a sikawdan mihadidiay a mitala to nika laˈosi no araaw ni Yihofa, ano paifalocoˈen ita ko taˈarawan nangra, wa makahito mitala. (Loma 15:4) Ano misimsim kita to nalifetan nangra i, haratengen to hakowaay ko kahalafin no pitala nangra, hano makahien mitala cangra, ato manan ko malayapay a sapalemed to nika pihadidi nangra.

9, 10. Hakowaay ko kahalafin mitala ci Apraham aci Sara to ci Yihofaan hani?

⁹ Haratengen ko taˈarawan ni Apraham aci Sara. Sowal no Fangcalay Cudad, cangra “mitiˈeray to Kawas a kodaitay ko falocoˈ a tamdaw.” O roma a sowal, “o kodaitay ko falocoˈ ni Apraham. Saka, malayap ningra ko nano nisowalan no Kawas a demak.” Mikiˈokan ni Yihofa to papalemeden, palenak to teloteloc ningra. (Hipray 6:12, 15) Misamaanay hano mihadidi ci Apraham hani? Samanen mamitalaho to cecay liyad ngaˈ, malaˈosi ko araaw no Kawas. ˈAyaw ni Yis to saka 1943 miheca Nisan folad 14 romiˈad, ci Apraham ato paro no lomaˈ, milakowitay to Iufratis ˈAlo a micomod i mikiˈokan pala, itiyaay misatapang ko katatelek ni Yihofa aci Apraham. Micomodto i mikiˈokan pala, mitalaayho to 25 miheca, tangasa 1918 a miheca to ˈayaw ni Yis, hofocen ci Isak, ikor no 60 a miheca, tangasa 1858 a miheca to ˈayaw ni Yis, o fofo ci Isau aci Yakop mihofocan.​—Hipray 11:9.

¹⁰ Hakowaay ko malayapay ni Apraham a sera hani? Sowal no Fangcalay Cudad: “Awaay ko niparocekan no Kawas i ci Aprahaman itiya to mamamamang aca a sera. Nikawrira, yo caho ka ciwawa cingra  i, maketonto no Kawas ko sowal i cingraan to sapafeliaw tonini a sera to mamalo ningra ato teloc ningra.” (Dmak 7:5) Ikor no pilakowit ni Apraham to Iufratis ˈalo, mataˈlif ko 430 miheca, ngaˈ mala kitakitay ko teloc ningra, milayap to sapafeli no Kawas a sera.​—Kasadakan 12:40-42; Satapangan 3:17.

11. (1) Misamaanay hano makahi a mitala ci Apraham ci Yihofaan? (2) Mihadidi a mitala cingra, malayapay ko manan a sapalemed?

¹¹ Makahiyay mitala ci Apraham, samanen mitiˈeray cingra ci Yihofaan. (ˈOsien ko Hipray 11:8-12.) Soˈlinto cowa ka ˈaraw ko nika laˈosi no araaw no Kawas, itini i ˈorip ningra, kamayanay makahi a mitala. Haratengen hena, ano patikorto maˈorip i lakoing ci Apraham, hakowa ko hemek ningra. Mafanaˈ to kinapina pinaay masowal no Fangcalay Cudad cingra ato fofofofo ningra, o fafahekaen cingra. * Mamafanaˈ ci Apraham to misamaanay palaˈosi ci Yihofa to araaw Ningra, halo mamahemek to nika karetengay ko saˈaroan no niyah, itini i mikiˈokan a teloc. Tahirato itiya, o nika halafin noka pitala ni Apraham iraayto ko minaroˈan.

12, 13. (1) Misamaanay hano mamihadidi a mitala ci Yosif hani? (2) Tahalifa to cowa ka sadafdaf a demak ci Yosif i, paihekalay to samaanay a waywayan cingra?

¹² Itong a fofo ni Apraham ci Yosif mihadidiay a mitala. Tahalifaay ci Yosif to cowa ka sadafdaf a noka picada no tao. Saˈayaw, 17 ko mihecaan mapacakayay no kaka cingra malo koli no tao, ikor mapalafoay to miˈodangay to fafahi no tawki, salikor, paliten a mirofo cingra. (Satapangan 39:11-20; ˈOlic 105:17, 18) Moecelay ko demak ningra, ˈarawhan palit han a mirofo, caka pilayap to sapalemed. Kawra, mapacakay tayra i Icip to ikor no 13 miheca, mafalicayto ko demak. Mapasadak nai pilofoan, pacakaten ko saˈaroan, isalaeno no hongti no Icip.​—Satapangan 41:14, 37-43; Dmak 7:9, 10.

¹³ Ci Yosif cowa ka masakakinih no tao a maketeren cingra, cowa ka lahedaw ko nika pasoˈlin to Kawas. O manan ko padamaay ci Yosifan a mihadidi hani? O nika pakasoˈlin to Kawas. Maˈaraway ni Yosif to miˈimeran ni Yihofa ko kihecod, sanay pasowal to safa cingra: “Aka ka talaw kamo, o Kawas a mimaan kako. Kona sapiriˈangan kamo i takowanan iˈayaw, nikawrira, falicen no Kawas koya tatiihay a demak a palangaˈayay, onini i, o sapaˈoripaw no Kawas to ˈalomanay a tamdaw.” (Satapangan 50:19, 20) Ci Yosif naitini i nalifetan, mahapinangay mitala cingra tada o ciepocay.

14, 15. (1) Samaanay a mihadidi ci Tafiti? (2) Misamaanay hano makahi mihadidi a mitala ci Tafiti hani?

¹⁴ Hongti ci Tafiti na tahacadaay to caay ka sadafdafen no tao. Soˈlin kaemangho ci Tafiti maherekayto ko Kawas mipiliˈ cingranan to mamala hongti no Israil, kawra 15 miheca a mitala cingra, ngaˈ mala hongtiay no Yutaya. (2 Samuil 2:3, 4) Itiya toya lintad, milepelan noya caay ka madimadi a Sawloan to sapipatayaw ci Tafitian. * Pakayni toninian, malafelay milaliw tayra i roma kitakit, nolatek milimek i dihidihifan. Mapatayto ci Sawlo i piloodan i, mitalaayho to 7 miheca ci Tafiti, ngaˈ soˈlinay mala hongti no Israil ato Yutaya.​—2 Samuil 5:4, 5.

¹⁵ Misamaanay hano makahi mihadidi a mitala ci Tafiti hani? Kina toloay cingra  milicay i ˈOlic saka 13 fedengan: “Hakowaho ko halafin?” Ikor sanay ko sowal: “Nikawrira, mitadiˈec kako to caay ka falic a olah Iso, o nano pipaˈorip Iso i takowanan ko sakalipahak ako. Tapangaw, o hahemeken ako Kiso a romadiw, nawhani tadamaan ko siniˈada Iso i takowanan.” (ˈOlic 13:5, 6) Mitiˈeray ci Tafiti to midaˈocay a olah ni Yihofa, lipahakay a mitala to sapaˈorip Ningra, milomal to nika siniˈada ni Yihofa i cingranan. Hay, miharateng ci Tafiti to nika pitala ningra, tada o ciepocay.

16, 17. Pakayni i mihadidiay a mitala, patirengay ci Yihofa aci Yis to manan ngaˈayay a taˈarawan?

¹⁶ Papihadidiay ci Yihofa kitanan a mitala, o matatodongay a demak, samanen o mikiriwiˈay a capeling Ningra ko kodaitay, patirengay Cingra to ngaˈayay taˈarawan, paihekal to mihadidiay. (ˈOsien ko 2 Pitiro 3:9.) Toha sapisaysayaw to lacongis i Itin halo pafangcal to ngangan Ningra, mihadidiay a mitala ci Yihofa to pina patek a mihecaan. Saikor, o polong mihadidiay mitala i Cingranan a tamdaw, o mamilayap to sapalemed.​—Isaya 30:18.

¹⁷ Ci Yis mihadidiay a mitala. Isaka 33 miheca, madimadiay tahatolas i sapalifet ci Yis, ikor pacakatan ko epoc no sapatefoc ningra i Kawasan. ˈArawhan, tangasa isaka 1914 a miheca ngaˈ, misatapangay a mikowan. (Dmak 2:33-35; Hipray 10:12, 13) Cowa koninian aca, wa mamitalaho ci Yis to hererekan noka pikowan to cecay patek miheca ngaˈ, mapalaˈafo ko ˈada ningra. (1 Korinto 15:25) Pakayni ci Yisan, tada halafinay ko noka pitala, kawra ciepocay ko kapitala ningra.

18, 19. Misamaan kita mihadidi a mitala hani?

¹⁸ Kita kahacecay tamdaw, o mamihadidi a mitala. Misamaan kita a mihadidi a mitala hani? Tolonen ko Kawas misaali to fangcalay saocor. O minaroˈan no fangcalay saocor ko kodait. (Ifiso 3:16; 6:18; 1 Tisalonika 5:17-19) Tolonen ci Yihofa, mingitangit padama kitanan mihadidi, miemem to pasangar.

¹⁹ Haratengen ita ci Apraham, ci Yosif aci Tafiti misamaanay hano mihadidi a mitala to nika laˈosi no araaw ni Yihofa. Mitiˈeray ci Yihofaan, pasoˈlin to mamikayat ci Yihofa to nika lingad no demak, cowa ka haharateng han kono niyah a sakangaˈay. Ano sinanoten ita ko malayapay a sapalemed nora nolitengan a madimadiay a sikawdan i, o ngangaˈay padama kitanan a mihadidi a mitala.

20. Misetek kita ko falocoˈ midemak to manan hani?

²⁰ Soˈlinto tahalifa kita to pades, hadidien a mitala. Nolatekay, wa mihaen a milekal ko falocoˈ ita: “Yihofaaw, hakowaho mitala kako hani?” Pakaynien i sapadama no fangcalay saocor, seteken ita ko falocoˈ mitodong ci Yirimiyaan, sanay ko sowal ningra: “O polong no lalayapen ako a dafong [ci Yihofa], saka, patoroden ako i Cingraan ko pafalocoˈan ako.”​—Mararomay 3:21, 24.