1. (1) Pakayni ci Yisan, paliˈayaway ci Isaya to maanan? (2) Oniya sapairasol hano mamisayar kitaanan hani?

PALIˈAYAWAY pasowal ci Isaya ci Yisan, “caay pakaynien ningra i maˈaraway ningra ato matengilay ningra a lihaf ko nipihapinang ningra to dademaken a mikowan,” hanaca ‘tano moecelay ko pisawkit to pakoyoc a tamdaw.’ (Isaya 11:3, 4) Oniya sapaˈayaw misayaray kitaanan, misamaanay hani? Samanen, aniniay a hekal sahto o misakakinihay ato misakahmaway minengneng to tao, mansa hinatalaay kita to malefotay a pisawkit ni Yis, cowa kao papotal ko nengnengen ningra a misawkit to tamdaw.

2. Pakayni misawkit to tamdaw, sasamaan kita mitodong ci Yisan hani?

² Tocerid misawkitay kita to tamdaw alatek, kawra cowa ko malefotay a tamdaw kita, pasangaray mahecad ci Yisan matatodong ko pisawkit to tao, tano papotalay a pakayraan ko pisawkit. Mihaenay haw i, itini i hekal ci Yis palimoˈotay to tarokos: “Aka kao papotal aca ko nengnengen namo a [misawkit] to tamdaw. Kao moecelay ko demak namo a [misawkit] to tamdaw.” (Yohani 7:24) Mitokelay ci Yis kitaanan mitodong cingraanan, aka kao papotal aca ko nengnengen a misawkit  to tamdaw. Tocerid o maanan a papotalan a pakayraan ko sapisawkit ita to tao hani? Oniya lalakaw mamilengo to toloay lalangian: Finacadan, hafay no tamdaw, mihecaan. Milengo toniya cecacecay a pakayraan i, wa nengnengen ita ko maanan a sapaini, ngaˈay padama kitaanan mitoor to limoˈot ni Yis a midemak.

3, 4. (1) O maanan a lalangian ko mifalicay to pinengneng ni Pitiro to ˈalafang tamdaw hani? (Nengnengen ko satapangan coka.) (2) Padamaan ni Yihofa ci Pitiro cipinang to maanan a demak hani?

³ Iraay ko mitahidangay ci Pitiroan tayra i Kaysariya, o lomaˈ no ˈalafang tamdaw ci Kornilius, alatek adihayay ko maharatengay ningra. (Dmak 10:17-29) Mahecaday ko harateng ni Pitiro ato Yutaya a tamdaw itiya, kaemangho cangra miharateng to ˈalafang a tamdaw o cowa ka korac, kawra dotoc mafekaday a demak masalofay ko pinengneng ningra to ˈalafang a tamdaw. Panengnengan no Kawas ci Pitiro to cecay mapolosi. (Dmak 10:9-16) Itini i mapolosi, manengnengay ni Pitiro ko hato mowa a kiradom matefaday, iraay ko maamaan a cikaditay hananay no Sarikec ni Mosi a ˈaˈadopen, matengilayho ni Pitiro ko ngiha nai kakarayan pasowal cingraanan: “Pitiroaw, kalomowad, pacoken ta kaenen!” Minaˈay ci Pitiro, kawra, iraay ko ngiha i kakarayan pasowal: “O makoracay a nengnengen no Kawas a maamaan i, o kaackan, aka ka saan kiso.” Maˈaraw ko mapolosi i, awaay ko pinang ni Pitiro, cowa ka fanaˈ to o maanan ko hasowal ni Yihofa cingraanan. Toya toki, o miocoran ni Kornilius a sikawdan mikilimay ci Pitiroan, itini i sakayat no fangcalay saocor ci Pitiroan mihakelongay toya sikawdan tayra i lomaˈ ni Kornilius.

⁴ Ano o potal aca ko minengnengan ni Pitiro a misaˈosi, tahadaˈocto cowa ko mamicomod i lomaˈ ni Kornilius. O Yutaya tamdaw cowa ka tayra i lomaˈ no ˈalafang a tamdaw. O maanan ko mifalicay ci Pitiroan, hato masawad ningra ko cilamitayto a misakakinihay harateng, makahi a micomod i lomaˈ ni Kornilius hani? Taˈangayay ko milingatan no maˈaraway ni Pitiro a mapolosi cingranan, malifokayho ningra ko sakayat no fangcalay saocor. Matengil ni Pitiro ko sowal ni Kornilius ato milifetan ningra, masemeray ko falocoˈ, itini pipatemer no fangcalay saocor sanay ko sowal: “Soˈlinay mahapinangto ako imatini ko nika caay ko misakakinihay ko Kawas. Ano masamaamaanayto a tamdaw no kasakitakit i, ano o mitaˈongay to Kawas ano o moecelay ko demak a tamdaw i, layapen no Kawas cingra.” (Dmak 10:34, 35) Oniya faelohay a pinengneng mahemekay ci Pitiro, taˈangayay ko pilingat cingranan. Mihaenay, oniya caka pisakakinih a kimad pakayni polong a Krisciyang samaanay ko pilingat hani?

5. (1) Mitokelay ci Yihofa to cecacecay Krisciyang cipinang to maanan a demak? (2) Soˈlin mafanaˈay kita to pinengneng ni Yihofa, kawrira itini i kemod no falocoˈ iraayho ko maanan a harateng no mita?

⁵ Pakaynian ni Yihofa ci Pitiroan padama ko Krisciyang a cipinang to cowa ka pisakakinih Cingra, cowa ka kiriwiˈen Ningra misakareteng ko cecay finacadan, kitakit, sasowalen a tamdaw. Ano faˈinayan fafahiyan, ano o mitaˈongay to Kawas ano o moecelay ko demak a tamdaw i, wa layapen no Kawas cingra. (Kalatiya 3:26-28; Paˈarawan 7:9, 10) Halatek mafanaˈayto kiso toniya kimad, kawra ano itiniay i misakakinihay a lalengawan a lomahad kiso, harateng iso cowa kafiyor ko niyah sanay halatek, kawra itini kemod no falocoˈ iraayho ko misakakinihay alatek. Tinakoen ci Pitiro, iraay ko toki ningra padama to tao cipinang to cowa pisakakinih ci Yihofa, kawra ikorto, o demak ningra paihkalay to kamayan ira ko misakakinihay a harateng. (Kalatiya 2:11-14) Itini toniya pakayraan, sasamaan kita mitengil to limoˈot ni Yis, aka kao potal ko nengnengen a misawkit to tamdaw.

6. (1) Sasamaan ko demak ita ngaˈ palahdaw to misakakinihay i falocoˈ no mita? (2) Mikitini i safanaˈ no cecay ciˈinorongay a salikaka, mahapinangay ita ko maanan?

⁶ Songilaˈen ita miharateng to matooray no niyah ko palinian no Fangcalay Cudad hokira, mihaen wa mafanaˈ to iraay ko misakakinihay a harateng  no niyah. (ˈOlic 119:105) O roma, misaaliay kita to sadama no tao, samanen cowa ka hapinang ita to misakakinihay ko niyah to tao, kawra mahapinangay no roma tamdaw. (Kalatiya 2:11, 14) Latekay, samanen halafinayto ira ko misakakinihay ita to tamdaw, teloc cowa ka hapinang to iraay ko mahaenay harateng no niyah. O cecay ciˈinorongay a salikaka mahaenay ko pakayraan, wa mitilid cingra to cecay safanaˈ pakayni mieminay to toki mitosilay a mararamoday. O finacadan noniya faˈinay, misakahmaway ko ˈalomanay minengneng toniya finacadan. Kawra oniya ciˈinorongay a salikaka cowa ka hapinang to iraay ko misakakinihay a harateng no niyah toniya finacadan, itini safanaˈ ningra pakahemekay toniya faˈinay, masowalay ko ngaˈayay a demak ningra, kawra itini sapihererek no safanaˈ sanay ko sowal: “Soˈlin ono [mimingay a finacadan] cingra, o waywayan ato pakayraan ningra a maˈorip pahapinangay to roma tamdaw, [oniya finacadan] a tamdaw wa ngaˈay eca ka malafo ko waywayan tatiih ko kaˈorip, mahaen o romaroma tamdaw [finacadan].” Mikitini sowal noniya salikaka wa mahapinang iso ko maanan hani? Ano samanayto ko ˈinorong ita i likakawa no Kawas, oha mamitiyawca to falocoˈ no niyah, iraay ko miming a misakakinihay hokira, hanaca makahi micada to sadama no tao. Wa ngaˈayho misamaan ko demak no mita hani?

7. Sasamaan ko demak ita ngaˈ misakakahad to falocoˈ?

⁷ Ano misakakahad kita to falocoˈ, wa malowid no olah ko misakakinihay a falocoˈ. (2 Korinto 6:11-13) Edeng ko mahecaday ko finacadan, ngasaw, kitakit, sowal a tamdaw ko misawidangan iso han? Maolah kiso misakakahad to micawmaˈan a widang han? Ngaˈay kiso mitahidang to cowa ka hecad a lalengawan malacafay mitosil, ato tahidangen cangra tayni i lomaˈ macacawmaˈ kalacafay komaen. (Dmak 16:14, 15) Ano mihaen ko demak wa matongal ko olah i falocoˈ iso, awaayto ko misakakinihay i falocoˈ iso. Kawra, alatek wa pakayni kita i maanan no potal a lalangian misawkit to tao hani? Dotocto wa milengo kita to pakayniay i hafay no tamdaw.

8. Mikitini i Lifi 19:15, patalipaˈelalay kitaanan to maanan?

⁸ Alatek mitooray kita to hafay no tamdaw a misawkit to samaanay a tamdaw cingra, mihaenay, i Lifi 19:15 sanay ko sowal: “Aka pisakakinih kamo to pakosiya ato tadamaanay a tamdaw. Kao moecelay ko sapisawkit namo to finacadan.” Kawrira, o hafay no cecay a tamdaw sasamaan milingat to kapinengneng ita cingranan hani?

9. Miˈoningay ci Solomon to maanan a ka adayayan a demak? O mananam ita ko maanan?

⁹ Mapatemeray no fangcalay saocor ci Solomon, miˈoningay to cecay ka adayayan a demak, sanay ko sowal ningra: “O kaˈosian no tamdamdaw ko pakosiya a tamdaw, nikawrira, ˈaloman ˈaloman ko widang no cidafongay a tamdaw.” (Taneng 14:20) Naitini citanengay a sowal mananamay ita ko maanan hani? Ano caka pisinanot kita i, wa edeng o cihafayay salikaka ko sawidangen, miliyas to manikaway a salikaka. Ano tooren ita ko hafay no tamdaw a misawkit i, wa ira ko maanan a pasangar hani?

10. Masowalay ni Yakop ko maanan pasangaray i kasakopang?

¹⁰ Ano tooren ita to hakowaay ko hafay no tamdaw a misawkit to samaanay a tamdaw cingra, alatek wa mafekad ko misaˈakawangay a pakayraan i kasakopang. Itini saka cecay hahekalan, o roma kasakopang iraay ko mahaenay a pasangar, mansa palimoˈoten ni Yakop ko Krisciyang misinanot toniya demak. (ˈOsien ko Yakop 2:1-4.) Wa misinanot kita aka pairaen ko maliwasakay a pakayraan i kasakopang. Sasamaan kita ngaˈ caka mitoor to hafay no tamdaw a misawkit to tao hani?

11. O hafay no tamdaw wa milingat to kalalaˈed ningra aci Yihofa han? Tadtaden hena.

¹¹ O tatano harateng ni Yihofa ko pinengneng ita to salikaka. Cowa ko hafay anca kanikaw no tamdaw ko misaaretengan ni Yihofa, o ngaˈayay kalalaˈed ita ci Yihofaan cowa pilingat to hakowaay ko hafay no mita. Na somowalay ci Yis: ‘O  cihafayay tamdaw pasangaray micomod i kakarayan kitakit,’ kawra cowa ka pasowal cingra to cowa ko mamadangal nangra. (Matay 19:23) Loma i, sanay ko sowal ni Yis: ‘Manikaway tamdaw mamalemed kamo, samanen ono namo ko Hongti Kitakit no Kawas.’ (Luka 6:20) O manikaway tamdaw wa madipot no Kawas maemin, anca wa mitengil cangra maemin to sapasifanaˈ ni Yis, cowa ka saan ko sowal ni Yis. Soˈlinay i, ˈalomanay a manikaway tamdaw cowa ka malo nisawawaan ni Yis. O maanan ko mananamay ita hani? Aka o hafay no tamdaw ko sapisawkit ita to kalalaˈed ningra aci Yihofa.

12. O maanan ko sapalimoˈot no Fangcalay Cudad to cihafayay ato manikaway a tamdaw?

¹² Anini, o finawlan no Kawas ano manikawayto cihafayayto, maolahay ci Yihofaan misarocod to falocoˈ mihodop Cingranan. Patalipaˈelalay ko Fangcalay Cudad to cihafayay a Krisciyang, “sakaecaaw ka pasayra no falocoˈ nangra i caay ko tatadiˈecen a dafong,” pasayraen i Kawas ko falocoˈ. (ˈOsien ko 1 Timoti 6:17-19.) Loma pakayraan i, mirikecay ko Fangcalay Cudad to polong a finawlan no Kawas, ano samanayto ko hafay, aka a maˈanof to payci. (1 Timoti 6:9, 10) Tano harateng ni Yihofa ko pinengneng ita to salikaka, mihaen cato ko hafay ko sapisawkit to samaanay a tamdaw cangra. Ano hatiraay i, o mihecaan ko nengneng ita a misawkit to tamdaw han?

13. Misaaliay ko Fangcalay Cudad kitaanan samaan ko picada to matoˈasay hani?

¹³ Itini i Fangcalay Cudad adihayay ko sapatalipaˈelal kitaanan mikangodo to matoˈasay a tamdaw. Tinakoen, sowal i Lifi 19:32 sanay: “Kangodoen ko matoˈasayto a tamdaw, katomireng kamo a mangodo i kaˈayaw no maˈofadayto a matoˈasay a tamdaw. Nawhani o Tapang a Kawas namo Kako.” Itini i Taneng 16:31 mifanaˈay kitaanan: “O nika ˈofad i, o tadamaanay a tamohong no moecelay a tamdaw, o nika koˈdaw no ˈorip i, o sapakaolah to moecelay a tamdaw.” O roma, pasowalan ni Pawlo ci Timoti haenen o wama ko pinengneng to matoˈasay a salikaka, hamaan pakidem ko pirikec cangranan. (1 Timoti 5:1, 2) Soˈlin ikakaay ko adihay no ˈinorong ni Timoti to matoˈasay a faˈinayan salikaka, kamayan o sasidaˈit cingra a mikangodo cangranan.

14. Itini i samaanay a pakayraan wa mirikec kita to matoˈasay tamdaw hani?

¹⁴ Kawraan, ano padeteng mararaw anca miowing to kapiliˈan no Kawas a demak ko matoˈasay a tamdaw, wa pakiyadi han anca dofdofen ita cangra han? Ci Yihofa cowa kao potal ko minengnengan a misawkit to tamdaw, cowa ko papakayni katoˈas no cecay tamdaw a pakihater cingranan a mararaw. Sinanoten samanay ko sowal i Isaya 65:20: “Ano caho ka semoˈot ko mihecaan, ano mapatay koya tamdaw i, o nitefocan no Kawas cingra han koya tamdaw.” Mikitini maˈaraway ni Icikil a mapolosi wa ngaˈay mahela ita ko mahecaday a safalod. (Icikil 9:5-7) Mihaenay, o sasinanoten ita o pinengneng ni Yihofa oya ‘tahadaˈocay a materek.’ (Taniil 7:9, 10, 13, 14) Ano mihaen ko demak no mita, wa ira ko timolo ita itini matatodongay a toki mirikec to matoˈasay tamdaw.​—Kalatiya 6:1.

15. Sasamaanen ita minengneng ko kaemangay a salikaka, mikitini i sowal ni Pawlo ato tinakoan ni Yis mananam ita ko maanan?

¹⁵ O roma i, sasamaanen ita minengneng ko kaemangay a salikaka i kasakopang hani? Pasowalay ci Pawlo ci Timotian, sanay ko sowal: “Aka kao kacangalan no nimanima ko nika mamangho no mihecaan iso. Kao [malo taˈarawan] no pasoˈlinay ci Kristoan a tamdaw ko sowal iso ato demak ato nika olah ato nipitiˈer ato nika korac no falocoˈ iso.” (1 Timoti 4:12) Mitilid ci Pawlo toniya sowal i, maedeng 30 ko mihecaan ni Timoti, kawra pafelianto ni Pawlo cingra to taˈangayay a ˈinorong. Ano o mananto a lalangian ko sapihadak ni Pawlo to limoˈot, wa minanam kita to cecay kalimlaan: Hamaan misakahmaw to kaemangayho a salikaka. Haharatengen ita, ci Yis itini 30 ira ko pina ko mihecaan a malaheci ko ˈinorong i cikiw.

16, 17. (1) Ano minilnil to faˈinayan salikaka malo padamaay sikawdan anca malohemay malitengay i, o malohemay malitengay ngaˈay tano maanan a palinian ko sapilalat to salikaka? (2) O pinengneng anca serangawan ita nolatekay iraay ko maanan a kasasiroma to palinian no Fangcalay Cudad hani?

 ¹⁶ Alatek itini i serangawan no mita, cowa ka ngodongen ko kaemangay tamdaw, ano mahaenay, o roma kaemangay salikaka i kasakopang, iraayto ko tatodong malo padamaay sikawdan ato malohemay malitengay, wa cisasa ko harateng no malohemay malitengay a minilnil cangraanan. Haharatengen no malohemay malitengay, cowa ka somowal ko Fangcalay Cudad to hakowa ko mihecaan no salikaka ngaˈ manilnil malo padamaay sikawdan ato malohemay malitengay. (1 Timoti 3:1-10, 12, 13; Titus 1:5-9) Ano tooren no malohemay malitengay ko serangawan no niyah a misaˈosi, cowato ko mitooray to Kimad no Kawas a dademak. Wa o palinian no Fangcalay Cudad ko sapisaˈosi no malohemay malitengay to kaemangay salikaka, eca ko pinengneng no niyah ato nanaman no hekal a misawkit.​—2 Timoti 3:16, 17.

¹⁷ O malohemay malitengay ano mafiyor no serangawan no niyah, eca ka tano palinian no Fangcalay Cudad a minengneng to salikaka, ano mahaen ˈalomanay iraay ko tatodong a salikaka, awato ko pakayraan a manilnil. Nengnengen ko tinakoan no cecay kitakit, o malohemay malitengay no kasakopang patorodan i cecay padamaay sikawdan ko kalimlaan a ˈinorong, ngaˈayay ko demak ningra. Mihayay ko malohemay malitengay to matooray noniya padamaay sikawdan ko palinian no malohemay malitengay i Fangcalay Cudad, kawra cowaho ka nilnilen cingra malo malohemay malitengay. O harateng no matoˈasay a malohemay malitengay i kasakopang, kaemangayho koniya padamaay sikawdan, hato cowa ko malohemay malitengay a nengnengen. Teloc i, oniya padamaay sikawdan pakayni i noka kaemang hato cowa ka nilnilen. Itini roma kilac, iraay ko mahaenay misakakinihay harateng. Mihaenay, o palinian no Fangcalay Cudad ko sapilalat to salikaka, hamaan tano serangawan ato no niyah a harateng ko pisaˈosi o masakalimlaan! Mihaen to demak o midoedoay ci Yisan, aka kao papotal aca ko nengnengen a misawkit to tamdaw.

18, 19. Sapinanamaw kita tano pinengneng ni Yihofa a minengneng to tao, sasamaan ko hademak?

¹⁸ Soˈlin cowa ka lefot kita, ngangaˈay tano pinengneng ni Yihofa a minengneng to tao, mitodong Cingranan a eca ka masakakinih. (Dmak 10:34, 35) Kawraan, kamayan kita misaˈicelay a misinanot to sapatalipaˈelal no Kimad no Kawas, halo misaka dademak i nokaˈorip, mihaen ngaˈayto mitoor to sapalimoˈot ni Yis a midemak, eca ka tano papotal no tamdaw a misawkit.—Yohani 7:24.

¹⁹ Cato ka halafin, o Hongti ci Yis Kristo mamisawkit to polong a tamdaw, kawra cowa ko tano maˈaraway ato matengilay a demak ko sapisawkit, ao tano moecelay ko pisawkit to tamdaw. (Isaya 11:3, 4) Mitokelay kita to sakairaaw noniya romiˈad!