1. Hano o hinapaladaˈay a Kawas ci Yihofa hani?

ˈAYAW no masangaˈ ko kihcod i, edeng ci Yihofa ko materekay, kawrira cowa ko niyah aca ko maharatengay ni Yihofa, misangaˈay Cingra to coyoh ato tamdaw o citanengay a pinaˈorip, pafeli cangranan to kalimlaan a ˈorip, ‘lipahakay a Kawas’ ci Yihofa maolahay paladaˈ to ngaˈayay a dafong. (1 Timoti 1:11; Yakop 1:17) Maolahay Cingra mahemek kita, mansa pasifanaˈ kitaanan makahi a hinapaladaˈ.​—Loma 1:20.

2, 3. (1) Hinapaladaˈ hano papakahemek kisowanan? (2) Oni lalakaw wa milengo to maanan hani?

² Palecadan no Kawas to tireng Ningra ko tamdaw a misangaˈ. (Satapangan 1:27) Tatodong i, misangaˈan kita ngaˈay paihkal to capeling Ningra. Ano makalimay kita mahemek ira ko epoc no kaˈorip, wa minanam to taˈarawan ni Yihofa, ciharateng ato hinapaladaˈ to tamdaw. (Filipi 2:3, 4; Yakop 1:5) Mihaen ko demak ita, hano aira ko hemek hani? Samanen misangaˈ ci Yihofa kitaanan wa ngaˈay mikitini  pipaladaˈ milifok to hemek. Soˈlin cowa ko malefotay kita, kawra wa ngaˈayho mitodong to hinapaladaˈay a harateng ni Yihofa.

³ Mitadtaday ko Fangcalay Cudad sasamaan hinapaladaˈ to tamdaw, dotoc nengnengen ita ko pina milingatay a sinael, cipinang to hano pakahemek to Kawas ko hinapaladaˈay a tamdaw, ato samaan padama koniya capeling milaheci to patorodan no Kawas a demak. Wa milengoho kita hinapaladaˈ samaan pakahemek to niyah, halo misamaanay hano papadotoc kita a palahad to hinapaladaˈay a harateng.

4, 5. Pakayni i hinapaladaˈay, ci Yihofa aci Yis patirengay to maanan a taˈarawan hani?

⁴ Mitokelay ci Yihofa kitaanan mitodong Cingranan, mansa mahemek Cingra pakaˈaraw kitaanan hinapaladaˈ to tamdaw. (Ifiso 5:1) Kasapaan ko pisangaˈ ni Yihofa kitaanan, pafeliayho to makapahay a kitiraan no mita, misawacayay konini to maolahay Cingra a mahemek kita. (ˈOlic 104:24; 139:13-16) Misaˈicel kita a pakahemek to tao, wa ngaˈay paˈodingal ci Yihofaan.

⁵ O soˈlinay Kriscyang wa mitodong ci Kristoan, samanen hinapaladaˈay cingra itiniho fafekang no sera, patireng to ngaˈayay taˈarawan no mita. Sanay ko sowal ni Yis: “O sakatayni ako i, caay ko pakatayalay to tamdaw to saki takowanan. O malamamatayal to saki tamdamdaw, o romasato, malasapatefoc kako a patodong to saki ˈalomanay a tamdaw a kinafalah to ˈorip.” (Matay 20:28) Pakalalokay ko tarokos ci Pawlo to Krisciyang, sanay ko sowal: “Samatiyaen o falocoˈ ni Kristo ko falocoˈ namo . . . Sawaden ningra kono tireng a demak, palakolien ningra ko tireng ningra a palecad tono tamdaw.” (Filipi 2:5, 7) Ngaˈayay licayen ita ko niyah: “Wa ngaˈay kako midemak to maanan, padama to niyah itini kihcod a demakan mikotod to taˈarawan ni Yis hani?”​—ˈOsien ko 1 Pitiro 2:21.

6. Pakayni i tinakoan no Samariya tamdaw, pasifanaˈay ci Yis kitaanan to manan? (Nengnengen ko satapangan coka.)

⁶ Samaan kita pakahemek ci Yihofaan hani? Minanam to ngaˈayay taˈarawan Ningra aci Kristo, ciharateng to kangaˈayan no tao, haratengen to sasamaan padama to tao. Pakayni ciolahay a Samariya tamdaw a tinakoan, paihkalay ci Yis mitokelay cingra to nisawawaan misaˈicel padama to tao, soˈlin cowa ka hecad ko serangawan i, padotocen a mihaen ko demak. (ˈOsien ko Luka 10:29-37.) Pasowal ci Yis toniya tinakoan i, samanen iraay ko milicayay cingranan a Yutaya tamdaw: ‘O cima ko kaolahen ako a tamdaw hani?’ Paihkalay ko caˈof ni Yis, ano sapakahemekaw to Kawas i, matiyaen oya Samariya tamdaw makahi a hinapaladaˈ.

7. O misatekeday kita hokira ato mifekadan ni Satan a lacongis, iraay ko manan a kalaliting hani?

⁷ Adihayay ko lalangian no Krisciyang hinapaladaˈ to tamdaw, o cecay milingatay to mifekaday i Itin a lacongis. Sowal ni Satan, ano isalakat ci Ifa micangacang to sakangaˈay no niyah, ecaka pidofdof to Kawas, wa ikaka ko ngaˈay no kaˈorip, ikor oniya lacongis macapiday ko polong a tamdaw. Itiya, paihkalay ci Ifa to misatekeday a waywayan, saka hecadaw to Kawas—ano ci Atam misatekeday, sapakahemekaw ci Ifaan. (Satapangan 3:4-6) O saˈosi nangra pairaay to ka adayayan a teloc. Mihaenay mahapinang, o misatekeday cowa pakahemek to tamdaw, pairaay to roray. Cowa ka hecad ko hinapaladaˈay, ira ko cowa pisateked a capeling paihkalay to pakasoˈlinay kita to sangaˈayay ko demak ni Yihofa.

8. Misamaanay ci Atam aci Ifa o caciharateng to sakangaˈay no teloteloc hani?

⁸ Mikitini salimoˈot no Kawas ci Ataman aci Ifaan ngaˈay mahapinang, soˈlin itini i Itin, satapang  edeng cangra aca tatosa, mitokelay ko Kawas cangranan patado miharateng to sakangaˈay no tao. Palemedan ni Yihofa ci Atam aci Ifa, mahofoc to teloteloc, ho miedef ko tamdaw i cikiw, halo pamatang to sera. (Satapangan 1:28) O caciharateng ci Atam aci Ifa to sakalipahak no teloteloc, mahecad o kaciharateng no misangaˈay tatapangan to masangaˈay a pinaˈorip. O araaw ni Yihofa mamacowat ko Lakoing i polong no cikiw, palemed to tamdamdaw. O tada taˈangayay a tayal konini, misaaliay ci Ataman aci Ifaan malacafay to teloteloc a milaheci toniya demak ngaˈ ngaˈay.

9. Micowat to kakahad no lakoing hano papakahemek to tamdaw hani?

⁹ O malefotay a tamdaw wa malacafay ci Yihofaan a dademak, mihaen ngaˈ, macowat ko lakoing ato malaˈosi ko araaw no Kawas. Mihaen, wa ngaˈay cangra milifok to paselaˈan no Kawas. (Hipray 4:11) Haratengen, oniya demak na papaira to taˈangayay a losiyang ato hemek no tamdaw. Patado ko tamdaw miharateng to sakangaˈay no tao a kinafalah to niyah, wa tatangongol ko karenec ato milifok to adihayay sapalemed.

10, 11. Samaan ko demak ita ngaˈ malaheci ko mitosilay ato pasifanaˈay to tamdaw a demak?

¹⁰ Anini, o mitosilay ato padama to tamdaw mala Krisciyang tayal, patorodan ni Yihofa ko finawlan Ningra. Ano sapalaˈosiaw kita toniya tayal i, wa nai falocoˈen a ciharateng to tao. Pairaen ko matatodongay a harateng, maolah to Kawas ato maolah to tao ngaˈ, kodait a midemak to patorodan no Kawas a demak.

¹¹ Pasowalay ci Pawlo o niyah ato romaroma Krisciyang, o ‘kapot no Kawas matayal’, samanen mitosilay cangra, ato pasifanaˈay to soˈlinay kimad. (1 Korinto 3:6, 9) Anini ngaˈay malo kapot no Kawas kita, o pakayraan i, cowa ka pisateked a patafang to toki, tireng ato dafong, misongilaˈ a midemak to sapatorod no Kawas a mitosilay a demak. O tada sakaliko no mita konini!

12, 13. Padama to tamdaw minanam to soˈlinay kimad malifokay iso ko maanan sapalemed?

¹² Makahi kita misadak to toki ato ˈicel mitosil pasifanaˈ to tamdaw, wa taˈangay ko hemek. Pakaynien i Krisciyang ko sowal, awaayto ko pakafiloay to hemek a macakat i noˈadingoan ko pacekiwan a tamdaw. Maˈaraw ko pacekiwan pakayni ka cipinang to soˈlinay kimad a mahemek, matongal ko pakasoˈlin no falocoˈ, mifalic to niyah ato paladaˈ to mananamay i tamdaw, pasangaray a sowalen ko kahemek no mita. Mahecaday ko harateng ni Yis, miocoran ningra ko 70 tamdaw a mitosil, samanen ngaˈayay ko minaroˈan ‘lipahakay a minokay’ cangra, pakahemekay konini ci Yisan.​—Luka 10:17-21.

¹³ Itini icowacowa pala a mitosilay mahemekay pakaˈaraw to tamdaw pakayni ngaˈayay lihaf a mafalic ko kaˈorip, mahaenay ci Anna *, o  cowaho cifaˈinay a kaemangay salikaka cingra, malinahay tayra i Iwropa misaaliay to adihayay mitosilay a kilac matayal. Sanay ko sowal ningra: “Maolahay kako itini, samanen adihayay ko pacekiwan a tamdaw. Pakahemekay ko mitosilay a demak takowanan. Ano tahalomaˈ, awaayto ko toki ako miharateng to niyah a demak, o maharatengay ako sahtoay o kalacafayay takowanan minanam to Fangcalay Cudad a tamdaw, ato masiˈayaway nangra a pasangaray ato kacalemceman a demak, mikilimay kako to toki a pakalalok ato padama cangranan. Mihaen to demak pakasoˈlinay kako, ‘o paladaˈay ikakaay ko hemek to milayapay.’”​—Dmak 20:35.

14. Soˈlin caka hakowa ko maolahay to soˈlinay kimad a tamdaw, samaan kiso milifok to hemek i pitosilan hani?

¹⁴ Misaˈicel kita mifanaˈ to tamdaw to ngaˈayay ratoh, soˈlin caka olah cangra i, wa malifokho ita ko lipahak. Anini o tayal ita mahecaday to pairasolay a Icikilan, pasowal ci Yihofa cingraanan: “Ano mitengilto cangra, ano ecato pitengil cangra to sowal iso i, o sasowasowalen aca iso cangra to nano sowal Ako.” (Icikil 2:7; Isaya 43:10) Soˈlin misakahmaw ko tamdaw to milasilan ita a lihaf kamayan misaareteng ci Yihofa to mihadakan ita a ˈicel. (ˈOsien ko Hipray 6:10.) O cecay faˈinayan salikaka iraay ko hatiniay talaˈayaway a waywayan, masowal ningra ko mitosilay a demak, sanay: “Paloma kita, micefos, mitokel a mitolon, micangacang ci Yihofaan palamit to soˈlinay kimad i falocoˈ no tamdaw, padama cingranan macakat.”​—1 Korinto 3:6.

15. Ano caka miakoˈid ko tamdaw to hinapaladaˈ no mita, wa padotoc kita makahi a paladaˈ han? Tadtaden hena.

¹⁵ Harateng ni Yis pakayni i hinapaladaˈ a lipahak kita. Tocerid, maolahay ko tamdaw to hinapaladaˈay a waywayan. Palimoˈotay ci Yis kitaanan: “Paladaˈen ko tao ta matiya o pipiepi no tamdaw a miseksek i sato a mitomes a mipafeli i tisowanan ko pipafeli no Kawas i tisowanan. Ano o maan ko sapilatang namo a pafeli i taowanan i, orira ito ko sapilatang no Kawas a pafeli i tamowanan.” (Luka 6:38) Soˈlin cowa ka sahto sa miakoˈid ko tamdaw to hinapaladaˈ no mita,  kawra o roma tamdaw wa pakayni hinapaladaˈ ita mapakalalok, misaˈosi a paladaˈ to tamdaw. O cecay hinapaladaˈay a demak wa paira to makapahay minaroˈan halatek. Mihaenay, ano ecato ka semer ko tamdaw to mihadakan ita, wa padotoc kita makahi a paladaˈ.

16. Hano cowa ka ngaˈay kita pakayni i maanan a lalangian a paladaˈ to tao hani?

¹⁶ O hinapaladaˈay a tamdaw cowa pilongoc to papatikolen. O sowal ni Yis: “Ano patala kiso to tadamaanay a tahka i, kao pakoyoc a tamdaw, tatiihay ko tireng, o mapiˈiway, o mapohaway a tamdaw ko tatahidangen. Ta mapalemed kiso.” (Luka 14:13, 14) O cecay patemeran no Kawas a tamdaw pasowalay cingra: “O siniˈadaay a pafeli i pakosiya a tamdaw to kakaenen i, o mamalemed cingra.” Roma tamdaw pasowalayho: “O mafanaˈay a miharateng to pakosiya a tamdaw i, tada o malmeday.” (Taneng 22:9; ˈOlic 41:1) Mihaenay, hanipaladaˈ kita to tamdaw, samanen padamaen ko tao wa lipahak kita.

17. Samaanay a pipaladaˈ wa palipahak tisowanan hani?

¹⁷ O sowal ni Yis: ‘O paladaˈay ikakaay ko hemek to milayapay.’ Pasowal ko tarokos ci Pawlo toniya sowal i, cowa ko pafeli aca to tamdaw to dafong, mahaopay ko pakalalok, mikayat, padama to iraay ko saali a tamdaw. (Dmak 20:31-35) Tano sowal ato waywayan ci Pawlo pasifanaˈ kitanan to sasamaan kinafalah to toki no niyah, ˈicel, ciharateng ato maolah to tamdaw.

18. Pakayni i hinapafeliay, samaanay ko pinengneng no adihayay mikingkiway a tamdaw hani?

¹⁸ Mahapinangay no mikingkiway to siyakay a tamdaw, o hinapafeliay wa malipahak ko falocoˈ sanay. Milengoay ko cecay lalakaw: “O sowal no ˈalomanay a tamdaw, ano midemak to ngaˈayay i, mamalifok ko taˈangayay a lipahak.” Somowalay ko mikingkiway a tamdaw, padama to tamdaw ‘matongalay ko araaw ato epoc no kaˈorip, samanen mihaen to demak mirenecay to sasafaay a saali no tamdaw.’ Mihaenay, ngaˈay padama kita to ˈalomanay a tamdaw hamaan ko lifon, mihaen to demak tanoktokay ko tireng, matongalay ko lipahak. Mihayay kita toniya sowal, samanen sowal no misangaˈay to tamdaw a Yihofa o paladaˈay ikakaay ko hemek to milayapay.​—2 Timoti 3:16, 17.

19, 20. Wa misetek kiso to falocoˈ misamaan to demak? Misamaanay aki?

¹⁹ Anini, o saka ciepoc no niyah ko miharatengan no tamdaw, o hatiniay a waywayan alatak wa mafiyor kita, wa pasangar kita padotoc a mipaladaˈ to tao. Kawra o sowal ni Yis, sakakaay tosa a limoˈot o misarocod to falocoˈ, sarocoden ko ˈorip, sarocoden ko harateng sarocoden ko ˈicel iso a maolah ci Yihofa ato maolah to tao. (Marko 12:28-31) Oniya lalakaw wa mahapinang ita, maolahay ci Yihofaan a tamdaw minanamay Cingranan. Hinapaladaˈay ci Yihofa aci Yis, mitokelay cangra kitaanan hinapaladaˈ, samanen wa pakahemek koni kitaanan. Ano maolah kita hinapafeli to Kawas ato tao i, wa paˈdil ci Yihofaan ato pakahemek to tao ato niyah.

²⁰ Ano misaˈicelay kiso a patafang to niyah a padama saki tamdaw, mikiriwiˈay to salikaka, tada ngaˈayayto. (Kalatiya 6:10) Ano padotoc kiso a hinapaladaˈ, wa kaolahen ato akoˈiden no tao kiso, matongal ko lipahak iso, mahaen o sowal itini Taneng 11:25 sanay: “O halipaladaˈay a tamdaw i, mangalef a matongal ko nika cakat ningra, o pipadama to tao i, o sakaciepoc no tireng.” Itini nokaˈorip ato noˈadingoan a demak i, wa ngaˈay kita tano romaroma a pakayraan caka pisateked a hinapaladaˈ, halo paihkal to siniˈadaay ato hinapafeliay. Ilaenoay a lalakaw wa milengo to wa ngaˈayho kita tano masamaanay a pakayraan a hinapaladaˈ.