1. Wa ngaˈay kita tano maanan a pakayraan a malacafay ci Yihofaan a matayal hani?

O MISANGAˈAY Tatapangan, na mitokelay a malacafay to malefotay tamdaw palaˈosi to araaw Ningra. Ikor cowato ka lefot ko tamdaw, kawra o madimadiay tamdaw wa ngaˈayho malacafay ci Yihofaan a matayal. Tinakoen, mitenak kita to ngaˈayay lihaf no Hongti Kitakit ato padama to tao malo Krisciyang, mahecaday ‘o kapot ita ko Kawas matayal’. (1 Korinto 3:5-9) Malacafay kita to ciˈicelay misangaˈay Tatapangan, milaheci to kalimlaan a tayal Ningra, tada kalikoanto! Kawra, coko mitosilay ato padama to tao malo Krisciyang aca ko tayal, ngaˈayho kita pakayni i roma pakayraan malacafay ci Yihofaan a matayal. Oniya lalakaw wa milengo to romaroma pakayraan, tinakoen—padama to paro no lomaˈ ato salikaka, paihkal to hinalafangay, makahi mirienang to masasiromaay a tayal i likakawa no Kawas, ato mitongal to adihayay a tayal ci Yihofaan.​—Kolosay 3:23.

2. Itini katayal ci Yihofaan, hano caka ngaˈay kita pararini to tao hani?

² Ano milengo kita toniya lalakaw i, aka pararinien ko tao ato niyah, samanen o mihecaan, tanoktok no tireng, kaˈoripan ato inaneng no cecacecay a tamdaw, cowa ka hecad, mansa o katayal ci Yihofaan  cowa ka hecad. Haratengen ita ko sowal ni Pawlo: ‘Kahacecay a tamdaw tiyawcaen ko tayal no niyah. Mihaen i, mahemek ko tamdaw pakayniay i tayal no niyah, cowa ko parariniay to tao.’​—Kalatiya 6:4.

3. Midimokos to paro no lomaˈ hano mahecaday o malacafayay ci Yihofaan a matayal hani?

³ Dimokosen ko paro no lomaˈ sanay ci Yihofa kitaanan. Alatek matayalay ko roma tamdaw pakayni i sakaˈorip no paro no lomaˈ, o roma, malo winaay midipotay to ˈengaengaho a wawa i lomaˈ, anca midimokosay to malonayay ko tireng a wama wina, o kalimlaan a demak konini. Sowal no Fangcalay Cudad: “Ano ira ko caay pikihar to [salawina] ato paro no lomaˈ ningra a tamdaw i, o misiikoray cingra to pitoor ningra ci Kristoan. Ikaka no caay pipasoˈlin to Kawas ko nika tatiih ningra.” (1 Timoti 5:8) Alatek sapitongalaw kiso to tayal saki Yihofaan, kawra, iraayho ko ˈinorong a midimokos to lomaˈ, hato awaay ko toki mihaen to demak, hamaan masomad, samanen midimokos to saali no paro no lomaˈ wa ngaˈay pakahemek ci Yihofaan.​—1 Korinto 10:31.

4. Wa samaan ko wama wina isalakat micangacang to Hongti Kitakit hani? Ano mihaen wa ira ko maanan a minaroˈan hani?

⁴ O Krisciyang a wama wina padamaen ko wawa patireng to patosokan i noˈadingoan, mahecaday o malacafayay ci Yihofaan a matayal koni. ˈAlomanay a wama wina mihaenay to demak, minaroˈan i, maolahay ko wawa mirienang to mieminay to toki a mitosil, alatek miliyas cangra to nalacolan, malo milakowitay to riyar a misakafahay, tayra i misaaliay to mitosilay a kilac misakafah, anca matayal i Pitil. Samanen maraayay ko kalinahan no wawa, alatek awaay ko pakayraan no wama wina a minengneng to wawa, kawra makahiay kinafalah a wama wina, mitokelay to wawa materek i tayal no Kawas, samanen mahemekay cangra maˈaraw ko wawa micangacang to Hongti Kitakit. (3 Yohani 4) Iti:yaho, sowal ni Hana, o ‘mipacaliwan ci Yihofaan’ ko wawa ako ci Samuil sanay, anini o harateng no ˈalomanay wama wina mahecaday ci Hanaan, ngaˈay malacafay ko niyah aci Yihofaan a matayal, tada o taˈangayay a sakaliko, o matatodongay a saˈosi koni.​—1 Samuil 1:28.

5. Wa samaan kiso padama to salikaka hani? (Nengnengen ko satapangan coka.)

⁵ Nohatini ano awaay ko ˈinorong i paro no lomaˈ iso, ngangaˈay kiso padama to salikaka han? Tinakoen, ngaˈay kiso padama to malonayay ko tireng a malitengay, anca padama to iraay ko roma saali a Krisciyang han? O roma salikaka midimokosay to malitengay anca ciadadaay, ngaˈay kiso padama cangranan han? Haratengen o cima ko misaaliay to sadama i kasakopang, tinakoen o cecay salikaka mamasadak cingra, o malitengay ningra iraay i lomaˈ, alatek ngaˈay kiso tayra kalacafay tora malitengay ningra, ngaˈayho kiso miˈorong to salikaka mirienang to saˈopo, ˈorongen cangra micakay to dafong padama cangraanan, anca ˈorongen cangra tayra i paisingan a milisoˈ to adadaay a salikaka. Ano padama kita to iraay ko saali a salikaka, o malacafayay ci Yihofaan a matayal, samanen pakaynian ni Yihofa kitaanan a pacaˈof to satolon no salikaka.​—ˈOsien ko 1 Korinto 10:24.

6. O maanan ko tatodong no paihkalay to hinalafangay hani?

⁶ O kapot no Kawas matayal paihkalay to hinalafangay. Itini Krisiya Sowal Fangcalay Cudad, o ‘hinalafangay’ a tilid, “o siniˈada a micada to kafahalan a tamdaw” ko mitoroˈan. (Hipray 13:2) Mikitini maˈoningay no Fangcalay Cudad ngaˈay kita minanam to sasamaan paihkal to hinalafangay i tamdaw. (Satapangan 18:1-5) Mihaenay i, ano ecato ko salikaka ko cima, saˈicelen ita padama cingra, ceriden mihaen to demak.​—Kalatiya 6:10.

7. Misalafang to mieminay to toki mitosil a salikaka iraay ko maanan epoc hani?

 ⁷ Wa ngaˈay kiso malacafay to Kawas a matayal, misalafang to tayniay i kasakopang mieminay to toki mitosil a tamdaw han? (ˈOsien ko 3 Yohani 5, 8.) Ano mihaen ko demak iso, wa ngaˈay ‘macacawmaˈ’ ato ‘mapakalalolalok’. (Loma 1:11, 12) Nengnengen ko tinakoan ni Awlafo. ˈAyaw no pina poloˈ mihecaan i kasakopang ni Awlafo, awaay ko cimacima papalafin to awaay ko ramod a kasakilac kantok, milicayay ci Awlafo to wama wina to ngaˈay palafin to kasakilac kantok i lomaˈ nangra han. Mihayay ko wama wina ningra, soˈlin cowa ko Misawacayay Tamdaw ni Yihofa, kawra wa itini i omakan a mafotiˈ ci Awlafo. Ikor no misalafang to kasakilac a kantok, samanay ko harateng ni Awlafo hani? Tada ciepocayto sanay ko harateng ningra, sanay ko sowal: “O malifetay toya lipay cowa ko mamapawan kako! Paceremay kako ato kasakilac kantok a lomowad, ano malanam adihayay ko milengoan kahemekan a demak. Mikitini kasakilac kantok malifokay ko taˈangayay sapakalalok, makalimayto kako sapirienangaw to mieminay to toki a misakafahay.” Lalomaˈ no 40 miheca, itiniay adihayay pala tano milakowitay to riyar a mitosilay ko saaroˈan ni Awlafo a matayal.

8. Soˈlin caka ngaˈay ko tamdaw kitaanan hano padotocho kita hinapaladaˈ cingraanan hani? Tinakoen mitadtad.

⁸ Wa ngaˈay kita i roma pakayraan, paihkal to hinapaladaˈay a waywayan i cowa pihakelong a tamdaw, soˈlin caka semer cangra to hinalafang ita isalakat. Itini i Sipanya, o cecay fafahiyan salikaka tiya pacekiw cingra i, o pacekiwan ci Yisika fahal sanay tomangic. Licayan no salikaka ci Yisika to samaanay, sowal ningra, ˈayaw no mikitini i Ekuwato malinah tayni i Sipanya i, tada manikaway cingra. Latekay awaay ko kakaenen, o nanom aca ko sapakaen to wawa. Itiya, mafotiˈ ko wawa ni Yisika, mitolonay to Kawas. Caka halafin, tatosaay a Misawacayay Tamdaw ni Yihofa milisoˈay to lomaˈ ni Yisika, cowa ka ngaˈay ko waywayan ningra, micicihan ningra ko casi. Pasowalan ni Yisika koya tatosaay salikaka: “Oniya casi, oha sapakaen ako to wawa han?” Sapisayaraw ko salikaka cingranan awaay ko kapo, liyas sanayto cangra. Ikor, patikol cangra i lomaˈ ni Yisika, miteli to cecay kadango a kakaenen i fawahan. Oniya siniˈadaay a waywayan no salikaka matemeray ko falocoˈ ni Yisika, maharateng nohatini to caka pisinanot to sapacaˈof ni Yihofa to satolon no niyah, tada kangodoanto. Ikor, misetekay ko falocoˈ ni Yisika a mihodop ci Yihofaan. Mihaenay, paihkal to hinapaladaˈay pairaay to makapahay a minaroˈan!​—Patnakay 11:1, 6.

9, 10. (1) Nolitengan a finawlan no Kawas iraay ko maanan a toki patafang to niyah padama to tao hani? (2) Anini o faˈinayan salikaka itini kasakopang ngaˈay padama to maanan a tayal hani?

⁹ Nolitengan Israil iraay ko adihayay a toki patafang to niyah padama to tao. (Kasadakan 36:2; 1 Rayray 29:5; Nihimiya 11:2) Anini, ngaˈay kita patafang to toki, dafong ato inaneng no niyah a padama to salikaka. Ano makahi kita patafang to niyah, wa taˈakay ko hemek, mamalifok ko adihayay a sapalemed.

¹⁰ O Kimad no Kawas pakalalokay to salikaka micangacang to padamaay sikawdan ato malohemay malitengay a tayal, tano nini pakayraan a malacafay ci Yihofaan a matayal. (1 Timoti 3:1, 8, 9; 1 Pitiro 5:2, 3) O micangacangay to hatayal a salikaka, paihkalay cangra to makalimay padama to roma a Krisciyang, wa makahiho padama to noˈadingoan a demak. (Dmak 6:1-4) Faˈinayan salikaka mapolong, mitahidangay ko malohemay malitengay kisowanan malo militemohay, anca mipadama a misolimet to tilid, milimasmas to kilac, misangaˈ to maamaan a tayal hokira? Oniya mirienangay to hatiniay tayal a salikaka misawacayay cangra, padama to salikaka tada o kahemekan a tayal sanay.

11. O cecay fafahiyan salikaka pakayni i pirienang to patirengay a tayal, adihayay ko widang, milifokay to manan a haepoc?

 ¹¹ Makahi kita a mirienang to tayal no likakawa no Kawas, wa adihay ko faelohay a widang. Fafahiyan salikaka ci Maci, 18 miheca cingra mirienang to patirengay to Hongti Kitakit kasaˈopoan a tayal. Toniya pina miheca, ciharatengay cingra to kaemangay a fafahiyan salikaka, pasifanaˈ cangranan to inaneng a dademak. Mahapinangay ni Maci, mirienang to patirengay a demak iraay ko toki a mapakalalolalok to salikaka. (Loma 1:12) Ano tahalifa ci Maci to pasangar i, o widang ningra i katayalan paˈicelay cingranan. Mirienangayto kiso to patirengay a tayal no likakawa han? Soˈlin awaay ko milifetan iso a patireng, wa ngaˈay pasadak to ˈicel.

12. Sasamaan kiso padama to tahapadesay a salikaka hani?

¹² O roma pakayraan malacafay to Kawas a matayal i, ikor no mapades, padama to tahapadesay a salikaka. Tinakoen, pakiyaho kita a padama cangranan. (Yohani 13:34, 35; Dmak 11:27-30) Wa ngaˈay kita padama cangranan milosimet ato miliyaw patireng to lomaˈ. O cecay fafahiyan salikaka i Polan ci Kafolila, mapalakay no cedas ko lomaˈ ningra, padamaay ko ingataay kasakopang a salikaka, hato fanekfekay ko falocoˈ ningra. Sowal ni Kafolila: “Akato sowalen ko malahdaway a dafong—samanen o dafong aca kora, sapasowalaw kako tamowanan to o maanan ko malifokay ako. Ikor no tahalifa toniya demak pakasoˈlinay kako, masalalomaˈ no kasakopang a Krisciyang, tada taˈangayay sakaliko, o masakahemekan a demak.” ˈAlomanay tahapadesay a salikaka micada to sapadama, ikakaay ko malifokay to malahdaway sanay ko harateng. Roma i, mihadakay to sadama a Krisciyang malacafay to Kawas a matayal, masaloay ko falocoˈ.​—ˈOsien ko Dmak 20:35; 2 Korinto 9:6, 7.

13. Makahi mirienang a matayal wa samaan paˈicel to kalalaˈed no niyah aci Yihofa. Tinakoen mitadtad.

¹³ Iraayho ko maanan a pakayraan malacafay to Kawas a matayal hani? O cecay fafahiyan salikaka ci Stifeni, iraay ko toki ningra malacafay to roma Krisciyang padama to pakayniay lalood milaliw tayra i Padaka a salikaka. Padamaay ci Stifeni to salikaka mikilim to hakitiraan a lomaˈ, padamaho misangaˈ to lomaˈ. Sanay ko sowal ni  Stifeni: “Malifet no salikaka ko olah no paro no lomaˈ no Krisciyang, miakoˈiday, mahemekay, tada mitemeray to falocoˈ niyam. Harateng nangra kami ko padamaay cangranan sanay, kawra adihayay ko sadama nangra tamiyanan, samanen taˈangayay ko olah, pakasoˈlinay falocoˈ, makelecay, misarocoday a mitadiˈec ci Yihofaan cangra. Maˈaraw ko ngaˈayay a taˈarawan nangra matongalay ko kaolah niyam ci Yihofaan, matongalay ko piakoˈid to Kawas pakayni i likakawa pafeli to kihcod kitaanan.”

14, 15 (1) Ci Isaya iraay ko samaanay a harateng hani? (2) Aniniay a Krisciyang wa misamaan mitodong ci Isayaan hani?

¹⁴ Makalimay kiso mitongal to tayal ci Yihofaan han? Wa makahi kiso tayra i misaaliay to sadama a pala matayal han? O finawlan no Kawas cowa ko miliyas to nalacolan ngaˈ ngaˈay patafang to niyah a matayal ci Yihofaan, kawraan o roma salikaka soˈlinay malinah tayra i maraayay a pala, o waywayan nangra mahecaday o pairasolay ci Isayaan, tiya milicay ci Yihofa: “Cima ko malo aocoren Ako saw? Cima ko mangalayay a patado tamiyanan saw?” Pacaˈof han ni Isaya: “Kakoto! Ocoren kako!” (Isaya 6:8) Iraay ko makahiay a falocoˈ iso a matayal, ngaˈay padiˈo to tahidang a matayal i likakawa no kawas han? Iraay ko maanan a hatayal hani?

¹⁵ Masowal ni Yis ko mitosilay ato palo nisawawaan to tamdaw a tayal i, sanay ko sowal: “Adihay ko papanayen, nikawrira, caay ka ˈaloman ko matayalay. Orasaka, ngitangiten ko tapang no cipanayay a papiocor to mamatayal a mipanay,” sanay. (Matay 9:37, 38) Wa ngaˈay kiso malinah tayra i misaaliay to mitosilay a pala, tano misakafahay a saaroˈan a matayal han? Anca wa ngaˈay kiso padama to tao malaˈosi koniya patosokan han? Miharateng ko ˈalomanay salikaka, tayra i misaaliay to “matayalay” a pala misakafah o sangaˈayay a pakayraan paihkal to kaolah no niyah to Kawas ato tao. Haratengen wa ngaˈayho kiso midemak to maanan, ano o maanto ko demak iso, ano pakayniay ci Yihofaan ko pisaˈicel wa taˈangay ko hemek.

16, 17. Ano sapitongalaw kiso to tayal saki Yihofaan, iraay ko maanan a hatayal hani?

¹⁶ Makalimay kiso tayra i Pitil cecay liyad a matayal anca mirienang to patirengay a tayal no likakawa han? Anca limasmasen ko pina a romiˈad tayra padama han? O likakawa no Kawas misaaliay to makahiay micada to maamaan a tayal a salikaka, i masasiromaay a kitiraan a matayal. Nolatekay, cecay tamdaw ano iraay ko tadamaanay a kafanaˈan ato nalifetan, kawra iraay ko roma saali to cowa ko kananaman nangra a tayal. Ano paihkal kita to kinafalahay a waywayan makahi padama to masakenakenaay a tayal, ci Yihofa wa misakareteng a minengneng to tayal no mita.​—ˈOlic 110:3.

¹⁷ Ano sakacakataw i pihodop ci Yihofaan, makahi kiso micada to adihayay a sapahatatanam han? Ngaˈay kiso misaˈicel patatodong to palinian mirienang to SKE. Oniya sapahatatanam wa ngaˈay padamato mieminay to toki matayal a salikaka, micudiyapto wa ngaˈay matongal ko tayal no Hongti Kitakit. Misingsiay mirienang toni pihatatanaman a tamdaw, mamakahi micada to kihcod a tayal. Wa makahi kiso micada to hatiniay sapahatatanam, milifok to adihayay a tayal han?​—1 Korinto 9:23.

18. Ano malacafay kita ci Yihofaan a matayal to romiˈamiˈad, wa malifok ko maanan a sapalemed hani?

¹⁸ O finawlan no Kawas kita, paihkalen ko hinapaladaˈay a harateng, to romiˈamiˈad ciharatengay to saali no tao. Makahi kita patafang saki tao, halo paihkal to olah ato siniˈada to tao. Ano marariday kita a midemak wa mahemek, ato rihadayay ko falocoˈ. (Kalatiya 5:22, 23) Ano hakowato ko demak iso ci Yihofaan, ano todongen ci Yihofa hinapaladaˈ, hanaca kalacafay Cingranan matayal, o mamarenec a lipahak!​—Taneng 3:9, 10.