O TAPELIK misetiˈay i tatayra i Iwropa a tamina, o midakaway to tamina ci Ciyoci Yangke liyas sanayho to Pracil, marenecay ko tawa no pising ningra, samanen o tayal no Hongti Kitakit i Pracil kadofahay ko minaroˈan. * Talaˈayaway ko rakat no tamina, o dotoc a patosokan ni Yangke, o Sipanya ato Putawya, i awaayho ko mitosilay a kilac. O halaka ni Yangke, ano tahira i Putawya i, milimasmas to salikaka ci Rosofo tayni a mikimad, halo palilam to 30 ˈofad a tancang itira!

1910 miheca, o finawlan ko misingkiway to ˈaˈideman no Putawya, awaayto ko ˈicel no Tingsokiw i mirikec a mifiyor. Itiniay 1925 miheca ci Yangke tahira i Lispon no Putawya, mahapinangay ningra soˈlin taˈangayay ko pasalat no finawlan, kawra cowa ka dipayal ko kitakit.

Tiya milimasmas ci Yangke to kimad ni Rosofo i, o sofitay ko mikowanay, samanen iraay ko mamitowakang to mirikecay. O Ikok ato kasakapot no kalodoyongan mirikecay to salikaka ci Yangkean, pasowal to aadihay ko misafelitay cingranan. Soˈlin hatira cowa ka talaw ci Yangke, pasayra i Kamoys a picudadan a misingsi to pitaykayan, ikor malaˈosiay ko misingsian!

Maraodayto ko 5 folad 13 romiˈad—​o pikimadan no salikaka ci Rosofo a romiˈad, hinatalaay ko ˈalomanay! O kanpang i fafekang no lomaˈ, o sinpong misintingay to lalangian no kimad: “Sasamaan Tahadaˈoc Maˈorip i Cikiw.” Macalohay pasadak i sinpong ko kiyokay to lalakaw, mirikec to tamdaw misinanot to “makaniway pairasolay”, itini i fawahan no pitaykayan palilamay to pina patek a kihepicay cudad, milikaf ci Rosofoan, ato misafelit to kimad ningra.

Soˈlin mahaen, maedeng 2,000 ko micelcelay i pitaykayan a tamdaw, hanaca 2,000 ko tamdaw i papotalay. Pakayni sapitengilaw to kimad, o fahkaˈay a tamdaw macokacokay i fatiˈiyan no sasoˈot a fiher, o roma tamdaw mikalicay i sapionto a kikay.

Cowa ka ngaˈay ko pikimad. Miowaway ko misafelitay a tamdaw, mifahkolay to ahenan, kawra cowa ka fiyor ko pikimad no salikaka ci Rosofo. Saka tengilaw no ˈalomanay to kimad ningra, tomirengay i cokowi ci Rosofo a mikimad. Tahiraay i lafii mahererek ko kimad nangra​—1,200 ko maolahay to Fangcalay Cudad a tamdaw, miterekay to ngangan ato ciwsiw nangra, makalimay sapilifokaw to mitepangan cudad. Saka tosa romiˈad, O Sikolo a singpon no Potawya masadakay ko kimad ni Rosofo.

1925 miheca 9 folad, no Putawya sowal a Mikecolay satapangay i Putawya mitepang. (Iˈayaw, no Potawya sowal a Mikecolay itiniay i Pracil  mitepang.) Maedeng toniya toki, o cecay Micekiway to Fangcalay Cudad ci Wiercilio Fukusen mihalakaay malinah tayra i Putawya, midama to mitosilay a demak. Salikaka ci Fukusen na kalacafayay ci Yangkean i Fenpo no Pracil a matayal. Caka halafin, cingra ato fafahi ci Lici tayniay i Putawya, miliyaw malacafay ci Yangkean. Matatodongay ko katayni ni Fukusen, samanen macadaay ni Yangke ko sanilnil, wa tayra i faelohay kilac a mitosil, mahaopay ko kilac no Suwiay.

Ikor mitowakangay ko sofitay i Putawya, o misatekedayto ko mikowanay. Tada masasifoday ko Putawya, pakidemay ko sapalak. Kawra, tanektekay ko salikaka ci Fukusen, milimasmasay a midipot ato padama to mimingay ˈopo a Micekiway to Fangcalay Cudad. Misingsiay cingra i mirikecay, kala kasaˈopoan ko lomaˈ no niyah. 1927 miheca 10 folad, malaˈosiay ko misingsian ningra.

Itini noka pikowan no misatekeday tamdaw, maedeng 450 tamdaw ko miyoyakay tono Putawya sowal a Mikecolay. O roma, o soˈlinay kimad no Fangcalay Cudad pakaynian i tancang ato kihpicay cudad a mapatenak i mikowanan no Putawya a pala, mahaopay ko—Ankola, Asores, Ferte, Sawali no Timor, Koa, Matera, ato Mosapike.

1920 miheca, o cecay misapoeneray ko falocoˈ a Putawya tamdaw ci Manuel Silewa Nortang, tayniay i Lispon. Itini i Pracil ci Manuel i, mitengilay to kimad ni Yangke, tangsolay pakahapinang to soˈlinay kimad koni, hanaca fanekfekay padama to salikaka ci Fukusen micowat to mitosilay a tayal. Ikor, misatapangay ci Manuel a malo misakafahay. Masieroday ko mitolicay ato palilamay to mitepangan a cudad a demak itiya, telocto macowatay ko noˈadingoan no kasakopang no Lispon!

1934 miheca, wa patikol ci Fukusen i Pracil, kawra mikosamayto cangra to sapaloma no soˈlinay kimad i Putawya. Ikor mifekaday ko lalood i Sipanya, marefongay ko Iwropa i Saka Tosa Taˈangayay Lalood, katalawan ko pakayraan, kawra kamayan a madimadi ci Yihofaan ko mimingay ˈopo no Micekiway to Fangcalay Cudad. Soˈlin cecay liyad cowato ka fanekfek cangra to noˈadingoan a demak, kawra ikor no 1947 miheca, tahira ko sakacecay milakowitay to riyar a mitosilay ci Yohani Koke, miliyaw makowad ko fanekfekay harateng nangra. Ikorto, padotocay matongal ko milasilay to Hongti Kitakit a tamdaw, mangalef tiyma miconged ko mirikecay to demak no Misawacayay Tamdaw ni Yihofa i 1962 miheca i, cowa pakaconged to kacakat nangra. Itini 1974 miheca 12 folad, malifokay no Misawacayay Tamdaw ni Yihofa ko pihayda no mirikecay, mataˈlifayto ko 13,000 ko mitosilay a tamdaw.

Anini, itini i Putawya ato somowalay tono Putawya a potipot, mahaopay ko Yasoe ato Matela, o milasilay to ngaˈayay lihaf no Kitakit no Kawas mataˈlifay ko 5 caˈol a tamdaw. Ilalomaˈ noniya mitosilay, o akong ato fofo nangra itini 1925 miheca na pakatengilay to kimad no salikaka ci Rosofo.

Tada miakoˈiday kita ci Yihofaan ato madimadiay a salikaka itiya, timoloay mikayat to mitosilay a demak, “malamatayalay ni Kristo Yis a . . . finacadan,” maocor tayra i romaroma kitakit, milasil to ngaˈayay ratoh no Hongti Kitakit.​—Loma 15:15, 16.—O safanaˈ no Fenpo i Putawya.