ITINIAY kita i ‘saikoray a romiˈad’ maˈorip, pakidemay ko saroero, o sikawdan no Kawas mikikakaay ko saali paihkal to kodaitay. (2 Timoti 3:1-5) Anini, cangoˈotay ko mihadidiay a capeling no tamdaw, misatekeday maolah to niyah aca, cowa ka kahi micada to sapaini no tao, cowa pakaˈmet to tireng. Mihaenay, o cecacecay a Krisciyang ngaˈay licayen ko niyah: ‘Mafiyoray no tatiihay a pinangan no hekal a malahdaw ko mihadidiay han? O maanan ko soˈlinay a kodait hani? Sasamaan kako padotoc palahad to kalimlaan a capeling no Krisciyang hani?’

Ilalomaˈ no Fangcalay Cudad, o kodait hananay cowa ko awaay ko araaw miemem to sapalifet, o iraay ko hatokel a padotoc miemem. O cecay mihadidiay tamdaw, cowa sahto sa o niyah aca ko miharatengan, ao mamisinanot to harateng no tao. Ano pakararaw ato pakangolaw ko tamdaw i, iraay ko mihadidiay a tamdaw wa mitokel cingra mala kangaˈay to kalalaˈed to tao. O sowal no Fangcalay Cudad o ciolahay a tamdaw paihkalay to ‘miememay’, hanaca o ‘kodaitay’ hananay i, o minaroˈan no fangcalay saocor a capeling. * (1 Korinto 13:4; Kalatiya 5:22, 23) Kawra, samaanen ita palahad ko kodait hani?

Sapalahdaw to kodait, micangacangho to sadama no Kawas, wa pafelien ni Yihofa ko mitadiˈecay Cingranan a tamdaw to fangcalay saocor. (Luka 11:13) Soˈlin matomesay ko ˈicel no fangcalay saocor no Kawas, nikawrira o sasowalen ato waywayan ita pahecaden to satolon ita. (ˈOlic 86:10, 11) Mihaenay haw i, to romiˈamiˈad misaˈicel kita palahad to kodaitay, palamiten koniya capeling i falocoˈ, malo o mikiriwiˈay a capeling no mita. Cowa konini aca, iraayho ko maanan a pakayraan padama kitaanan palahad to kodaitay hani?

Songilaˈen mihapinang ato mitodong to malefotay a taˈarawan ni Yis, wa ngaˈay kita palahad to kodaitay a capeling. Itini i pipatemer no fangcalay saocor pakalalokay ci Pawlo kitaanan micaˈedong to ‘faelohay a capeling’, mahaopay ko kodaitay, sanay cingra: “Paaroˈen [ko dipayalay] i falocoˈ namo ko sowal ni Kristo a palahad.” (Kolosay 3:10, 12, 15) Tanektekay a pakasoˈlin ci Yis ci Yihofaan, wa misaysay to pasangar itini matatodongay a toki. Mitodong kita ci Yisan, palahad to pakasoˈlinay a falocoˈ to Kawas, wa “paaroˈ” i falocoˈ no mita to dipayalay. Ano mifekad ko maanan a demak, cowa ko mamalahdaw ko kodait no mita.​—Yohani 14:27; 16:33.

Hinatalaay kita to sakairaaw no mikiˈokan no Kawas a faelohay hekal, nikawrira midotim kita to paihkalan ni Yihofa kitaanan a pihadidi, wa ngaˈay kita minanam a padotoc miemem. Mikiˈokay ko Fangcalay Cudad kitaanan: “O harateng no roma a tamdaw i, ‘Maosoy ko Tapang a milaheci to demak Ningra,’ saan cangra. Nikawrira, caay  ko nika osoy no Tapang a milaheci to nano sowal Ningra. O mihadidiay Cingra tamowanan a mitala. Nawhani mangalay Cingra to sakasasiyoraw no falocoˈ no tamdaw a maemin a miliyas to raraw. Caay ka ngalay Cingra to nika tekop no cecacecay aca a tamdaw.” (2 Pitiro 3:9) Midotim to paihkalan ni Yihofa kitaanan a mihadidiay, pakalalokay kitaanan paihkal to mihadidiay i roma tamdaw. (Loma 2:4) Itini masamaanay a pakayraan wa mikiriwiˈ kita a mihadidi hani?

To romiˈamiˈad adihayay ko masasiromaay a pakayraan milifetay to mihadidiay no mita. Tinakoen, alatek sapasowalaw kiso to kalimlaan a sowal, kawra, paihkal kiso to mihadidiay ngaˈ caka maketon ko sowal no tao. (Yakop 1:19) O nanaman no roma salikaka cowa ko kaolahan iso, ano kalacafay cangraanan i, misaaliay to mihadidiay. Ano dotimen ko taˈarawan ni Yihofa aci Yis, wa papadama kitaanan, ira ko matatodongay ko pinengneng to dangoc no tao. Ci Yihofa aci Yis caka pataˈakay minengneng to dangoc no mita, misinanotay Cangra to makapahay a capeling no mita, pafeliayho kitaanan to toki a macakat.​—1 Timoti 1:16; 1 Pitiro 3:12.

Ano mitoroˈ ko tamdaw to mararaway ko sowal anca mararaway ko demak iso i, wa palifet kitaanan to iraay ko mihadidiay hokira. Madokaˈay kita wa saan ko harateng, sapitadtadaw a midama to niyah, kawraan pakalalokay ko Kimad no Kawas tano roma a pakayraan a pacaˈof. Sanay ko sowal no Fangcalay Cudad: “O kodaitay ko falocoˈ a tamdaw i, ikaka no malataˈangay ko nika ngaˈay. Aka narikay a maketer, o karaketeray a miˈintel i, o maapaay a tamdaw.” (Patnakay 7:8, 9) Misiˈayaw ci Yis to sakokot i, paihkalay to kodaitay. (Matay 11:19) Mihaenay, ano patelas sa ko tamdaw a pakokot kitaanan i, sasinanoten ita ko sowal ato waywayan, paihkal to mihadidiay.

O wama wina a tamdaw misaaliay to mihadidiay, ngaˈ misalof to mararaway a waywayan, coos no tireng, ato harateng no wawa. Nengnengen ko milifetan ni Matiyas, nohatini o matayalay no Pitil i Skantinawiya cingra. Madeng moetep ko mihecaan ningra i, marariday malikaf no cafay micudad pakayni pihakelongan. Isalakat cowa ka fanaˈ ko wama wina ningra, ikorto mahapinangay nangra to cisasaay to mananamay a soˈlinay kimad ko wawa nangra. O sowal no wama ni Matiyas ci Cilisi: “Kako ato fafahi soˈlinay misaali to taˈangayay a mihadidiay.” Milicayay ci Matiyas: “O cima ko Kawas? Ano cowa ko Kimad no Kawas ko Fangcalay Cudad wa samaan hani? Samaan kiso pakasoˈlin to, o Kawas ko micorcoray kitaanan midemak tonini anca midemak toraan hani?” Mangalef mihaenay pasowal cingra to wama: “Ano caka hecad ko harateng ako tamowanan, hano likafen no tao hani?”

Sanay ci Cilisi: “O wawa ako nolatekay mangolaway a milicay, kawra cowa pasayni takowanan ato fafahi ako a mangolaw, ao pasayraay i mananamay a soˈlinay kimad, samanen cowa ka ngaˈay ko kaˈorip ningra pakayni i pidoyongan.” Samaanay ci Cilisi padama to wawa hani? Sanay cingra: “Nolatekay malacafayay a maroˈ ato masasowal, marariday mipalak to toki. Halafinay mitengil to sowal no wawa, alatek licayen cingra, ho ngaˈay mahapinang ako ko harateng ningra. Latekay mitadtadan ako ko roma demak i cingranan, pairaen ko romiˈad a misaharaterateng, ikor padotoc  kami a malalengo. O roma i, pasowalan ako ko wawa, misaaliay kako to pina romiˈad misimsim to sowal ningra. Marariday a malacafay a caciyaw kami, palidlid sato micada ci Matiyas to soˈlinay kimad, mahaopay ko sapatefoc ni Yis, saˈakawangay a sapikowan a fadangalan no Kawas ato olah ni Yihofa to tamdamdaw. Ohatiniay a demak misaaliay to adihayay toki, halo mihadidiay, ikor ci Matiyas palidlid sanay matongal ko olah ci Yihofaan. Maˈaraw ko kangaˈay no wawa to kalakapahan, mikitini falocoˈ micada to soˈlinay kimad, tada mahemekay kami ira ko ngaˈayay minaroˈan a mihadidi.”

Ci Cilisi ato fafahi mitiˈeray to sadama ni Yihofa, mihadidiay a pasifanaˈ to wawa. Tikolen ni Cilisi miharateng koya romiˈad i, sanay ko sowal: “Marariday kako pasowal ci Matiyasan, tada maolahay kami tisowanan, fanekfekay patado cingranan mitolon to Kawas, micangacang ci Yihofaan padama cingranan cipinang to soˈlinay kimad.” ˈAlomanay a wama wina maedeng mahecaday ci Cilisian, mahemek a paihkal ko niyah to kodaitay a kalimlaan capeling!

Cowa ko pisadak aca to noˈadingoan a sadama, o roma Krisciyang wa midimokos to halafinay adada a paro no lomaˈ anca salawina, misaaliay to olah ato mihadidiay. Nengnengen ko tinakoan ni Alon * itiniay i Skantinawiya ko kitiraan ningra.

O faˈinay ni Alon itini ˈayaw no 8 miheca kinatosaay mapalakay ko ponoˈ, cowato ka fanaˈ to hemek ato mararomay a harateng. Tada taˈangayay a sapalifet ci Alonan konini, sanay ko sowal ningra: “Tada misaaliay kako to kodaitay a capeling, misaaliay to sapiceridaw a mitolon to Kawas. O kaolahan ako a sinael o Filipi 4:13, oniya sinael taˈangayay ko sasayar takowanan, sanay ko sinael: ‘Pakayni i ˈicel ni Yihofa o paˈicelay takowanan ko sakapakafilo ako a misiˈayaw to masamaamaanay a demak.’” Mitadiˈec to sapafeli ni Yihofa a ˈicel, ngaˈayay ci Alon matomes ko pakasoˈlin, padadotoc a miemem.​—ˈOlic 62:5, 6.

Pakayni kodaitay o malefotay a taˈarawan ci Yihofa. (2 Pitiro 3:15) Adihayay a tinako i Fangcalay Cudad, ci Yihofa paihkal to tada taˈangayay a mihadidiay. (Nihimiya 9:30; Isaya 30:18) Tinakoen, tiya misaˈosi ci Yihofa palaˈafo to Sotom i, cisasaay ci Apraham to sasawkit no Kawas. Samaanan no Kawas pacaˈof ci Apraham hani? Mihadidiay ko Kawas mitengil to sowal ni Apraham, cowa ka ketonen ko sowal ningra, mihadidiay a milomal to cecacecay a saali ato sasa ningra, halo mikiˈok cingraanan, ano ira ko mamoetep a moecelay tamdaw i Sotom, cowato ko papalaˈafoen no Kawas koniya niyaroˈ. (Satapangan 18:22-33) Itini i paihkal to miememay, patirengay ci Yihofa to mikiriwiˈay a taˈarawan!

O kodait a capeling tada kalimlaan, o cacaˈedongen no polong a Krisciyang koniya faelohay a capeling. Mitodong kita to mihadidiay ni Yihofa, saˈicelen palahad ato paihkal to soˈlinay a kodait, wa paˈodingar to ciolahay a Wama i kakarayan, kita i wa malo ‘pakayniay i pakasoˈlin ato miememay milifok to sakiˈok a tamdaw.’​—Hipray 6:10-12.