1, 2. (1) O papalahad kita to maanan kalimlaan a ˈicel hani? Misamaanay aki? (2) Oniya lalakaw wa milengo to manan?

O KRISCIYANG a tamdaw i, misaaliay to sakafanaˈ pafafidaˈ to matengilay a lihaf, o soˈlinay anca o makaniway, ikor to matatodong ko misaˈosian. (Taneng 3:21-23; 8:4, 5) Ano caka palahad kita to hatiniay a ˈicel, wa madolo malipalaw ni Satan ato hekal ningra. (Ifiso 5:6; Kolosay 2:8) Pakasoˈlinho kita to demak ngaˈ matatodong ko misaˈosian. Matatodongay ko limoˈot no Taneng 18:13 sanay ko sowal: “Caho ka harek a mitengil halo pacaˈofay a tamdaw i, o apa ningra ato sakangodo ningra konini.”

² Oniya lalakaw mamilengo to, ano sakafanaˈaw to soˈlinay a demak a matatodong ko misaˈosian i, wa masiˈayaw ko samaanay a sapalifet. Minengnengho kita, o maanan safalod ato maˈoningay no Fangcalay Cudad, papadama kitaanan matatodong ko pafafidaˈ to soˈlinay anca makaniway a lihaf.

3. Misamaanay hano saka dademaken ita ko safalod no Taneng 14:15 i nokaˈorip? (Nengnengen ko satapangan coka.)

³ Anini, pakidemay ko adihay no lihaf a lintad. Itini i wangcan, tilifi,  anca o romaroma hatiniay a palihafay a demak, padotocay masadak ko adihayay a lalakaw. O roma i, ˈalomanay a tamdaw macadaay ko nai widang anca kafanaˈan a tamdaw a tano tingnaw ato soci a tikami. O roma tamdaw padetengay mitenak to mararaway makaniway a lalakaw, mansa o sasinanoten ita miharateng ko matengilay a lihaf. Iraay ko maanan a safalod no Fangcalay Cudad papadama kitaanan hokira? Taneng 14:15 sanay ko sowal: “O maapaay a tamdaw i, pasoˈlin to maamaan a demak a maemin, o citangalay a tamdaw i, minaˈon to rarakaten ningra a lalan.”

4. (1) Filipi 4:8, 9 misamaan padama kitaanan mipiliˈ to macadaay a lihaf? (2) Micada to matatodongay a lalakaw hano o masakalimlaan hani? (Nengnengen ko sapatongal lalakaw,  “Samaan Milifok to Matatodongay a Lihaf.”)

⁴ Saka tatodongaw no misaˈosian, kalimlaan ko matatodongay a lalakaw no mita. Mihaenay, oha mamisinanot kita mipiliˈ to micadaan a lihaf. (ˈOsien ko Filipi 4:8, 9.) Hamaan palaken ita ko toki, minengneng to cowa ka soˈlin a sinpong anca cowaho ka hapinangen a tikami no tingnaw. Kakiriwiˈen ita miliyas kono misafelitay to kimad a wangcan, samanen sahtoay o mararaway ko sowal nangra, mamipalak to pasoˈlinay falocoˈ no finawlan no Kawas. O tatiihay a lihaf wa mararaw ko pisaˈosi no tamdaw. Aka a pisakahmaw to pipalak no mararaway lihaf to harateng ato falocoˈ no mita.​—1 Timoti 6:20, 21.

5. Matengilay no Israil a tamdaw ko maanan mararaway a lihaf hani? Samaanay ko harateng nangra hani?

⁵ Ano pakasoˈlinen ko mararaway a lihaf wa mikidat to pakidemay a teloc. Tinakoen, miocoran ni Mosi ko 12 a misolapay papinengneng to Mikiˈokan a Pala, o mamoetepay misolapay o mararaway a lihaf ko misowalan. (Saˈosi 13:25-33) O tatiihay a safanaˈ nangra patoleday to falocoˈ no finawlan ni Yihofa. (Saˈosi 14:1-4) Hano mahaen ko harateng no Israil tamdaw hani? Harateng nangra, ano mararaway a lihaf ko mihadakan no ˈalomanay, maedeng o matatodongay koniya lihaf sanay cangra. Cowa ka kahi cangra pakasoˈlin to mihadakan no madimadiay a Yosuwa aci Kalip a ngaˈayay lihaf. (Saˈosi 14:6-10) Cowa pihapinang ko Israil tamdaw to soˈlinay demak, cowa pitadiˈec ci Yihofaan, pakasoˈlinayho to mararaway lihaf, tada maapaay cangra!

6. Ano matengil ita ko pakayniay i finawlan ni Yihofa a mararaway a safanaˈ i, misamaanay hano cowa ko mamacekid kita?

⁶ Ano matengil ita ko pakayniay i finawlan ni Yihofa a safanaˈ i, hano kakiriwiˈen a misinanot? Samanen padotocay ci Satan a mikokot to madimadiay a sikawdan no Kawas. (Paˈarawan 12:10) Na pasowalay ci Yis o misafelitay tano “masamaamaanay a tatiihay a sowal” mipalafo to nisawawaan ningra. (Matay 5:11) Paifalocoˈen ita ko sapatalipaˈelal ni Yis, ano mihaen matengil ita ko pakayniay i finawlan ni Yihofa a mararaway a safanaˈ i, cowato ko mamacekid.

7. ˈAyaw no pasadak kiso tono tingnaw ato soci a lihaf i, ngaˈay salalicayen ko niyah to maanan?

⁷ Maolahay kiso tano tingnaw anca tano soci a patikami to kafanaˈan a tamdaw ato widang han? Ano maolahay kiso a mihaen to demak, ano maˈaraw iso ko safaelohay a sinpong ato safanaˈ anca matengil ko cecay milifetan, makalimay mahecad to paratohay to sinpong a tamdaw, malo sakacecay a milasilay tamdaw hokira? Kawrira, ˈayaw no papasadak kiso tono tingnaw ato soci a lihaf i, licayenho ko niyah: “Soˈlinay mafanaˈ kako to matatodongay a lihaf konini han? Mafanaˈay kako to samaanay ko soˈlinay demak han?” Ano cowa ka fanaˈ kiso to soˈlinay anca makaniway koniya lihaf, ano fanaˈ han ko tao, itini kalalaˈed no Krisciyang wa patenak kiso to mararaway a lihaf alatek. Mihaenay, ano cisasaay kiso toniya lihaf, keniˈen ko sapipalahdaw a eca ka pasadak to mararaway a lihaf.

8. (1) O misafelitay a tamdaw i roma kilac, na midemakay cangra to maanan? (2) Sasamaan kita ngaˈ caka marefong i talakal nangra a mipalak to likakawa no Kawas?

 ⁸ Haratengay saan pasadak tono tingnaw ato soci a lihaf iraay ko roma katalawan. Itini roma kilac, o mitosilay a demak ita macongeday. Tohatiniay a kilac, padetengay mipatenak ko misafelitay tamdaw to mararaway a lihaf, saparawrawaw anca maka cisasa ko harateng no salikaka. Tinakoen itini i Suwiay, patenakay ko KGB to sapaoraf a lihaf misafelitay ko mikayatay salikaka to finawlan ni Yihofa sanay ko sowal. * ˈAlomanay salikaka pakasoˈlinay toniya mararaway a lihaf, telocto miliyasay to likakawa no Kawas, tada ka adayayanto! Kao ngaˈayay, ikor patikolay ko ˈalomanay salikaka i likakawa, kawrira o roma tamdaw tahanini cowa patikol i likakawa no Kawas, samanen malahdaway ko pakasoˈlin no falocoˈ nangra. (1 Timoti 1:19) Sasamaan kita ho eca ka tahalifa to hatiniay ka adayayan a teloc hani? Aka patenak kita to mararaway anca cowa ko soˈlinay a lihaf, aka patelas a pakasoˈlin to macadaay a lihaf. Hahapinangen ita to o soˈlinay anca makaniway koniya lihaf.

9. Latekay hano pasangar matatodong ko misaˈosian no mita hani?

⁹ Latekay, pasangaray kita misaˈosi to matatodongay a saˈosi, samanen o macadaay a lihaf cowa ko soˈlinay maemin. Mihaenay i, cecay lihaf ano cowa ka soˈliˈlin i, wa pakararaw to tao. Ano mimingay ko soˈlinay nora lihaf, wa samaan kita ngaˈ eca ka lipalaw hani?​—Ifiso 4:14.

10. Misamaanay hano mangatato a looden no Israil tamdaw ko salikaka no niyah? Samaanay ko demak nangra hato maliyasay ko hatiniay a teloc hani?

¹⁰ Nengnengen ita iti:yaho, itiniay i kaetip no Yortan ˈAlo a Israil tamdaw, mifekaday ko maanan a demak. (Yosuwa 22:9-34) Matengilay nangra ko cecay lihaf, oya itiniay kawali no Yortan ˈAlo a Israil tamdaw (Riupin, Kat, Manasi a ngasaw), itiniay lawac no Yortan ˈAlo patirengay to taˈangayay patafangan cadada. Soˈlin o matatodongay koniya lihaf, kawra cowa ko komodan no demak. Nikawrira, oya itiniay kaetip no Yortan ˈAlo a Israil tamdaw, saˈosi sanay to misafelitay ko salikaka nangra ci Yihofaan, hato  masaˈopoay misaday to sapiloodaw to salikaka nangra. (ˈOsien ko Yosuwa 22:9-12.) Kao ngaˈayay ˈayaw no mamilood i, miocoran nangra ko madimadiay tamdaw mitiyawca to samaanay ko demak. O maanan ko mahapinangay nangra hani? Patireng ko Riupin, Kat, Manasi a ngasaw to patafangan cadada, cowa ko papatoˈaya, o mamalo sapisawacay. Patireng cangra to patafangan cadada o sapasifanaˈ to teloteloc a tamdaw, o madimadiay a sikawdan ni Yihofa cangra. Itiniay kaetip no Yortan ˈAlo a Israil tamdaw, maedeng mahemekay a mahapinang no niyah ko soˈlinay demak, eca ka pitoor to cidangocay a lihaf mipalaˈafo to salikaka nangra.

11. (1) Hano macada ni Mifiposit ko cowa ka sadafdaf a demak hani? (2) Soˈlinay i, o ngangaˈay ci Tafiti misamaan to demak hani?

¹¹ Latekay micadaay kita to cowa ka sadafdaf a demak, samanen o kafanaˈan no tao pakayni kitaanan, edeng o mimingay ko soˈlinay a demak. Tinakoen pakayniay picada ni Tafiti ci Mifipositan a maˈoningay, hinapaladaˈay ato sidaˈitay ci Tafiti cingranan, Omah no akong ningra ci Sawlo patikolan ci Mifipositan. (2 Samuil 9:6, 7) Ikor, matengilay ni Tafiti ko mararaway a lihaf ni Mifiposit, saˈosi sanay cingra pafeli to polong a hafay i roma tamdaw. (2 Samuil 16:1-4) Ikor no masasowal ci Tafiti aci Mifiposit i, mihayay ci Tafiti to mararaway ko saˈosi no niyah, patikolan ci Mifiposit to miming a hafay. (2 Samuil 19:24-29) Ano salakatan ni Tafiti mihapinang ko soˈlinay a demak, eca ka pitoor to cidangocay a lihaf a misaˈosi, cato ko mamifekad koniya cowa ka sadafdaf a demak.

12, 13. (1) Samaanay ci Yis misiˈayaw to hatiniay cowa ka soˈlin a sakokot hani? (2) Ano patenak ko tamdaw to cowa ka soˈlin a lihaf pakayni kitaanan i, wa samaanto aki?

¹² Ano matongangan no tao kita sasamaan hani? Ci Yis ato painoˈay a Yohani na tahalifaay to mahaenay a demak. (ˈOsien ko Matay 11:18, 19.) Samaanay ci Yis misiˈayaw to hatiniay cowa ka soˈlin a sakokot hani? Cowa ka pipalak cingra to toki ato ˈicel mihadak to sadipot to niyah a sowal, patalipaˈelalay to tamdaw mihapinang to demak, o nano demak ato sapasifanaˈ ningra. Mahaen o sowal ni Yis: ‘Citanengay a waywayan paihkalay to moecelay.’​—Matay 11:19.

¹³ Mikitini toniya maˈoningay wa mananam ita ko maanan hani? Latekay, cowa ka sadafdaf ko sowal no tao kitaanan, mangalef milikafay kitaanan. Makalimay kita o niyah ko misaali to masadafdafay, mikorac to ngangan. Mihaenay, sasamaanto kita hani? Ano patenak ko tamdaw to cowa ka soˈlin a lihaf pakayni kitaanan, wa ngaˈay tano pakayraan ita a maˈorip pahapinang to tamdaw to soˈlinay a waywayan no mita. O malifetay ni Yis paihkalay, ira ko ngaˈayay a waywayan no Krisciyang, wa ngaˈay misawacay to mararaway ko sapakokot no tamdaw kitaanan.

14, 15. Mitiˈer to taneng no niyah hano mamifekad ko pasangaray hani?

¹⁴ Sapilifokaw to soˈlinay a lihaf matatodong ko pisaˈosi cowa ko madoloay, o cowa ka lefot a tireng mifiyoray to saka tatodong no pisaˈosi no mita. Alatek halafinayto kita madimadi mihodop ci Yihofaan, mapalahaday ko ngaˈayay sapisimsim ato sapafafidaˈ to demak a ˈicel, pakayni i kangaˈay no pisaˈosi ita mikangodoay ko tao kitaanan. Kawraan, mamifekad ko maanan a pasangaray noniya demak hani?

¹⁵ Ano pakidem ko pitadiˈec ita to taneng no niyah mamifekad ko pasangar. O falocoˈ ato harateng ita wa mifiyor to misaˈosian ita alatek. Soˈlin cowa ka fanaˈ kita to polong a demak, kawra wa kamayan a cipinang ato matatodong ko misaˈosian wa saan. O hatiniay a harateng tada katalawanto! Ihkalay ko limoˈot no Fangcalay Cudad kitaanan, aka pitadiˈec to taneng no niyah, sanay.​—Taneng 3:5, 6; 28:26.

16. Mikitini toniya tinakoan, manengnengay ni Komeng ko maanan? Mifekaday ko maanan a harateng ningra hani?

¹⁶ Haratengen hena cecay a kakereman, o cecay  matenesay malohemay malitengay ci Komeng i pitahkaan komaen cingra, maˈaraway ko roma malohemay malitengay ci Yohani ato cecay fafahiyan malacafay komaen, oniya fafahiyan cowa ko fafahi ni Yohani. Manengneng ni Komeng mahemekay cangra, tatawa saan, matatakecayho cangra. Calemcemay ko harateng ni Komeng, harateng ningra i, oniya pakayraan wa mipalak to raramod ni Yohani hokira? O wawa ato fafahi ni Yohani wa samaanto hani? Isaˈayaw i, manengnengay ni Komeng ko hatiniay a tinakoan. Ano kiso ko pakanengnengay to hatiniay a pakayraan, wa samaan ko piharateng iso hani?

17. (1) O maanan ko mahapinangay ni Komeng a demak hani? (2) Mikitini toniya tinakoan o maanan ko mananamay ita?

¹⁷ Haratengen ita, soˈlin kalikiay ci Komeng misaˈosito cowa ka madimadi ci Yohani to fafahi ningra, kawra soˈlinay ci Komeng a mafanaˈ to samaanay koniya demak han? Toya dadaya, patingwaan ni Komeng ci Yohani, ˈarawhan o safa ni Yohani koya fafahiyan, ci Yohani ato safa ningra halafinayto cowa ka sasoˈaraw, hanaca o safa ningra cowa ko hahalafin materek itira, mansa malalitemohay cangra i pitahkaan. O fafahi ni Yohani iraay ko demak mansa cowa ka tayra malacafay cangranan a komaen. Kao ngaˈayay, cowa ka fanaˈen ni Komeng ko tao to mararaway a saˈosi no niyah. Oniya tinakoan patalipaˈelalay kitaanan, ano hakowato ko halafin malo Krisciyang kita, hamaan tano milifetan no niyah a misaˈosi to demak, soˈlinen ko kacipinang to demak ngaˈ ngaˈay.

18. Ano eca ka langaˈay kita to salikaka, wa samaan mifiyor to pisaˈosi no mita hani?

¹⁸ Ano eca ka langaˈay kita to salikaka i kasakopang, wa mifiyor kitaanan matatodong ko pisaˈosi alatek. Ano haharateng han ko lacongis i kalalaˈed to salikaka, wa misatapang caka pakasoˈlin to salikaka. Telocto, ano matengil ita ko mararaway lihaf noniya salikaka i, wa kahnay a pakasoˈlin. Mihaenay haratengen ita, ano ira ko macangalay harateng to salikaka wa miapoh kitanan eca pakahapinang to demak, mararawto ko misaˈosian. (1 Timoti 6:4, 5) Hamaan palamiten ita ko maˈinapay i falocoˈ, mihaen ecato ka fiyor ko pisaˈosi no niyah. Hamaan papiˈmeten ko tatiihay harateng to niyah, padadotocen a maolah ko salikaka ita, mikifalocoˈ a misodod cangranan.​—ˈOsien ko Kolosay 3:12-14.

19, 20. (1) Saka dademaken ita ko maanan a safalod no Fangcalay Cudad ngaˈ matatodong ko pitadtad to lihaf hani? (2) Ilaenoay a lalakaw mamilengo to manan hani?

¹⁹ Anini, sapilifokaw to soˈlinay lihaf ato matatodong ko pitadtad to macadaay a lihaf cowa ko madoloay, samanen ngaˈayay pasoˈlinen a lihaf cowa ka hakowa, anca cowa ka songilaˈ ko lalakaw; o cowa ka lefot a tireng mifiyoray to saka tatodong no pisaˈosi no mita. Sasamaan kita miremo to hatiniay a sapalifet hani? Kalimlaan ko kafanaˈ ita to safalod no Fangcalay Cudad ato saka dademaken, o cecay safalod ano caho ka tengil ko samanay ko soˈlinay demak tangsol sa a misaˈosi, mihaen to demak cowa ko inanengay oha papakangodo to niyah. (Taneng 18:13) Patalipaˈelalay ko Fangcalay Cudad kitaanan hamaan patelas a pakasoˈlin to maamaan a lihaf. (Taneng 14:15) Saikoray, ano hakowato ko halafin ita malo Krisciyang, wa misinanot eca ka pitadiˈec to taneng no niyah. (Taneng 3:5, 6) Tooren ita ko soˈlinay a lihaf a inaneng ko pisaˈosi, mihaen wa madipot no safalod no Fangcalay Cudad kita.

²⁰ Cowa ko malengoay aca noniya lalakaw a pakayraan ko mamifiyor kitaanan a matatodong ko pisaˈosi, tocerid o potal aca no demak ko mitooran no tamdaw a misaˈosi. Itini laenoay lalakaw, wa milengo kita iraay ko maanan marariday maˈaraw a talakal mamifiyor to tamdaw matatodong ko pisaˈosi, ato sasamaan kita a miliyas to talakal.