NGAˈAYAY paˈicel to tamdaw ko pakasoˈlinay falocoˈ. Sapipalakaw ci Satan to kalawidang ita aci Yihofaan, kawra o pakasoˈlinay falocoˈ wa padama kitaanan ‘mipadeng to cinamalay a panaˈ no palafoay.’ (Ifiso 6:16) Ira ko pakasoˈlinay falocoˈ ita, ngaˈayto misiˈayaw to sano lotokay a sapalifet. Pasowalan ni Yis ko nisawawaan: ‘O pakasoˈlinay falocoˈ namo, ano hatira o palok no kolang a kaeming, pasowalen namo koniya lotok, mikitini malinah tayra, o mamalinah ko lotok.’ (Matay 17:20) Palahad to pakasoˈlinay falocoˈ wa ngaˈay patanektek to kalalaˈed ita aci Yihofaan, mihaenay o sasongilaˈen ita miharateng koniya laenoay salicay: “O maanan ko pakasoˈlinay falocoˈ? O harateng ita samaanay mifiyor to pakasoˈlinay falocoˈ ita hani? Wa samaan kita paˈicel to pakasoˈlinay falocoˈ hani? O cima ko papakasoˈlinen hani?—Loma 4:3.

O pakasoˈlin aca to sowal no Fangcalay Cudad, cowa ko soˈlinay a pakasoˈlinay falocoˈ. Sowal no Fangcalay Cudad ‘pakasoˈlinay ko tatiihay coyoh to iraay ko Kawas, kawra mamirmiray ko falocoˈ a matalaw.’ (Yakop 2:19) Mihaenay, o maanan ko pakasoˈlinay falocoˈ hani?

Sowal no Fangcalay Cudad tosaay ko mahawpay no pakasoˈlinay falocoˈ. Saka 1, ‘o pakasoˈlinay falocoˈ mafanaˈay to mamalaˈosi ko mitokelan.’ (Hipray 11:1a) Ano ira ko pakasoˈlinay falocoˈ ita, wa pakasoˈlin to kihcod a sowal ni Yihofa, o mamalaˈosi. Pasowalan ni Yihofa ko nolitengan a Israil: ‘Ano ngaˈay kamo mipalak to katatelekan ako to romiˈad ato dadaya, cato pitoor to toki ko romiˈad ato dadaya mafafalic, wa ngaˈay kamo mipalak to katatelekan ako to sikawdan ci Tafitian.’ (Yirimiya 33:20, 21) Wa calemcem kiso, cecay romiˈad cato ka cokacok ato caka likelon ko cidal, cato ka fafalic ko romiˈad ato dadaya hokira? Ano cowa ka cisasa kiso to pikalileng no cikiw to cidal a romakat, mihaenay wa cisasa kiso to cowa ko mamalaˈosi ko sowal no patirengay toniya safalod a Tatapangan han? Meedeng cowa kira!—Isaya 55:10, 11; Matay 5:18.

Saka 2, o pakasoˈlinay falocoˈ ‘o ihkalay wacay no cowa ka ˈaraw a dafong.’ ‘Ihkalay wacay’ ngaˈayay pakasoˈlinen no tamdaw, misawacay to materekay ko cowa ka ˈaraw a dafong. (Hipray 11:1b) Tinakoen, ano milicay ko cecay wawa tisowanan, ‘Hano mafanaˈ kiso to iraay ko fali a materek hani?’ Soˈlin cowa ka ˈaraw no mata ko fali, kawra ngaˈayay pasowalen iso ko wawa to materekay ko fali a wacay, tinakoen saseraˈ, miiyofay ko fali a wacay. Pakasoˈlin ko wawa toniya wacay, wa cipinangto materekay ko cowa ka ˈaraw a dafong. Mihaenay o pakasoˈlinay falocoˈ iraay ko wacay.—Loma 1:20.

Ano misaaliay to wacay ko pakasoˈlinay falocoˈ, palahad to pakasoˈlinay falocoˈ, kalimlaan ko ‘matatodongay kafanaˈ to soˈlinay kimad.’ (1 Timoti 2:4) Ira ko sifanaˈ cangoˈotayho. Sowal no tarokos ci Pawlo: ‘Mikitini i falocoˈ a pakasoˈlin’ ko tamdaw, sanay.  (Loma 10:10) Sa koniya sowal, cowa ko pakasoˈlin aca to soˈlinay kimad, saaretengenho ko soˈlinay kimad, mihaen ngaˈ tano waywayan cingra paihkal to pakasoˈlinay falocoˈ, mitoor to kahemekan no Kawas a pakayraan a maˈorip. (Yakop 2:20) Ano caka pisaareteng ko tamdaw to soˈlinay kimad, mitoor to harateng no niyah a misalo to coos no niyah, cowato pakaˈaraw to ihkalay a wacay. (2 Pitiro 3:3, 4; Yuta 18) Tinakoen, i lintad no Fangcalay Cudad, maˈaraway no ˈalomanay ko kafahkaˈan a demak, kawra cowa palahad to pakasoˈlinay falocoˈ. (Saˈosi 14:11; Yohani 12:37) O papadamaen no Kawas oyaan nai falocoˈay a maolah to soˈlinay kimad a tamdaw, palahad to pakasoˈlinay falocoˈ a makapahay capeling.—Kalatiya 5:22; 2 Tisalonika 2:10,11.

Iraay ko pakasoˈlinay falocoˈ ni Tafiti. (Hipray 11:32, 33) Kawra cowa ka sahto sa mahaen ko paro no lomaˈ ni Tafiti, tinakoen o kaka ningra ci Iliyap cangoˈotay ko pakasoˈlinay falocoˈ. Tiya milood ci Koliyat to sofitay no Israil i, mifekaday ko moecelay harateng ni Tafiti, kawra mirikecan ni Iliyap ci Tafiti, misatekeday ko falocoˈ sanay. (1 Samuil 17:26-28) Mahapinangay itini, cowa ka hofochan iraayto ko pakasoˈlinay falocoˈ, cowa ko miterekan no wama wina. Ira ko pakasoˈlinay falocoˈ ni Tafiti, samanen palahadan ningra ko tangongolay kalawidang aci Yihofaan.

ˈOsien ita ko ˈOlic saka 27 fedengan, wa mafanaˈto samanay ci Tafiti palahad to tanektekay pakasoˈlinay falocoˈ. (Saka 1 sinael) Midotimay ci Tafiti to nalifetan isalakat, miharateng to samaanay ci Yihofa a padama cingranan misiˈayaw to ciˈicelay ˈada. (Saka 2, 3 sinael) Tada maolahay ci Tafiti to fangcalay kopang ni Yihofa, hanaca pakayni ko piakoˈid to Kawas. (Saka 4 sinael) Malacafayayho to roma iraay ko pakasoˈlinay falocoˈ a tamdaw, itini fangcalay kopang a midoko to Kawas. (Saka 6 sinael) Roma i, fanekfekay ci Tafiti a mitolon ato micangacang to sadama ni Yihofa. (Saka 7, 8 sinael) Makahiay cingra micada to sapasifanaˈ no Kawas. (Saka 11 sinael) Itini pinengneng ni Tafiti, tada kalimlaan ko pakasoˈlinay falocoˈ, cedaˈahay cingra ano awaay ko pakasoˈlinay falocoˈ no niyah, awato ko ˈicel a padadotoc!—Saka 13 sinael.

Ano palahaden ita ko masowalay i ˈOlic 27 fedengan a harateng ato ngaˈayay nanaman, wa malecad ci Tafitian, ira ko pakasoˈlinay falocoˈ. O matatodongay a sifanaˈ ano o taˈeneran no pakasoˈlinay falocoˈ, micerid kita micekiw to Fangcalay Cudad ato mitepangan a cudad, wa malifok ko sapadama no Kawas, palahad to hatiniay makapahay a capeling. (ˈOlic 1:2, 3) Ano micekiw i, palaken ko toki a midotim, mihaen ngaˈ matongal ko miakoˈiday ci Yihofaan a harateng. Ano adihay ko piakoˈid iso ci Yihofaan, matongal ko kalim tano waywayan paihkal to pakasoˈlinay falocoˈ, mirienang to saˈopo midoko Cingranan, hanaca milasil to ngaˈayay lihaf. (Hipray 10:23-25) O roma pakayraan paihkal to pakasoˈlinay falocoˈ fanekfek a mitolon, aka pisawad. (Luka 18:1-8) Ka ‘padadotoc mitolon,’ pakasoˈlin to ciharatengay ci Yihofa kitaanan. (1 Tisalonika 5:17; 1 Pitiro 5:7) O pakasoˈlinay falocoˈ mamiocor kitaanan midemak to ngaˈayay a demak, ano mararid kita midemak  to ngaˈayay demak, wa matongal ko tanektek no pakasoˈlinay falocoˈ.—Yakop 2:22.

Itini ˈayaw no kinafalah ci Yis a dadaya, pasowlay to nisawawaan: ‘Ka pakasoˈlin to Kawas, pakasoˈlinenho kako.’ (Yohani 14:1) Mihaenay cowa ko pidoedo aca ci Yihofaan, dadoedoenho ci Yis. Samaan ko demak o midoedoay ci Yisan hani? Nengnengen ita ko tolo a pakayraan.

Saka 1, o sapatelong no Kawas tisowanan ko sapatefoc han ko pinengneng. Sowal ni Pawlo: ‘Pakayni pakasoˈlin ako to wawa no Kawas ko sakaˈorip. Maolahay cingra takowanan, pakayniay takowanan kinafalah to niyah.’ (Kalatiya 2:20) Malecad ci Pawloan, ira ko pakasoˈlinay falocoˈ iso ci Yisan, o papakasoˈlinto papadama ko sapatefoc tisowanan, milifok to sasodod no Kawas ato tokel tahadaˈoc maˈorip, pakasoˈlinho to o wacay ko sapatefoc to maolahay ko Kawas tisowanan. (Loma 8:32, 38, 39; Ifiso 1:7) Ano mihaen cowato papakidem ko mafasaway harateng to niyah.—2 Tisalonika 2:16, 17.

Saka 2, pakayni satolon a miingid ci Yihofaan. O sapatefoc ni Yis padamaay kitaanan itini satolon, ‘mifowah to nafalocoˈan, ho malifok ita ko sidaˈit, ato mikiriwiˈay sidaˈit, malo matatodongay a sapadama.’ (Hipray 4:15, 16; 10:19-22) Padamaayho ko satolon kitaanan misetek to falocoˈ micoˈay to sakayhid.—Luka 22:40.

Saka 3, midoedo ci Yisan. Sowal no tarokos ci Yohani: ‘O midoedoay to Wawa i, wa tahadaˈoc maˈorip; cowa pidoedo to Wawa i, awa ko haˈorip, wa materek i tireng ningra ko keter no Kawas.’ (Yohani 3:36) Ano palalinian ni Yohani ko midoedoay ato cowa pidoedo, ano pakasoˈlinay kita ci Yisan, o mamidoedo cingranan. Midoedo ci Yisan o mamidofdof to sarikec ningra, oyaan sapasifanaˈ ningra kitaanan a kihcod sapalimoˈot. (Kalatiya 6:2) Midoedo ci Yisan oha mamitengil to pakaynian ningra i ‘madimadiay citanengay a koli’ a sakayat kitanan. (Matay 24:45) Ano makahi kiso midoedo ci Yisan, soˈlin tahalifa to sano faliyosay a pasangaray, wa ira ko ˈicel a padadotoc miemem.—Luka 6:47, 48.

Iraay ko cecay tamdaw micangacangay ci Yisan: ‘Iraay ko pakasoˈlinay falocoˈ ako! Ano cangoˈot ko pakasoˈlinay falocoˈ ako i, nanay padamaen kako haw!’ (Marko 9:24) Soˈlinay ira ko pakasoˈlinay falocoˈ noniya tamdaw, kawra misapoeneray ko falocoˈ ningra, mihayi to misaaliay to mikikakaay taˈangay a pakasoˈlinay falocoˈ. Malecad cingranan, itini kaˈorip o mamalifa ita o cecacecay tamdaw ko pasangaray, misaaliay to taˈangayay a pakasoˈlinay falocoˈ ho ngaˈay a misiˈayaw. Mihaenay nohatiniho paˈicelento ita ko pakasoˈlinay falocoˈ, o pakayraan i, micekiw to Kimad no Kawas, midotim to lalakaw i lalomaˈ, mitongal to miakoˈiday falocoˈ ci Yihofaan. Malacafay kita to salikaka itini kasaˈopoan a midoko ci Yihofaan, paladaˈen ko tao to tokel no mita, padadotoc a mitolon caka pisawad. Pakalalokay ko Fangcalay Cudad kitanan sanay: ‘Kanonoˈan a salikaka, ka itini kamo i fangcalay pihakelongan a paˈicel to niyah . . . ho ngaˈay materek i olah no Kawas.’ (Yuta 20, 21) Ano paˈicelen ita ko pakasoˈlinay falocoˈ, wa ngaˈay materek i olah no Kawas, o sangaˈayay a sapalifon konini.