MAKALIMAY kiso to cecay ˈinorong i kasakopang, kawra o roma salikaka ko ciˈinorongay nohatini, mansa awa ko toki iso han? Anca na itiniay kiso i cecay katayalan a dademak, kawra matoˈasayto, tatiihay ko tireng, pasangaray ko sakaˈorip anca ira ko ˈinorong no paro no lomaˈ hato miliyasay toniya katayalan han? Roma i, misalofay ko likakawa no Kawas, misawadayto kiso to halafinayto a ˈinorong. Ano samaanto ko pakayraan, miharateng kiso o midemakan no niyah no hatini cowa ko kaoalahan a midemak, pakayni ko sakatoled. Mihaenay, sasamaan kiso miliyas to sakatoledaw, anca macangalen ko harateng han? Wa samaan kiso mitafo to lipahakay hani?

Mikitini i taˈarawan no mipaputisemay a Yohani ngaˈayay adihay ko mananamay ita. Iraay ko mikiriwiˈay a tayal ni Yohani, kawra ikor to o mifekaday a demak cowa ko maharatengay ningra. Cowa ka harateng ningra to mamapalit ko niyah alatek, hanaca o halafin a mapalit malecaday to halafin a misawacay to tamdaw. Soˈlin mahaen, kamayan cingra padadotoc a lipahak matayal saki Kawas. Samanay cingra a miremo hani? Ano misiˈayaw kita to katoledan a pakayraan i, sasamaan mitafo to lipahak hani?

Itini kacanglahan no saka 29 miheca, misatapangay ci Yohani to patorodan ni Yihofa cingranan a demak, padama to tamdaw misaday a militemoh to ka ira ni Misiya, sanay milekal cingra: ‘Ka pasasiyor kamo, mangataayto ko kakarayan a Hongti Kitakit.’ (Matay 3:2; Luka 1:12-17) ˈAlomanay ko nai ra:ayay a tamdaw mitengil to lihaf ningra, ˈalomanay ko matemelay ko falocoˈ, misaˈosi pasasiyor a micada to paputisem. Timoloay ci Yohani a mirikec toya misaidahiay a ˈaˈideman no pihakelongan, ano caka pasasiyor cangra o mamasawkit no Kawas. (Matay 3:5-12) Itini kafarawfawan no 29 miheca, midemakay ci Yohani to cecay kalimlaan a demak, mipaputisem ci Yisan. Mikitiya misatapang, pakalalokay ci Yohani to tamdaw mikotod ci Yisan, samanen o pairasolan no Fangcalay Cudad a Misiya cingra.—Yohani 1:32-37.

Mikiriwiˈay ko saaroˈan ni Yohani, mansa mihaen ci Yis milengo cingranan: ‘O mihofocan no fafahiyan i, awaay ko mikikakaay ko taˈangay to paputisemay a Yohani.’ (Matay 11:11) Adihayay ko malifokay ni Yohani a sapalemed, harataengen iso hakowaay ko kahemek ningra hani? Anini, ˈalomanay  salikaka milifokay to malecaday ni Yohani kadofahay a sapalemed. Tinakoen ko salikaka ci Teli, 50 miheca misakafah cingra ato fafahi ci Santela, sanay cingra: “Na iraay ko makapahay a toki ako matayal. Misakafahay, matayal i Pitil, kasakilac kantok ato kasapala kantok, no hatini miliyaway malo mikiriwiˈay misakafah.” Ira ko toki matayal tada kahemekan, kawra mikitini nalifetan ni Yohani mamananamho ita ko roma demak, ano tahalifa to kafalic i, misaaliay to kapisaˈicel ngaˈ ngaˈay mitafo to lipahakay.

O maanan ko pakayraan ni Yohani mitafo to lipahakay hani? Miakoˈiday cingra ira ko toki no niyah matayal saki Yihofaan. Tinakoen, ikor no micada ci Yis to paputisem, maˈesalay ko nisawawaan ni Yohani, kawra matongalay ko mikotoday ci Yisan a tamdaw. Calemcemay ko nisawawaan ni Yohani, mansa tayra ci Yohanian a pasowal: ‘Nengnengen iso, mipaputisemay cingra nohatini, tayraayto ko polong a tamdaw cingranan.’ (Yohani 3:26) Pacaˈof ci Yohani: ‘O cifafahiyay oya cacifafahi a faˈinayan. Kawra, tireng sanay ko widang no cifafahiyay, matengil ko ngiha no cifafahiyay, tada lipahakay. Mihaenay, oniya lipahak ako o marocekay.’ (Yohani 3:29) Cowa pisiay ci Yohani ci Yisan, soˈlin kalimlaan ko demak ni Yis, awaayto ko epoc no demak no niyah cowa pihaen ko harateng. Padadotocay ci Yohani a lipahak, malo ‘widang no cifafahiyay faˈinayan,’ malikoan nanay cingra.

Matatodongay ko pinengneng ni Yohani to katayalan no niyah, soˈlin pasangar ko ˈinorong, kamayan marenec cingra. Hofochan ci Yohani o malamicidekay to hekal a tamdaw, hakelong no ˈorip cowa ka ngaˈay komaen to epah. (Luka 1:15) Sowal ni Yis: ‘Ira ci Yohani, caka komaen caka pinanom.’ Tatodong nonini madoloay ko kaˈorip ni Yohani. Kawra ci Yis ato nisawawaan cowa ko mamidofdof to saali no malamicidekay to hekal a tamdaw, ngaˈayay malecad to kalo a tamdaw a maˈorip. (Matay 1:18, 19) Roma i, cowa pidemak ci Yohani to kafahkaˈan a demak, kawra mafanaˈay cingra o nisawawaan ni Yis, mahawpay ko namitooray ci Yohanian a tamdaw, milifokay to sapidemak to kafahkaˈan a ˈicel. (Matay 10:1; Yohani 10:41) Oniya kasasiroma cowa ka kalisanga ko falocoˈ ni Yohani, kamayan padadotoc misamacay matayal saki Yihofaan.

Pahecaden ita ci Yohanian misalimla to katayalan nohatini, wa ngaˈay mitafo to lipahak. ˈAyaw malengoay a salikaka ci Teli, sowal ningra: “Ano samaan ko katayalan ako, misarocoday kako a midemak.” Milomal ci Teli to tayal i hakelongan no kaˈorip ningra i, sowal sa cingra: “Adihayay ko kahemekan a lalomalen ako, awaay ko kasomadan no falocoˈ ako.”

Ano sapitongalaw to lipahak a matayal i, ngaˈay simsimen ita, o katayalan ako hano o kalimlaan, ciepocay a tayal. Samanen mikapotay to Kawas a matayal, tada kalikoanto! (1 Korinto 3:9) Tinakoen, ano ceriden ita a misisit ko kalimlaan a dafong, cowa ko cacitaˈi kora dafong. Malecaday, ano micerid kita misimsim to kalikoan ko katayal saki Kawas, ora lipahak ita cowato ko mamalahdaw. Aka palalinien ita to kinafalah no niyah ato tao, aka misakahmaw to katayalan no niyah, hato awaay ko kapo saan a miharateng.—Kalatiya 6:4.

Alatek mafanaˈay ci Yohani, cowa ko hahalafin ko katayalan ningra, coka harateng to wa fahal saan tomerep koniya tayal. (Yohani 3:30) Itini saka 30 miheca, maedeng ikor no micada ci Yis to paputisem to 6 folad, milofoan ni Hiroti ci Yohani i kapalitan. Soˈlin mahaen, kamayan padadotoc ci Yohani pasifanaˈ to tamdaw lomakat to moecelay lalan. (Marko 6:17-20) Soˈlin mafalic ko pakayraan, hano kamayan ci Yohani mitafo to lipahak hani? Samanen o misamacayan ningra o misaaretengan ni Yihofa a demak.

Matengilay ni Yohani i kapalitan ko mitosilay demak ni Yis. (Matay 11:2; Luka 7:18) Pakasoˈlinay cingra to ci Misiya ci Yis, kawra cowa ka fanaˈ to sasamaan ci Yis palaˈosi to kihcod pakayniay ci Misiyaan a sapairasol. Mihaenay ko harateng ni Yohani alatek: “Ano malifokayto ni Misiya ko fadangalan no hongti, wa kalikito ci Yis misatapang a mikowan han? Maraod ko toki, wa pasadaken ni Yis kako nai kapalitan han?” Saka cipinangaw ci Yohani to saaroˈan ni Yis, mansa miocor to tatosa nisawawaan milicay ci Yisan: ‘O kiso koya Tatayni han? Anca wa mitalaho kami to roma hokira?’ (Luka 7:19) Palimoˈotan  ni Yis ko nisawawaan ni Yohani minokay pasowal ci Yohanian to maˈaraway nangra a kafahkaˈan a demak. Minokayto cangra pasowal ci Yohanian: ‘Pakaˈaraway ko mapohaway, romakatay ko mapiˈiway, makoracay ko mapodokay, pakatengilay ko madoˈengay, patikolay maˈorip ko mapatayay, matengilay no manikaway ko ngaˈayay lihaf.’ Maedeng misongilaˈay ci Yohani a mitengil.—Luka 7:20-22.

Maharek ci Yohani mitengil to safanaˈ no nisawawaan, maedeng macadaay ko taˈangayay sapakalalok. Samanen matongalay ko pakasoˈlin ningra to palaˈosiay ci Yis to pakayniay ci Misiyaan a sapairasol. Soˈlin cowa padama ci Yis ci Yohanian milifok pasalat, kawra mafanaˈay ci Yohani to ciepocay ko tayal no niyah, soˈlin pasangar ko pakayraan, iraayho ko lalangian ningra a lipahak.

Malecad kita ci Yohanian misamacay to misaaretengan no Kawas a demak, itini pasangaray pakayraan wa ngaˈay mitafo to lipahakay ato mihadidi a mitala. (Kolosay 1:9-11) Wa samaan ko demak ita hani? Ngaˈay kita micekiw to Fangcalay Cudad hanaca midotim to maˈosiay a lalakaw, mihaen wa maharateng to cowa ko malahoracay ko nano demak ci Yihofaan. (1 Korinto 15:58) Sowal ni Santela: “To romiˈamiˈad miˈosi to cecay fedengan a sinael padamaay takowanan miingid ci Yihofaan, padamaay takowanan micerid miharateng ci Yihofaan eca ko niyah.” Roma i, ngaˈayay ciharateng kita to kalingad no demak no Hongti Kitakit, ano mihaen wa masinanot ita ko milahcian ni Yihofa a demak, eca ko pakayraan no niyah. Sanayho ko sowal ni Santela: “Minengneng to kamok no JW Tilifi to folafoladan padamaay takowanan cipinang to malaˈosiay likakawa no Kawas a demak, oniya kamok padamaay kitaanan lipahak a dademak i katayalan nohatini.”

O katayalan a toki ni Yohani cowa ka halafin, kawra paihkalay cingra to malecaday o ‘timolo ato tanektekay a ˈicel ni Iliya,’ hanaca o ‘malecaday kitaanan o tamdaw.’ (Luka 1:17; Yakop 5:17) Ano malecad kita ci Yohanian, micerid ira ko miakoˈiday a falocoˈ halo misamacay to misaaretengan no Kawas a demak, itini masamaamaanay a pakayraan wa ngaˈay padadotoc lipahak a matayal.