1. Samaanay mapatireng ko Filipi a kasakopang hani?

TAYRAAY ci Pawlo, Silas, Luka aci Timoti i Filipi, mahapinangay nangra maolahay ko itiraay a tamdaw to lihaf no Hongti Kitakit. Oniya sasepatay salikaka tawlikay cangra a mitosil, mansa mapatirengay ko Filipi a kasakopang. Tiya iraay ko cecay hinalafangay fafahiyan a salikaka ci Litiya, o faelohay a salikaka itiya, itiraay i lomaˈ ningra misatapang a masaˈopo.—Dmak 16:40.

2. Oniya faelohay a kasakopang malifaay ko masamaanay pasangaray a demak hani?

² Caka halafin, oniya faelohay a kasakopang, malifaay ko pasangaray a demak. Miowingan ni Satan ko misaˈadaay to kimad a tamdaw misafelit to mitosilay a demak, hato malepelay ci Pawlo aci Silas, mipekpekan mipalitanho cangra. Matedal cangra i, tangsolay masasoˈaraw to salikaka pakalalok cangranan. Ikor, miliyasay ci Pawlo, Silas aci Timoti to Filipi a niyaroˈ, edengan ci Luka aca ko materekay. Oniya faelohay a salikaka wa samaan ko demak nangra hani? Pakayni sapadama ni Yihofa, padadotocay cangra fanefek a midoko to Kawas. (Filipi 2:12) Tada malikoay ci Pawlo cangraanan!

3. Itini Filipi 1:9-11, mingitangitay ci Pawlo to Kawas to maanan hani?

³ Maedeng ikor no 10 miheca, patikamian ni Pawlo ko Filipi a kasakopang. Matomesay ko olah ni Pawlo to salikaka i tikami, sanay ci Pawlo: ‘Iraay ko mahecaday ni Yis Kristo a olah ako tamowanan.’ (Filipi 1:8) Sowal ni Pawlo, patadoay cingra to Filipiay a salikaka mingitangit ci Yihofaan  patongal to olah nangra, mihapinang to o maanan ko masakalimlaan a demak, mitafo to makoracay, hamaan pakapolin to tao, ato ciheci to minaroˈan no moecelay. O sowal ni Pawlo iraay ko epoc to aniniay a Krisciyang, sasongilaˈen ita a micekiw. (ˈOsien ko Filipi 1:9-11.) O mamilengo kita to kalimlaan no sowal ni Pawlo, halo pilengo to sasamaan kita a misaka dademak.

4. (1) Sowal i saka 1 Yohani 4:9, 10, samaanay ko Kawas paihkal to olah Ningra kitaanan hani? (2) Wa hakowaen ko tangongol no olah ita ci Yihofaan hani?

⁴ Miocoran ni Yihofa ko Wawa ningra tayni i sera, kinafalah to ˈorip pakayni i raraw no mita, paihkal to olah kitaanan. (ˈOsien ko 1 Yohani 4:9, 10.) O kasapaan a olah no Kawas, patemeray to falocoˈ no mita a maolah Cingranan. (Loma 5:8) Wa hakowaen ko tangongol no olah ita ci Yihofaan hani? Pasowal sa ci Yis to Farisay a tamdaw: ‘Sarocoden ko falocoˈ iso, sarocoden ko harateng iso, sarocoden ko taneng iso a maolah ci Yihofaan Kawas iso.’ (Matay 22:36, 37) Mihaenay i, o olah ita to Kawas coko kalitosaen ko olah, ao matongal to romiˈamiˈad ngaˈ ngaˈay. Palimoˈotan ni Pawlo ko Filipiay a salikaka, tongalen ko olah. Kawra, samaanen ita mitongal to ka olah to Kawas hani?

5. Sasamaan kita mitongal to kaolah to Kawas hani?

⁵ Salakatho kita mafanaˈ to Kawas ngaˈ ngaˈay maolah Cingranan. Sowal no Fangcalay Cudad: ‘Awaay ko olah i, cowaho ka fanaˈ to Kawas, samanen o olah ko Kawas.’ (1 Yohani 4:8) Sanay ko sowal ni Pawlo, ano matatodong ko kafanaˈ ita to Kawas, misongilaˈ a cipinang to harateng Ningra, mihaen o mamatongal ko olah Cingranan. (Filipi 1:9) Satapang kita minanam to Fangcalay Cudad i, soˈlin, cowa ka adihay ko kafanaˈ to capeling no Kawas, kamayanho a maolah Cingranan. Ikor matongal ko kacipinang ita ci Yihofaan, matongalay ko kaolah ita Cingranan. Mihaenay i, micerid a micekiw to Fangcalay Cudad, pacalep a misimsim to lalakaw, tada o masakalimlaan!—Filipi 2:16.

6. Pakayni saka 1 Yohani 4:11, 20, 21, patongalenho ita ko olah cimaanan hani?

⁶ O olah no Kawas miocoray kitaanan a maolah to salikaka. (ˈOsien ko 1 Yohani 4:11, 20, 21.) Maolah to salikaka cowa ko pasangaray a demak sanay ko harateng no mita alatek, samaanen kita i, sahto o midokoay ci Yihofaan ato minanamay to fangcalay capeling Ningra. Hanaca, minanamayho kita ci Yisan, tada maolahay cingra kitaanan, pakayni kitaanan kinafalah to niyah. Latekay pasangaray kita midofdof to masasiolahay a limoˈot no Kawas. Mahecad o mafekaday i kasakopang no Filipi a demak.

7. O sapalimoˈot ni Pawlo ci Iuotian aci Sintikian mananamay ita ko maanan hani?

⁷ O ‘malacafayay matayal’ to tarokos ci Pawloan ko salikaka ci Iuotia aci Sintiki. Ikorto, cowa ka lecad ko harateng nangra, cowato ko ngaˈayay widang. Itini tikami ni Pawlo to kasakopang no Filipi masowalay ci Iuotia aci Sintiki, palimoˈot cangranan ‘mahecad ko falocoˈ ato harateng.’ (Filipi 4:2, 3) Pasowalay ci Pawlo to polong a tamdaw i kasakopang: ‘Ano mananto ko demak namo, hamaan ngaliwngiw, malacongis.’ (Filipi 2:14) O limoˈot ni Pawlo, soˈlin mapadamaay koniya tatosaay salikaka  ato kasakopang, mitongal to olah i kalalaˈed.

8. (1) Latekay hano pasangar kita maolah to salikaka hani? (2) Samaanen ita miremo toniya pasangaray hani?

⁸ Mahecad ci Iuotia aci Sintiki, latekay haharateng sanay kita to dangoc no salikaka, hato pasangaray maolah cangranan. Kawra kahacecacecay tamdaw sahto mamararaw, ano nanengneng sa kita to raraw no tao, o olah ita wa mafasaw mafasawto. Tinakoen, o cecay salikaka matawalay miasik to kasaˈopoan, mamaketer kita alatek. Ano misatapang kita misaˈosi to raraw ningra, mamatongal ko ngolaw ita, pasangarayto kita maolah cingraanan. Mihaenay i, ano malifaay iso ko hatiniay a demak, haratengen: Maˈaraway ni Yihofa ko raraw iso, ato raraw no salikaka, kawra kamayanay Cingra a maolah tisowanan ato salikaka. Mihaenay todongen ita ci Yihofaan a palahad to olah, kilimen ko kangaˈayan no salikaka. Ano mihaen kita a maolah to salikaka i, mamakelec ko kalalaˈed ita ato salikaka.—Filipi 2:1, 2.

9. O misowalan ni Pawlo i Filipi a ‘masakalimlaan a demak,’ mahawpay ko maanan hani?

⁹ Itini sakayat ni Yihofa, pasowlan ni Pawlo ko Filipiay a Krisciyang, ‘hapinangen o maanan ko masakalimlaan a demak.’ (Filipi 1:10) O masakalimlaan a demak mahawpay ko pikangodo to fangcalay ngangan ni Yihofa, malaˈosi ko araaw Ningra, ato makelec a dipayal ko kasakopang. (Matay 6:9, 10; Yohani 13:35) Ano saaretengen i nokaˈorip koniya pina demak, o misawacayay to maolahay kita ci Yihofaan.

10. Samaan ko hademak ita ngaˈ, ngaˈay ‘makoracay awaay ko kadit’ hani?

¹⁰ Sowal ni Pawlo misaaliayho kitaanan to ‘makoracay awaay ko kadit.’ Cowa ko malo malefotay a tamdaw kita sanay, samanen awaay ko pakayraan ita mahecad ci Yihofaan a malefot, makorac. Kawra ano songilaˈen ita patongal to olah, hapinangen o manan ko masakalimlaan a demak, o makoracay awaay ko kadit saan ko pinengneng ni Yihofa kitaanan. O roma pakayraan paihkal to olah i, aka pasetolen ko tao.

11. Hano laliyasen ko sapakapolinaw to tao hani?

¹¹ ‘Aka pakapolin to tao,’ o pakidemay a sapirikec koni. Midemak kita to maanan oha pakapolin to salikaka hani? O mipiliˈan ita a lawla, caˈedong ato tayal, cowa ko mararaway, kawra, o mipiliˈan ita ano mamipalak to ngaˈayay falocoˈ no salikaka, malahdaw ko pakasoˈlinay falocoˈ nangra to Kawas, o mararawayto konini. Sowal ni Yis, ano pakapolinen ita ko salikaka, mahecaday pakafiten i liˈel ko taˈangayay fakeloh patekengen i riyar sanay!—Matay 18:6.

12. O cecay misakafahay mararamoday salikaka patirengay to maanan ngaˈayay a taˈarawan hani?

¹² Sinanoten o cecay mararamoday misakafahay salikakak samanay midofdof to limoˈot ni Yis. I kasakopang noniya mararamoday, iraay ko cecay faelohay micada to paputisem a mararamoday salikakak, o harateng nangra, cowa ka ngaˈay ko Krisciyang tayra i paikaan a minengneng to ika, ano samaanto ngaˈay ko ika cowa ka tatodong a tayra, sanay cangra miharateng. Ya mafanaˈ cangra to tayraay i paikaan minengneng to ika ko misakafahay salikaka, mafahkaˈay cangra. Ikor, oniya misakafahay salikaka cowato ka tayra a minengneng to ika, tangasa i kafanaˈan a pafafidaˈ to demak koya faelohay salikaka ngaˈ. (Hipray 5:14) O olah noniya misakafahay  mararamoday a salikaka, cowa ko sowal aca, tano waywayan a paihkal to maolahay cangra to salikaka.—Loma 14:19-21; 1 Yohani 3:18.

13. Latekay hano mikayhid kita to salikaka a mararaw hani? Tinakoen.

¹³ Latekay, o waywayan ato somowal ita pakapolinay to tao, mikayhid to salikaka a mararaw. Hano mahaen hani? Tinakoen, o cecay minanamay to Fangcalay Cudad a tamdaw, halafinay misaˈicel misawad to kahiyan to epah, misetek to falocoˈ ecato komaen to epah. Ikor macakat cingra micada to paputisem. Cecay romiˈad, mitahidangan no salikaka a micawmaˈ, patakid to epah cingranan, saan ko sowal: “O Krisciyangto kiso nohatini, iraay ko fangcalay saocor ni Yihofa, o minaroˈan no fangcalay saocor iraay ko miˈimeray. Mihaenay ano iraay ko miˈimeray iso, wa matatodong ko kakomaen to epah.” Ano tengilen noniya faelohay a salikaka koniya sapaini, maedeng ka adayayan ko hateloc!

14. Mirienang to saˈopo hano papadama kitaanan misaka dademak to limoˈot no Filipi 1:10 hani?

¹⁴ O saˈopo no Krisciyang padamaay kitaanan misaka dademak to limoˈot no Filipi 1:10. Saka 1, o lalakaw no saˈopo patalipaˈelalay kitaanan, itini pinengneng ni Yihofa o maanan ko masakalimlaan a demak. Saka 2, mananamay ita to sasamaan kita misaka dademak to mananamay a safalod, ngaˈ ira ko makoracay awaay ko kadit a waywayan ato sasowalen. Saka 3, o saˈopo ‘mikowaday to ciolahay falocoˈ,  micowat to ngaˈayay demak.’ (Hipray 10:24, 25) Ano adihayay ko micadaan ita a sapakalalok, wa matongal ko olah ita to Kawas ato salikaka. Ano sarocoden ko falocoˈ, harateng a maolah to Kawas ato salikaka, eca to pakapolin to salikaka.

15. Samaan ko demak ita o ciheciay to minaroˈan no moecelay hani?

¹⁵ Micangacangay ci Pawlo to Kawas padama to Filipiay salikaka ‘ciheci to minaroˈan no moecelay.’ (Filipi 1:11) Ano maolah kita ci Yihofaa ato finawlan ningra, o ciheciay to ‘minaroˈan no moecelay.’ O ‘minaroˈan no moecelay,’ mahawpay ko pasowal to tao, pakasoˈlinay ko niyah ci Yisan ato hatokel noikoran. Roma i, itini Filipi 2:15 misaka dademakan ni Pawlo ko cecay sapatinako: ‘Itini lalomaˈ no tamdaw mahecad o likat patedil.’ Maharatengay ita ko pangangan ni Yis to nisawawaan ‘o tedil no hekal,’ palimoˈot cangranan padama to tamdaw malo Krisciyang, itini icowacowa pala malo misawacayay ni Yis, tahira i samaraa:yay a pala. (Matay 5:14-16; 28:18-20; Dmak 1:8) Mihaenay misarocod kita mirienang to mitosilay demak, o ciheciay to ‘minaroˈan no moecelay.’

16. Itini i Filipi 1:12-14, samaanay mitadtad to, ano cowa ka ngaˈay ko pakayraan no mita, wa ngaˈayay pataengad to likat ita hani? (Nengnengen ko papotal coka.)

¹⁶ Ano samaanto ko pakayraan no mita, ngaˈayay pataengad to likat ita. Latekay, o saconged o ngaˈayay a toki ita mitosil. Tinakoen, o tarokos ci Pawlo, patikami cingra to Filipi a kasakopang i, alatek mapalitay cingra i Loma, kawra oniya kading cowa pakaˈmet cingranan, kamayanay cingra patenak to ngaˈayay lihaf to milisoˈay cingranan a lafang ato milaocay.  Itiniay i pasangaray a pakayraan, padadotocay ci Pawlo fanekfek ko falocoˈ mikowad to salikaka, padadotoc ‘timolo a patenak to Kimad no Kawas.’—ˈOsien ko Filipi 1:12-14; 4:22.

17. Tano tinakoan a mitadtad samanay ko salikaka miremo to saconged padadotoc a mitosil.

¹⁷ O salikaka ita mahecaday ci Pawloan a timolo, soˈlin makeceng ko mitosilay i kitiraan nangra, caka ngaˈay pakalomalomaˈ anca pakapapotal a milasil to ngaˈayay lihaf, kawra kamayan cangra tano roma pakayraan a mitosil. (Matay 10:16-20) Itini makecengay a kitakit, painiay ko kasakilac kantok to mitosilay, kalakilacen ko salawina, fiyaw, cafay micudad, cafay matayal ato kafanaˈan a tamdaw misongilaˈ a mitosil. Telocto lalomaˈ no tosa miheca, matongalay ko kasakopang i kasakilac. Cowa ko makecengay ko kilac ita, wa ngaˈay kita mahecad toniya salikaka, mikilim to pakayraan misongilaˈ a mitosil, o papafelien ni Yihofa kita to ˈicel, miremo to kihcod a saconged.—Filipi 2:13.

18. Saˈosien ita ko falocoˈ a midemak to maanan hani?

¹⁸ Macalohay ko toki nohatini, saˈosien ita ko falocoˈ misaka dademak to limoˈot no Filipi, mihapinang to masakalimlaan a demak, makorac awa ko kadit, aka pakapolin to tao, ciheci to minaroˈan no moecelay. Mihaen ngaˈ mamatomes ko olah i falocoˈ no mita, paˈdil to ciolahay a Wama ci Yihofaan.