1. Iraay ko maanan a pitokel ita to paro no lomaˈ hani?

SALIKAKA ci Pawlina * pasowalay cingra: “Mikitiya pinanaman ako to soˈlinay kimad i, mitokelayto kako kalacafay to paro no lomaˈ i Lakoing a maˈorip, mangalef o faˈinay ato wawa ako midoko ci Yihofaan.” Cowaho ka fanaˈ, ato midoko ci Yihofaan ko paro no lomaˈ iso han? Ano cowaho i, o harateng iso wa mahecad ci Pawlinaan alatek.

2. Oniya lalakaw wa milengo to maanan?

² Soˈlin cowa ka ngaˈay pacieci to paro no lomaˈ, micada to ngaˈayay lihaf, kawra o ngangaˈay padamaen ita cangra mifohat to falocoˈ micada to lihaf no Fangcalay Cudad. (2 Timoti 3:14, 15) Hano sasawacayen ita ko paro no lomaˈ hani? Hano papatadoen miharateng ko nafalocoˈan nangra hani? Samaan ko demak ngaˈay padama to paro no lomaˈ malecad kitaanan maolah ci Yihofaan hani? O salikaka i kasakopang wa samaan padama to tao hani?

3. Mikitini i saka 2 Pitiro 3:9, hano sawacayen ita ko paro no lomaˈ?

³ Cato ka halafin papalaˈafoento ni Yihofa ko hekal ni Satan, edeng o matatodongay ko waywayan a tamdaw ko mamalidong. (Dmak 13:48) Adihayay ko mipalakan ita a toki ato ˈicel mitosil to kafahalan a tamdaw, malecaday makalimay kita malacafay ko paro no lomaˈ kitaanan midoko ci Yihofaan. O sidaˈitay a Wama ita ci Yihofa ‘cowa ka kahi malaˈafo  ko cecay tamdaw,’ mitokelay pasasiyor ko cecacecay a tamdaw.—ˈOsien ko 2 Pitiro 3:9.

4. Ano misawacay kita to paro no lomaˈ i, sasinanoten ko maanan hani?

⁴ Ano milasil kita to sakalidong a lihaf i, sinanoten matatodongay ko pakayraan hokira. Ano mitosil kita to kafahalan a tamdaw i madaˈmaˈay ko sowal, kawra ano misawacay to paro no lomaˈ i patodicek sanay ko sasowalen, cowa piharateng to nafalocoˈan nangra.

5. Ano misawacay kita to paro no lomaˈ i, haharatengen ko maanan hani?

⁵ Cowa ka ngaˈay ko pakayraan iso a misawacay to paro no lomaˈ isalakat alatek, nanay ngaˈay ko pidemak isalakat. O limoˈot no tarokos ci Pawlo wa ngaˈay padama tisowanan: “Kararid a damsay ko sowal namo. Kao kaolahan no tamdaw a mitengil ko sowal namo. Kafanaˈ kamo to nika samaanen ko pipacaˈof to licay no kahacecacecay a tamdaw.” (Kolosay 4:5, 6) Ano caka dofdofen ita koniya limoˈot, wa pasangar padama to paro no lomaˈ micada to soˈlinay kimad, alatek mamaketer cangra.

6-7. O Krisciyang hano papatado a miharateng to nafalocoˈan no ramod? Tinakoen.

⁶ Patadoen a miharateng. Masowalay i ˈaˈayaw ci Pawlina sanay: “Salakat, sahtoay o noˈadingoan a demak ko misowalan ako i faˈinay, cowa pilengo to nokaˈorip a demak.” Kawra, o faˈinay ningra ci Wien cowa ka cipinang to Fangcalay Cudad, awaay ko pinang to sowal no fafahi. O harateng ni Wien, sahtoay ono pihakelongan ko maharatengay no fafahi, calemcemay cingra to fafahi malipalaway no katalawan a kiyokay.

⁷ Soˈlin adihayay ko toki ni Pawlina mirienang to saˈopo to dadaya ato pilipayan,  mitosilay anca macacawmaˈ to salikaka. Sanay ci Pawlina: “Latekay minokay ci Wien, awaay ko i lomaˈay, matoˈolay cingra.” Maedeng makalimay ci Wien pacafay ko fafahi ato wawa cingranan i lomaˈ. Oya micawmaˈan no fafahi ato wawa a tamdaw, cowa ko kafanaˈan ningra, hanaca ikakaay ko pisaareteng ni Pawlina to faelohay a widang. Orato, patalaway to mamilikong ci Pawlinaan. Ano ci Pawlina kiso, wa samaan kiso patado miharateng to nafalocoˈan no paro no lomaˈ hani?

8. Pakayni i saka 1 Pitiro 3:1, 2, o manan ko taˈakayay a pilingat to paro no lomaˈ hani?

⁸ Ngaˈayay a waywayan mikikakaay to adihayay sasowalan. O waywayan no mita mikikakaay to sasowalan. (ˈOsien ko 1 Pitiro 3:1, 2.) Ikor, mahapinangay ni Pawlina koniya kalimlaan, sowal sa cingra: “Mafanaˈay kako, maolahay ci Wien tamiyanan, soˈlin coko sapilikongaw cingra takowanan. Mahapinangay ako, edengan misakadademak kako to limoˈot ni Yihofa i raramod ngaˈ ngaˈay. Coko sasowal sa kako, tano waywayan a paihkal ngaˈ ngaˈay.” Cowato ka pacieci patengil ci Pawlina to Fangcalay Cudad ci Wienan, tano mihololay sa a masasowal to mafekaday i nokaˈorip a demak. Ikor, maˈaraway ni Wien ko kafalic ni Pawlina, ato kangaˈayan no wawa. (Taneng 31:18, 27, 28) Mahapinangay ningra, o Fangcalay Cudad iraay ko ngaˈayay a pilingat to fafahi ato wawa, ikor mafohatay ko falocoˈ ningra makahi a mitengil to Kimad no Kawas.—1 Korinto 7:12-14, 16.

9. Hano padadotoc caka pisawad kita a padama to paro no lomaˈ hani?

⁹ Padadotocen a padama. Patirengay ci Yihofa to ngaˈayay taˈarawan ita, misaliyaliyaw pafeli to hatoki no tamdaw, mitengil to  kimad Ningra a malidong ko ˈorip. (Yirimiya 44:4) Pasowalan ni Pawlo ci Timoti padadotocen a padama to tamdaw. Misamaanay hani? Samanen mihaen to demak wa malidong ko niyah ato mitengilay a tamdaw. (1 Timoti 4:16) Maolahay kita to paro no lomaˈ, mansa makalim saka fanaˈaw nangra to kimad no Kawas. Malecad to tinakoan ni Pawlina, o waywayan ningra ngaˈayay ko pilingat to paro no lomaˈ, lipahakayto cingra ato faˈinay matayal saki Yihofa, o misakafahay cangra, hanaca malo malohemay malitengay no kasakopang ci Wien.

10. Hano pairaen ita ko mihadidiay?

¹⁰ Pairaen ko mihadidi. Na misaˈosi kita to falocoˈ mitoor to palinian no Kawas a maˈorip i, alatek pasangaray ko paro no lomaˈ micada to kafalic no mita. Salakat maˈaraway nangra to cowa kala cafay cangranan a misalisin, cowa pirienang to mirikecay a demak. Maketeray ko paro no lomaˈ kitanan alatek. (Matay 10:35, 36) Kawra aka pisawad kita padama cangranan. Ano misawad kita padama cangranan mihapinang to pihakelongan no mita, mahecad to misawkitay cangranan, hato awaay ko tatodong nangra micada to tahadaˈocay a hatokel. Soˈlin, cowa pafeli ci Yihofa to misawkitay a fadangalan kitaanan, pafelian Ningra ci Yis. (Yohani 5:22) Mihaenay i, ano hadidien ita ko paro no lomaˈ, alatek saikor, cacadaen nangra ko mitenakan no mita a lihaf.—Nengnengen ko sapatongal lalakaw “Sakadademaken ko Wangcan no Mita.”

11-13. Pakayni pipadama ni Alis to paro no lomaˈ a nalifetan, mananamay iso ko maanan hani?

¹¹ Daˈmaˈen ko sowal, tanektek ko saˈosi. (Taneng 15:2) Nengnengen ko tinakoan ni Alis, minanam cingra to Fangcalay Cudad i, miraayay to wama wina ko kitiraan. Fanekfekay tono mirikecay a demak, cowa pakasoˈlin to Kawas ko wama wina ningra. Mafanaˈay ci Alis, o kakalikien ningra a pasowal ko wama wina to mananamay a ngaˈayay lihaf, sanay cingra: “Ano nayaren iso pasowal to kafalic no pihakelongan ato waywayan, wa taˈangay ko kafahkaˈ nangra.” Patikamian ni Alis ko wama wina, pakayniay i olah a lalangian ko sapikidat to harateng nangra, milicay cangranan samanay ko pinengneng to kimad no Fangcalay Cudad. (1 Korinto 13:1-13) Sowal ni Alis miakoˈiday cingra to palahad ato pidimokos nangra, palakatayho to sapatelong cangranan. Ano milisoˈ cangranan i, padamaay to wina matayal. Kawra, cowa ka hemek ko wama wina ni Alis to faelohay pihakelongan ningra.

¹² Mikilomaˈ ci Alis i lomaˈ no wama wina i, padadotocay cingra to nanaman a miˈosi to Fangcalay Cudad. Sowal ningra: “Mihaenay, wa mahapinang no wina ako, o masakalimlaan ko minanamay to Fangcalay Cudad takowanan.” O wama ni Alis, sapihapinangaw cingra to kafalic ni Alis, halo mikilim to dangoc no Fangcalay Cudad, mansa miˈosi cingra to Fangcalay Cudad. Sowal ni Alis: “Pafelian ako ko wama to Fangcalay Cudad, mitilidan ako ko pina sowal i lalomaˈ.” Samanay ko minaroˈan hani? O wama ni Alis cowa pakakilim to dangoc no Fangcalay Cudad, cowa konini aca, mapatemeray no Kimad no Kawas ko falocoˈ no wama ni Alis.

¹³ Itini pipadama to paro no lomaˈ tahalifa kita to sapalifet alatek, kawra tafoen ko madaˈmaˈay, tanektek ko saˈosi. (1 Korinto 4:12b) Itini pisafelit no wina kamayan mihadidi ci Alis, sanay cingra: “Mafanaˈ ko ina to micadaayto kako to inoˈ, o tatiihay a wawa kako sanay pasowal. Cowa piliyas kako toniya pasangaray, mikangodoay a mitadtad, to pisetek ako to falocoˈ  malo Misawacayay Tamdaw ni Yihofa, hanaca cowa ko mamafalic. Misaˈicelay kako misayar to wina, pasowal cingranan kamayan maolah kako cingranan, tangic sanay kami. Ikor patadoan ako ko wina milahkad to kadofahay a kakaenen. Mikitiya, palidlid sanay mahapinang no wina o Fangcalay Cudad ko padamaay takowanan malo ngaˈayay a tamdaw.”

14. Ano tahacada to saroero hano cowa ka ngaˈay kita a misawad hani?

¹⁴ Latekay, misaaliay to toki ngaˈ cipinangay ko paro no lomaˈ to kalimlaan ko pidoko to Kawas. Tinakoen ci Alis, tiya misaˈosi cingra malo misakafahay, eca ko mipiliˈan no wama wina a tayal i, masomaday aca tomangic ko wina ningra. Cowa ka falic ci Alis, sanay cingra: “Ano micaˈi kiso to cecay demak, itini roma demakan wa miroero ko paro no lomaˈ tisowanan papisawad. Kawra ano sidaˈit ko waywayan iso, tanektek ko saˈosi, wa micada to ngaˈayay lihaf ko paro no lomaˈ alatek.” Mahaenay ko pakayraan ni Alis, ikorto malo misakafahay ko wama ato wina ningra, o malohemay malitengay ko wama nohatini.

15. Pakayni Matay 5:14-16 ato 1 Pitiro 2:12, o “ngaˈayay demak” no salikaka iraay ko maanan a sapadama to paro no lomaˈ no mita hani?

¹⁵ Pakaynian ni Yihofa i “ngaˈayay demak” no kasakopang no Krisciyang a misolot ko tamdaw. (ˈOsien ko Matay 5:14-16 ato 1 Pitiro 2:12.) Ano cowa ko Misawacayay Tamdaw ni Yihofa ko ramod iso, misiwkayan iso cingra mafanaˈ to salikaka i kasakopang han? O masowalay i ˈaˈayaw ci Pawlina mitahidangay to salikaka tayni i lomaˈ misalafang, ira ko toki no  faˈinay ci Wien mafanaˈ cangranan. Masowalay ni Wien ko cecay faˈinayan salikaka samanay padama cingranan a cipinang, sanay cingra: “Pahanhan sanay ko cecay salikaka kalacafay takowanan minengneng to misiayay mimali, harateng ako itiya, o malecaday o kalo a tamdaw ko Misawacayay Tamdaw ni Yihofa ha!”

16. Hano tatahidangen ita ko paro no lomaˈ a mirienang to saˈopo?

¹⁶ O roma ngaˈayay pakayraan padama to paro no lomaˈ i, tahidangen cangra mirienang to saˈopo. (1 Korinto 14:24, 25) O saka cecay mirienangan ni Wien a saˈopo o piharatengan to kapatay ni Yis, samanen itiniay ikor no mawmah ko saˈopo, hanaca cowa ka koˈdaw ko toki. Sanay ci Wien: “Soˈlinay i, awaay ko pinang ako to lalakaw no saˈopo, kawra cowa ka pawan ako ko mirienangay to saˈopo a tamdaw, mihamhamay cangra takowanan, soˈliˈlinay ko falocoˈ a mimetmet to kamay ako, mahapinangay ako o ngaˈayay a tamdaw cangra.” Mikiriwiˈay a ciharateng ci Pawlinaan ko cecay mararamoday salikaka, marariday padama cingranan ato wawa mirienang to saˈopo ato mitosil. Mihaenay, tiya misaˈosi ci Wien saka cipinangaw to pihakelongan no fafahi i, oya faˈinayay salikaka ko padamaay cingranan minanam to Fangcalay Cudad.

17. Hamaan pakayni i maanan a demakan a makesem kita hani? Hano hamaan misawad kita a padama to paro no lomaˈ hani?

¹⁷ Makalimay kita malacafay to paro no lomaˈ a midoko ci Yihofaan, Kawra ano samaanto kita a misaˈicel, cowa ko mamicada cangra to soˈlinay kimad alatek. Ano mahaenay ko pakayraan, cowa ko papakayni i saˈosi nangra a makesem kita, samanen cowa ko ngangaˈay kita pacieci to tamdaw micada to soˈlinay kimad. Kawra, lipahak kiso matayal saki Yihofaan wa ngaˈay ko pilingat to paro no lomaˈ. Mihaenay, ka padadotoc patado to paro no lomaˈ a mitolon, madaˈmaˈ ko sasowalen, hamaan misawad! (Dmak 20:20) O papalemeden ni Yihofa ko pisaˈicel iso. Ano makahi ko paro no lomaˈ iso a mitengil to Kimad no Kawas, oha mamalidong cangra!