1. Ano sapilahciaw to saka tahadaˈoc no ˈorip a cacikayen, sasamaan ko demak no Krisciyang hani?

O KAHACECAY Krisciyang itiniay i saka tahadaˈoc no ˈorip a cacikayen, satapang sanayho kita a comikay, anca halafinayto a comikay, kalimlaan ko sapadadotocaw ita tahira i patosokan a comikay. O sapalimoˈot no tarokos ci Pawlo to Filipiay Krisciyang papakalalok kitaanan, milahci toniya cacikayen. Tiya macada no Filipiay kasakopang ko tikami ni Pawlo i, halafinayto ko ˈalomanay Krisciyang a midoko to Kawas, soˈlin madimadiay cangra to Kawas, patalipaˈelalanho ni Pawlo cangra padadotoc a miemem. Tokel ningra minanam cangra to taˈarawan ningra, pasayra i patosokan misaˈicel a comikay.—Filipi 3:14.

2. O limoˈot ni Pawlo hano padama to Filipiay a Krisciyang hani?

² O limoˈot ni Pawlo padamaay to Filipiay a Krisciyang, samanen ka tomireng noniya faelohay kasakopang misiˈayawayto pakidemay a sapalak. Itini saka 50 miheca, malifokay ni Pawlo ko mapolosi, o tatayra i Filipi no Makitoniya, malacafayay cingra ci Silasan a tayra. (Dmak 16:9) Mitosil ci Pawlo i, malitemohay ningra ko cecay fafahiyan ci Litiya, ‘mifohatan ni Yihofa ko falocoˈ ningra,’ orato micadaay ci Litiya to ngaˈayay lihaf. (Dmak 16:14) Tangsolay cingra ato paro no lomaˈ ningra micada to inoˈ. Itiya, misatapangay ci Satan miconged to mitosilay tayal. Milepelan no itiraay tamdaw ci Pawlo aci Silas patayra i mikowanay, pakokot cangranan mifodifoday to demak. Telocto, mipekpekan ci Pawlo aci Silas, ikor mipalitan. Ikor mitedalan no mikowanay macaloh a papiliyas cangranan. (Dmak 16:16-40) Sawad sanayto ci Pawlo aci Silas han? Cowa! Oniya faelohay kasakopang a Krisciyang, cowaho ka halafin micada  to inoˈ, soˈlin safeliten cowa pisawad. O taˈarawan ni Pawlo aci Silas taˈangayay ko pakalalok cangranan.

3. (1) Mafanaˈay ci Pawlo ano sakatahiraaw i patosokan a comikay, mamisamaan ko hademak ngaˈ ngaˈay hani? (2) Oniya lalakaw mamilengo to maanan a salicay hani?

³ Misetekay ko falocoˈ ni Pawlo eca ka pisawad. (2 Korinto 4:16) Kawra mafanaˈay cingra mamisamacay ko harateng i patosokan, ngaˈ tahira i patosokan a comikay. Mikitini ci Pawloan mamananam ita ko maanan hani? Aniniay a Krisciyang misiˈayaw to pasangaray, samaanay a mitafo to mihadidiay hani? O noikoran a tokel hano papadama kitaanan misetek to falocoˈ eca ka pisawad hani?

4. Soˈlin pasangaray ko pakayraan ni Pawlo, samaanay cingra misarocod a matayal saki Kawas hani?

⁴ Itiniay masamaanay pakayraan patikami ci Pawlo to Filipi a kasakopang hani? Itiniay i Loma cingra itiya, marofoay i lomaˈ, kawra kamayan micerid cingra mitosil to milisoˈay tamdaw, patikamiayho to adihayay kasakopang. Anini, o roma salikaka caka ngaˈay masadak a mitosil, kawra ano ira ko milisoˈay tamdaw, tawlikay cangra mamet to toki a mitosil. Roma i, patikamian nangra a misawacay ko cowa ka lisoˈ no mitosilay a cilomaˈay.

5. Mikitini i Filipi 3:12-14, hano ngaˈay ci Pawlo pasayra i patosokan a comikay hani?

⁵ Cowa ka pakayni saaroˈan ato raraw isalakat a makalisanga ko falocoˈ ni Pawlo, mafanaˈay cingra ‘tatawalen ko salakatay demak,’ ngaˈ ‘misaˈicel a talaˈayaw,’ milahci to saka tahadaˈoc no ˈorip a cacikayen. (ˈOsien ko Filipi 3:12-14.) Alatek o maanan a lalangian ko mamikalisanga to falocoˈ ni Pawlo hani? Saka 1, na ngaˈayay ko saaroˈan ni Pawlo i Yutaya tamdaw, kawra malo Krisciyang cingra i, malecaday o ‘hadec’ sanay ko pinengneng ningra tonini. (Filipi 3:3-8) Saka 2, na mikariˈangay ci Pawlo to Krisciyang, kawra cowa ka pakidem ko kakesem ningra a misawad midoko to Kawas. Saka 3, adihayto ko tayal no niyah i Kawas, hamaanto padadotoc misaˈicel, cowa ka saan ko harateng ni Pawlo. Adihayay ko minaroˈan ningra a mitosil, na mapalitay, mipekpekan no tao ato tekolan to fakeloh, tahapadesay ko tamina, cangoˈotay ko rikoˈ ato kakaenen. (2 Korinto 11:23-27) Nikawrira, ano hakowaayto ko malahciay a tayal ni Pawlo, miemem to adihayay roray, o papasayra i patosokan a comikay, cowa ka makalisanga ko falocoˈ, sanay ko harateng ningra. Todongen ita ko taˈarawan ningra.

6. O ‘tatawalen’ ita a demak mahawpay ko maanan?

⁶ Sasamaan kita mitodong ci Pawloan ‘mitawal to salakatay demak’ hani? Alatek pakayniay kita i salakatay a raraw, hato cikiyamay ko falocoˈ, sapiremoaw to hatiniay a harateng, wa ngaˈay kita micekiw to pakayniay sapatefoc a lalakaw pakalalok to niyah. Pakayni i picekiw, midotim ato mitolon, palidlid wasa kita miremo to makesemay a harateng, pakasoˈlin to misododay ci Yihofa kitaanan ecato ka kesem. ‘Mitawal to salakatay demak’ mahawpay ko maanan hani? Sapitongalaw to tayal saki Yihofaan misawadan ita ko ˈakawangay ko lifon a tayal alatek. Ano mahaenay i, hamaanto a tangoˈol to misawadanto a dafong. (Saˈosi 11:4-6; Patnakay 7:10) Roma i, o ‘tatawalen a demak’ mahawpay ko nano demak i likakawa no Kawas ato miememan a roray. Milomal kita to sapalemed ato sadama ni Yihofa  wa padama kitaanan miingid to kakarayan a Wama, hamaan malitaˈang, maedengayto ko demak saki Kawas, aka haenen a miharateng.—1 Korinto 15:58.

7. Itini saka 1 Korinto 9:24-27, ano sapilifokaw to lifon i tahadaˈoc no ˈorip i, sasamaan ko hademak ita ngaˈ ngaˈay hani? Tano tinakoan a mitadtad.

⁷ Sowal ni Yis, wa ‘misarocod to ˈicel’ ko Krisciyang. (Luka 13:23, 24) Mihaenay, mafanaˈay ci Pawlo wa malecad ko niyah ci Kristoan, hakelong no ˈorip misaˈicel a matayal saki Kawas. Patinakoan ni Pawlo ko kaˈorip no Krisciyang to comikayay a midefolay. (ˈOsien ko 1 Korinto 9:24-27.) O midefolay a tamdaw samacayen ko harateng to patosokan, caka ngaˈay makalisanga ko falocoˈ. Tinakoen, o roma pidefolan a lalan mitaˈlifay to maci, alatek maˈaraway no comikayay ko masakenaay a patiyamay. Wa tomireng cingra i tanameng a minengneng to o maanan ko dafong no patiyamay han? Ano mihaen to demak i, wa pasokiyaw cingra! Itini saka tahadaˈoc no ˈorip a midefolay, aka ka makalisanga ko falocoˈ ita. Ano samacayen ita ko patosokan i, mitodong ci Pawloan misarocod to ˈicel talaˈayaw a comikay, wa malifok ko sapalifon.

8. O manan toloay a pasangaray a demak ko saka naˈon no hawang no mita hani?

⁸ Itini saka tahadaˈoc no ˈorip a lalifeten, wa pakayni i pasangaray a demak ko saka naˈon no hawang ita alatek, mahawpay ko kanayar a caho ka laˈosi ko mitalaan a demak, matoˈasto malonay ko tireng anca halafin micada to sapalifet. Dotoc wa minengneng kita to samanay miremo ko roma Krisciyang to pasangaray a demak.—Filipi 3:17.

9. Ano caho ka laˈosi ko mitalaan a demak, wa samaan ko harateng ita hani?

⁹ Caho ka laˈosi ko mitalaan a demak. Ciharatengay kita sapakaˈarawaw to kalaˈosi no mikiˈokan ni Yihofa a makapahay tokel. Tinakoen pairasolay a Hapakuk mitokelay to palaˈafoen ni Yihofa ko tatiihay tamdaw ato demak i Yutaya kitakit, pasowalan  ni Yihofa cingra padadotoc mitala toniya demak. (Hapakuk 2:3) Kawra, ano caho ka laˈosi ko mitalaan a demak, wa matoled ko falocoˈ ita alatek. (Taneng 13:12) Itini satapangan no 20 hahekalan, harateng no ˈalomanay mapasimalay Krisciyang, wa itini 1914 miheca milifok to saki kakarayan a lifon sanay, ˈarawhan cowa pifekad koniya demak itiya. Oya madimadiay a Krisciyang samanay cangra miremo toniya pasangaray demak hani?

10. Cecay mararamoday cowa kalaˈosi ko mitalaan nangra, samannayto ko demak hani?

¹⁰ Nengnengen ita ko taˈarawan no tatosaay madimadiay a Krisciyang. Salikaka ci Royal Spaci 1908 miheca micada to inoˈ, 20 ko mihecaan ningra itiya, pakasoˈlinay cingra cato ka halafin wa milifokto kakarayan a sapilifon. Mansa, 1911 miheca saka ciraramodaw ci Pearan, sanay ko sowal: “Mafanaˈay kiso 1914 miheca mamifekad ko maanan a demak, kalekien ita a mararamod!” Tahini 1914 miheca, cowa kalaˈosi ko mitalaan nangra, sawad sanayto cangra to saka tahadaˈoc no ˈorip a lalifeten han? Cowa. O misaaretengan nangra o madimadi midofdof to araaw no Kawas, cowa ko sapilifokaw to sapalifon, hato misetekay to falocoˈ cangra miemem tahatolas, milaheci to cacikayen. Ci Spaci mararamod padadotocay fanekfek a midoko to Kawas, tahira ka hererekan no ˈorip i fafekang no sera. Malecad cangranan, makalimay kiso pakaˈaraw to pikorac ni Yihofa to ngangan no niyah, misawacay to matatodongay ko sapikowan a fadangalan no niyah, halo palaˈosi to kihcod a mikiˈokan. Oniya demak wa itini misaˈosian ni Yihofa a toki mifekad, ˈayaw no kairaan noniya romiˈad, wa padadotoc kita a faedet ko falocoˈ mihodop to Kawas, hamaan pakayni ka ecaho ka laˈosi no mitalaan a demak minaˈon to hawang.

11-12. Soˈlin matoˈas malonay ko tireng no Krisciyang, hano ngaˈayho padadotoc a matayal saki Yihofaan hani? Tinakoen.

¹¹ Matoˈas malonay ko tireng. O midefolay comikay misaaliay to tanektekay a tireng, kawra soˈlin malonay adada ko tireng no Krisciyang, wa ngaˈay padadotoc mitongal to pakasoˈlinay falocoˈ i Kawas, ikaka ko faedet no falocoˈ matayal saki Kawas. ˈAlomanay Krisciyang soˈlin matoˈas malonay ko tireng, kamayan patafang to sangaˈayay ci Yihofaan. (2 Korinto 4:16) Tinakoen, salikaka ci Aser Sikete * 88 ko mihecaan, 55 miheca matayalay i Pitil. Itiya, cowato ka ngaˈay ko tireng ningra. Cecay romiˈad, o malo kangkofoay  a fafahiyan salikaka tayraay takar ningra midimokos cingranan, nengneng sanay ko salikaka cingranan, damsay a pasowal: “Salikaka Sikete, oniya pina miheca adihayay ko nano demak iso ci Yihofaan.” Kawra cowa ka litaˈang ko salikaka ci Sikete to isaˈayaw a romiˈad, sedi sanay a pasowal toniya salikaka: “Soˈlinay adihay ko midemakan ako, kawra o kalimlaan i, cowa ko hakowaay ko na midemakan no mita, ao padadotoc mitafo to madimadi.”

¹² Halafinayto kiso a midoko to Kawas alatek, tatiih tatiihayto ko tireng, cowato ka lecad to salakatay adihay ko midemakan. Ano mahaenay i, hamaan matoled. Misalimlaay ci Yihofa to nano demak iso i Cingranan. (Hipray 6:10) Anini sa i, hamaan mapawan, hakowaay ko olah no tamdaw ci Yhofaan cowa ko hakowaay ko mademakay, orira tawlikay a waywayan ko piˈarawan, misaˈicel a matayal saki Kawas. (Kolosay 3:23) Cipinangay ci Yihofa to tolas no ˈicel ita, cowa ko papakidem ko saali Ningra kitaanan.—Marko 12:43, 44.

13. Ano micada kita to halafinay sapalifet, o taˈarawan ni Anatoli aci Liciya wa saman pakalalok kitaanan hani?

¹³ Micada to halafinay sapalifet. O roma salikaka halafinay mihadidi to roray ato sapalak. Tinakoen, salikaka ci Anatoli Milnik * itiniay i Moltowa a lomahad. 12 ko mihecaan ningra i, mapalitay ko wama, ikor maholiway tayra 7,000 kongli ko raay a Sipoliya. Ikor no cecay miheca, ci Anatoli ato wina ato fofo ningra maholiway tayra i Sipoliya. Ikorto, soˈlin ngaˈay mirienang to saˈopo, kawra miememay to pakidemay a sienaw, itini soeda romakat to 30 kongli tayra i roma niyaroˈ. Ikor no pina miheca, 3 miheca mapalit ci Anatoli, mapacieciay malaliyas to fafahi ci Liciya ato cecayay ko mihecaan a wawa. Soˈlin adihayay ko roray, ci Anatoli ato paro no lomaˈ kamayan madimadi a midoko ci Yihofaan. Nohatini 82 ko mihecaan ningra, itiniay Tenok no Asia malo Iing no Fenpo. Wa ngaˈay minanam kita to taˈarawan ni Anatoli aci Liciya, eminen ko ˈicel matayal saki Yihofaan.—Kalatiya 6:9.

14. Ano sapilifokaw to sapalifon, sasamaan ko hademak ni Pawlo hani?

¹⁴ Pakasoˈlinay ci Pawlo to mamaliˈay ko patosokan no niyah, milahci to saka tahadaˈoc no ˈorip a cacikayen. Malo mapasimalay  Krisciyang, mitalaay ci Pawlo milifok to saki kakarayan a ˈorip. Mafanaˈay cingra wa pasayra i patosokan a comikay ko niyah, ngaˈ malifok koniya sapalifon. (Filipi 3:14) Pakayni sapakalalokaw to Filipiay Krisciyang misamacay to patosokan, misaka dademakan ni Pawlo ko matatodongay a sapatinako.

15. Ci Pawlo tano maanan a sapatinako pakalalok to Filipiay a Krisciyang pasayra i patosokan a comikay hani?

¹⁵ Patalipaˈelalan ni Pawlo ko Filipiay a Krisciyang, ono kakarayan a finawlan cangra. (Filipi 3:20) Itiya, adihayay ko fadangalan no Loma a finawlan. * Kawra malo finawlan no kakarayan a kitakit ko mapasimalay Krisciyang, ikakaay ko macadaay a epoc, palalinien, cowa ka samaan ko finawlan no Loma kitakit. Mihaenay, pakalalokan ni Pawlo ko Filipi a Krisciyang, ‘palecaden to ngaˈayay ratoh ni Kristo a dademak.’ (Filipi 1:27) O aniniay a mapasimalay Krisciyang, wa pasayra i patosokan a comikay, o ngaˈayay a taˈarawan no mita.

16. Pakayni Filipi 4:6, 7, o kahacecay Krisciyang sasamaan ko hademak?

¹⁶ O hatokel ita o sakikakarayan anca itini fafekang no sera tahadaˈoc maˈorip i Lakoing, o papasayra i patosokan misaˈicel a comikay. Hamaanto tangoˈol to mataˈlifayto a demak, hamaan papicaraen ko kalo demak to katalaˈayaw no mita. (Filipi 3:16) O mitalaan ita a demak manayaray caho ka laˈosi alatek, tatiitatiihay ko tireng, anca micadaay to halafinay a roray ato sapalifet. Ano o mananto ko masiˈayaway a pasangaray, ‘aka cariraw,’ padadotoc a mingitangit, o papafelien no Kawas kita to cowa ka harateng a rihaday.—ˈOsien ko Filipi 4:6, 7.

17. Dotoc a lalakaw mamilengo to maanan hani?

¹⁷ Malecad to midefolay a comikay mangata ko patosokan, misarocoday to ˈicel a milaseto, ano kitato mamisarocod to ˈicel, milahci to saka tahadaˈoc no ˈorip a cacikayen. Nanay tooren ita ko ˈicel no niyah, pasayra i makapahay hatokel a comikay. Kawra, sasamaan kita ngaˈ pasayra i matatodongay a patosokan fanekfek a tahatolas hani? Dotoc a lalakaw wa padama kitaanan, ‘mihapinang to o maanan ko kalimlaan a demak.’—Filipi 1:9, 10.