1. Hano o lipahakay a tamdaw ko Misawacayay Tamdaw ni Yihofa hani? (Nengnengen ko satapangan coka.)

MISAWACAYAY Tamdaw ni Yihofa o lipahakay a tamdaw. Ano malacafay cangra i, itini i kasaˈopoan, pitaykayan anca itini kacacawmaˈan, maˈaraway mahemekay a masasowal, taˈangayay ko tawa. Misamaanay hano lipahak cangra hani? Samanen midokoay cangra to ‘lipahakay a Kawas,’ mafanaˈay cangra ci Yihofaan, hanaca mitodongay Cingraanan. (1 Timoti 1:11; ˈOlic 16:11) O pipowaran no lipahak ci Yihofa, makalimay Cingra lipahak kita. Adihayay ko sapafeli Ningra to sakalipahak ita a lalangian.​—Limoˈot 12:7; Patnakay 3:12, 13.

2, 3. (1) O manan ko lipahak hani? (2) Misamaanay sapadotocaw a lipahak hano cowa ko madoloay?

² O lipahakay a tamdaw kiso han? Sapitongalaw kiso to lipahak han? O cecay taˈarawan a cudad sanay milengo to lipahak “O harateng no tamdaw to lipahak cowa ka lecad, o roma a lipahak halafinay, o roma a lipahak cecayay liyad, o lipahakay tamdaw makalimay padadotoc ko lipahak.” Mifanaˈay ko Fangcalay Cudad kitaanan, ira ko ngaˈayay kalalaˈed no tamdaw aci Yihofa ngaˈ soˈliˈlin ko lipahak. Kawraan, sapadotocaw a lipahak cowa ko madoloay. Misamaanay hani?

 ³ Adihayay ko mamiˈafas to lipahak ita a pakayraan, tinakoen, mapatay ko salawina anca mafalah no kasakopang, ira ko pasangaray no raramod anca awa ko katayalan. Ano mararid macacoli to paro no lomaˈ, malikaf no cafay matayal anca cafay micudad, pakayni pihakelongan micada to sapalak anca mapalit, tahalifa to hatiniay demak sapadotocaw lipahak pasangarayto. O roma i, cato ka tanoktok ko tireng, halafin ko adada anca matoled ko falocoˈ, o papalahdaw to lipahak ita konini. Soˈlin hatira, ‘oya lipahakay, o dengan a mikowanay,’ ci Yis Kristo, makalimay paira to sahinom ato lipahak no tamdaw. (1 Timoti 6:15; Matay 11:28-30) O pasifanaˈan i lotok, masowalay ni Yis ko pina capeling, wa ngaˈay padama kitaanan, itini pisiˈayaw to sapalifet i hekal ni Satan kamayan padotoc a lipahak.

4, 5. Samaan kita ngaˈ malifok halo padotoc a lipahak hani?

⁴ Masowalay ni Yis itini ‘pasifanaˈan i lotok’, o sakacecay pakayraan masakalimlaan, sanay ko sowal ningra: ‘O mafanaˈay to cangoˈotay ko noˈadingoan i, o malemeday, samanen citodongay cangra to kakarayan a Hongti Kitakit.’ (Matay 5:3) Ano mafanaˈ kita to misaaliay ko niyah to noˈadingoan, wa micangacang to sadama ato sakayat no Kawas. Mihaenay, wa micerid kita komaen to noˈadingoan a kakaenen, misinanot to saali ni Yihofa, hanaca misalimla to kalalaˈed no niyah aci Yihofa, mihaen wa ngaˈay milifok kita to soˈlinay a lipahak. Wa matongal ko pakasoˈlin ita ci Yihofaan, pasoˈlin to kakahnay malaˈosi ko sakiˈok Ningra. Pitala ita to “kahalamhaman ita a kalemedan”, wa ngaˈay padama kitaanan itini sapalifet padadotoc a lipahak.​—Titus 2:13.

⁵ Patireng kita to tangongolay kalawidang ci Yihofaan, ngaˈay milifok to tahadaˈocay a lipahak. Sanay ko sowal no tarokos ci Pawlo: “Kararid kamo a lipahak to nika lacecay namo [aci Yihofa]. Miliyaw kako a pasowal i tamowanan, kalipahak kamo”! (Filipi 4:4) Ano ciharatengay kita malo soˈlinay widang ni Yihofa, minanamto Kimad no Kawas. Sanay ko sowal no Fangcalay Cudad: ‘Mahela no tamdaw ko taneng, pakahapinang to demak, o malemeday. O mitafoay to taneng a tamdaw, o kilang no ˈorip nangra. Mirikecay mitafo to taneng a tamdaw, o malemeday.’​—Taneng 3:13, 18.

6. Ano sapadotocaw kita a lipahak, wa samaanen ko hademak hani?

⁶ Sapadotocaw kita a lipahak, o piˈosi aca to Fangcalay Cudad cowaho ka edeng, saka dademakenho ko mananamay ngaˈ ngaˈay. Pasowalay ci Yis to kalimlaan mihaen ko demak, sanay ko sowal: “Mafanaˈ kamo tonini a demak. Saka, ano milaheci kamo tonini i, o malemeday kamo.” (Yohani 13:17; ˈosien ko Yakop 1:25.) Ano sapirenecaw kita to saali no niyah i noˈadingoan, hanaca ira ko soˈlinay a lipahak, wa misaˈicel misaka dademak to soˈlinay kimad. Kawra, itini no kaˈorip adihayay ko mamiˈafas to lipahak ita a demak, sasamaan kita ngaˈ padadotoc a lipahak hani? Nengnengen ita ko mihadakan ni Yis i pasifanaˈan i lotok a hapakayraan.

7. Hano malipahakay ko “mararomay tamdaw” hani?

⁷ Itini Matay 5:4 sanay ko sowal: “O mararomay to nika ciraraw nangra i, o malemeday. Nawhani o mamahinom no Kawas cangra.” Mihaen ko harateng no roma tamdaw alatek, wa samaan a lipahak ko mararomay tamdaw hani? O mitoroˈan ni Yis cowa ko mararomay ko harateng a tamdaw, samanen itini ‘pasangaray siˈayawen a ˈawaled,’ ano o tatiihay tamdaw mararomay to  malifaay a pasangaray. (2 Timoti 3:1) Kawra o rarom nangra mikitiniay i misatekeday a lalangian, cowa ka makalim cangra sakafanaˈaw ci Yihofaan, cowa ko mamilifok to lipahak. O misowalan ni Yis a “mararomay tamdaw”, oyaan pakahapinangay to saali no niyah i noˈadingoan a tamdaw, o kararom nangra maˈaraway ko hekal a tamdaw, cowa pisikol to palinian no Kawas. Mihayay cangra to cowa ka lefot ko tamdaw, mansa adihay ko katalawan a demak noniya hekal. Misinanotay ci Yihofa to mararomay a tamdaw, padama cangranan mikitini i kimad Ningra milifok to sahinom, padamaho cangranan milifok to lipahak ato tahadaˈocay ˈorip.​—ˈOsien ko Icikil 5:11; 9:4.

8. Hano malipahakay ko “damsayay a tamdaw” hani?

⁸ Itini Matay 5:5 sanay ko sowal: “O damsayay a tamdaw i, o malemeday. Nawhani o mamilayap cangra to nano nisowalan no Kawas a sapafeli.” O damsayay a tamdaw hano lalipahak hani? Ikor no mafanaˈ to soˈlinay kimad ko ˈalomanay tamdaw, mafalicay ko capeling nangra. Nao mariˈangay a tamdaw cangra alatek, marariday malacongis to tao. Kawra ‘micaˈedong to faelohay capeling’ cangra nohatini, misaˈicelay paihkal to o “adayayay, siniˈadaay, misapoeneray, damsayay, kodaitay ko falocoˈ.” (Kolosay 3:9-12) Iraayto ko rihaday, dipayal ato lipahakay a kaˈorip nangra. O roma, mikiˈokay ko Fangcalay Cudad o damsayay a tamdaw ‘mamilifok toniya sera.’​—ˈOlic 37:8-10, 29.

9. (1) O damsayay tamdaw hano mamilifok to sera hani? (2) ‘O milongocay to moecelay’ a tamdaw hano malipahak hani?

⁹ O damsayay tamdaw hano mamilifok to sera hani? O mapasimalay salikaka ni Yis wa kalacafay cingranan mala hongti, mala saysi noikor, o mamikowan cangra to polong no cikaw. (Paˈarawan 20:6) Oya cowa ka tahidang tayra i kakarayan a Krisciyang, wa patatikol a malefot ko tireng, tahadaˈoc dipayal a lipahak maˈorip. O lalipahak ko damsayay a tamdaw, samanen ‘o milongocay to moecelay’ cangra. (Matay 5:6) Ano irato ko mikiˈokan ni Yihofa a faelohay hekal, wa marenecto ko saali nangra to moecelay. (2 Pitiro 3:13) Itiya, wa songilaˈen ni Yihofa palahdaw ko tatiihay tamdaw ato tatiihay demak, o moecelay tamdaw wa tahadaˈoc a lipahak, ecato ka calemcem to mamafiyor no mararaway ato cowa ka sadafdaf a demak.​—ˈOlic 37:17.

10. O manan ko tatodong no adayayay hani?

¹⁰ Itini Matay 5:7 sanay ko sowal: “O adayayay a tamdaw i, o malemeday. Nawhani o aadayayen no Kawas cangra.” O adayayay no Hipray a sowal, tatodong i “damsayay ko falocoˈ, paihkal to faenkfekay harateng a siniˈada.” Itini no Kirisiya a sowal, o adayayay iraay ko “siniˈadaay to roray no tao” a tatodong. Kawraan o adayayay cowa ko harateng aca, itini Fangcalay Cudad, o adayayay mahawpay ko talaˈayaw dademak padama to misaaliay a tamdaw.

11. Itini sidaˈitay a Samariya tamdaw a tinakoan, wa mananam ita ko maanan?

¹¹ ˈOsien ko Luka 10:30-37. Somowalay ci Yis to cecay tinakoan, milengo to cecay sidaˈitay a Samariya tamdaw samanay paihkal to adayayay. Siniˈadaay cingra to tahalifaay to kokong a tamdaw, orato padamaay tora tamdaw. Maharek ci Yis somowal toniya sapatinako sanay ko sowal: “Ano hatira i, haenen ko demak iso.” Ngaˈayay licayen ita ko niyah: “Mitodongay kako toya sidaˈitay a Samariya tamdaw han? Talaˈayaway ko demak ako, paihkal to adayayay i tahapadesay tamdaw hokira? Wa ngaˈay kako midemak to maanan a padama to matoˈasay anca malahdaway ko ramod a salikaka han? O roma kaemangay cowa ko Misawacayay Tamdaw ni Yihofa ko wama wina, wa ngaˈay kako ciharateng cangranan han? Wa ngaˈay  kako ‘mipaˈicel to matoleday a tamdaw’ han?”​—1 Tisalonika 5:14; Yakop 1:27.

12. Hano malipahakay ko adayayay tamdaw hani?

¹² Hano o lipahakay ko adayayay tamdaw hani? Ano paihkal kita to adayayay i tao, wa malifa ko lipahak no paladaˈay, hanaca mafanaˈay kita mihaen ko demak, wa pakahemek ci Yihofaan. (Dmak 20:35; ˈosien ko Hipray 13:16.) Masowalay ni Tafiti ko paihkalay to adayayay a tamdaw, sanay ko sowal: “Dipoten [ni Yihofa] cangra a parihaday to ˈorip nangra, palemeden Ningra cangra tonini a sera.” (ˈOlic 41:1, 2) Paihkal kita to adayayay ato siniˈadaay i tamdaw, wa milifok ko niyah to adayay no Kawas, milifok to tahadaˈocay a lipahak.​—Yakop 2:13.

13, 14. Hano malipahakay ko tingalaway ko falocoˈ a tamdaw hani?

¹³ Itini Matay 5:8 sanay ko sowal: “O tingalaway ko falocoˈ a tamdaw i, o malemeday. Nawhani o mamaˈaraw nangra ko Kawas.” Ano sapadotocaw kita to tingalaway a falocoˈ, wa misinanot to iraay ko cikaditay anca mararaway a harateng no niyah hokira. Ano misaˈicel kita padotoc to makoracay a harateng, ci Yihofa wa micada to pidoko no mita.​—ˈOsien ko 2 Korinto 4:2; 1 Timoti 1:5.

¹⁴ O tingalaway ko falocoˈ a tamdaw wa ngaˈay malawidang ni Yihofa, ngaˈay cangra milekal a pasowal to: “O mifacaˈay to rikoˈ no tireng a tamdaw i, o malemeday.” (Paˈarawan 22:14) Pakayni i mapasimalay Krisciyang, “o mifacaˈay to rikoˈ” no niyah, o makoracay ko pinengneng ni Yihofa, ngaˈayay tayra i kakarayan milifok to cowa ka patay a ˈorip no ikor, milifok to tahadaˈocay a hemek. Pakayni i tahadaˈoc maˈorip i sera a taˈangayay ˈopo a tamdaw i, wa ngaˈay cangra o moecelay han ni Yihofa a minengneng, mansa ngaˈay malawidang ni Yihofa. Pasowalay ko Fangcalay Cudad to “o nano remes no Tofor a Siri ko sapifacaˈ nangra to rikoˈ nangra a misakohcal.”​—Paˈarawan 7:9, 13, 14.

15, 16. O tingalaway ko falocoˈ a tamdaw, hano “pakaˈaraw” to Kawas hani?

¹⁵ O sowal no Fangcalay Cudad “maˈaraw no tamdaw [ko Kawas], caayto ko mamaˈorip” sanay, kawra, hano pasowalay ci Yis to tingalaway ko falocoˈ a tamdaw, wa “maˈaraw” ko Kawas hani? (Kasadakan 33:20) Itini Kirisiya Sowal, o “maˈaraw” sanay iraay ko “tano ponoˈ, cipinang, mafanaˈ” sanay a tatodong. Mansa ano mafanaˈ kita ci Yihofaan, maolah to makapahay a capeling Ningra, wa ‘tano falocoˈan a mata’ pakaˈaraw to Kawas. (Ifiso 1:18) Malefotay ci Yis paihkal to makapahay capeling ni Yihofa, mansa pasowal cingra: “O pakaˈaraway i takowanan i, o pakaˈaraway to Wama.”​—Yohani 14:7-9.

¹⁶ Cowa ko kafanaˈ aca to capeling ni Yihofa, ano sinanoten ita to samaanay ci Yihofa padama kitaanan i, wa “maˈaraw” ita ko Kawas. (Yopu 42:5) Wa ngaˈayho kita misamocek i sapalifon ni Yihofa, mikiˈokay  Cingra to papafelien Ningra ko padotocay makorac ato madimadiay a tamdaw. Pakayni mapasimalay Krisciyang i, ano patikol maˈorip tayra i kakarayan i, wa soˈliˈlin a pakaˈaraw to Kawas cangra.​—1 Yohani 3:2.

17. Hano malipahakay ko pararihadayay a tamdaw hani?

¹⁷ Padotocay ci Yis a somowal: “O pararihadayay a tamdaw i, o malemeday.” (Matay 5:9) Talaˈayaw kita a pararihaday, o lalipahak. Sanay ko sowal no nisawawaan ci Yakop: “O moecelay a demak ko heci no demak no pararihadayay a tamdaw.” (Yakop 3:18) O kalalaˈed ita ato salikaka anca paro no lomaˈ ano mifekad ko marawraway, cangacangen ko Kawas padama kitaanan mararihaday. O fangcalay saocor ni Yihofa, papadama kitaanan paihkal to capeling no Krisciyang, mihaen mamatongal ko lipahak no mita. Somowalay ci Yis to kalimlaan ko micangacangay to pararihadayay, sanay: “Ano pacakat kiso to sapaini i Kawas i pipacakatan i, ano maharateng iso itiya ko nika tatiih no harateng no salikaka i tisowanan i, teli hanho i kaˈayaw noya pipacakatan koya sapaini iso. Ta tayraho toya salikaka a malaliˈay. Ta patiko kiso a tayra a mipacakat to sapaini iso i Kawas.”​—Matay 5:23, 24.

18, 19. Misiˈayaw to saroero ko Krisciyang hano ngaˈay padotoc a lipahak hani?

¹⁸ Sanay ko sowal ni Yis: “Ano milokes ko tamdamdaw i tamowanan a mikariˈang a mipalafo to masamaamaanay a tatiihay a sowal tona mitoor kamo i takowanan i, o malemeday.” O maanan ko tatodong no sowal ningra hani? Padotoc pasowal ci Yis: “Nawhani mahaento a makariˈang ko iˈayaway namo a paliˈayaway to sowal no Kawas a tamdaw. Saka, kalipahak, kalipahak, nawhani tadamaan ko sapakaolah i tamowanan i kakarayan.” (Matay 5:11, 12) Ikor no masetiˈ ko tarokos i, maparoeroay no tamdaw to aka padotoc a mitosil, ˈarawhan “salipahak” sanay cangra a miliyas to Pilaocan. Cowa ko maolahay cangra a masetiˈ, samanen o “matatodongay a mapakangodo tona mitoor . . . ci Yisan” ko lalangian nangra.​—Dmak 5:41.

¹⁹ Anini, o finawlan ni Yihofa mahemekay pakayni i ngangan ni Yis mihadidi to sapalak anca sapalifet. (ˈOsien ko Yakop 1:2-4.) Mahecaday to tarokos, cowa ka ciharateng kita to maroero no tao. Kawraan ano madimadi kita ci Yihofaan, patimoloen ni Yihofa kita a mihadidi. Nengnengen ko milifetan ni Henglike Tornik, 1944 miheca 8 folad, cingra ato kaka patayraan i pitepengan a kapalitan, oya mipalakay cangranan a tamdaw sanay ko sowal: “Ecato ka mapacieci cangra midemak to kihcod a demak, pakayni pihakelongan, ano mapatayto kamayan mahemek cangra.” Sanay ko sowal ni Henglike: “Cowa ka ciharateng kako pakayni kimad a mapatay, kawra pakayni saka madimadiaw ci Yihofaan, makahi kako ira ko saka seneng, timolo a mihadidi to pasangaray . . . fanekfekay kako a mitolon miingid ci Yihofaan, tada ngaˈayay tadiˈecen Cingra, pafeliay to matatodongay a sadama.”

20. Hano ngangaˈay kita mahemek a mihodop to lipahakay a Kawas hani?

²⁰ O waywayan ita wa ngaˈay pakahemek to “lipahakay a Kawas”, soˈlin misiˈayaw to sapalak, saroero nai paro no lomaˈ, adada anca malonay ko tireng, ngaˈay padotoc kita a lipahak. (1 Timoti 1:11) Mahemek kita, samanen mafanaˈay kita o “caay pisamangah a Kawas”, mamilaˈosi to mikiˈokan Ningra. (Titus 1:2) Itini i Lakoing, o sapalemed ni Yihofa kitanan mataˈlifay ko maharatengay no mita, mihaenay, o malifaay ita anini, cowa ka samaan. Aira ko adihayay a sapalemed no mita, “o rarihaday cangra a malemed ko ˈorip.”​—ˈOlic 37:11.