1, 2. (1) O picada ni Yihofa to tamdaw samaanay caka lecad to cifadangalay a tamdaw? (2) Oniya lalakaw wa milengo to maanan hani?

O CIFADANGALAY a tamdaw marariday mikowan to tao, mipenecayho cangranan. (Matay 20:25; Patnakay 8:9) Cowa ka hecad ci Yihofa cangranan, o malefotay ko ˈicel a Kawas Cingra. Kawraan damsayay to cowa ka lefot a tamdaw. Sidaˈitay ci Yihofa a patado to tamdaw a miharateng, misimsimay to harateng nangra, misinanot to saali no mita. Ci Yihofa “maharateng Ningra ko nika o nano sera kita.” Mihaenay cowa pisaali to mataˈlifay ko tolas no ˈicel ita a demak.​—ˈOlic 103:13, 14.

² Adihayay ko maˈoningay i Fangcalay Cudad to patadoay ci Yihofa miharateng to madimadiay sikawdan a tinakoan, oniya lalakaw wa milengo to tolo. Saka cecay, marocekay ko maharatengay ni Yihofa, padama to kaemangay a Samuil pasayra i Sakakaay Saysi ci Ilian milasil to sasawkit; saka tosa, tiya misaliyaliyaw ci Mosi minaˈay, caka kahi malo ˈaˈideman no Israil i, mihadidiay ci Yihofa micada ci Mosian; saka tolo, miliyas ko Israil tamdaw to Icip i, misinanotan ni Yihofa ko pakayraan nangra. Ano miˈosi kita toniya maˈoningay i, ngaˈayay  miharateng, o masamaanay a Kawas ci Yihofa, ato sasamaan kita a misaka dademak to mananamay.

3. Kaemangay a Samuil milifetay to maanan mikiriwiˈay a demak hani? Alatek Iraay ko maanan a salicay ita hani? (Nengnengen ko satapangan coka.)

³ Kaemangho ci Samuil itiniayto i fangcalay kopang a ‘mihodop ci Yihofaan.’ (1 Samuil 3:1) Cecay dadaya, mafotiˈayto ci Samuil, mifekaday ko cecay kafahkaˈan a demak. * (ˈOsien ko 1 Samuil 3:2-10.) Matengilay ni Samuil iraay ko miowaway cingranan, oyaan matoˈasay a Ilian ko miowaway sanay cingra, orato tayraay ci Ilian, pasowal cingranan: “Mitahidangay kiso i takowanan, ini kako.” Sowal sa ci Ili, cowa pitahidang ci Samuilan sanay. O mahecaday a demak kinatosaay aca mifekad, mahapinangay ni Ili to o Kawas ko miowaway ci Samuilan, pasowal ci Samuilan ano miliyaw matengil ko ngiha i, sasamaan a pacaˈof. Ikor, mitooran ni Samuil ko sowal ni Ili a midemak. Itini satapang a miowaw ci Yihofa ci Samuilan i, hano caka itiya pasifanaˈ ci Samuilan to o Cingra ko miowawaay hani? Cowa pifanaˈ ko Fangcalay Cudad to lalangian, kawra mikitini toniya demak mahapinang ita, patadoay ci Yihofa toya kaemangay a Samuil a miharateng. Hano mihaen ko sowal hani?

4, 5. (1) Pakayni i miocoran no Kawas a demak, samaanay ko harateng ni Samuil? Ikorto samaanay ko kalingad no demak? (2) Pakayni maˈoningay i Samuil a demak i, mahapinangay ita to o samaanay a Kawas ci Yihofa hani?

⁴ ˈOsien ko 1 Samuil 3:11-18. O sarikec ni Yihofa, mikangodo to malitengay ko kaemangay a tamdaw, mikiriwiˈay ko kakeridan no finawlan. (Kasadakan 22:28; Lifi 19:32) Wa ngaˈay haratengen iso pacerem ci Samuil mifanaˈto ci Ilian to pakidemay sasawkit no Kawas han? Soˈlinay i, sowal no Fangcalay Cudad, “matalaw ci Samuil a pasowal ci Ilian.” Kawraan, ci Ili ko misaaliay ci Samuilan a mihadak to lihaf no Kawas, palimoˈot ci Samuilan a somowal: “O maan ko sowal no [Kawas] i tisowanan saw? Aka pikilif i takowanan.” Mitengilay ci Samuil to sowal ni Ili, pasowal to kihcod cingranan.

⁵ Cowa ka fahkaˈ ci Ili to mihadakan ni Samuil a lihaf, samanen i ˈayaw, “ira a tayra ci Ilian ko paliˈayaway to sowal a tamdaw,” maharekayto pasowal cingranan to mahecaday a sowal. (1 Samuil 2:27-36) Mikitini toniya maˈoningay mahapinangay ita, masinanotay ato citanengay ko maharatengay ni Yihofa.

6. Mikitini pipadama ni Yihofa ci Samuilan, mananamay ita ko maanan hani?

⁶ Ano o kaemangay a tamdaw kiso i, mikitini milifetan ni Samuil i kaemang wa mananam iso, cipinangay ci Yihofa to masiˈayaway iso a pasangaray ato miharatengan. Alatek kalingodoay ko niyah sanay kiso, caay ka timolo pasayra matoˈasay a mitosil, anca eca ka timolo masasiroma to sakahecad ko mihecaan a tamdaw. Aka a matalaw, makahiay ci Yihofa padama tisowanan, eminen mifanaˈ Cingra to kacalemceman iso a demak. (ˈOlic 62:8) Wa ngaˈay simsimen iso ko tinakoan i Fangcalay Cudad, tinakoen o malifetay no kaemangay a Samuil. O roma a Krisciyang pakaremoay to mahecaday o miso a pasangaray—o matoˈasay anca o cafacafay—masasowal cangranan, wa mafanaˈ to samanay ci Yihofa a padama cangranan, alatek tano cowa ka harateng nangra a pakayraan a mihadak to sapadama.

7, 8. Samaanay ko demak ni Yihofa paihkal to misinanotay Cingra to harateng ni Mosi?

⁷ 80 ko mihecaan ni Mosi i, patorodan ni Yihofa cingra to taˈangayay a ˈinorong, mamilidong to misakolian no Icip a Israil tamdaw. (Kasadakan 3:10) Samaanay ko harateng ni Mosi hani? Itini i Mitin 40 miheca cingra pakaen to siri, matengil  koniya ˈinorong i macekiday cingra. Sanay ko sowal ni Mosi i Kawas: “Caay ko masamaanay a tamdaw kako i, maedeng a mimaan kako a tayra [ci Falawan] a pasowal to sapikeridaw to finawlan no Israil a pasadak nai Icip?” Sanay ko caˈof no Kawas: “Caay ka eca o mamikapot Kako i tisowanan.” (Kasadakan 3:11, 12) Mikiˈokan ni Yihofa ci Mosi, wa mitengil ko malohemay malitengay no Israil to sowal ningra. Kawra licayanho ni Mosi ci Yihofa, ano eca ka pitengil cangra samaanto. (Kasadakan 3:18; 4:1) Mihadak ci Mosi to hatiniay salicay, mahecaday to cisasaay to Kawas. Soˈlin hatira, kamayan mihadidi ci Yihofa ci Mosian, pafeliho cingranan to haˈicel midemak to kafahkaˈan, ilalomaˈ no Fangcalay Cudad, o saka cecay midemakay to kafahkaˈan a tamdaw ci Mosi.​—Kasadakan 4:2-9, 21.

⁸ Kawra, mihaenayho ko sowal ni Mosi, caka ngaˈay ko kasasowal no mako sanay cingra. Sanay ko Kawas: “O papatadoen Ako ko ngoyos iso. O papasifanaˈen Ako kiso to malo sasowalen iso,” sanay. Ikor no matengil ni Mosi makahiayto a micada han? Cowa, kamayanay cingra papiocor ci Yihofaan to romaroma tamdaw a milaheci toniya demak. Telocto, mangolaw ci Yihofa, kawra caka pacieci sa Cingra papicada ci Mosian, ˈarawhan misinanotay to harateng ni Mosi, miocor ci Aronan mala mitaypiway ci Mosian a palihaf.​—Kasadakan 4:10-16.

9. Sidaˈitay a mihadidi ci Yihofa ci Mosian, samaanayto ko minaroˈan?

⁹ Pakayni ci Yihofaan, mikitini toniya maˈoningay mahapinangay ita ko maanan hani? O malefotay ko ˈicel ni Yihofa, wa ngaˈay Cingra pacieci ci Mosian a midofdof, kawra cowa pihaen ko demak Ningra, sidaˈitay a mihadidi ci Mosian, hato rihadayay ko falocoˈ noniya misapoeneray ko falocoˈ a sikawdan. Damsay ci Yihofa ci Mosian, samanayto ko minaroˈan hani? Malo mikiriwiˈay a ˈaˈideman ci Mosi, minanamay cingra to taˈarawan no Kawas, damsay to tamdaw, patado to tamdaw a miharateng.​—Saˈosi 12:3.

10. Mitodong ci Yihofaan misinanotay to harateng no tao, wa ira ko masamaanay a ngaˈayay minaroˈan?

¹⁰ O malohemay malitengay kiso ha? Anca o faˈinay anca o wama wina kiso ha? Wa sasamaan kiso misaka dademak to kakeridan a fadangalan hani? Mahecaday ci Yihofaan misinanotay  to harateng no tao, damsay ato mihadidiay, oniya capeling masakalimlaan konini. (Kolosay 3:19-21; 1 Pitiro 5:1-3) Ano misaˈicel kiso mitodong ci Yihofaan, halo pasayra i ‘kasapaan a Mosi’ ci Yisan a minanam, mamatongal ko damsayay ato siniˈadaay ko pinangan iso a misayar to tamdaw. (Matay 11:28, 29) Wa ngaˈay kiso patireng to taˈarawan no roma tamdaw.​—Hipray 13:7.

11, 12. Tiya keriden ni Yihofa ko Israil tamdaw miliyas to Icip i, midemakay to maanan misayar to falocoˈ no finawlan Ningra hani?

¹¹ ˈAyaw no 3,531 miheca, miliyas ko Israil tamdaw nai Icip, maedeng mataˈlifay ko 300 ˈofad no tamdaw, ilalomaˈ ira ko fofo no fofo, mahawpay ko wawa, ato matoˈasay, romaroma malonayay ato adadaay a tamdaw. ˈAlomanay ko Israil tamdaw, cowaho ka maroˈ i roma pala, nikawrira wa miliyas to kananaman a Icip, o ˈaˈideman nangra misaaliay to tada misinanotay to saali no tamdaw ngaˈ ngaˈay, ˈarawhan o damsayay a Kawas ci Yihofa, miocor ci Mosian midipot to Israil tamdaw, misayaray to falocoˈ nangra.​—ˈOlic 78:52, 53.

¹² Midemakay ci Yihofa to maanan parihaday to finawlan Ningra hani? Milikakawaan Ningra ko Israil tamdaw, ‘misilsil’ cangranan miliyas to Icip. (Kasadakan 13:18) Masieroday koniya limasmas, padama to Israil tamdaw cipinang to maˈimeray no Kawas ko kihcod. O roma, sapahapinangaw to Israil tamdaw to mikapotay ci Yihofa cangranan, “O romiˈad i, pakaynien no Kawas i toˈem ko nipikerid i cangraan, o dadaya i, pakaynien Ningra i likat no namal ko nipikerid i cangraan.” (ˈOlic 78:14) Mahecaday to pasowalan ni Yihofa ko finawlan Ningra: ‘Aka a matalaw! Wa kayaten ako kamo, midipot tamowanan.’ Misaaliay ko Israil tamdaw to mahaenay sakiˈok, misamaanay hani?

13, 14. (1) Mingata ko Israil to Kahngangay a Riyar i, samaanay ci Yihofa misinanot to harateng nangra hani? (2) Samaanan ni Yihofa midemak to kafahkaˈan a palahdaw to Icip a tamdaw hani?

¹³ ˈOsien ko Kasadakan 14:19-22. Haratengen ilalomaˈay no miliyasay to Icip a tamdaw kiso, maˈaraw iso milepelay i kaikor ko sofitay ni Falaw, o Kahngangay a Riyar ko kaˈayaw, awaayto ko pilaliwan iso. Toniya toki, misatapang ko demak no Kawas, milinah to toˈem tayra kaikor no ˈalomanay, miˈteng to sofitay no Icip. Patoˈemanan ni Yihofa ko Icip a tamdaw, kawra patedilan kiso ato Israil tamdaw. Dotoc i, milayap ci Mosi to kamay mitoroˈ to riyar, miiyof ko ciˈicelay a fali to riyar, lalicinowas sanay ko riyar, ira ko kakahaday a lalan karomakatan no ˈalomanay talaˈayaw. Orato, kiso ato paro no lomaˈ ato pinaloma romakat i malicinowasay a riyar, malacafay to Israil tamdaw masierod a talaˈayaw. Padotoc kiso a talaˈayaw, fahkaˈay kiso cowa ka kohnac koniya lalan, cowa ka kocinaˈ, o maˈicangay, ngaˈayay a rakaten, ano matayoay ko rakat a tamdaw dipayalay a mitaˈlif.

¹⁴ ˈOsien ko Kasadakan 14:23, 26-30. O misatakaraway mafolaay a Falaw padotocay a milepel, polong a sofitay songtol sanay a mikotod. Nohatini, miliyaw ci Mosi mitoroˈ to Kahngangay a Riyar, maˈalitaday sano mocoˈay a nanom tangsolay a maperar, sano tapelikay a nanom, mahecaday o cedas. Teloc i, maeminay mahadefek ko sofitay ni Falaw.​—Kasadakan 15:8-10.

15. Mikitini toniya piliyas no Israil tamdaw nai Icip a maˈoningay, mahapinangay ita samaanay a Kawas ci Yihofa?

¹⁵ Mikitini toniya maˈoningay mahapinangay ita, masilsilay a masieroday ko demak ni Yihofa, pairaay to rihaday ita konini. (1 Korinto 14:33) Mahecaday o siniˈadaay a pakaenay ci Yihofa, misinanotay a midimokos to finawlan Ningra, itini i kihcod no demak padama cangranan. Miafofoan ni Yihofa ko finawlan, mipohpoh cangranan, ato milidong cangranan nai sacoˈay no ˈada. Oniya soˈlinay kimad misayaray kitaanan, samanen  mingataayto ko hatolas noniya lekakawa no hekal!​—Taneng 1:33.

16. Mikitini kita i pilidong ni Yihofa to Israil tamdaw a maˈoningay, mananamay ko maanan hani?

¹⁶ Anini, pakayni i noˈadingoan mamidipot ci Yihofa to finawlan Ningra, halo midipot toniya ˈopo. Padotocay ci Yihofa miharateng to saali no finawlan, tangasa i ka iraan no taˈangayay a padiˈing. (Paˈarawan 7:9, 10) Mihaenay, itini i taˈangayay a padiˈing, matoˈasay anca kaemangay, masamoˈay, cato ka makokiˈ marawraw a samodikoh sa. * Misinanotay cangra to sowal ni Yis: “Kahalamham ko falocoˈ namo. Nawhani o airato ko papaˈorip tamowanan.” (Luka 21:28) Sowal no Fangcalay Cudad wa micoˈay ko “Kok”to finawlan no Kawas, o”Kok” o makomoday a kitakit. Soˈlin misiˈayaw to sacoˈay, o finawlan no Kawas wa padotoc a tanektek ko pasoˈlinay falocoˈ. (Icikil 38:2, 14-16) Misiˈayaw ko finawlan no Kawas to mikikakaay ko ˈicel ni Falaw a Kok i, hano iraho ko pakasoˈlinay falocoˈ no finawlan no Kawas hani? Samanen, mafanaˈay cangra to cowa ka falic ci Yihofa, ciharatengay ato damsayay to finawlan Ningra, halo milidong cangraan.​—Isaya 26:3, 20.

17. (1) Ano misaharateng kita to samaanan ni Yihofa miharateng ko finawlan Ningra, wa ira ko maanan a epoc hani? (2) Dotoc a lalakaw wa milengo to maanan hani?

¹⁷ Mikitini milengoanlalakaw a tinakoan mananamay ita, tano sidaˈitay damsayay a pakayraan ko kaciharateng ni Yihofa, mikayat ato milidong to finawlan Ningra. Ano misimsim kita toniya maˈoningay i, kilimen ko cowaho ka sinanot isalakat a demak, mihaen wa matongal ko kacipinang to capeling no Kawas. Haratengen ita i falocoˈ ko makapahay capeling ni Yihofa, wa matongal ko kaolah Cingranan, matongalho ko pakasoˈlin Cingraan. Laenoay lalakaw wa milengo, wa ngaˈay kita samaan mitodong ci Yihofaan itini lomaˈ, kasakopang, pitosilan a patado to tamdaw a miharateng.