ICOWACOWA pala a malohemay malitengay tada misalimlaay pipadama to finawlan no Kawas a toki. Ira ko malohemay malitengay padama kitaanan tada o kalemedanto. Caka halafin, iraay ko faelohay a kafalican, o likakawa no Kawas misaaliay to matoˈasay a malohemay malitengay pafelien ko kaemangay ko mihecaan a malohemay malitengay to kalimlaan a ˈinorong. Oniya limasmas samaanaay hani?

Oniya faelohay a limasmas i, ano mataˈlifay to 70 ko mihecaan no malohemay malitengay, wa cowato ko malo kasakilac kantok anca malo papotalay a singsi, o mataˈlifay to 80 ko mihecaan a malohemay malitengay wa paikenen ko roma ˈinorong to kaemangay a malohemay malitengay, tinakoen, o misatenokay no Iing no Fenpo anca o misatenokay no malohemay malitengay itini i kasakopang. Pakayni toniya kafalican, iraay ko maanan a harateng no matoˈasay a malohemay malitengay hani? Paihkalay cangra to madimadi ci Yihofaan ato likakawa Ningra.

Ci Keen malo misatenokay no Iing no Fenpo a matayal, maedeng 49 miheca, sanay ko sowal ningra: “Tada mihayay kako toniya limasmas! Soˈlinay i, matengil koniya lihaf a papacem i, tolon sanayho kako ci Yihofaan, misaali to kaemangay  a salikaka malo misatenokay no Iing no Fenpo.” Icowacowa pala a madimadiay malohemay malitengay, mahecaday ko harateng ci Keenan. Kawrira, maolahay cangra padama to salikaka, tiya misatapang aca, mararomay ko falocoˈ nangra.

Ci Asiperatio malo misatenokay no malohemay malitengay i kasakopang, sanay cingra: “Isalakat mararomay kako.” Kawra, mihayay cingra: “O tireng ako tatiih tatiihayto, misaaliay to toki a midimokos.” Ci Asiperatio padotocay madimadi ci Yihofaan, taˈangayay ko nika padama to kasakopang.

Halafinayto milisoˈ to kasakopang a salikaka, mafalic ko tayal nangra, samaanay ko harateng nangra hani? Ci Alen 38 miheca a milisoˈ to kasakopang, sanay ko sowal ningra: “Na mafanaˈ kako to mamafalic ko ˈinorong i, tada macekokayto!” Kawra, o harateng ningra i, ano pahatatanamen ko kaemangay a salikaka pakafilo toniya tayal o kalimlaanto. Padotocay ci Alen madimadi matayal saki Yihofaan.

Ci Rasier 40 a mihecaan milisoˈ to kasakopang, o malo papotalay a singsiho cingra. Isatapang mararomay cingra ato fafahi ningra, o sowal ningra: “Tada misalimlaay kami toniya tayal, hanaca iraayho ko ˈicel no niyah padotoc a mitayal.” Nohatini ci Rasier ato fafahi ningra misaka dademakan nangra ko mihatatanaman ato nalifetan itiya, padama to kasakopang a salikaka, mahemakay ko salikaka cangraanan.

Alatek awaay ko hatiniay a nalifetan iso, kawra wa ngaˈayho kiso nai miˈoningan i saka 2 Samuil a mafanaˈ to harateng no matoˈasay a salikaka.

O wawa ni Tafiti ci Apsalom sapiˈafasaw to hongti a saaroˈan, mansa, milaliw ci Tafiti nai Yirusalim tayra i kawali no Yortan ˈAlo a Mahanahim, itiya i, misaaliay ci Tafiti ato sikawdan ningra to sakaˈorip a dafong, maharatengayho iso mafekaday ko maanan a demak han?

Itiya iraay ko tatoloay faˈinayan pafeliay to takar, masakenakenaay a kakaenen ato sakaˈorip a dafong. Ora cecay faˈinayan ci Parcilay. (2 Samuil 17:27-29) Ikor, mapadikay ci Apsalom, minokay ci Tafiti tayra i Yirusalim i, padamaan ni Parcilay ci Tafiti tayra i Yortan ˈAlo. Ci Tafiti sapiˈorongaw ci Parcilayan tayra i Yirusalim midimokos cingranan. “O cidafongay a tamdaw” ci Parcilay, ngaˈayay midimokos to niyah, kawra masemeray ci Tafiti to capeling ningra, misaaretengay to sapaini ningra. (2 Samuil 19:31-33) Ano ngaˈay ci Parcilay i lomaˈ no hongti a maˈorip ato matayal, tada o kalikoan ningra!

O misapoeneray ato matatodongay ko pinengneng a tamdaw ci Parcilay, 80 ko mihecaan, sanay cingra to niyah, o sowal ningra: ‘Ngaˈayho kako pafafidaˈ to ngaˈayay ato tatiihay han?’ O maanan ko tatodong no sowal ningra hani? Iˈayaway a nalifetan ni Parcilay padamaay cingranan malo citanengay a tamdaw, mansa kamayanay ngaˈay cingra mihadak to matatodongay a sapaini, mahecad to i tatihiay no hongti ci Rihopoam a  “malohemay malitengay.” (1 Hongti 12:6, 7; ˈOlic 92:12-14; Taneng 16:31) Soˈlinay i, ‘pafafidaˈ to ngaˈayay ato tatiihay’, tatodong noniya sowal ni Parcilay i, samanen matoˈasayto, cowato ka hakowa ko mamademak. Mihayay cingra matoˈasayto ko niyah, cato ka hecad to saˈayaway ko matengilay ato cato ka ˈaredet ko kakomaen. (Patnakay 12:4, 5) Mihaenay i, sapaini ni Parcilay ci Tafitian, ci Kimham sato ko mikotay cingraanan tayra i Yirusalim.—2 Samuil 19:35-40.

O masowalay i satapangan no lalakaw a kafalic itini i likakawa, mahecaday o harateng ni Parcilay. O haharatengen ita cowa ko pakayraan ato ˈicel no cecay tamdaw, wa haratengenho ko roma a demak, mahaen o tinakoan ni Parcilay. Pairaen ita ko matatodongay a harateng, tano soˈliˈlinay a pinengneng ko pisaˈosi to, o maanan ko sangaˈayay i madimadiay a malohemay malitengay.

O matoˈasay a salikaka iraay ko pinengneng no Kawas, mafanaˈay cangra ano paikenen ko kaemangay to hano ikor a demak, wa ngaˈay pakalingad to kacowat no likakawa no Kawas. Tocerid ciˈinorongay ko matoˈasay salikaka pahatatanam to kaemangay salikaka, mahecad o pahatatanam ni Parcilay to wawa ato pahatatanam ni Pawlo ci Timotian. (1 Korinto 4:17; Filipi 2:20-22) Oniya kaemangay salikaka paihkalay to ‘sapafeli a sidaˈit’ ko niyah, wa ngaˈay ‘patanektek to tireng ni Kristo’.—Ifiso 4:8-12; nengnengen ko Saˈosi 11:16, 17, 29.

Itini icowacowa pala a kasakopang, patorodan no ˈalomanay salikaka ko ˈinorong i kaemangay, mihaen wa ngaˈayto cangra mirienang to masakenaay a tayal, padotoc matayal saki Yihofaan.

Ci Maeke, 19 miheca matayal to milisoˈay, sanay ko sowal: “O faˈinay no roma salikaka i kasakopang cowaho ko salikaka, wa ngaˈayto kako a padama cangranan.”

Ci Rerato na milisoˈay to kasakopang i 28 miheca, sanay ko sowal: “O faelohay patosokan niyam papadama to tomerepayto mitosil a tamdaw, hanaca patireng to adihayay a pacekiwan.” Cingra ato fafahi nohatini 15 ko pacekiwan, padamaayho to papina tomerepayto mitosil a tamdaw miliyaw a mirienang to saˈopo.

O masowalay iˈayaw ci Alen sanay ko sowal: “Nohatini ngaˈayayto kami misongilaˈ a mitosil. Mahemekay kami mirienang to kaˈalomanan a pisawacayan, itini misasingdiay a kilac mitosil, misawacay to fiyafiyaw. O tatosaay a fiyaw niyam mirienangayto to saˈopo!”

Itini i likakawa no Kawas ano iraay ko faelohay a tayal iso, wa ngaˈayho kiso misaka dademak to kafanaˈan, paihkal to madimadi, o pakayraan i paladaˈen ko kaemangay i kasakopang to kalimlaan a nalifetan iso, mihaen to demak mahecaday o midamaay to tayal ni Yihofa. Masowalay iˈayaw ci Rasier, sanay ko sowal: “Pahatatanamen ni Yihofa ko citanengay a kaemangay salikaka, fanekfek cangra pasifanaˈ, pakaen to kasakopang, taˈangayay ko malifokay no ˈalomanay a epoc!”​—Nengnengen ko sapatongal lalakaw, “ Padama to Kaemangay Faˈinayan Salikaka Saka Dademaken ko Inaneng.”

Ano misatapang kiso to faelohay a tayal i, pairaen ko talaˈayaway a waywayan. O nano tayal iso isalakat ngaˈay padama to ˈalomanay, tangongolay ko pifiyor cangranan, nohatini kamayan ngaˈay kiso padotoc a padama to tamdaw. Maolahay ko salikaka kisowanan, hanaca wa padotoc a maolah tisowanan.

Masakalimlaan i, wa tahadaˈoc maharateng ni Yihofa kiso. Sowal no Fangcalay Cudad, o Kawas cowa ka mamapawan ko “nano tayal namo ato nipipatalahkal namo to olah i Cingraan itini i nipipadama namo to mitooray ci Kristoan ato nika tahanini nora demak namo.” (Hipray 6:10) Maharatengay ni Yihofa ko nano demak ita isalakat, mikiˈokay to cowa ko mamapawan to nano demak  ita anini. Sano odoˈay ko pinengneng ni Yihofa tisowanan, ano salakatayto, aninito a tayal iso, cowa ko mamapawan ci Yihofa.

Cowa ka tahalifa kiso to hatiniay a kafalic alatek, kawra oniya faelohay limasmas milingatay tisowanan. Samaanay hani?

Mafanaˈay kiso to mafalicay ko ˈinorong a matoˈasay salikaka han? Sahtoay o matenesay madimadiay a salikaka cangra, wa ngaˈay kiso mikitini nalifetan nangra a milifok to sapadama, wa ngaˈayho milicay to sapaini nangra, halo pinengneng to samanay cangra misaka dademak to nalifetan itini faelohay a katayalan.

O satapangay kiso i faelohay katayalan a matoˈasay salikaka han? Anca o micadaay to sapakalalok nangra a tamdaw hokira? Ano o maananto ko saaroˈan iso, haratengen to misalimlaay ci Yihofa tisowanan, samanen madimadiay kiso isalakat a mihodop Cingranan, ano aninito papadotoc a matayal i Cingranan.