1. Itini ˈayaw no kinafalah ci Yis to ˈorip a dadaya, malalengoay to nisawawaan to maanan kalimlaan a demak hani?

ITINI ˈayaw no kinafalah ci Yis to ˈorip a dadaya, kina 30 milengo ci Yis to ‘olah’ i nisawawaan, mikiriwiˈay palimoˈot to nisawawaan ‘masasiolaolah’. (Yohani 15:12, 17) O masasiolahay o tahapinangan, ihkal a mahapinang no tamdaw, o cima ko soˈlinay nisawawaan ni Yis. (Yohani 13:34, 35) O hatiniay a olah cowa ko nofalocoˈan aca​—o makapahay a capeling. Sanay ko sowal ni Yis: “O nika kinafalah no tamdaw to ˈorip no tireng to saki widawidang i, o sakakaay a olah konini i hekal. Ano midoedo kamo to limoˈot ako i, o salikaka ako kamo.”​—Yohani 15:13, 14.

2. (1) O finawlan no Kawas tano maanan a capeling ko kafanaˈan no tamdaw hani? (2) Oni lalakaw wa pacaˈof to maanan a salicay?

² Anini, o finawlan no Kawas tano cowa pisateked a olah ato kalacecay ko kafanaˈan no tamdaw. (1 Yohani 3:10, 11) Soˈlin mikitiniay cangra cowa ka hecad a kitakit, finacadan, sasowalen ato serangawan, kawra mitodongay cangra ci Yisan masasiolah. Mihaen ko harateng ita halatek: “Paihkal to olah anini hano kalimlaan? Ci Yihofa aci Yis samaanay tano olah a paˈicel kitaanan?  Kita maemin sasamaan mitodong ci Kristoan, tano olah a ‘paˈicel to tamdaw’ hani?”​—1 Korinto 8:1.

3. O ‘pasangaray siˈayawen a ˈawaled’ samaanay mifiyor to ˈalomanay tamdaw?

³ Maˈorip i ‘pasangaray siˈayawen a ˈawaled’, ‘maroray’ ko kaˈorip ita, matomesay ko ‘cariraw’. (ˈOlic 90:10; 2 Timoti 3:1-5) Samanen pakidemay ko roray no ˈalomanay, cowato ka sakaˈoripaw. Saˈosien, cecay miheca 80 ˈofad ko kinasoˈotay tamdaw, 2 ehon toloay ko kinasoˈotay. Ka adayayan i, o roma salikaka samanen taˈangayay ko saroero, laˈeto sanay to ˈorip no niyah.

4. Maˈoningay i Fangcalay Cudad o cimacima ko ciharatengay to sakapatayaw hani?

⁴ Maˈoningay i Fangcalay Cudad, o roma madimadiay sikawdan no Kawas pakayni pasangaray demak, cowato ka sakaˈoripaw. Tinakoen, ci Yopu masomaday a somowal: “Awaayto ko sakaˈoripaw ako, maˈosito kako to ˈorip ako.” (Yopu 7:16; 14:13) Ci Yona midemakay to sapatorod no Kawas a demak, kawra mafalicay ko pakayraan hato matoleday cingra, mihaenay ko sowal ni Yona: “[Yihofaaw], nanay patayen kako imatini. Nawhani o nika patay ako ko ngaˈay to nika ˈorip ako.” (Yona 4:3) Pairasolay ci Iliya awaayto ko hatokel no niyah sanay, pasowal to Kawas: “[Yihofaaw], caayto pakahadidi kako, o nika patayto ako ko ngaˈay, nanay alaento kako.” (1 Hongti 19:4) Soˈlin mahaen, misalimlaan ni Yihofa koniya madimadiay sikawdan, mitokel to papadotoc cangra a maˈorip. Cowa ka poˈi cangranan, tano olahan a paˈicel cangra, padama cangranan eca pisakahmaw to ˈorip no niyah, padadotoc madimadi a mihodop Cingranan.

5. O salikaka hano misaaliay to mikitiniay i olah a sapakalalok no mita hani?

⁵ Anini, ˈalomanay salikaka soˈlin awaay ko sakapatayaw a harateng, kawra pakayni sapisaysayaw to masakenaay a saroero, misaaliay to mikitiniay i olah a sapakalalok no tao. O roma tamdaw mihadidiay to sapalak ato salikaf; o roma tamdaw madokaˈay no sanaysanay a sowal no cafay matayal; o roma tamdaw misiˈayaway to saroero no tayal. Cowa ka hatini aca, o pasangaray no paro no lomaˈ mahawpay ko halafinay to pisafelit no cowa pihakelong a raramod, tada marorayayto. Oniya pasangaray ato saroero palotayay to ˈalomanay a Krisciyang. Mihaenay, o cima ko papadama cangranan miliyaw a tanektek hani?

6. Samaanay ci Yihofa a paˈicel to finawlan Ningra?

⁶ Samaanay ci Yihofa paˈicel to finawlan Ningra hani? Mikiˈokay Cingra tatahadaˈoc maolah cangranan. Sanay ko sowal no Kawas to madimadiay a Israil tamdaw: “Tada o kakalimlaan, o kahemekan, o kaolahan Ako kamo . . . Aka ka talaw. Ira Kako a mikapot i tamowanan.” (Isaya 43:4, 5) Haratengen hena, matengil no Israil tamdaw koniya sowal hahakowa ko kahemek hani! Pakasoˈlinay kita, cowa ko pisalimla aca ni Yihofa to mihodopay Cingranan a tamdaw, hanaca maolahay cangranan. * Sowal no Fangcalay Cudad: “Mikapot i tisowanan ko Tapang a Kawas iso, o tadamaanay a ˈicel Ningra ko saka pakalowid iso. Lipahak ko Tapang i tisowanan,” sanay.​—Cifaniya 3:16, 17.

7. Ci Yihofa itini maanan a pakayraan mahecaday to sidaˈitay a wina hani? (Nengnengen ko satapangan coka.)

⁷ Ano samaanayto ko malifaay no finawlan no Kawas a pasangaray, wa padotoc ci  Yihofa a midama ato misayar cangranan. Sanay ko sowal no Kawas: ‘Wa mahecad kamo o ˈengaenga a komaen to hacol, ˈafofoen i falohang a mipohpoh, itini cepiˈ a mikalona. Samanay ko wina a misayar to lomahadayto a wawa, wa mihaen Kako a misayar to finawlan Ako.’ (Isaya 66:12, 13) Tano mitemeray to falocoˈ a pakayraan ko pitadtad no Kawas, tangongolay ko kaciharateng ato kaolah Ningra to madimadiay sikawdan Ningra. Pakasoˈlinen, misalimlaay ci Yihofa kitaanan maemin.​—Yirimiya 31:3.

8, 9. O olah ni Yis samaanay mifiyor kitaanan?

⁸ Iraayho ko cecay lalangian papakasoˈlinen no Krisciyang, tangongolay ko olah ni Yihofa cangranan. Itini Yohani 3:16 sanay ko sowal: “Tada maolah ko Kawas to tamdamdaw. Saka, padeteng sa Cingra a pafeli to dengan a wawa Ningra to sakaecaaw ka tekop no cimacima a pasoˈlinay a mitiˈer i Cingraan. O sakaciˈorip nangra to midaˈocay.” Ano ci Yis tangongolay ko olah kitaanan, makahi a kinafalah to ˈorip no niyah. O hatiniay a olah tada kasapaanto! Sowal no Fangcalay Cudad, “ano o padesto, ano o pisemsemto, awaay ko pakapaliyasay titaanan nanitini tonini a nipatalahkalan no Kawas i tapang ita ci Yis Kristoan a olah Ningra.” (Loma 8:35, 38, 39) O olah ni Yis patanektekay kitaanan.

⁹ Latekay pakayni pasangaray malotayay kita, awaayto ko ˈicel midemak to noˈadingoan. Kawra, maharateng ko olah ni Kristo kitaanan, wa paˈicel kitaanan padadotoc a mihadidi. (ˈOsien ko 2 Korinto 5:14, 15.) O olah ni Yis pafeliay kitaanan to haˈicel a tanektek, soˈlin tahalifa to pades, sapalak anca matoled, macariraw, cowa ko raranikay a misawad.

10, 11. O cima ko mamihinom ato pakalalok to matoleday a salikaka hani? Tadtaden hena.

¹⁰ O roma pakayraan ni Yihofa paˈicel kitaanan, pakaynian i kasakopang a pakalalok kitaanan. Ano tangongolay ko olah ita ci Yihofaan, wa tangongol ko olah to salikaka, misarocod to ˈicel no niyah, padama cangranan i noˈadingoan ato no falocoˈan a patanektek cangranan. (1 Yohani 4:19-21) Pakalalokay ko tarokos ci Pawlo to Krisciyang, sanay ko sowal: “Orasaka, haenento o demak namo anini ko nika sasipaˈicel  namo a masasipadama.” (1 Tisalonika 5:11) Cowa ko malohemay malitengay aca ko mamihinom to tamdaw—o polong a Krisciyang wa ngaˈay mitodong to taˈarawan ni Yihofa aci Yis, padadotoc a mihinom ato pakalalok to salikaka.—ˈOsien ko Loma 15:1, 2.

¹¹ O roma salikaka matoleday ko falocoˈ, misaaliay cangra to piadah no ising ato cemel. (Luka 5:31) O malohemay malitengay ato roma tamdaw mafanaˈay to​—cowa ko ising ko niyah a miadah tono falocoˈan a adada, kawra wa ngaˈay mihadak cangra to sadama, “paˈicelen ko matoleday a tamdaw. Padamaen ko tadancaay a tamdaw. Kao kodaitay ko falocoˈ namo to saki cangraan a maemin.” (1 Tisalonika 5:14) Sasiniˈadaen ita ko matoleday ko falocoˈ a tamdaw, mihadidi cangranan, somowal to misayaray a sowal pakalalok cangranan, mihaenay ko demak iso han? Wa ngaˈayho midemak kiso to maanan a mihinom ato pakalalok to matoleday a tamdaw hani?

12. Tadtaden o cecay fafahiyan salikaka samanay milifok to sadama no kasakopang.

¹² Samaan kita paihkal to olah, pakalalok to matoleday ko falocoˈ a salikaka hani? O cecay Iwropaay fafahiyan salikaka sanay ko sowal: “Latekay, sakinasoˈotaw kako. Kawra, milidongay ko salikaka i kasakopang to ˈorip ako. Tocerid tano olahay pakalalok takowanan, mihinom takowanan. Soˈlin cowa ka hakowa ko mafanaˈay to matoleday kako, kawra polong no kasakopang a salikaka itiniay tatihi ako a midama takowanan. Itini kasakopang, iraay ko cecay mararamoday mahecaday o noˈadingoan a wama wina ako, makahiay cangra misaromiˈad a kalacafay takowanan, midimokos takowanan.” Manaokaniw, cowa ka sahto saan ira ko toki a misadak to sadama, kawra ano soˈliˈlin kita a ciharateng to mapasemsemay no tatiihay a harateng a salikaka, wa taˈangay ko sadama cangranan. *

13. Ano pakalalok kita to tamdaw i, sasinanoten ko maanan hani?

¹³ Misongilaˈ a mitengil. (Yakop 1:19) Patado kita to tao miharateng, misongilaˈ a mitengil o paihkalay to olah. Saka fanaˈaw to matoleday harateng no tao, ngaˈayay damsay ko pilicay. Soˈliˈlin ko waywayan, lopayˈay ko pising, wa ngaˈay mihinom to matoleday a salikaka. Ano pasowal to maharatengay ko matoleday a salikaka i, pairaen ko mihadidiay, hamaan ketonen ko sowal nangra, mihaen matongal ko kafanaˈ ita to harateng nangra. Wa pakasoˈlin ko matoleday salikaka kitaanan, madoloto micada to sapakalalok ita a sowal. Ano mafanaˈ cangra to nai falocoˈay ita a olah, wa milifok to sasayar.

14. Hano caka ngaˈay kita milikaf to matoleday a tamdaw?

¹⁴ Aka milikaf. Ano mafanaˈ cangra to malikafay kita cingranan, wa matolang ko katoled no falocoˈ ningra, ano mihaen i, cato ka ngaˈay padama cangranan. Sowal no Fangcalay Cudad: “Ano caay pinaˈon to sowal i, matiya o mikotangay a midokaˈ to tamdaw, nikawrira, o citanengay a sowal i, matiya o ngaˈayay a sapaiyo a miadah.” (Taneng 12:18) Manaokaniw cowa ko papadeteng kita tano tatiihay sowal a “mikotang to tamdaw”, kawraan ano capisinanot kita midokaˈay ko sowal ita to matoleday a tamdaw. Mihaenay, pahecaden ita ko falocoˈ, misaˈicel a siniˈada to matoleday a tamdaw,  mihaen wa ngaˈay pakalalok a paˈicel cangranan.​—Matay 7:12.

15. O maanan ko saka dademaken ita mihinom to tamdaw hani?

¹⁵ Tano Kimad no Kawas a mihinom to tamdaw. (ˈOsien ko Loma 15:4,5.) Adihayay ko odoˈ i Fangcalay Cudad, ano misamacay kita a mikarkar, wa mahela ko adihayay sapihinom a sowal, samanen oniya cudad mikitiniay i ‘pafeliay to sahinom a Kawas.’ Iraayho ko roma sapicekiw ita to Fangcalay Cudad a lalosidan, tinakoen, Pirorodan to Mitepangan Cudad no Mikecolay ato Pirorodan to Mitepangan Cudad no Misawacayay Tamdaw ni Yihofa. Ano o maananto ko malifaay no salikaka a pasangaray, minanam kita misaka dademak to milingatay a sinael ato lalakaw, wa mafanaˈ to sasamaan mihinom to matoleday a salikaka, padama cangranan miliyaw a tanektek.

16. Ano pakalalok kita to matoleday a tamdaw i, samaanen ko waywayan hani?

¹⁶ Madaˈmaˈ ko waywayan. Ano pakalalok kita to tao i, madaˈmaˈen ko waywayan ngaˈ, paihkalay to cowa pisateked a olah. Ci Yihofa “o karasiniˈadaay a Wama, o halihinomay a Kawas.” Pakayni finawlan Ningra ‘iraay ko siniˈadaay a falocoˈ.’ (ˈOsien ko 2 Korinto 1:3-6; Luka 1:78; Loma 15:13) Patirengay ci Pawlo to ngaˈayay taˈarawan no mita. Sanay ko sowal ningra: “Yo itiraho kami i tamowanan i, samatiyaen niyam o pidipot no ina to wawa ko demak niyam a damsay a midipot tamowanan. Tona maolah kami i tamowanan saka, caay ka deng o ngaˈayay a ratoh no Kawas a cecay ko sapaini niyam i tamowanan. Halo ˈorip han niyam a kinafalah to saki tamowanan saan ko harateng niyam. Nawhani tada maolah kami i tamowanan.” (1 Tisalonika 2:7, 8) Minanam kita ci Yihofaan, madaˈmaˈ to matoleday a tamdaw, mihaen, wa mahapinang nangra to mitengilan ni Yihofa ko satolon nangra.

17. Samaan ko picada ita to matoleday a salikaka hani?

¹⁷ Aka malefot ko saali to salikaka. Pakidem ko saali to salikaka tahira malefotay, cowa ko matatodongay, o sakatoled no niyah konini. Ngaˈayay i, pairaen ko maroyaroyay a pinengneng to salikaka. (Patnakay 7:21, 22) Hanaca, cowa pisaali ci Yihofa to madimadiay sikawdan Ningra tahira i malefotay ko demak. Ano todongen ita ko Kawas, wa makahi a misodod to caka lefot no tao. (Ifiso 4:2, 32) Hamaan tatiihay ko demak iso han ko matoleday a tamdaw, ihkalen a pakahemek ko nano demak nangra. Ano matengil no matoleday salikaka ko nai falocoˈay a pakahemek no mita, wa mapaˈicel cangra, wa pakayni i demak no niyah a lipahak. Hamaan palalinien ita ko matoleday salikaka to roma a salikaka, mihaen wa matongal ko hemek nangra a mihodop to Kawas.​—Kalatiya 6:4.

18. Misamaanay hano tano olah kita a paˈicel to salikaka hani?

¹⁸ Misalimlaay ci Yihofa to madimadiay sikawdan Ningra, ano ci Yis misaodoˈay minengneng kitaanan, mansa makahi pakayni kitaanan kinafalah to ˈorip. (Kalatiya 2:20) Ano tangongolay ko olah ita to salikaka i, wa damsay ko picada cangraanan. Ano sapakahemekaw to falocoˈ nangra i, wa longocen ita ko “sakararihaday ato sakasasipaˈicel to falocoˈ a demak.” (Loma 14:19) Hinatalaay kita to Lakoing, samanen itiya wa awa ko adada, lalood, patay, sapalak, pasangaray no paro no lomaˈ ato romaroma katoledan a demak. Hererek no pikowan ni Yis, wa patatikol to malefot ko tireng. O mitaˈlifay to saikoray a sapalifet a tamdaw, wa malo wawa no Kawas, milifok to ‘ciˈdilay a pasalat no wawa no Kawas’. (Loma 8:21) Nanay padadotoc kita tano olah a paˈicel to salikaka, masasidama, nanay malaˈafang kita tayra i Lakoling!