ANO sakafanaˈaw kiso to toki, anca licayan no widang kiso to hakowaay ko toki nohatini, wa samaan kiso pacaˈof hani? Wa minengnengho to toki iso, ngaˈ mafanaˈ to matatodongay a toki, ngaˈ ngaˈay pacaˈof tora widang. Kawra samaanen iso pasowal hani? Iraay ko pina a pakayraan paihkal to toki. Mafanaˈay kiso han?

Tinakoen, nohatini o harek no kalahokan to 1 toki 30 ehon. Alatek pasowal kiso nohatini o cecay toki ira ko kali tosa. O miso a kitiraan, anca o kananaman iso, o 13 toki 30 ehon nohatini. Oniya sowal mitooray to cecay romiˈad 24 tatokian ko pinengneng. O roma pala a tamdaw, pasowal to mataˈlif ko kali tosa tatokian wa tosato ko toki.

O tamdaw itini lintad no Fangcalay Cudad, samaanay a somowal to toki hani? Cowa ka cecay aca ko pakayraan. Itini Hipray Fangcalay Cudad masowalay ko “papacem,” “tenok no kalahokan,” “kalahokan” ato “dadaya.” (Satapangan 8:11; 19:27; 43:16; Limoˈot 28:29; 1 Hongti 18:26) Nikawrira, latekay misongilaˈay ko tamdaw a mitadtad to toki.

Itini lintad no Fangcalay Cudad, tocerid iraay ko misimaway a tamdaw itini dadaya. Kalitoloan no Israil tamdaw pafafidaˈ ko dadaya a toki. (ˈOlic 119:148) Itini Kakitaan 7:19 somowalay “o tenok no lafii.” Itini romiˈad ni Yis, misaka dademakan no Yutaya tamdaw ko pakayraan no Krisiya ato Loma, kalisepatan pafafidaˈ ko dadaya a toki.

Kinapinaay ko ratoh a cudad milengo to pafafidaˈan a toki. Tinakoen, tiya tomireng ci Yis i fafekang no nanom pasayra i tamina no nisawawaan a romakat i, itiya o “kanikaran” a toki. (Matay 14:25) Itini cecay sapatinako sanay ko sowal ni Yis: “Ano mafanaˈ ko tapang no lomaˈ to nika ano hacowa ko sakaira no mitakaway i, mapalal cingra a misimaw to sakaecaaw ka lipalaw no mitakaway a micomod i lomaˈ ningra.”​—Matay 24:43.

Pasifanaˈ ci Yis to nisawawaan i, masowalay ko sepat liyad no toki: “Orasaka, kapalal kamo, nawhani caay ka fanaˈ kamo to nika ano hakowa a minokay ko tapang no lomaˈ. Ano o dadayato, ano o lafiito, ano o kasekakanto no [kokoˈ], ano o kasadakanto no cidal i, caay ka fanaˈen.” (Marko 13:35) O saka cecay noniya toki, “kerem,” mikitini picereman no cidal misatapang tangsa dadaya 9 ko toki. Saka tosa i “tenok no lafii,” mikitini dadaya 9 ko toki tahira 12 ko toki to lafii. Saka tolo a toki itiniay “kasekakan no kokoˈ” anca “ˈayaw no kanikaran,” mikitini lafii tangasa tolo ko toki no papacem. Tiya kacepetan ni Yis a dadaya, somowalay ko Fangcalay Cudad, masekakay ko kokoˈ, o sakatolo a liyad koni. (Marko 14:72) O saka sepat a toki “papacem,” mikitini tolo ko toki tangasa kasadakan no cidal.

Mihaenay, soˈlin cowato ka hecad ko tamdaw anini to lintaday no Fangcalay Cudad a paihkal to toki, kawraan o pakayraan isalakat ngaˈayay paihkal to romiˈad anca o dadaya.