1. Samaanay masasiolah ko finawlan no Kawas hani?

O NOˈADINGOAN a paro no lomaˈ ko finawlan no Kawas, tano kasasiolah ko kafanaˈan no ˈalomanay. (1 Yohani 4:16, 21) Samaanay cangra masasiolah hani? Alatek, taˈakay ko kinafalah nangra patado to salikaka, kawra, maolahay to salikaka a pakayraan sakakaay i, o tano mimingay a demak, tinakoen o patadoay miharateng a sowal, anca o sidaˈitay a waywayan. Ano tano sidaˈitay, patadoay miharateng a pakayraan micada to tao i, o ‘mitodongay to Kawas’ koni.​—Ifiso 5:1.

2. Samaanay ci Yis mitodong to Wama ningra ciharateng to tao hani?

² Ci Yis mitodongay to Wama ningra, malefotay a patahkal to capeling no Wama. Sowal ni Yis: “Kamo o marorayay ato karetengay ko ˈinorong a tamdamdaw i, katayni i takowanan a maemin ta pahanhanen ako kamo. O damsayay kako. O poeneray ko falocoˈ ako.” (Matay 11:28, 29) Ano mitodong kita ci Yisan “mafanaˈay a miharateng to  pakosiya a tamdaw”, wa pakahemek to kakarayan a Wama, wa mahemekho ko niyah. (ˈOlic 41:1) Nohatini, nengnengen ita to samaan itini i paro no lomaˈ, kasakopang, ato pitosilan a patado miharateng to tao.

3. Samaan patado miharateng ato cipinang ko faˈinay to fafahi hani? (Nengnengen ko satapangan coka.)

³ Itini pipatado miharateng to paro no lomaˈ, o faˈinay wa patireng to taˈarawan. (Ifiso 5:25; 6:4) Tinokoen, palimoˈotan no Fangcalay Cudad ko faˈinay, ‘mafanaˈ to saali’ no fafahi malacafay a maˈorip—‘mafanaˈ to saali’ ngaˈayay hongyaken to patadoay miharateng ato cipinangay, o cipinangay ato patadoay miharateng, o malalitingay. (1 Pitiro 3:7) Mafanaˈay ko faˈinay to o cafay ningra ko fafahi, soˈlin adihayay ko kasasiroma, kawra caay pakarini cowa ka saan. (Satapangan 2:18) Mihaenay, wa miharateng ko faˈinay to nafalocoˈan no fafahi, mikangodo cingranan, hato kalimlaan cingra saan ko piharateng. O cecay Kanataay a fafahiyan, sanay ko sowal: “Cowa pisakahmaw ko faˈinay ako minengneng takowanan, cowa ka pasowal takowanan, ‘Hano mahaen ko harateng iso?’ Makahiay cingra mitengil to sowal ako. Hanaca ano sasalofen ko harateng ako, sidaˈitay cingra a padama takowanan.”

4. Ano kalacafay to roma fafahiyan ko faˈinay i, samaan ko demak ngaˈ miharatengay to nafalocoˈan no fafahi hani?

⁴ O patadoay to fafahi miharateng a faˈinay, ano kalacafay to roma fafahiyan i, wa miharateng to nafalocoˈan no fafahi. Cowa ko mamikalona to roma fafahiyan, cowa ko aira ko makalimay a harateng. (Yopu 31:1) O mahecaday a safalod ngaˈayay saka dademaken i soci ato sapicawmaˈ a wangcan. Oha mamadimadi ko faˈinay i kihcod a demakan to fafahi, mihaen ko demak ningra, cowa ko kaolah aca to fafahi, pakayniay kaolah to Kawas, hanaca ˈinteh to kaˈintehan no Kawas a demak.​—ˈOsien ko ˈOlic 19:14; 97:10.

5. Samaan ko fafahi patado a miharateng to faˈinay hani?

⁵ Kalafongohen no faˈinay ci Yis Kristo, mitodong to taˈarawan ni Yis, wa madoloto a mikangodo ko fafahi to faˈinay. (Ifiso 5:22-25, 33) Mikangodo ko fafahi to faˈinay wa patado cingranan a miharateng, mangalef ano ˈifowa ko faˈinay to tayal no likakawa no Kawas, anca pakayni pasangaray demak a calemcem i, wa sidaˈit ko fafahi a micada cingranan. O cecay itiniay i Ikok a faˈinayan, sanay ko sowal: “Latekay, mahapinang no fafahi caka hecad ko demak ako tocerid, mafanaˈayto iraay ko cariraw ako. Misaka dademakay cingra to safalod i Taneng 20:5, mitala to matatodongay a toki ‘pakapipatalahkal to harateng’ no mako, kawrira cowa koyaan hahimeden a demak.”

6. Samaan kita a padama to wawa minanam patado a miharateng to tao? Wa ira ko maanan a haepoc no wawa hani?

⁶ Makakangodo ko wama wina, sidaˈit a macacada, ngaˈay patireng to taˈarawan no wawa. O roma, papasifanaˈ cangra to wawa, samaan patado to tao a miharateng. Tinakoen, ngaˈayay rikecen no wama wina ko wawa, aka misacikacikay i kasaˈopoan. Ano ˈorongen no wama wina ko wawa mirienang to cawmaˈ i, ngaˈayay fanaˈen ko wawa mipacaˈi to matoˈasay tamdaw, salakaten cangra a miala to kakaenen. O cecacecay tamdaw i kasakopang wa ngaˈay padama to wama wina. Ano midemakay ko wawa to ngaˈayay a demak, patado mifohat to fawahan, pakahemeken cangra. Mihaen to demak wa ira ko ngaˈayay pifiyor cangranan, wa matanam nangra, “Ikaka no nika lemed no milayapay ko nika lemed no mipafeliay.”​—Dmak 20:35.

7. Samaanan ni Yis tano ciharateng to tao a pakayraan, micada to madoˈengay a tamdaw hani? O manan ko mananamay ita hani?

⁷ Kinacecayay, ci Yis itini Tikapolis i, iraay ko miˈorongay to madoˈengay a tamdaw miˈaraw  cingranan. (Marko 7:31-35) Cowa ka i ˈaˈayaw no ˈalomanay tamdaw a miadah toniya tamdaw, paliyasan cingra a miadah. Mahapinangay ni Yis koniya masamoˈay faˈinayan marawraway ilalomaˈ no ˈalomanay, hato misatekeday a miadah cingranan. Mikitini mananamay ita ko maanan hani? Soˈlin awaay ko pakayraan ita tano kafahkaˈan a miadah to tamdaw, kawra wa ngaˈay misinanot to saali no salikaka, miharateng to nafalocoˈan nangra. Sowal no tarokos ci Pawlo: “O nika sasipaˈicel ita ko ngaˈay to sakasasiolah ato sakangaˈayaw no demak ita.” (Hipray 10:24) Mafanaˈay ci Yis to harateng noniya madoˈengay, patado a miharateng cingranan. Tada o fangcalay a taˈarawan no mita ci Yis!

8, 9. Samaanen ita patado ciharateng ko matoˈasay ato malonayay a tamdaw hani? Tinakoen hena.

⁸ Patado a miharateng to matoˈasay ato malonayay ko tireng a salikaka. O kasakopang no Krisciyang cowa ko tano kalikiay ko demak ko kafanaˈan no tamdaw, ao ciolahay a falocoˈ. (Yohani 13:34, 35) Samanen iraay ko olah ita, masa makahi misaˈicel a padama to matoˈasay ato masamoˈay ko tireng a tamdaw, mirienang to saˈopo ato mitosil, soˈlin caka hakowa ko mademakay nangra, wa kamayan kita padama cangranan. (Matay 13:23) Ci Mayke cowa ka ngaˈay romakat, maroˈay i cikalilengay a kamaroˈan no masamoˈay, mikoˈiday cingra to padama no paro no lomaˈ ato kasakapot no mitosilay a salikaka, sanay ko sowal ningra: “Ira ko sadama nangra, ngaˈ ngaˈay kako mirienang to saˈopo ato mararid a mitosil. Mikiriwiˈay maolah kako to kaˈalomanay a pisawacay.”

⁹ Itini paro no lomaˈ no Pitil, iraay ko matoˈasay ato malonayay ko tireng a salikaka. O kantok no Pitil ciolahay ko falocoˈ, patado miharateng toni madimadiay sikawdan, milimasmasay cangranan tano tikami ato patingwa a misawacay. Ci Pier, 86 ko mihecaan, patikamiay cingra to itiniay maraayay kilac a tamdaw, sanay ko sowal ningra: “Mahemekay kami ira ko toki patikami mitosil to tamdaw.” Ci Nansi maedeng 90 ko mihecaan, sanay ko sowal ningra: “Tano tikami misawacay cowa ko piparo aca to tikami i foto, o mitosilay a demak konini, hanaca misaaliay ko tamdaw to soˈlinay kimad!” Ci Asayer itiniay 1921 miheca hofocen, sanay ko sowal: “Marariday adada ko tireng ako, latekay caay kangaˈay micaˈedong to rikoˈ.” Soˈlin mahaen, maolahay ci Asayer tano tingwa a misawacay, iraay ko ngaˈayay a milisoˈan. 85 ko mihecaan ci Papala sanay: “Cowa ka ngaˈay ko tireng ako, pasangaray masadak a mitosil, kawra ngaˈayay kako tano tingwa a misawacay masasowal to tamdaw. Yihofaaw, koˈidayto Kiso!” Itini lalomaˈ no cecay miheca, oniya sano odoˈay a matoˈasay, 1,228 ko toki a mitosil, 6,265 ko mitilidan a tikami, mataˈlifay ko 2,000 a patingwaan, mapalilamay ko 6,315 a mitepangan cudad! O mihadakan nangra a ˈicel maedeng mapakahemekay ci Yihofa!​—Taneng 27:11.

10. Samaan kita midemak ngaˈ, wa milifok to haepoc ko salikaka mikitini i saˈopo hani?

¹⁰ Ano masaˈopo patado to tao miharateng. Tokel ita ngaˈay ko salikaka mikitini saˈopo milifok to haepoc, wa misamaan ko hademak no mita hani? O cecay pakayraan patado cangranan miharateng. Tinakoen, wa ngaˈay kita kahnay tahira kasaˈopoan, mihaen cato ka maosoy a mikalisanga to tao. Manaokaniw, latekay fahal sanay mifekad ko demak hato maosoyay kita. Kawra ano mararid a maosoy kita, sasongilaˈen a miharateng to sasamaan a mifiyor to salikaka. Haratengen, o mitahidangay kitaanan mirienang to saˈopo i, ci Yihofa ato wawa Ningra. (Matay 18:20) Matoor ita ko toki mirienang, o paihkalay to mikangodoay Cangranan!

11. Iraay ko kamok i kasaˈopoan a salikaka, hano saka dademaken ko safalod no 1 Korinto 14:40 hani?

¹¹ Ano patado kita to salikaka miharateng, wa mitengil to limoˈot no Fangcalay Cudad: “Kao masinanotay ko demak namo a maemin.” (1 Korinto 14:40) O iraay ko kamo i kasaˈopoan a salikaka,  wa mitoor toniya limoˈot a midemak, i misaˈosian a toki milaheci to kamok. Mihaen ko demak ningra, o patadoay miharateng to mamidotoc mikimad a salikaka, patadoayho to salikaka i kasakopang a miharateng, samanen o roma tamdaw adihayay ko mapalakay toki ngaˈ tahalomaˈay, o roma tamdaw wa mikalic to faso, o roma tamdaw iraay ko cowa pihakelong a raramod.

12. O malalokay dademak a malohemay malitengay, hano tada kakiriwiˈen ita a mikangodo hani? (Nengnengen ko sapatongal lalakaw, “ Kangodoen ko Mikeriday a Faˈinayan Salikaka.”)

¹² O malohemay malitengay malalokay dademak i kasakopang, itini mitosilay a demak fanekfekay mikerid i mitosilay a demak, tada kakiriwiˈen a mikangodo. (ˈOsien ko 1 Tisalonika 5:12, 13.) Miakoˈiday kita to nano demak no malohemay malitengay kitaanan. Mihaenay, makahi kita a malacafay cangranan, midama cangranan. Samanen, o marariday cangra a miharateng to sakangaˈay no ˈorip namo. Nawhani o papatikol to kiyam i Kawas.​—Hipray 13:7, 17.

13. Pakayni picada ni Yis to tao a pakayraan, mananamay ita ko maanan hani?

¹³ Paliˈayaway pasowal ci Isaya to pakayniay demak ni Yis, sanay ko sowal ningra: ‘O mapaekelay a ˈaredo, caka piteken ningra, o mamalanto a keliw, caka padengen ningra.’ (Isaya 42:3) Ciolahay to tao ci Yis, mansa siniˈadaay to tamdaw. Itiyaay a tamdaw matiya ‘o mapaekelay a ˈaredo’ anca ‘mamalanto a keliw’, mafanaˈay ci Yis to harateng nangra. Mihaenay, patadoay ci Yis ciharateng to tao, siniˈadaay, mihadidiay cingra, ano o wawato maolahay i tatihi ningra. (Marko 10:14) Soˈlin, caka haen kita ci Yisan mahapinang ko demak a pasifanaˈ to tamdaw, kawra  ngaˈayho kita patado miharateng to mitosilan i kilac a tamdaw, tinakoen, tano samaanay a pakayraan pasowal cangranan, ihacowa a toki milisoˈ cangranan, anca hakowa ko toki a materek hokira.

14. Hano sinanoten ita ko pakayraan no niyah a masasowal to tamdaw?

¹⁴ Wa tano masamanay pakayraan ko kasasowal ita to tamdaw? Anini, mapaekelay no misasingdiay ko ˈalomanay tamdaw, hanaca masamsamay no mirikecay ato ˈaˈideman no kalodoyongan, marawraw cangra a matiya o malafelay. (Matay 9:36) Telocto maketer cangra toni hekal, matoleday ko falocoˈ. Mihaenay, o lalakaw no sowal ato ngiha sidaˈit a patado miharateng masaka limlaan! Masolot no lihaf ita ko ˈalomanay tamdaw, cowa ko kafanaˈ aca ita misaka dademak to Fangcalay Cudad, pakayniayho pipatado ita miharateng, soˈliˈlin a ciharateng cangranan.

15. Samaanay a pakayraan ngaˈay kita patado miharateng to mitosilan hani?

¹⁵ Wa ngaˈay kita itini adihayay pakayraan patado to mitosilan a miharateng, o cecay i sinanoten to sasamaan milicay to salicay. Ano mihadak kita to salicay i, sidaˈiten ato mikangodo ko waywayan. Sowal no cecay misakafahay, ˈalomanay tamdaw i kilac ningra masimeday, kalingodoay, mansa cowa pilicay to kangodoan a salicay cingra, mahawpay ko awaay ko pakayraan pacaˈof anca mamararaw ko caˈof a salicay. Tinakoen, cowa pilicay cingra, “Mafanaˈay kiso to ngangan no Kawas han?” “Mafanaˈay kiso to o maanan ko Hongti Kitakit han?” Tocerid mihaenay ko sowal ningra: “Mikitini Fangcalay Cudad mananamay ako iraay ko ngangan no Kawas, wa ngaˈay paˈarawen ako kiso to ngangan Ningra han?” Manaokaniw, cowa ka lecalecad ko serangawan no kilac, mihaenay ano mitosil cowa ka lecalecad ko hasowal. Kawra ano samaanto, oha papatado kita a miharateng ato mikangodo to tamdaw, mahawpay ko kacipinang to mitosilan i kilac a tamdaw.

16, 17. Samaan kita i tosa pakayraan patado a miharateng to pitosilan a tamdaw, (1) wa hacowa a toki milisoˈ to tamdaw? (2) hahakowa ko halafin ngaˈ ngaˈay?

¹⁶ Wa hacowa a toki milisoˈ kita to tamdaw hani? Ano pakalomalomaˈ kita a mitosil i, cowa pilongoc ko cilomaˈay to mamilisoˈ kita, mihaenay wa misinanot kita hahacowa a toki milisoˈ, o matatodongay. (Matay 7:12) Ngaˈayay haratengen ita, o i kilacay a tamdaw mananamay maosoy a lomowad to pahahanan romiˈad hokira. Ano hatiraay i, wa ngaˈay salakat i lalan misawacay, kaˈalomanay misawacay anca milisoˈ to lomowadayto a tamdaw.

¹⁷ Ano milisoˈ hahakowa ko halafin? ˈIfowaay ko ˈalomanay tamdaw, mihaenay wa kantangen ita ko pilisoˈ cangranan, mangalef sakina cecay a milisoˈ, hamaan sahalafin saan. O kantangay a masasowal ikakaay ko kangaˈay to halafinay. (1 Korinto 9:20-23) Mahapinang no i kilacay tamdaw to miharatengay kita to pakayraan nangra, wa makahi a masasowal kitaanan. Mihaenay, ano mitosil paihkal to ngaˈayay capeling no Krisciyang tada masakalimlaan. Mihaen ko demak ita, “O kapot no Kawas kita a matayal,” saka dademaken no Kawas a padama to tamdaw minanam to soˈlinay kimad.​—1 Korinto 3:6, 7, 9.

18. Ano patado a miharateng to tamdaw kita, wa micada to masamaanay a sapalemed hani?

¹⁸ Wa misaˈicel kita patado miharateng i lomaˈ, kasakopang ato mitosilan a tamdaw. Mihaen ko demak ita, wa milifok to adihayay sapalemed anini ato no ikoran, mahecad o sowal i ˈOlic 41:1, 2: “O mafanaˈay a miharateng to pakosiya a tamdaw i, tada o malemeday. Ano mapades ko matiniay a tamdaw i, dipoten [ni Yihofa] cangra. . . . palemeden Ningra cangra tonini a sera.”