1-2. (1) Hano o ngaˈayay lihaf ko Armakiton hani? (2) Oniya lalakaw wa milengo to maanan a salicay?

HARATENG no ˈalomanay, o “Armakiton” milingatay to lalood ato pades no hekal sanay, tahatengilay kiso to hatiniay a sowal han? Soˈlinay i, o ngaˈayay a lihaf ko Armakiton sanay ko Fangcalay Cudad! (Paˈarawan 1:3) O Armakiton cowa ko papalaˈafo to tamdaw, oha sakalidong no mita!

² Sowal no Fangcalay Cudad, o mamitolas to pikowan no kalo a kitakit ko Armakiton, palaˈafo to mariˈangay tamdaw, milidong to moecelay tamdaw, cato ko mapalak ko cikiw. (Paˈarawan 11:18) Wa milengo kita to sepat a salicay: O maanan ko Armakiton hani? ˈAyaw no Armakiton wa mifekad ko maanan a demak hani? Sasamaan kita ngaˈ milakowit to Armakiton? Ano mangataayto ko Armakiton, sasamaan kita ngaˈ tahatolas a madimadi hani?

3. (1) O Armakiton o maanan ko tatodong hani? (2) Mikitini Paˈarawan 16:14,16, o “Armakiton” hano cowa ko soˈlinay a pala hani?

³ ˈOsien ko Paˈarawan 16:14, 16. O Armakiton kinacecayay masadak i Fangcalay Cudad, o Hipray a sowal koni, tatodong i ‘Mikito Lotok.’ (Paˈarawan 16:16) Kawra o Armakiton cowa ko soˈlinay a pala. O “Armakiton” hananay, o masaˈopoay ko ‘kalo a hongti’ mitowakang ci Yihofaan a pakayraan ko mitoroˈan. (Paˈarawan 16:14) Kawra itini toniya lalakaw, mitoroˈayho to ikor no masaˈopo ko kalo a hongti mamifekad a lalood ko  “Armakiton”. Hano mafanaˈ kita to, cowa ko soˈlinay a pala ko “Aramakiton” hani? Saka 1, toniya hekal awaay ko Mikito hananay a lotok. Saka 2, nolitengan a Israil a niyaroˈ iraay ko Mikito, kawra cowa ko papakapalo to polong a hongti no hekal ato sofitay ato sapilood a lalosidan nangra. (Yosuwa 17:11) Saka 3, o lalengoen no dotoc lalakaw a ‘kalo a hongti’ miˈodis to finawlan no Kawas i, wa mifekad ko Armakiton, itiya o finawlan no Kawas mamaliwasak i cowacowa a pala.

4. Hano palalitingen ni Yihofa ko “Armakiton” to kalalood Ningra to mikowanay no hekal hani?

⁴ Hano palalitingen ni Yihofa ko “Armakiton” to kalalood Ningra to mikowanay no hekal hani? O Mikito ato fideloan no Yicriil na mifekaday ko adihayay lalood, na milidongay ci Yihofa to finawlan Ningra itiya. Tinakoen, itini ‘lawac no ˈalo no Mikito,’ padamaan ni Yihofa ko kakitaan ci Parak milowid to sofitay ni Sisira. Ikor, ci Parak ato fafahiyan pairasolay ci Tipora romadiway to pakalowiday a radiw miakoˈ id to Kawas, sanay koniya radiw: “Nanikakarayan ko fuˈifuˈis a milood ci Sisiraan. Kericen no Kison a ˈalo ca Sisira.”—Kakitaan 5:19-21.

5. O Armakiton ato lalood no kakitaan ci Parak o maanan ko kasiromaan hani?

⁵ Saikor radiw ni Parak aci Tipora sanay: ‘Yihofaaw, nanay malaˈafo ko ˈada Iso, nanay malecad o cidal macakat ko maolahay Tisowanan a tamdaw, taˈanagay ko ˈicel.’ (Kakitaan 5:31) Itini Armakiton, wa palaˈafoen no Kawas ko ˈada, mamalidong ko maolahay to Kawas a tamdaw. Kawra o Armakiton cowa kalecad to lalood no kakitaan ci Parak, o finawlan no Kawas cowa ko mamirienang ato mitatoy to sapilood a lalosidan. Tano rihaday a falocoˈ a mitadiˈec to Kawas wa malidong cangra.—Isaya 30:15; Paˈarawan 19:11-15.

6. Itini Armakiton, tano maanan a pakayraan ko sapalaˈafo ni Yihofa to ˈada hani?

⁶ Itini Armakiton, tano maanan a pakayraan ko sapalaˈafo no Kawas to ˈada hani? Adihayay pakayraan alatek. Tano ˈatoray, masaˈikayay soeda anca fitiliˈ a milood ko ˈada. (Yopu 38:22, 23; Icikil 38:19-22) Ngaˈayay mapapataypatay ko ˈada. (2 Rayray 20:17, 22, 23) Ngaˈay miocor to coyoh palaˈafo to ˈada. (Isaya 37:36) Ano samaanto ko pakayraan ni Yihofa, oha papakalowid, misongilaˈ palaˈafo to misafelitay Cingranan a tamdaw, milidong to moecelay a tamdaw.—Taneng 3:25, 26.

7-8. (1) Mikitini i 1 Tisalonika 5:1-6, o ˈaˈideman no kitakit wa milasil to maanan? (2) Oniya salasil hano o palafoay a mangah hani?

⁷ ‘Milasil ko hekal tamdaw ‘dipayalayto,’ dotoc wa irato ko ‘romiˈad ni Yihofa.’ (ˈOsien ko 1 Tisalonika 5:1-6.) Masowalay i 1 Tisalonika 5:2 a ‘romiˈad ni Yihofa’ o ‘taˈangayay padiing’ ko mitoroˈan. (Paˈarawan 7:14) Samaan a mafanaˈ kita to hahacowa misatapang ko taˈangayay padiing hani? Sowal no Fangcalay Cudad, wa ira ko mikiriwiˈay a salasil, mahapinang ita to mamifekadto ko taˈangayay padiing.

⁸ Oniya ‘dipayalayto’ a salasil, hano mihaen ko ˈaˈideman a milasil hani? Awaay ko pinang. O ˈaˈideman no pihakelongan wa pahecad a milasil hokira? Mahaen alatek. Oniya salasil mikitiniay i mangah no tatiihay coyoh. O palafoay a mangah koni, o makaniway a rihaday konini, soˈlinay i, mangtaayto ko taˈangayay a padiing. ‘Fahal sanay a laˈafo, wa mifekad i tireng nangra, malecad o mamahofoc a fafahiyan.’ Wa samaan ko sikawdan ni Yihofa itiya hani? Soˈlin fahal saan mifekad ko taˈangayay padiiing, kawra maharekayto cangra a misaday.

9. Wa kinacecay ci Yihofa a palaˈafo to polong a hekal ni Satan han? Tadtaden.

 ⁹ Ci Yihofa cowa ko mamahaen to lintad ni Nowa, palaˈafo toniya hekal. Oniya sakalaˈafo tosaay ko malingato. Salakat, o taˈangayay papilon ko papalaˈafoen no Kawas, o polong a mararaway pihakelongan. Dotoc, wa itini Armakiton palaˈafo ko Kawas toniya hekal ni Satan, mahawpay ko mikowanay, sofitay ato misasingdiay a likakawa. Ihkalen ita milengo koniya tosa a lingato.

10. Pakayni Paˈarawan 17:1, 6 ato 18:24, hano palaˈafoen ni Yihofa ko Taˈangayay Papilon hani?

¹⁰ Wa sayfangen no Kawas ko “tasalamaan a fafahiyan.” (ˈOsien ko Paˈarawan 17:1, 6; 18:24.) Taˈangayay Papilon pakidemay ko pipalak to ngangan no Kawas. Samanen pakayni i Kawas miolatay to tamdaw ko mararaway a pihakelongan, micapidayho to mikowanay, malecad o tasalamaan a fafahiyan. Miroeroay to mihakelongay tamdaw, milipalaw to payci, mipatayay to adihayay sikawdan no Kawas cikiyamay to ˈirang. (Paˈarawan 19:2) Samanen ni Yihofa palaˈafo ko Taˈangayay Papilon hani?

11. (1) O “kahngangay a ˈaˈadopen” mitaypiyaway to maanan hani? (2) Samanan ni Yihofa misakadademak ko “kahngangay a ˈaˈadopen” palaˈafo to “tasalamaan a fafahiyan.” Hani?

¹¹ Sakadademaken ni Yihofa ko “moetep ko pohong” no “kahngangay a ˈaˈadopen” a palaˈafo to “tasalamaan a fafahiyan.” “Kahngangay a ˈaˈadopen” mitaypiyaway to makomoday kitakit, “moetep ko pohong” mitaypiyaway to midamaay to makomoday kitakit a mikowanay. Malaod ko misaˈosian a toki, oniya mikowanay mamiˈodis to “tasalamaan a fafahiyan”, ‘milonic cingranan, miwacay cingranan,’ wa miˈafas to hafay no pihakelongan ato mitihedak to malafoay a demak nangra. (Paˈarawan 17:3, 16) Wa kaliki mifekad koniya laˈafo, malecad to “cecay a romiˈad,” tataˈangay ko kacekid no midamaay to mararaway pihakelongan a tamdaw, samanen malikoay ko “tasalamaan a fafahiyan” sanay: “O malahongtiay a fafahiyan kako. Caay ko maponengay a fafahiyan  kako. Saka, caay ko mamararom kako.”—Paˈarawan 18:7, 8.

12. Cowa ko mamihayi ci Yihofa to mikowanay midemak to maanan hani? Misamaanay?

¹² Kawra, cowa ko mamihayi ko Kawas to mikowanay palaˈafo to finawlan Ningra. Samanen i nganganay ni Yihofa cangra, mitooray to limoˈot no Kawas mikitini Taˈangayay Papilon a masadak, misaˈicelay a padama to tao miliyas to mararaway pihakelongan. (Dmak 15:16, 17; Paˈarawan 18:4) Soˈlin, o sikawdan ni Yihofa cowa ko mamalacafay to mararaway pihakelongan a malaˈafo, kawra o mamidotoc mifekad a demak wa palifet to pakasoˈlinay falocoˈ nangra.

13. (1) O ‘Kok’ mitaypiyaway to manan? (2) Pakayni Icikil 38:2, 8, 9, o maanan a pakayraan mikayatay to pifekad no Armakiton hani?

¹³ Mifekad to saˈodis ko Kok. (ˈOsien ko Icikil 38:2, 8, 9) Ikor no mapalaˈafo ko mararaway pihakelongan, cecayayto ko matatodongay a pihakelongan a materek. O finawlan no Kawas malecaday o materekay a taˈangayay kilang i ikor no taˈangayay faliyos a mahapinang no tamdaw. Maedeng o mamangoraw ci Satan, oha mamilasil cira, tano ‘cikaditay a lihaf^’ no tatiihay coyoh misaˈopo to makomoday kitakit a miˈodis to sikawdan ni Yihofa. (Paˈarawan 16:13, 14) O makomoday a kitakit oya ‘Makok a kok,’ Ano miˈodis ko mikowanay to finawlan no Kawas i, wa mifekadto ko Armakiton.—Paˈarawan 16:16.

14. O Kok salikor cacipinang to maanan?

¹⁴ O mitadiˈecan ni Kok, o ‘ˈicel no tamdaw,’ o ˈicel no sofitay, kawra ci Yihofa ko mitadiˈecan no mita. (2 Rayray 32:8) Pinengneng no mikowanay, mafolaay ko harateng ita, samanen taˈangayay ko ˈicel no Taˈangayay Papilon, kawra o kawakawas nira cowa pakaconged to saˈodis no “ˈaˈadopen” ato “moetep ko pohong!” (Paˈarawan 17:16) Harateng no Kok wa madolo a palaˈafo to finawlan ni Yihofa sanay, hato mifekaday to saˈodis, malecad o “toˈem mitahpo to sra.” (Icikil 38:16) Kawra malecad o malifetay ni  Falaw i hangangay riyar, miˈodis ci Kok to finawlan no Kawas cowa ko sakangaˈay nira, hanaca salikor cacipinang cira to ci Yihofa ko misiˈayawan noniyah.—Kasadakan 14:1-4; Icikil 38:3, 4, 18, 21-23.

15. Sasamaan ci Yis pakalowid to ˈada hani?

¹⁵ Ci Yis ato kakarayan a sofitay, wa midipot to finawlan no Kawas, palaˈafo to kalo a kitakit. (Paˈarawan 19:11, 14, 15) Miowingay ci Satan to kalo kitakit a miˈodis to finawlan no Kawas, mikidatay to Armakiton, wa samaan ko teloc nira hani? Wa fahekolen ni Yis ci Satan ato tatiihay coyoh i awaay ko tolas a ofang, mipalit cangranan to 1,000 miheca.—Paˈarawan 20:1-3.

16. (1) Ano ‘mafanaˈ to Kawas’ kita wa samaan ko hademak? (2) O mafanaˈay ci Yihofaan a tamdaw hano cowa ko mamatalaw i Armakiton?

¹⁶ Ano halafinay anca kamotoˈay ko toki ita malo Krisciyang, o papaihekal ko niyah to ‘mafanaˈay to Kawas,’ hanaca ‘midofdofay to ngaˈayay lihaf no tatapangan ci Yis,’ mihaen ngaˈ milakowit to Armakiton. (2 Tisalonika 1:7-9) ‘Mafanaˈ to Kawas’ tatodong i mafanaˈ to palinian no Kawas, cipinang to maanan ko kaolahan, ˈintehay to maanan. Ano ‘mafanaˈ to Kawas’ kita wa maolah Cingranan, midofdof Cingranan, misacecay to falocoˈ a midoko Cingranan. (1 Yohani 2:3-5; 5:3) Mihaen, o mamalo kafanaˈan no Kawas a tamdaw kita, milifok to pihayda Ningra, mamadipot no Kawas i Armakiton.—1 Korinto 8:3.

17. Midofdof to ngaˈayay lihaf no Tatapangan ci Yis misaaliay kitaanan misamaan ko hademak hani?

¹⁷ ‘Ngaˈayay lihaf no Tatapangan ci Yis’ mahawpay ko kihecod a sapasifanaˈ ni Yis a Kimad. Midofdof kita toniya ngaˈayay lihaf, wa misaˈicel a misaka dademak i kaˈorip to sapasifanaˈ ni Yis, isalakat a micangacang to Hongti Kitakit, mitoor to palinian no Kawas a maˈorip, milasil to Hongti Kitakit no Kawas. (Matay 6:33; 24:14) Roma i, aretengay ko ˈinorong no salikaka ni Kristo, midofdof kita to ngaˈayay lihaf, mamisaˈicel a midama cangranan.—Matay 25:31-40.

18. O salikaka ni Kristo wa samaan padiˈo to midamaay cangranan a salikaka?

 ¹⁸ Cato ka halafin wa milifok to sapadiˈo no salikaka ni Kristo ko ‘Roma lopayˈay siri.’ (Yohani 10:16) Wa samaan koniya demak mifekad hani? ˈAyaw no mifekad ko Armakiton, itiniayho i fafekang no sera a ‘mimingay ˈopo a siri’ wa patikolen maˈorip cangra tayra kakarayan malo cowa ko mamapatay a ˈadingo a tireng, itiya 144,000 a wawa no Kawas wa mikapot to kakarayan sofitay, palaˈafo to Kok, midipot to ‘taˈangayay ˈopo a tamdaw.’ (Paˈarawan 2:26, 27; 7:9, 10) ‘Taˈangayay ˈopo a tamdaw’ ngaˈay midama to itiniayho i fafekang no sera a salikaka ni Kristo, tada kalikoanto!

19-20. Ano misiˈayaw to sapalifet, samaan ko hademak ita ngaˈ tahatolas a madimadi?

¹⁹ Pasangaray siˈayawen ko salikolay a romiˈad, misiˈayaway to masakenaay a sapalifet ko sikawdan ni Yihofa. Kamayan kita mitafo to lipahakay, fanekfek a midoko to Kawas. (Yakop 1:2-4) Micerid mikitini falocoˈ a mitolon to Kawas o kalimlaan. (Luka 21:36) Micerid micekiw ato midotim to lalakaw no Fangcalay Cudad, mahawpay ko mamalaˈosi a sapairasol. (ˈOlic 77:12) Wa misarocodho kita mirienang to mitosilay demak, mihaen o tatanektek ko pakasoˈlinay falocoˈ, ira ko tokel a misiˈayaw to noikoran!

²⁰ Haratengen hena, malaˈafoayto ko mararaway pihakelongan, mahererekayto ko Armakiton, wa hakowa ko kahemek iso! Kalimlaan i, itini faelohay hekal wa mikangodo maemin ko tamdaw to fangcalay ngangan ni Yihofa ato sapikowan a fadangalan Ningra, maˈaraw iso konini maedeng o lalipahak ko falocoˈ! (Icikil 38:23) Pakayni kafanaˈ to Kawas, midofdofay ci Yisan ato tahatolasay miemem a tamdaw, o Armakiton tada o ngaˈayay a lihaf!—Matay 24:13.