CACEKIWEN LALAKAW 38
Ka Tayni Takowanan, Wa Sayaren Ako Kamo
‘Kamo o marorayay ato karetengay ko ˈinorong a tamdamdaw i, ka tayni i takowanan wa sayaren ako kamo.’—MATAY 11:28.
RADIW 84 Makalim Kako
KALIMLAAN NO LALAKAW *
1. Pakayni Matay 11:28-30, o manan ko misadakan ni Yis a sakiˈok hani?
MITENGIL ko ˈalomanay to sapasifanaˈ ni Yis i, pafelian ni Yis cangra to kalimlaan a sakiˈok, sanay: ‘Ka tayni takowanan, wa sayaren ako kamo.’ (ˈOsien ko Matay 11:28-30.) Oniya sakiˈok cowa ko makaniway, nengnengen ita samanay cingra padama to cecay adadaay a fafahiyan.
2. Samaanay ci Yis padama to adadaay a fafahiyan hani?
2 Tada misaaliay koniya fafahiyan to sapadama, 12 miheca ko halafin, adihayay ko miˈarawan ningra a ising, makalimay sakaadahaw no adada no niyah, kawra awaay ko kangaˈayan. Pakayni Rikec ni Mosi, o cikaditay cingra. (Lifi 15:25) Ikor, matengilay ningra ngaˈayay ci Yis miadah to adadaay a tamdaw, orato mikilimay ci Yisan, o pikama aca ningra to lawac no rikoˈ ni Yis, tangsolay maadah. Cowa ko adada aca ningra ko miadahan ni Yis, miadahayho to madokaˈay a falocoˈ ningra, matanamay ningra ko olah ato pikangodo ni Yis. Tinakoen, pasowal ci Yis Cingranan i, madaˈmaˈay a mikangodo. Pangangan cingranan to ‘fafahiyan wawa,’ maedeng masayaray a mapakalalaok cingra.—Luka 8:43-48.
3. Oniya lalakaw wa pacaˈof to maanan salicay hani?
3 Sasinanoten i, mihadakay to ˈicel koniya fafahiyan tayra ci Yisan. Anini, Wa malecad kita cingranan talaˈayaw ko demak. Soˈlin cowato pidemak ci Yis to kafahkaan a miadah to tamdaw, kawra sanay cingra mikiˈok: ‘Ka tayni takowanan, wa sayaren ako kamo.’ Oniya lalakaw wa pacaˈof to lima salicay: Wa samaan kita tayra ci Yisan hani? Mitamorong to taloˈodan ni Yis o maanan ko tatodong hani? Wa ngaˈay kita mikitini ci Yisan minanam to maanan hani? O sapafeli ni Yis kitaanan a demak hano mamisayar kitaanan? Samaan ko demak ita ngaˈay a padadotoc i laeno no taloˈodan ni Yis a milifok to sasayar?
KA TAYNI TAKOWANAN
4-5. Samaan ko hademak ita ngaˈay tayra ci Yisan hani?
4 O cecay pakayraan ita tayra ci Yisan i, misaˈicel a cipinang to sasowalen ato waywayan ningra. (Luka 1:1-4) Dengan o niyah ko mamicekiw to Fangcalay Cudud. O roma pakayraan i, micada to inoˈ malo Krisciyang.
5 Iraayho ko roma pakayraan, ano misaali kita to sapadama i, kilimen ko sadama no malohemay malitengay no kasakopang. Misaka dademakan ni Yis ko ‘malo sidaˈitay’ a tamdaw midimokos to lopayˈay a siri ningra. (Ifiso 4:7, 8, 11; Yohani 21:16; 1 Pitiro 5:1-3) Oha tatalaˈayaw kita mikilim to sapadama, cowa ko mamitala to mafanaˈay cangra to harateng ato saali no mita. O cecay ci Corian faˈinayan salikaka sanay: “Samanen cowa kangaˈay ko tireng ako hato miliyasay to Pitil, painiay ko cecay widang takowanan misaali to sapakalalok no malohemay malitengay. Satapang aca, cowa ko kalimlaan mihaen sanay ko harateng ako, ikorto mafalicay ko harateng, mitahidangay to malohemay malitengay a milisoˈ takowanan. O pilisoˈ nangra tada o kalimlaan a sapatelong, cowa ko mamapawan kako.” Malecad oya milisoˈay ci Corianan a malohemay malitengay, o madimadiay a malohemay malitengay wa ngaˈay padama kitaanan cipinang to ‘harateng ni Kristo,’ cipinang a minanam to harateng ato waywayan ni Yis. (1 Korinto 2:16; 1 Pitiro 2:21) O hatiniay a sapadama nangra tada o kalimlaan a sapatelong.
TAMORONGEN KO TALOˈODAN AKO
6. ‘Tamorongen ko taloˈodan ako.’ O manan ko tatodong hani?
6 Sowal ni Yis: ‘Tamorongen ko taloˈodan ako.’ Tatodong ningra misaaliay to nisawawaan midofdof to pikayat ningra alatek, anca misaaliay to nisawawaan malacafay cingranan mitamorong to taloˈodan, malacafay matayal saki Yihofaan. Ano samaanto tatodong no mitamorong to taloˈodan oha mamatayal kita o sanay.
7. Pakayni Matay 28:18-20, iraay ko toki ita mirienang to maanan a tayal hani? Hanaca ngaˈay pakasoˈlin kita to maanan?
7 Patafang kita to tireng ci Yihofaan micada to inoˈ o micadaay to satahidang ni Yis, mitamorong to taloˈodan ningra. Oniya tahidang pasayraay i polong a tamdaw a hadaken, o makalimay sapidokoaw to Kawas a tamdaw, cowa ko nanaˈayen ningra. (Yohani 6:37, 38) Patorodan ni Yihofa ci Yis to cecay a tayal, polong a nisawawaan ni Yis iraay ko toki a mirienang. Wa ngaˈay pakasoˈlin kita, papadadotoc ci Yis kalacafay kitaanan, padama kitaanan milaheci toniya tayal.—ˈOsien ko Matay 28:18-20.
PASAYNI TAKOWANAN MINANAM
Mitodong ci Yisan pasinoway to tao (Nengnengen ko 8-11 fatac) *
8-9. (1) O misapoeneray tamdaw hano masolot ni Yis hani? (2) Ngaˈayay licayen ita ko niyah to maanan a salicay hani?
8 Masolotay ni Yis ko misapoeneray ko falocoˈ a tamdaw. (Matay 19:13, 14; Luka 7:37, 38) Misamaanay hani? Samanen taˈangayay ko kasasiroma ni Yis to Farisay a tamdaw. Cowa ka ngaˈay ngataen misatakaraway ko ˈaˈideman no pihakelongan, kawra damsayay a misapoener ci Yis. (Matay 12:9-14) Maˈanofay to fadangalan ko Farisay a tamdaw, mansa misaidahidahi cangra, samanen ˈakawangay ko saaroˈan hato misatakaraway. Palimoˈotay ci Yis, hamaan maˈanof, pasifanaˈ to nisawawaan misapoener a matayal i tamdaw. (Matay 23:2, 6-11) O Farisay tamdaw marariday a patalaw to tamdaw, mikowan to tao. (Yohani 9:13, 22) Ci Yis sai tano sidaˈitay a waywayan ato sasowalen pasinoway to tamdaw.
9 Mikitini ci Yisan mananamay iso ko maanan hani? Ngaˈayay licayen ko niyah: “Minengneng ko tao takowanan, o damsayay misapoeneray han? Maolahay kako midemak to sasafa:ay a demak han, matayal saki tao han? O waywayan ako to tao sidaˈitay han?”
10. Samaanay ci Yis malacafay to nisawawaan matayal hani?
10 Malacafay ci Yis ato nisawawaan matayal i, iraay ko rihadayay a macacawmaˈ, sinowayay ko falocoˈ no nisawawaan, ci Yis i, maolahay pahatatanam cangranan. (Luka 10:1, 19-21) Pakalalokan ni Yis ko nisawawaan a mihadak to salicay, makalimay cingra mitengil to harateng nangra. (Matay 16:13-16) O nisawawaan malecaday to micadaay to masongilaˈay a midimokos a pinaloma, padotoc a romahad, kadofahay ko minaroˈan nangra. Mananamay nangra ko pasifanaˈan ni Yis a kimad, midemak to ciepocay a demak.
Ngaˈayay ngataen no tamdaw
Tawlik a fanekfek
Misapoener a malalok *
11. O maanan ko lalicayen ita to niyah hani?
11 Iraay ko fadangalan iso han? Ano iraay i, ngaˈay licayen ko niyah: “Itini i lomaˈ anca i katayalan, samaanay kako micada to tao hani? O micowatay to rihaday a tamdaw kako han? Pakalalokay kako to tao mihadak to salicay han? Makahiay kako mitengil to harateng no tao han?” O Farisay a tamdaw mapiliˈay milicay ko tao cangranan, miroeroayho toya cowa kahecad ko harateng cangranan a tamdaw, aka a mahecad cangranan!—Marko 3:1-6; Yohani 9:29-34.
WA MILIFOK KAMO TO SASAYAR
12-14. Midemak to patorodan ni Yis a tayal, hano sasinoway ko falocoˈ ita hani?
12 Midemak to patorodan ni Yis a tayal, hano sasinoway ko falocoˈ ita hani? Adihayay ko lalangian, lengoen ita nohatini ko pina.
13 Iraay ko sangaˈayay a kantok no mita. O kasapaan a kantok ci Yihofa, masemeray cingra to tayal ita, cowa ko mariˈangay a tawki. (Hipray 6:10) Pafeliay Cingra kitaanan to ˈicel, ho ngaˈay kita mitamorong to ˈinorong no niyah. (2 Korinto 4:7; Kalatiya 6:5) Patirengay ko Hongti ita ci Yis Kristo to taˈarawan, pasifanaˈ kitaanan sasamaan micada to tao. (Yohani 13:15) O pakaenay kitaanan a malohemay malitengay, misaˈicelay a mitodong to ‘kasapaan a pakaenay’ ci Yisan. (Hipray 13:20; 1 Pitiro 5:2) Misarocoday cangra sidaˈit a midimokos ato pakalalok kitaanan, timoloayho a midipot kitaanan.
14 Iraay ko sangaˈayay a widang no mita. Cowa kalecad to hekal a tamdaw, adihayay ko ciolahay a widang no mita, ciepocay ko nikaˈorip. Haratengen hena, makapahay ko waywayan no salikaka ita, cowa ka misaidahi. Adihayay ko inaneng nangra, kawra misapoeneray ko falocoˈ, ikakaay ko tao toniyah sanay miharateng. Minengneng cangra kitaanan cowa ko kalacafay aca matayal, o widang sanay a minengneng kitaanan. Tada maolahay cangra kitaanan, makahiay pakayni kitaanan a kinafalah to ˈorip. Malacafay cangranan a matayal tada kalikoanto!
15. Sasamaan ko pinengneng ita to tayal no mita hani?
15 Iraay ko sangaˈayay a tayal no mita. Pasifanaˈay kita to tao mafanaˈ to pakayniay ci Yihofaan a soˈlinay kimad, mitihedakayho to mangah ni Akoma. (Yohani 8:44) O masakenaay a mangah ni Satan pakarorayay to tamdaw, awaay ko hatokel. Tinakoen, mioratay cingra to harateng ita cowa ko mamisodod ci Yihofa to raraw ita, awaay ko tatodong ita milifok to olah ni Yihofa sanay. Tada mariˈangay koniya mangah ningra! Ano pakasoˈlin ko tamdaw toniya mangah, mamatoled a masomad. Kawraan, tayra kita ci Kristoan, mamasodod ko raraw, samanen tangongolay ko olah ni Yihofa to kahacecay tamdaw. (Loma 8:32, 38, 39) Ngaˈay padama to tao minanam a mitadiˈec ci Yihofaan, hanaca maˈaraw ko kafalic no kaˈorip nangra, tada o sakarenec no falocoˈ ita konini!
PADADOTOC I LAENO NO TALOˈODAN NI YIS MILIFOK TO SASAYAR
16. O sapatamorong ni Yis kitaanan a ˈinorong, o manan ko cowa kalecad to roma ˈinorong i kaˈorip ita hani?
16 O sapatamorong ni Yis kitaanan a ˈinorong, cowa kalecad to roma ˈinorong i kaˈorip ita. Tinakoen, ikor no misaromiˈad a mawmah i, malotayayto, awaay ko lipahak. Kawra matayal kita ci Yihofaan aci Kristoan marenecay ko falocoˈ. Matayal to cecay romiˈad, malotayay kita, misaˈicel ngaˈ ngaˈay mirienang to saˈopo toya dadaya, kawra mahererek ko saˈopo mapakalalokay a sinoway kita. Malecaday, misaˈicel kita a micekiw to Fangcalay Cudad ato mirienang to mitosilay, o malifokay ita a epoc mikikakaay to mihadakan a ˈicel.
17. O hahapinangen ita ko maanan a demak hani?
17 O cacipinang kita, citolasay ko ˈicel no kahacecay tamdaw, mihaenay o sasongilaˈen ita misaka dademak ko ˈicel no niyah. Tinakoen, ano caka pisinanot kita, wa saka dademaken ko ˈicel i picangacang to hafay, mihaen to demak o mafolaay. O cecay cihafayay a kapah na milicayay ci Yisan: ‘Sasamaan ko demak ngaˈ, milifok to tahadaˈocay a ˈorip hani?’ Oniya kapah midofdofay to Rikec ni Mosi, hanaca sowal no Marko, ci Yis ‘maoalahay cingranan’ sanay, mihaenay maedeng o moecelay a tamdaw cingra. Mitahidangan ni Yis koniya kapah a tapang sanay: ‘Olili, paˈacaen ko kihcod iso mihakelong takowanan.’ Makalimay koniya kapah sapihakelongaw ci Yisan, kawra ‘adihayay ko hafay’ ningra, cowa ka sapisawadaw. (Marko 10:17-22) Telocto manaˈayay cingra mitamorong to taloˈodan ni Yis, padadotocay malo ‘koli no Hafay.’ (Matay 6:24) Ano onini a kapah tapang kiso, wa samaan ko pipiliˈ iso hani?
18. Karariden ita midemak to maanan hani? Misamaanay hani?
18 Karariden ita mikinsa to, o manan ko misaaretengan ako nokaˈorip, mihaen ngaˈ citaneng kita misaka dademak to ˈicel noniyah. Cecay a kapah ci Marko sanay cingra: “Pinapina miheca madoloay ko nokaˈorip no niyah saan kako, Soˈlin misakafahay kako, kawra sahto o payci ko miharatengan ako, ciharatengay kako to saemelay a nokaˈorip. Cowa kafanaˈto hano maroray ko nokaˈorip ako, ikor mahapinangayto ako, o isalakatay kako micangacang to sakaciepoc aca no niyah, o maˈosaway a toki ato ˈicel ko pafelian ci Yihofaan.” Ikor mafalicay ko harateng ato nokaˈorip ni Marko, matongalay ko toki matayal saki Yihofaan, sowal sa cingra: “Calemcemay kako nolatekay, kawra iraay ko sadama ni Yihofa aci Yis, maremoay ako ko masakenaay a pasangaray.”
19. Paira to matatodongay a noka pinengneng, hano masaka limlaan hani?
19 Ano songilaˈen ita midemak ko tolo a demak, wa milifok to rihadayay. Saka 1, pairaen ko matatodongay a noka pinengneng. Midemakay kita to tayal ni Yihofa, mansa tooren ko pakayraan ni Yihofa a matayal, samanen o Tawki ci Yihofa, o matayalay kita. (Luka 17:10) Ano tooren ita ko pakayraan no niyah midemak to tayal no Kawas, mamarorayto kita. Mahecad o ciˈicelay a kolong pasayra i kaolahan no niyah a romakat, mitowakang to sakayat no tawki, teloc i mamaroray ko tireng mangalef madokaˈ ko tireng alatek. Ano maolahay kita midofdof to sakayat ni Yihofa, wa pakaremo to pasangar, milaheci to tadamanay a demak, samanen awaay ko cima mamiconged to kalaˈosi no araaw no Kawas.—Loma 8:31; 1 Yohani 4:4.
20. Pairaen ita ko maanan araaw no falocoˈ a mitamorong to taloˈodan ni Yis hani?
20 Saka 2, pairaen ko moecelay araaw no falocoˈ. O mamisaˈicel kita a pakahemek to sidaˈitay a wama ci Yihofaan. Itini saka 1 hahekalan, o roma tamdaw na mikotoday ci Yisan, kawra iraay ko ˈanof misatekeday a harateng macangalay ko falocoˈ, cowato ka pikotod ci Yisan. (Yohani 6:25-27, 51, 60, 66; Filipi 3:18, 19) Kawra, oya maolahay to Kawas ato tao a tamdaw, padadotocay a mahemek mitamorong to taloˈodan ni Yis, mansa ira ko tokel malacafay ci Yisan i kakarayan a matayal. Ano malecad kita cangranan ira ko moecelay araaw no falocoˈ, wa ngaˈay padadotoc a lipahak.
21. Pakayni Matay 6:31-33, ngaˈay pakasoˈlin kita sasamaan ko demak ni Yihofa hani?
21 Saka 3, pairaen ko tanektekay pakasoˈlinay a falocoˈ. Malo Krisciyang, kalimlaan ita ko malalokay ato kinafalahay a harateng. Roma i, na somowalay ci Yis wa palaken no tamdaw kita. Kawra wa ngaˈay pakasoˈlin kita, papafeli ci Yihofa kitaanan to ˈicel, ho ngaˈay kita miemem to pasangaray. Padadotoc kita a miemem, wa matongal ko katanektek. (Yakop 1:2-4) Wa ngaˈayho pakasoˈlin kita, papafeli ci Yihofa kitaanan to kihcod a saali no mita, papakaenen ni Yis kita, papakalaloken no salikaka kita. (ˈOsien ko Matay 6:31-33; Yohani 10:14; 1 Tisalonika 5:11) O mananho ko kacalemceman ita hani?
22. Hano tada o lalipahak kita noikor hani?
22 Oya miadahan ni Yis a fafahiyan, maedeng taˈangayay ko hemek toya romiˈad. Kawra oha mamadimadi cingra a mihakelong ci Yisan ngaˈ, milifok to tahadaˈocay a sasayar. Ano maolah cingra mitamorong to taloˈodan ni Yis, wa ira ko toki tayra kakarayan malacafay ci Yisan matayal, ano mihaen, soˈlin kinafalah cingra, iraay ko epoc. O tokel ita ano tatayrato i kakarayan anca itini fafekang no sera tahadaˈoc ko ˈorip, micada kita to satahidang ni Yis tayra cingranan, tada o lalipahak noikor!
RADIW 5 Taˈarawan ita ci Kristo
^ 5段 Mitahidangay ci Yis: ‘Katayni takowanan.’ Misamaan ko demak ita o micadaay to satahidang ningra hani? Oniya lalakaw, wa pacaˈof toniya salicay, wa milengoho malacafay ci Kristoan a matayal, hano mamisayar kitaanan, ato sasamaan ko hademak no mita.
