1. Hono dadoedoen ita ci Yihofa hani?

MISAMAANAY hano dadoedoen * ita ci Yihofa hani? Samanen o misangaˈay a Tatapangan, iraay ko fadangalan patireng to palinian no mita. (Paˈarawan 4:11) Roma i, maolah kita a midoedo ci Yihofaan—o sangaˈayay ko pikowan Ningra. Likisi no tamdaw adihayay ko mikowanay, awaay ko malecaday ci Yihofaan a citaneng, ciolahay ato siniˈaday a falocoˈ.—Kasadakan 34:6; Loma 16:27; 1 Yohani 4:8.

2. Pakayni i Hipray 12:9-11, Hono dadoedoen ita ci Yihofa hani?

² Tokel ni Yihofa kitaanan, o sidaˈitay a Wama han ko pinengneng Cingranan, pakayniay kaolah Cingranan a midoedo, cowa ko pakayniay katalaw to saka eca kahemek Ningra. Itini Hipray cudad, sowal ni Pawlo o mamaolah ko Krisciyang a midoedo to kakarayan Wama, samanen ‘pakayniay saka ciepoc no mita’ ko pirikec Ningra kitaanan.—ˈOsien ko Hipray 12:9-11. *

3. (1) Ano midoedo kita ci Yihofaan i, wa samaan ko hademak hani? (2) Dotoc papacaˈof to maanan a salicay hani?

³ Ano midoedo kita ci Yihofaan i, wa misarocod midoedo Cingranan i maamaan a demakan, cowa ko mamisatakaraw (Taneng 3:5) Mafanaˈ kita to makapahay capeling ni Yihofa, wa madoloto a midoedo Cingranan. Misamanay hani? Kihcod a demak ni Yihofa sahtoay o paihkalay to makapahay capeling Ningra. (ˈOlic 145:9) Ano cipinang kita toniya capeling, wa  matongal ko kaolah ci Yihofaan. Maolah kita Cingranan, cowato ko mamisaali mihacecay a pasowal kitaanan, o maanan ko ngaˈayay demaken, o maanan ko cowa ka ngaˈay, o papalahad to malecaday ni Yihofa a harateng ato nafalocoˈan. (ˈOlic 97:10) Kawra, pasangaran nanay kita nolatekay midoedo ci Yihofaan. Hano mahaen hani? Roma i, malo malohemay malitengay, wama anca wina a tamdaw, wa ngaˈay mikitini i ˈAˈideman ci Nihimiya, Hongti ci Tafiti, wina ni Yis ci Mariyaan minanam to maanan hani? Oniya lalakaw papacaˈof toniya salicay.

4-5. Pakayni i Loma 7:21-23, midoedo ci Yihofaan nolatekay hano pasangaray hani?

⁴ O lalangian a pasangar midoedo ci Yihofaan i, mirocokay kita to raraw, o cowa ka lefot a tamdaw, mansa ira ko mitowakangay a harateng. Mitowakangay ci Atam aci Ifa to Kawas, komaen to heci no mihapinang to ngaˈayay ato tatiihay a kilang, paihkalay to niyahsa patireng to ngaˈayay tatiihay a palinian. (Satapangan 3:22) Anini, cowa pisikol ko ˈalomanay tamdaw to palinian ni Yihofa, o niyah sanay ko misaˈosiay to ngaˈayay tatiihay.

⁵ Soˈlin mafanaˈay kita ci Yihofaan, maolahy Cingranan, kawra, sapidoedoaw Cingranan i kihcod a demak tada pasangarayto. Mahecaday ko harateng no tarokos ci Pawlo. (ˈOsien ko Loma 7:21-23.) Mahecaday kita ci Pawloan, sapidemakaw to matatodongay a demak i pinengneng ni Yihofa, kawra, papadadtoc kita a misaˈicel ngaˈ ngaˈay pakaconged to mararaway a coˈos no tireng.

6-7. O roma pasangaray midoedo ci Yihofaan a lalangian, o manan hani? Tano tinakoen a mitadtad.

⁶ O roma pasangaray midoedo ci Yihofaan a lalangian i, o kalomahadan ita mifiyoray to harateng. O harateng no kalo a tamdaw, misafelitay to harateng ni Yihofa, wa misaˈicel kita ngaˈ, caka madenga no hekal. Nengnengen ita ko cecay tinakoan.

⁷ Itini adihayay pala, maroeroay ko kapah a tamdaw o saka cihafay ko patosokan a maˈorip. O cecay ci Mariya * a salikaka misiˈayaway to mahaenay sapalifet. ˈAyaw no minanam ci Mariya to soˈlinay kimad, itiniay ngaˈayay a picudadan. Miowingay ko paro no lomaˈ cingranan mikilim to ˈakawangay ko lifon sanengsengay a katayalan, ciharatengay cingra micangacang to hatiniay a patosokan. Ikor, minanam ci Mariya to soˈlinay kimad maolahay ci Yihofaan, mafalicayto ko patosokan ningra. Soˈlin mahaen, sanay cingra: “Latekay, maˈaraw ko ngaˈayay toki mietan to adihayay payci, soˈlin mafanaˈay to mamifiyor to tayal ako ci Yihofaan, kamayanho mangiyangi ko falocoˈ. Samanen nano kaemangan a mananamay, tada pasangaray a minaˈay. Micangacangay kako to sapadama ni Yihofa, ngaˈ iraay ko ˈicel a miconged to sakayhid, padadotoc a misamacay midoko to Kawas.”—Matay 6:24.

8. Dotoc wa milengo kita to maanan hani?

⁸ Midoedo ci Yihofaan o saka ciepoc no mita. Kawra, malo malohemay malitengay, wama anca wina a salikaka kalimlaan ko pidofdof to sakayat no Kawas, mihaen ngaˈ matatodong ko pisaka dademak to fadangalan a padama to tao. Dotoc wa milengo kita to litengan a tinakoan no madimadiay sikawdan, samaanay cangra misaka dademak to fadangalan, pakahemek ci Yihofaan.

9. Misiˈayaway ci Nihimiya to maanan a pasangaray hani?

⁹ Palimoˈotan ni Yihofa ko malohemay malitengay misongilaˈ a midimokos to finawlan  Ningra, karetengay ko ˈinorong no malohemay malitengay. (1 Pitiro 5:2) Wa ngaˈay cangra mikitini picada ni Nihimiya to finawlan a minanam. Malo ˈaˈideman no Yutaya, taˈangayay ko fadangalan ni Nihiniya. (Nihimiya 1:11; 2:7, 8; 5:14) Kawra, adihayay ko masiˈayaway ningra a pasangaray. Tinakoen, maˈaraw ningra ko pikasimaan no finawlan misaka dademak to dafong no fangcalay sefi, cowa pikangdo to pidokoan ci Yihofaan a kitiraan. Cowa ka hatini aca, cowa pitoor ko finawlan to Rikec pafeli to dafong no Lifi tamdaw, cowa pidofdof to saˈosi no Paselaˈan a Romiˈad, o roma tamdaw ci fafahiyay to cowa pidoko to Kawas a tamdaw. Oniniya demak o sasaysayen ni Nihiniya a pasangaray—Nihimiya 13:4-30.

10. Misiˈaway to pasangaray samaanay ko demak ni Nihimiya hani?

¹⁰ Cowa ka patelas misaka dademak to fadangalan ci Nihimiya, patireng to saˈosi a papidofdof to finawlan, ao mitolonay a milongoc to sakayat ni Yihofa, pasifanaˈ cangranan mafanaˈ to Rikec ni Yihofa. (Nihimiya 1:4-10; 13:1-3) Misapoeneray ci Nihimiya a kalacafay to finawlan a matayal, midama cangranan miliyaw patireng to lowil no Yirusalim.—Nihimiya 4:15.

11. Pakayni 1 Tisalonika 2:7, 8, sasamaan ko malohemay malitengay micada to salikaka hani?

¹¹ Anini, cowa kalecad ko sasaysayen no malohemay malitengay to ni Nihimiya, kawra kamayan cangra ngaˈay mikitini ci Nihimiyaan a minanam. Tinakoen malalok cangra matayal saki salikaka, soˈlin ira ko fadangalan, cowa ka misatakaraw. Ao dadamsay a madaˈmaˈ to salikaka. (ˈOsien ko 1 Tisalonika 2:7, 8.) Maolahay cangra to salikaka, ira ko misapoeneray falocoˈ, masa mikangodo ko sowal. O cecay adihayay ko milifetan a malohemay malitengay ci Antero, sanay: “Ano soˈlin a ciharateng ko malohemay malitengay to salikaka, wa mitemer ko falocoˈ nangra, maolah a kalacafay to malohemay malitengay a matayal.” Roma halafinayto a malohemay malitengay  sanay: “Misaˈicelay kako misaka dademak to limoˈot i Filipi 2:3, minengneng to tao mikikakaay to niyah, mihaen ecato ka malecad o mikowanay, pacieci to tao mitoor to harateng ako a midemak.”

12. Misamaanay hano mamisapoener ko malohemay malitengay hani?

¹² O misapoeneray a Kawas ci Yihofa, mihaenay o mamisapoener ko malohemay malitengay. O saˈakawangay a Tatapangan ci Yihofa, makahiayho a ‘miroho misapoener’ ato ‘mikitini i tahfod a pacakat to tadancaay a tamdaw.’ (ˈOlic 18:35; 113:6, 7) Pakayni i misatakaraway tamdaw, tada maacekay ci Yihofa.—Taneng 16:5.

13. O malohemay malitengay hano ‘mamitawmec to sema no niyah’ hani?

¹³ O roma pakayraan no malohemay malitengay midoedo ci Yihofaan i, ‘tawmecen ko sema no niyah,’ ano eca ka pikangodo ko tao cingranan wa mariˈang ko sasowalen ningra. (Yakop 1:26; Kalatiya 5:14, 15) O misowalan i kaˈayaw ci Antero sanay: “Latekay, hato cowa pikangodo ko salikaka takowanan, sapacoliaw kako cangranan. Kawra, midotim to taˈarawan no madimadiay sikawdan mahapinangay ako, paihkal to misapoeneray ato damsayay a capeling tada masakalimlaanto.” O malohemay malitengay tano sidaˈitay patadoay miharateng a waywayan masasowal to salikaka, ato roma malohemay malitengay, ngaˈay paihkal to midoedoay ko niyah ci Yihofaan.—Kolosay 4:6.

14. Paikenan ni Yihofa ko malo wamaay to maanan a ˈinorong hani? Mitokelay Cingra to malo wamaay to maanan hani?

¹⁴ Ci Yihofa pala tawkian no lomaˈ ko malo wamaay, mitokel cangranan misongilaˈ pasifanaˈ to wawa. (1 Korinto 11:3; Ifiso 6:4) Kawra, citolasay ko fadangalan no malo wamaay. O likakawa no lomaˈ ci Yihofa ko patirengay, mihaenay wa tano kaolahan ni Yihofa a pakayraan micada to paro no lomaˈ cangra. (Ifiso 3:14, 15) Ano midoedo ko malo wamaay ci Yihofaan, wa misongilaˈ misaka dademak to fadangalan, pakahemek ci Yihofaan, wa ngaˈay cangra mikitini malifetay ni Tafiti a minanam.

15. O taˈarawan ni Tafiti, hano o ciepocay a nanamen hani?

¹⁵ Ci Tafiti cowa ko tawki aca no paro no lomaˈ, palahongtianho ni Yihofa cingra no Israil, taˈangayay ko fadangalan. Kawra, na patelasay ci Tafiti misaka dademak to fadangalan, mararaw to pakidemay a raraw. (2 Samuil 11:14, 15) Kawra midoedoay ci Tafiti ci Yihofaan, micada to pirikec, mihadakayho to nafalocoˈan mifanaˈ ci Yihofaan i satolon, misarocd a midoedo to limoˈot Ningra. (ˈOlic 51:1-4) Roma i, makahiay ci Tafiti micada to  sapaini no tao, soˈlin oniya sapaini mikitiniay i fafahiyan. (1 Samuil 19:11, 12; 25:32, 33) O taˈarawan ni Tafiti ngaˈayay nanamen ita, samanen mikitiniay i mararaway cingra micada to sapasifanaˈ, hanaca misaareteng i nokaˈorip to pidoko to Kawas.

16. Malo wamaay mikitini ci Tafitian wa mananam ko maanan hani?

¹⁶ Malo wamaay a salikaka mikitini ci Tafitian wa mananam ko maanan hani? Hamaan patelas misaka dademak to sapafeli ni Yihofa tisowanan a fadangalan, ano mararaw ko demak makahi a mihai, micadaho to mikitiniay i Fangcalay Cudad a salimoˈot no tao. Ano mihaen ko demak iso, pakayni misapoeneray a taˈarawan iso, wa mikangodo ko paro no lomaˈ tisowanan. Ano mikayat kiso to paro no lomaˈ a mitolon i, hadaken ko nai falocoˈay a harateng pasowal ci Yihofaan, mihaen mikitini satolon iso, wa mahapinang no paro no lomaˈ, makalimay kiso milifok to sapadama ni Yihofa. Sakakaay i, misaareteng kiso i nokaˈorip to pidoko to Kawas. (Limoˈot 6:6-9) Misaˈicel kiso midoedo to Kawas, patireng to ngaˈayay taˈarawan, saka ciepoc no paro no lomaˈ.

17. Pafelian ni Yihofa ko malo winaay to maanan kalimlaan a ˈinorong i paro no lomaˈ hani?,

¹⁷ Pafelian ni Yihofa ko malo winaay to kalimlaan a ˈinorong i paro no lomaˈ, ira ko fadangalan nangra pasifanaˈ to wawa. (Taneng 6:20) Soˈlinay i, tangongolay ko pifiyor no wina to hakelong nokaˈorip no wawa. (Taneng 22:6) O malo winaay a salikaka mikitini wina ni Yis ci Mariyaan, wa mananam ko maanan hani?

18-19. O malo winaay itini maanan a pakayraan minanam to taˈarawan ni Mariya hani?

¹⁸ Mananamay ci Mariya to sinael, tangongolay ko pikangodo ningra ci Yihofaan, tangongolay ko kalawidang Cingranan. Midoedo ci Mariya to Kawas oha mamafalic ko kaˈorip no niyah, kamayan cingra maolah a mihaen to demak.—Luka 1:35-38, 46-55.

¹⁹ O malo winaay a salikaka, itini maanan a pakayraan minanam to taˈarawan ni Mariya hani? Salakat, ngaˈay kiso pakayni picekiw to Fangcalay Cudad ato satolon patanektek to kalawidang ci Yihofaan. Dotoc, ngaˈay kiso malecad ci Mariyaan, maolah a mifalic to kaˈorip, pakahemek ci Yihofaan. Ano hinaketeray ko wama wina iso, caka ngaˈay tengilen ko sowal to wawa, miharateng kiso o matatodongay ko hatiniay a pakayraan wa saan. Soˈlin ikorto mafanaˈ kiso to soˈlinay kimad, tano damsayay ato mihadidiay a pasifanaˈ to wawa cowa ko madoloay. Mangalef ano malotay kiso, maliyangho ko wawa, tada mahaenay. (Ifiso 4:31) Ano mahaen ko pakayraan,  tolonen ci Yihofa, mitiˈer to sapadama Ningra. O wina ci Litiya, sanay cingra: “Latekay, papadadotoc kako a mitolon, ho eca ka mangolaw ano maliyang ko wawa. Latekay kalitosa ko sowal tomerepayho a mitolon. O satolon soˈlinay a padama takowanan mitafo to madaˈamaˈay.”—ˈOlic 37:5.

20. O roma malo winaay misiˈayaway to maanan a pasangaray hani? Samaan cangra a misalof hani?

²⁰ O roma malo winaay misiˈayaway to roma pasangaray, pasangaray paihkal to olah i wawa. (Titus 2:3, 4) Alatek kaemangho cowa pilifok to olah, cowa kangaˈay ko kalalaˈed to wama wina. Ano mahaenay ko pakayraan iso, aka a pitoor to mararaway. O malo winaay midoedoay ci Yihofaan, oha maminanam sasamaan paihkal to olah i wawa. Sapisalofaw to harateng, nafalocoˈan ato waywayan cowa ko madoloay alatek, kawra o mamadangal iso, ano makahi kiso a mifalic, o sakaciepoc no niyah ato paro no lomaˈ.

21-22. Mikitini Isaya 65:13, 14, midoedo kita ci Yihofaan iraay ko maanan a epoc hani?

²¹ Cipinangay ci Tafiti to epoc no midoedoay ci Yihofaan. Sanay cingra: ‘Moecelay ko limoˈot ni Yihofa, pakahemekay to falocoˈ no tamdaw; Makoracay ko limoˈot ni Yihofa, pataengaday to mata no tamdaw; Micada ko sikawdan iso to pirikec no limoˈot Iso, ano midofdof wa ira ko sapalifon.’ (ˈOlic 19:8, 11) Anini, ngaˈayay mahapinang ita o midoedoay ci Yihofaan ato cowa pitengil to limoˈot a tamdaw, taˈangayay ko kasasiroma. Tada lipahakay ko midoedoay ci Yihofaan a tamdaw, samanen ‘lipahakay ko falocoˈ a malekal.’—ˈOsien ko Isaya 65:13, 14.

²² Malo malohemay malitengay, wama anca wina a tamdaw midoedo ci Yihofaan, wa mafalic ko nokaˈorip, matongal ko lipahak no paro no lomaˈ nangra, polong no kasakopang wa makelec a malacecay. Sakakaay i, midoedo ci Yihofaan wa pakahemek Cingranan, pakayni kitaanan o kalipahakan a demak konini!—Taneng 27:11.