1. Samaanay ko pinengneng ni Yihofa to misapoeneray a tamdaw hani?

MAOLAHAY ci Yihofa to misapoeneray ko falocoˈ a tamdaw. Edengan o soˈlinay misapoeneray ko falocoˈ a tamdaw, wa ira ko ngaˈayay a kalalaˈed aci Yihofa, oya malitaˈangay a tamdaw, cowa ka piingid ci Yihofa cangranan. (ˈOlic 138:6) Mitokelay kita pakahemek ci Yihofaan, ato micada to kanonoˈ Ningra. Mihaenay i, maminanam kita to sasamaan palahad to misapoeneray a capeling.

2. Oniya lalakaw mamilengo to maanan a salicay hani?

² Oniya lalakaw mamilengo to tolo a salicay: (1) O manan ko misapoeneray a falocoˈ hani? (2) Hano palahad kita to misapoeneray a falocoˈ hani? (3) I masamaanay a pakayraan, mitafo to misapoeneray cowa ko madoloay hani? Maminanam kita, palahad to misapoeneray a capeling, cowa ko pakahemek aca ci Yihofaan, mamilifokho kita to haepoc.—Taneng 27:11; Isaya 48:17.

3. O manan ko tatodong no misapoeneray a falocoˈ hani?

³ O tatodong no misapoeneray a falocoˈ, cowa ko malitaˈangay. Mikitini i Fangcalay Cudad mananamay ita, oya misapoeneray a tamdaw mihayay to ikakaay ko saaroˈan ni Yihofa tono niyah, ikakaay ko midemakan no tao tono niyah. Mansa cowa ko hamamalitaˈang kita.—Filipi 2:3, 4.

4-5. Hano caka ngaˈay o papotal aca ko pihapinang to tamdaw to misapoeneray hokira?

⁴ O roma tamdaw hato misapoeneray nengnengen, maomoyay ko pinangan nangra alatek, anca pakayni i serangawan ato kalomahadan nangra, mapasifanaˈ to kakangodoen ko tao,  ˈarawhan, i falocoˈ nangra ikakaay ko niyah to tao. Ano mihaenay i, o malitaˈangay a falocoˈ nangra mamahadak noikor.—Luka 6:45.

⁵ O cecay tamdaw ano fanekfekay ko falocoˈ anca, timoloay mihadak to harateng no niyah, cowa ko malitaˈangay a tamdaw alatek. (Yohani 1:46, 47) Kawra, sinanotenho, ano mitiˈer to niyah i, wa malo malitaˈangay a tamdaw. Mihaenay i, ano samaan ko pinangan ita, o maomoyay anca o mamenacay, o hamami saˈicel a malo soˈlinay misapoeneray a tamdaw.

6. O somowal ni Pawlo i 1 Korinto 15:10 mananamay ita ko maanan?

⁶ Sasinanoten ko nalifetan ni Pawlo. Miocoran ni Yihofa cingra, itini icowacowaay a pala patireng to kasakopang, alatek o minaroˈan no pitosilan ningra ikakaay ko adihay to roma tarokos. Kawra cowa malitaˈang ci Pawlo, nikawrira misapoeneray ko falocoˈ ningra a somowal: “O sasafaay a tarokos kako. Caay ka tatodong kako a cingangan to tarokos. Nawhani nano mikariˈangay kako to saˈopo no mitooray to Kawas.” (1 Korinto 15:9) Somowalayho cingra, edeng pakayni sapadama ni Yihofa ato mikiriwiˈay a sidaˈit, ho ngaˈay milifok to makapahay a minaroˈan, cowa kono niyah aca. (ˈOsien ko 1 Korinto 15:10.) Itini i Korinto a kasakopang o roma a Krisciyang, sapisawacayaw cangra ikakaay ko inaneng no niyah ci Pawloan, kawra patikami ci Pawlo cangranan i, cowa pasengi to niyah, tada misapoenengay cingra, patireng to tada ngaˈayay a taˈarawan no mita!—2 Korinto 10:10.

7. O cecay kalimlaan ko saaroˈan a salikaka samaanay a paihkalay to misapoeneray a falocoˈ hani?

⁷ O cecay Malohemay Malitengay i Congpo a salikaka ci Kael Kelayen, o nalifetan ningra pakalalokay to ˈalomanay salikaka, misapoeneray cingra somowalay to na masiˈayaway ko masamaanay a pasangaray no niyah. Tinakoen,  isaka 1922 miheca, sakinacecay cingra mirienang to pakalomalomaˈay a mitosil i, tada pasangaray sanay ko harateng ningra. Mihaenay i, tosaay a miheca cowato ka pirienang to pakalomalomaˈay a mitosil. Ikor, tayra i Pitil a matayal cingra, itira o cecay salikaka mirikecay cingranan, ꞌarawhan halafinay cingra a mangolaw. Somowalayho cingra pakidemay ko somad ningra to cecay liyad, ikor maadahayto cingra. Mihaenay i, kamayan cingra milifok to adihayay kalimlaan a tayal. ˈAlomanay salikaka mafanaˈay ci Kaelan, mahaenay a salikaka mihayay to raraw no niyah, misapoener ko falocoˈ ngaˈ ngaˈay. Mansa ˈalomanay salikaka tada maolahay cingranan ato nalifetan ningra. *

8. Mikitini i saka 1 Pitiro 5:6 hano cipinang kita to maolahay ci Yihofa to misapoeneray a tamdaw hani?

⁸ Hano palahad to misapoeneray falocoˈ, o masakalimlaan hani? Kalimlaan a lalangian i, ci Yihofa maolahay to misapoeneray ko falocoˈ a tamdaw. Mahaenay ko sowal no tarokos ci Pitiro. (ˈOsien ko 1 Pitiro 5:6.) Itini “Katayni Mikotod Takowanan” a cudad (no Kowaping) milengo koniya sinael i, sanay: ‘Ano misaˈakawang ko tamdaw mahecaday to mawarakay no ˈetok, awaay ko kangaˈayay no teloc. Ano samaamaan ko inaneng no misaidahiyay a tamdaw i, awaay ko kapo sanay ko harateng no Kawas . . . soˈlin awa ko inaneng no misapoeneray a tamdaw, wa ngaˈayayho saka dademaken ni Yihofa. Misapoener kita dademak i, wa mahemek a palifon ko Kawas kitaanan.’ * Paihkal to misapoeneray a waywayan, ngaˈay pakahemek ci Yihofaan, awaay ko mikikakaay tonini a ciepoc!—Taneng 23:15.

9. Ano ira ko misapoeneray a falocoˈita, hano mamaolah ko tao micawmaˈkitaanan?

⁹ Palahad to misapoeneray a capeling, ngaˈay pahemek ci Yihofaan, cowa konini aca, wa milifokho to adihayay haepoc. Malo misapoeneray a tamdaw, mamaolah ko tao micawmaˈ kitaanan. Misamaanay hani? Haratengen hena, maolahay kiso a micawmaˈ to samaanay a tamdaw hani? (Matay 7:12) Cowa koya mapiˈliay mitengil to sowal no tao a tamdaw. Oya ‘patadoay miharateng to tao, iraay ko no salikaka a olah, siniˈadaˈay ko falocoˈ misapoeneray ko falocoˈ’ a tamdaw ko kaolahan no mita. Samanen malacafay cangranan wa lipahak ko falocoˈ ita. (1 Pitiro 3:8) Ano misaˈicel kita palahad to misapoeneray a capeling, wa mamaolah ko tao micawmaˈ kitanan, samanen maolahay ko  cecacecay tamdaw macacawmaˈ to misapoeneray a tamdaw.

10. Ira ko misapoeneray a capeling ita i, hano mamadolo a misiˈayaw to pasangaray hani?

¹⁰ Ano iraay ko misapoeneray a capeling ita i, wa madolo a misaysay to pasangaray. Itini kaˈorip ita, adihayay ko cowa ka sadafdaf a demak, nolatekay malitemohay ita ko hatiniay a demak. Sanay ko sowal ni Solomon: “Maˈaraw ako ko nipidakaw no kuli to efa, o hongtito ko romakatay a matiya o kuli.” (Patnakay 10:7) Soˈlinay, iraay ko inaneng a tamdaw cowa ka itini i matatodongay a saaroˈan alatek, kawra oya awaay ko inaneng a tamdaw i, micadaay to adihayay a sapahemek. Somowalayho ci Solomon, citanengay a pakayraan i, wa micada anca misiˈayaw to cowa ka masadafdafay a demak, cowa ko mamararid a ngaliwngiw a miharateng. (Patnakay 6:9) Ano malo misapoeneray a tamdaw i, soˈlin o kaˈorip ita adihayay ko pasangaray, cowa ko tatatiih ko falocoˈ.

11. Ano palimoˈot ko tao i kitaanan i, sasamaan ko hademak ita hani?

¹¹ To romiˈamiꞌad adihayay ko toki ita, paihkal to misapoeneray a waywayan. Lengoen ita ko pina a pakayraan. O cecay pakayraan i, ano palimoˈot ko tao i kitaanan. Haharateng no mita ano patalipaˈelal ko tao kitaanan, o manan ko sasalofen i, o pasangaray ita ikakaay to maharatengay no niyah. Itiya cowa ka pitengil kita alatek, cowa ka olah to palimoˈot ningra alatek, malikafayho to painiay a tamdaw. Kawra, ano misapoener ko falocoˈ ita i, mamisaˈicel kita misalof to harateng no niyah.

12. Pakayni i Taneng 27:5, 6, hano miakoˈid kita to palimoˈotay kitaanan a tamdaw hani? Tano tinakoen a mitadtad.

¹² Oya misapoeneray ko falocoˈ a tamdaw, wa naifalocoˈ a miakoˈid to limoˈot no tao. Tinakoen, ano itini i kasaˈopoan kiso a macacawmaˈ to salikaka, ikor pasowal ko cecay salikaka tisowanan, citingalay ko wadis iso. Tada mangodoay kiso, kawra wa miakoˈid kiso cingranan, hano caka kahenay a pasowal sanay ko harateng no miso. Mahecaday i, itini i matatodongay a toki, ano timoloay ko salikaka palimoˈot tisowanan, sapoeneren ita a micada ngaˈngaˈay, halo miakoˈid to nano demak nangra. O widang no mita cangra, cowa ko ˈada.—ˈOsien ko Taneng 27:5, 6; Kalatiya 4:16.

13. Ano maˈaraw ko tao milifok to roma tayal no kasakopang, o misapoeneray a tamdaw cowa ko hamamiharateng to maan a demakan hani?

¹³ O roma pakayraan i, maˈaraw ko salikaka micadaay to fadangalan a matayal. O cecay malohemay malitengay salikaka ci Ciyasen,  sanay ko sowal ningra: “Soˈlin, ano maˈaraw ko tao milifok to roma tayal no kasakopang i, o harateng ako i, hano cingra, cowa ko kako, sanay.” Micangacang to tayal no kasakopang o ngaˈayay a patosokan. (1 Timoti 3:1) Kawra, sinanotenho ko harateng ita, samanen ano cowa ka songilaˈen ita a misimsim, wa ira ko malitaˈangay a harateng i falocoˈita. O roma salikaka sanay ko harateng, edeng o niyah ko citatodongay milifok to roma tayal no kasakopang, o roma fafahiyan salikaka sanay ko harateng, o faˈinay ako ikakaay to roma salikaka. Ano o soˈlinay misapoeneray kita i, cowa ko mamihaen ko harateng.

14. Milifok ko tao to roma tayal no kasakopang i, sasamaan kita mitodong to taˈarawan ni Mosi?

¹⁴ Ano milifokay ko tao to roma tayal no kasakopang i, samaanen ko waywayan ita hani? Nengnengen ita ko taˈarawan ni Mosi. Papikayaten ni Yihofa ci Mosi to Israil tamdaw, misaaretengay ci Mosi toniya ˈinorong. Minilnilay ci Yihofa to roma tamdaw a padama ci Mosian i, samaanay ko waywayan ni Mosi hani? Cowa ka ˈinap ci Mosi cangranan. (Saˈosi 11:24-29) O roma, pasalatan ni Mosi ko tao padama to misawkitay a tayal. (Kasadakan 18:13-24) Ikakaay koniya limasmas to isaˈayaway, mihaen ciharatengay ci Mosi to haepoc no finawlan, cowa ko saaroˈan no niyah, patirengay cingra to tada makapahay a taˈarawan no mita! Sowal no Fangcalay Cudad: ‘Soˈlin ci Yihofa o satadamaanay, pasilaenoay a minengneng Cingra to misapoeneray a tamdaw.’ (ˈOlic 138:6) Ano sapitongalaw kita to tayal saki Yihofaan, haharatengen ita o misapoeneray a capeling ikakaay to inaneng.

15. ˈAlomanay salikaka tahalifaay to maanan a noka falic?

¹⁵ Ano mafalicay ko katayalan ita i, padadotocen paihkal to misapoeneray. Pina miheca isaˈayaw, adihayay milifetan no salikaka mafalicay ko katayalan. Tinakoen mikitini 2014 miheca, ˈalomanay kasapala kantok ato fafahi nangra miliyas ato misalof to tayal nangra,  midemak to roma mieminay to toki a tayal no likakawa. Roma i, mataˈlifay ko 70 mihecaan a salikaka cowato ko kasakilac kantok, mataˈlifayto ko 80 mihecaan a salikaka cowato ko misatenokay no malohemay malitengay itini i kasakopang. ˈAyaw no pina miheca, ˈalomanay salikaka cowato katayal itini i Pitil, malo misakafahay. O roma salikaka ciadadaay anca sapidipotaw to paro no lomaˈ, anca roma pakayraan, cowato ka miemin to toki a malamitosilay.

16. ˈAlomanay salikaka tahalifa to kafalic i, samaan paihkal to misapoeneray a capeling hani?

¹⁶ O salikaka tahalifa to mafalicay a pakayraan, cowa ko madoloay koni. Halafinay ko tayal nangra isaˈayaw, ano mafalic ko pakayraan i, misaˈicel cangra a minanam to faelohay a demak, nolatekay masomaday ko falocoˈ. Kawra ikorto mananamay to faelohay a kitiraan. maolahay cangra ci Yihofaan, mansa ngaˈayay cangra miremo to pasangar. Mahapinangay nangra patafang to niyah i kawas, cowa ko saaroˈan anca ˈinorong. (Kolosay 3:23) Tada misapoeneray cangra, lipahakay cangra padadotoc matayal i masamaamaanay a tayal saki Yihofaan. Mahapinangay nangra ciharatengay ci Yihofa cangranan, mansa “patorod han i Kawas ko polong no rawraw no falocoˈ” nangra.—1 Pitiro 5:6, 7.

17. Pakalalokay ko Kawas kitanan malo misapoeneray a tamdaw, hano miakoˈid kita Cingranan hani?

¹⁷ Pakaynian no Kawas to Fangcalay Cudad pakalalok kitanan a malo misapoeneray a tamdaw, tada miakoˈiday kita Cingranan, samanen palahad toniya capeling, ho ngaˈay milifok to haepoc no niyah ato tao, halo madoloay a misiˈayaw to pasangaray i nokaˈorip. Kalimlaan i, ngaˈayay miingid kita ci Yihofaan. Mahapinangay ita, o kasapaan a Tapang ci Yihofa, ˈarawhan maolahay ato misalimlaay to misapoeneray a tamdaw, tada kasemelanto!—Isaya 57:15.