1. Itini saka 1 hahekalan, samaanay ko pakayraan no tarokos ci Yohani?

ITINI saka 1 hahekalan, pasangaray ko kaˈorip no tarokos ci Yohani, matoˈasayto, mapalitay i Patmos a potipot, hanaca denganto a tarokos cingra itiya. (Paˈarawan 1:9) Mafanaˈay cingra iraay ko misafelitay to kimad a tamdaw mioratay to soˈlinay Krisciyang, paliwasakay to kasakopang. Alatek cato ka halafin wa awato ko soˈlinay a Krisciyang.—Yuta 4; Paˈarawan 2:15, 20; 3:1, 17.

2. Pakayni i Paˈarawan 7:9-14, maˈaraway ni Yohani ko manan a mikowaday to falocoˈ a mapolosi hani? (Nengnengen ko papotal coka.)

² Pasangar ko pakayraan, paˈarawan no Kawas ci Yohani to mikowaday to falocoˈ a mapolosi. Maˈaraway ningra ko cecay coyoh palimoˈotay to sasepat a coyoh mimetmet to sapalaˈafo a fali no taˈangayay padiing, tahira kalahecian a malinaˈ ko ‘koli no Kawas.’ (Paˈarawan 7:1-3) Oniya malinaˈay a Krisciyang komoden 144,000 ko ˈaloman, wa tayra cangra i kakarayan malacafay ci Yisan a mikowan. (Luka 13:32; Paˈarawan 7:4) Dotoc, maˈaraway ni Yohani ko ˈalomanay ˈopo a tamdaw, sanay cingra: ‘Nengneng sa kako, maˈaraw ko taˈangayay ˈopo a tamdaw, awaay ko pakaˈosiay, mikitiniay kalo kitakit, ngasaw, finacadan, sasowalen aira, tomireng i kaˈayaw no tadamaanay kamaroˈan ato tofor a siri.’ (ˈOsien ko Paˈarawan 7:9-14.) Mafanaˈ ci Yohani wa ira ko taˈangayay ˈopo a tamdaw midoko ci Yihofaan no ikor maedeng taˈangayay ko lipahak!

3. (1) Maˈaraway ni Yohani a mapolosi hano mamitongal to pakasoˈlinay a falocoˈ no mita hani? (2) Oniya lalakaw wa milengo to maanan?

 ³ Maˈaraw ni Yohani ko mapolosi maedeng matongalay ko pakasoˈlinay a falocoˈ. Mangalefay kita anini, samanen itiniay kita i kalaˈosian no mapolosi a maˈorip. Nohatini pinaayto a soˈot emang ko misaˈopoan a tamdaw, iraay ko tokel nangra milakowit to taˈangayay padiing, tahadaˈoc maˈorip i cikiw. Oniya lalakaw wa milengo, samanay ci Yihofa i ˈayaw no 80 miheca, padama to finawlan Ningra mihapinang to, o cima ko taˈanagayay ˈopo a tamdaw. Wa milengoho to tosa mikiriwiˈay no taˈangayay ˈopo a tamdaw: (1) o kaˈaloman ato (2) mikitiniay i cowacowa aira. Milengo toniya lalakaw ngaˈay padama to taˈangayay ˈopo a tamdaw patanektek to pakasoˈlinay falocoˈ.

4. O kiyokay a tamdaw cowa ka cipinang to maanan a soliˈnay kimad hani? Micekiway a Tamdaw cipinangay to maanan?

⁴ Masowalay no Fangcalay Cudad, o midofdofay to Kawas a tamdaw, wa tahadaˈoc maˈorip i cikiw. (2 Korinto 4:3, 4) Kawra pasowalay ko kiyokay, mapatay ko ngaˈayay tamdaw tatayra i kakarayan sanay. Kawra i saikor no 19 hahekalan, oya mitepangay to Mikecolay Micekiway to Fangcalay Cudad a Tamdaw mahapinangay nangra, wa patikolen no Kawas ko Lakoing i cikiw, o midofdofay to Kawas a tamdaw wa itini i fafekang no sera—coko i kakarayan a maˈorip. Kawra, o cima koniya tamdaw, ikor cipinangayto cangra.—Matay 6:10.

5. Mahapingay no Micekiway a Tamdaw, o cima ko 144,000 a tamdaw hani?

⁵ Mikitini i Fangcalay Cudad mahapinangay no Micekiway a Tamdaw, o roma tamdaw ‘miˈacaan i fafekang no sera,’ tatayra i kakarayan malacafay ci Yisan mikowan. (Paˈarawan 14:3) Komoden 144,000 ko ˈaloman, o patafangay to tireng a Krisciyang cangra, fanekfekay a madimadi midoko to Kawas. Kawra, samanay ko kacipinang no Micekiway a Tamdaw to taˈangayay ˈopo a tamdaw hani?

6. Harateng no Micekiway a Tamdaw, o cima ko taˈangayay ˈopo a tamdaw hani?

⁶ Maˈaraway ni Yohani i mapolosi, ‘tomirengay i kaˈayaw no tadamaanay kamaroˈan ato tofor a Siri’ ko taˈangayay ˈopo a tamdaw. (Paˈarawan 7:9) O taˈangayay ˈopo a tamdaw wa malacafay to 144,000 tamdaw tayra i kakarayan, saan ko harateng no Micekiway a Tamdaw. Ano tatayra i kakarayan koniya tosa ˈopo a tamdaw, iraay ko kasasiromaan nangra han? O harateng no Micekiway a Tamdaw: O taˈangayay ˈopo a tamdaw oya cowa ka pisongilaˈ midofdof to Kawas a Krisciyang, soˈlin mitooray cangra to palinian no Kawas a maˈorip, kawra cowa piliyas to kiyokay sanay. Cangoˈotay ko fanekfek nangra, mansa caka ngaˈay malacafay ci Kristoan a mikowan. Cangoˈotay ko kaolah to Kawas, mansa tomireng i kaˈayaw no tadamaanay kamaroˈan, awaay ko tatodong a maroˈ i tadamaanay a kamaroˈan a mikowan.

7. O harateng no Micekiway a Tamdaw, (1) Pikowan ni Kristo to Comaˈol Miheca, o cima ko mamaˈoripay i fafekang no sera hani? (2) Itini ˈayaw no kinafalah ni Kristo a madimadiay faˈinayan iraay ko maanan a hatokel?

⁷ O cima ko aitini fafekang no sera maˈorip hani? Pakasoˈlinay ko Micekiway a Tamdaw, oya 144,000 tamdaw ato taˈangayay ˈopo a tamdaw tatayra cangra i kakarayan, ikor i, wa ira ko masacaˈolay emang a tamdaw itini Pikowan ni Kristo to Comaˈol Miheca maˈorip i fafekang no sera. O harateng nangra, oniya tamdaw itini ˈayaw no Mikowan ci Kristo cowaho pidoko ci Yihofaan, itiniay i lalomaˈ no Pikowan to Comaˈol Miheca a mapasifanaˈ mafanaˈ ci Yihofaan. Saikorto, o midofdofay to palinian ni Yihofa a tamdaw wa tahadaˈoc a maˈorip, oya  cowa pidofdof to Kawas o mamalaˈafo. Harateng no Micekiway a Tamdaw, itini Pikowan to Comaˈol Miheca, wa ira ko malo ‘ˈaˈideman’ a tamdaw i fafekang no sera, mahawpay ko madimadiay a faˈinayan i ˈayaw no kinafalah ni Kristo, oniya ‘ˈaˈideman’ itini mahererek ko Pikowan to Comaˈol Miheca, wa mapalifon tayra i kakarayan a maˈorip.—ˈOlic 45:16.

8. Pinengneng no Micekiway a Tamdaw iraay ko maanan tolo ˈopo a tamdaw hani?

⁸ Mihaenay, pinengneng no Micekiway a Tamdaw iraay ko tolo ˈopo a tamdaw: (1) 144,000 tamdaw, tatayra i kakarayan malacafay ci Yisan mikowan; (2) taˈangayay ˈopo a tamdaw, cangoˈotay ko fanekfek, mansa ka tomireng aca i kaˈayaw no tadamaanay kamaroˈan ato tofor a Siri; (3) masacaˈolay emang a tamdaw, wa itini Pikowan ni Kristo to Comaˈol Miheca minanam a mafanaˈ ci Yihofaan. * Kawra ikorto, padamaan ni Yihofa cangra misalof to harateng.—Taneng 4:18.

9. (1) Fafekang no sera ko taˈangayay ˈopo a tamdaw, samaanay ‘tomireng i kaˈayaw no tadamaanay kamaroˈan ato tofor a Siri’ hani? (2) Oniya faelohay noka cipinang hano matatodongay hani?

⁹ 1935 miheca, ihekalayto a mahapinang no Misawacayay Tamdaw ni Yihofa ko taˈangayay ˈopo a tamdaw. O taˈangayay ˈopo a tamdaw coko tatayra i kakarayan ngaˈ ngaˈay a ‘tomireng i kaˈayaw no tadamaanay kamaroˈan ato tofor a Siri.’ O sapatinako a sowal konini, ano mihayi cangra to satadamaanay noka pikowan ni Yihofa ato midofdof Cingranan, malecaday o tomirengay i kaˈayaw no tadamaanay a kamaroˈan ni Yihofa. (Isaya 66:1) Roma i, ano pakasoˈlinay cangra to sapatefoc ni Yis, malecaday o tomirengay i ˈaˈayaw no tofor a Siri. Mitadtaday ko Matay 25:31, 32, toniya sapatinako. Milengoay ko sinael maroˈay ci Yis i ˈodingaray a kamaroˈan, ‘masaˈopoay ko polong a finacadan i ˈaˈayaw ningra,’ mahawpay ko tatiihay tamdaw, oniya tamdaw itiniay i fafekang no sera a masaˈopo. Soˈlin cowa pilengo ko Fangcalay Cudad to tatayra i kakarayan ko taˈangayay ˈopo a tamdaw, matatodongay koniya faelohay noka cipinang. Mihaenay, cecayay aca a ˈopo a tamdaw ko tatayra kakarayan tahadaˈoc maˈorip, komoden 144,000 ko ˈaloman, malacafay ci Yisan ‘mikowan toniya sera.’—Paˈarawan 5:10.

10. Taˈangayay ˈopo a tamdaw hano itini ˈayaw no misatapang Mikowan ci Kristo to Comaˈol Miheca mafanaˈto ci Yihofaan hani?

¹⁰ Mikitini 1935 miheca misatapang, cipinangayto ko Misawacayay Tamdaw ni Yihofa o madimadiay a Krisciyang ko taˈanagayay ˈopo a tamdaw, iraay ko tokel tahadaˈoc maˈorip i fafekang no sera. Mahapinangayho nangra, o taˈangayay ˈopo a tamdaw itini ˈayaw no misatapang Mikowan ci Kristo to Comaˈol Miheca mafanaˈayto ci Yihofaan, midoko Cingranan, ngaˈ ngaˈay milakowit to taˈangayay padiing. Ira ko tanektekay pakasoˈlinay falocoˈ, ngaˈ ngaˈay “mitaˈlif tonini a aira a demak.”—Luka 21:34-36.

11. O roma tamdaw wa itini mahererek ko Comaˈol Miheca a Pikowan tatayra i kakarayan, O Micekiway a Tamdaw hano ira ko mahaenay a pinengneng hani?

¹¹ 1913 miheca 2 folad 15 romiˈad a Mikecolay (padaka) sanay ko sowal, o roma madimadiay a tamdaw ano mahererek ko Comaˈol Miheca a Pikowan tatayra i kakarayan sanay. O Micekiway a Tamdaw hano ira ko mahaenay a pinengneng itiya hani? Harateng nangra itiya o Taˈangayay ˈOpo a Tamdaw o cowa ka fanekfek a Krisciyang, kawra iraay ko tokel tayra i kakarayan, mansa mihaen ko harateng no roma tamdaw: “O cowa ka fanekfek a Krisciyang ngaˈay tayra i kakarayan, o madimadiay a sikawdan nolitengan hano itini aca i fafekang no sera a maˈorip hani?”

12-13. Oya tatayra kakarayan a tamdaw ato taˈangayay ˈopo a tamdaw, cipinangay cangra to maanan hani?

 ¹² Kawra, mikitini i 1935 miheca misatapang cipinangayto ko Misawacayay Tamdaw ni Yihofa, maˈaraway ni Yohani i mapolosi a taˈangayay ˈopo a tamdaw oyaan milakowitay to Armakiton a tamdaw. ‘Mikitiniay i taˈangayay padiing a masadak’ cangra, cowa ko tatayra i kakarayan ao itini fafekang no sera a materek, wa padadotoc cangra a miowaw: ‘Malidong kita, mitiˈeray toya maroˈay i kasapaan kamaroˈan a Kawas, ato tofol a Siri.’ (Paˈarawan 7:10, 14) Roma i, somowalay ko Fangcalay Cudad, palalinien to madimadiay a faˈinayan i nolitengan, oya patikolay maˈorip tayra kakarayan a tamdaw milifokay to ‘tada ngaˈayay’ a sapalifon. (Hipray 11:40) Cipinang tonini kimad i, tawlikayto ko salikaka mitahidang to tamdaw midoko ci Yihofaan, mihaen wa irato ko tokel no tamdaw tahadaˈoc maˈorip i fafekang no sera.

¹³ Mahemekay ko taˈangayay ˈopo a tamdaw itini fafekang no sera a tahadaˈoc maˈorip. Mafanaˈay cangra, edengan ci Yihofa ko mamisaˈosi to ao cima ko itini kakarayan ato i fafekang no sera a midoko Cingranan. O tatayra kakarayan anca o taˈangayay ˈopo a tamdaw, cipinangay cangra o pakaynian ni Yihofa i sapatefoc ni Yis a mikiriwiˈay a sidaˈit, mansa ngaˈay ira ko makapahay a hatokel nangra.—Loma 3:24.

14. Ikor no 1935 miheca, hahakowa ko ˈaloman no taˈangayay ˈopo a tamdaw, cisasaay ko tamdaw to maanan hani?

¹⁴ Soˈlin ikor no 1935 miheca, cipinangayto ko finawlan ni Yihofa to o cima ko taˈangayay ˈopo a tamdaw, kawra kamayan miharateng ko ˈalomanay tamdaw, iraay ko tokel maˈorip i fafekang no sera soˈlinay taˈangay ko ˈopo han? Tiya salofen no likakawa no Kawas ko pinengneng to pakayniay taˈangayay ˈopo a tamdaw i, salikaka ci Ronate Pacin 12 ko mihecaan itiya, sanay cingra milomal: “Komodan no mitosilay itiya 56,000, hanaca o tatayra i kakarayan ko ˈalomanay, ano nengnengen cowa ka samaan ko ˈaloman no taˈangayay ˈopo a tamdaw sanay.”

15. O ˈaloman no taˈangayay ˈopo a tamdaw hano padadotoc a matongal hani?

¹⁵ Kawra dotocto a pina poloˈ miheca, ˈalomanay ko milakowitay to riyar a misakafahay tayraay i cowacowa pala mitosil, orato matongalay ko ˈaloman no Misawacayay Tamdaw ni Yihofa. Itini 1968 miheca, misatapangay misaka dademak to Mikayatay to Hasaka Toˈdaw no ˈOrip a Kimad a cudad pasifanaˈ to tamdaw. Madoloay nanamen koniya cudad, masolotay ko misapoeneray ko falocoˈ a tamdaw a minanam. Lalomaˈ no sepat miheca, 50 emang ko micadaay to inoˈ. Roma i, malahedaway ko ˈicel no  Tingsokiw i Latin Amilika ato roma kitakit, hanaca o midokoay a tayal ita itini Iwropa ato Afrika cowato ka makeceng, orato pinaay soˈot emang ko micadaay to inoˈ. (Isaya 60:22) Ingata mihecaan, adihayay ko mitepangan no likakawa ni Yihofa a ciepocay lalosidan padama to tamdaw mafanaˈ to kimad. Anini, 800 emang ko misaˈopoan a tamdaw, soˈlinayto a ˈaloman ko taˈangayay ˈopo a tamdaw!

16. Naicoway ko taˈangayay ˈopo a tamdaw hani?

¹⁶ Itini Paˈarawan masowalay ni Yohani, ‘o taˈangayay ˈopo a tamdaw mikitiniay i kalo kitakit, ngasaw, finacadan, sasowalen aira.’ Malecaday o sapairasol ni Cikariya konini, sanay cingra: “Toya romiˈad i, o tatayra ko moetepay a roma a finacadan a tamdaw i cecay a tamdaw no Yuta, sowal saan cangra: ‘Haydaen kami a mikapot i nika tadamaan namo, nawhani matengil niyam ko nika mikapot ko Kawas i tamowanan,’”—Cikariya 8:23.

17. Sapadamaaw to cowa kalecad ko sowal a tamdaw minanam to soˈlinay kimad, misaˈicelay ko likakawa no Kawas to maanan hani?

¹⁷ Mahapinangay no Misawacayay Tamdaw ni Yihofa, ano mamisaˈopo to cowa kalecad ko sowal a tamdaw, wa tano cowa kalecad a sowal ko pilasil to ngaˈayay lihaf. Mataˈlifayto a 130  miheca, misaˈicelay ko likakawa no Kawas mihongyak malo adihayay sowal to mitepangan a cudad. Anini, pinaayto a soˈot ko kasasiroma no mitepangan a cudad no mita, macowatay ko mihongyakay a tayal. O taˈangayay ˈopo a tamdaw miktiniay i cowacowa pala a masaˈopo, tada o kasapaan a demak ni Yihofa konini. Samanen adihayay ko sasowalen no mitepangan a cudad, soˈlin mikitiniay i cowacowa pala ira cangra, kamayan a makelec malacecay midoko ci Yihofaan. Mahapinangay no ˈalomanay tamdaw fanekfekay cangra a mitosil, tangongolay ko olah i kalalaˈed. Oniya kihecod tada kasemeranto!—Matay 24:14; Yohani 13:35.

18. (1) Pakayni i Isaya 46:10,11, pipalaˈosi ni Yihofa to pakayniay i taˈangayay ˈopo a tamdaw a sapairasol hano cowa ko mamacekid kita hani? (2) O tatahadaˈoc maˈorip i sera a tamdaw hano cowa ka macangal ko harateng hani?

¹⁸ O pakayniay i taˈangayay ˈopo a tamdaw a sapairasol mikowaday to falocoˈ! Tano kasapaan a pakayraan ko sapalaˈosi ni Yihofa toniya sapairasol, mafanaˈay kita to mamalaˈosi ko sowal ni Yihofa, mansa cowa ko mamacekid. (ˈOsien ko Isaya 46:10, 11.) Miakoˈiday ko taˈangayay ˈopo a tamdaw to sapafeli ni Yihofa a saka tahadaˈoc maˈorip a hatokel, caka piliˈen cangra tayra kakarayan malacafay ci Yisan mikowan, cowa ka macangal ko harateng. Itini Fangcalay Cudad ˈalomanay madimadiay tamdaw micadaay to sakayat no Kawas, kawra cowa ka masalalomaˈ no 144,000 a tamdaw, tinakoen oya painoˈay a Yohanian aci Tafiti. (Matay 11:11; Dmak 2:34) Noikor, oniya madimadiay sikawdan ato cowa ka saˈosi ko ˈaloman a tamdaw wa patikol maˈorip i lakoing. Cangra ato taˈangayay ˈopo a tamdaw iraay ko toki paihkal to makahiay koniyah madimadi ci Yihofaan, midama to saˈakawangay pikowan a fadangalan Ningra.

19. Malaˈosi ko taˈangayay ˈopo a tamdaw a sapairasol hano paihkal to macalohay ko pakayraan anini hani?

¹⁹ Anini, mikelecan ni Yihofa a palacecay ko pinaay soˈot emang a tamdaw midoko Cingranan, na cowaho pifekad i salakat konini. Ano sakikakarayan anca saki fafekang no sera ko hatokel ita, mamisaˈicel a padama to ˈalomanay tamdaw malo ‘roma lopayˈay siri’ a taˈangayay ˈopo a tamdaw. (Yohani 10:16) Cato ka halafin, wa mifekadto ko taˈangayay padiing, o pairaay to adihayay pades a pihakelongan ato mikowanay mamalaˈafo maemin. Mahererek ko taˈangayay padiing, wa tahadaˈocto ko taˈangayay ˈopo a tamdaw itini fafekang no sera a midoko ci Yihofaan!—Paˈarawan 7:14.