1-2. O madimadiay a midoko ci Yihofaan a tamdaw tatahalifa to maanan a sapalifet alatek?

 O KAˈORIP ita alatek talifahal sa malifa ko kafalic. Tinakoen, faˈinayan salikaka ci Luis a to hatiniay madimadiay midoko to Kawas, kawra talifahal sa makinsa to adadaay cingra to pakidemay a ekang, o sowal no ising pinaay aca folad ko ˈorip ningra sanay. Fafahiyan salikaka ci Monika ato faˈinay ˈifowaay matayal to midokoay a demak, o malohemay malitengay ko faˈinay ningra, kawra cecay romiˈad mahapinangay ni Monika, halafinayto ko faˈinay mitakaw a midemak to kaˈintehan no Kawas a demak. Ci Oliwiya o cowa ka ciraramod a fafahiyan salikaka, samanen mingataay ko faliyos mapacieciay cingra milaliw to lomaˈ. Minokayto cingra i, mapalakayto maemin ko lomaˈ no niyah. O kaˈorip nangra sahtoay talifahal sanay mafalic. Iraay ko malecaday a nalifetan iso han? O kaˈorip iso talifahal sanay taˈangay ko kafalic han?

² Madimadiay kita midoko ci Yihofaan, kawra malecaday kita to romaroma tamdaw mamisiˈayaw to adada ato maanan a pasangaray. Roma i, tatahalifaho kita to pisafelit ato hakokay, samanen o roma tamdaw ˈintehay to finawlan no Kawas. Soˈliˈlin cowa ko papalasawaden ni Yihofa ko sapalifet ita, kawra mikiˈokay Cingra to papadama kitaanan. (Isaya 41:10) Mitiˈer to sapadama Ningra, soˈlinto tahalifa kita to pasangaray, o ngangaˈay kita lipahak, mataneng ko pisaˈosi, hanaca padadotoc a madimadi Cingraanan. Onini lalakaw mamilengo, itini kapasangaran no kaˈorip a tatokian i, ci Yihofa tatano maanan sepat a pakayraan padama kitaanan. Onini a lalakaw mamilengo, mamidemak kita to maanan ngaˈ milifok to sapadama ni Yihofa.

 O SASIMAWEN NI YIHOFA KISO

3. Ano tahalifa kita to pakidemay a pasangar i, cato ka dolo samaan ko pidemak hani?

³ Alatek mamisiˈayaw to maanan a pasangaray hani? Ano tahalifa kita to pakidemay a pasangar i, alatek cato ka ihkal ko ponoˈ a misaˈosi. Misamaanay hani? Samanen tada mararomay ko falocoˈ ita alatek, matomesayho no cariraw ko ponoˈ, sasifod sanayto. Miharateng kita to niyah hato itiniay i toˈem, cato ka fanaˈ to papasicowa a romakat. Nengnengen ko misowalan ifafekang tatosa fafahiyan salikaka itini pasangaray samaanay ko falocoˈ nangra. Sanay ci Oliwiya: “Mapalakto no faliyos ko lomaˈ i, maoratay ko harateng, cowato ka fanaˈ to sasamaan ko demak.” Somowal ci Monika to nafalocoˈan ningra, misafelitay ko faˈinay miliyas cingranan i, sanay ko sowal: “Tada matoleday kako, mahecaday o mipacokan no tamdaw ko falocoˈ, tada adadaayto. O kantangay demak i nokaˈorip caayto ka ngaˈay midemak. Na cowaho ka harateng ako to mamifekad ko mahaenay a demak.” Mikiˈokay ci Yihofa sasamaan padama kitanan misiˈayaw to mahaenay a pasangaray hani?

4. Mikitini Filipi 4:​6, 7, mikiˈokay ci Yihofa mamidemak to maanan?

⁴ Mamidemak ci Yihofa to maanan hani? Mikiˈokay Cingra to papafeli to rihaday no mita. (ˈOsien ko Filipi 4:​6, 7.) O paparihaday to ponoˈ, paparihaday to falocoˈ ita, edengan o iraay ko ngaˈayay noka lalaˈed aci Yihofaan a tamdaw mamatinako ko mahaenay a rihaday. Onini sapafeli no Kawas a rihaday ‘mataˈlifay to niharatengan no tamdaw,’ ikakaay to nisahalakaan ita ko nika fangcal. Na mingitangitay kiso mitolon ci Yihofaan, ikor sarihaday sanayto ko falocoˈ iso han? Mahaenay i, matinakoayto iso ko sapafeli no Kawas a rihaday.

5. O sapafeli no Kawas a rihaday sasamaan misimaw to falocoˈ ato ponoˈ ita?

⁵ Filipi 4:​6, 7 sanay, o sapafeli no Kawas a rihaday ‘mamisimaw to falocoˈ ato ponoˈ namo.’ ‘Misimaw’ sanay a tilid i, ono sofitay a sasowalen, mitoroˈan i, misimaway ko sofitay to niyaroˈ, mieteng to pilood no ˈada, midimokos to sakadipayal no niyaroˈ. Mafanaˈ ko ilalomaˈay no niyaroˈ a finawlan to pisimaw no sofitay i ˈadawang, hato sarihaday saan a mafotiˈ. Malecaday, o sapafeli no Kawas a rihaday o mamisimaw to falocoˈ ato ponoˈ no mita, mihaen i, o rarihadayto ko falocoˈ ita. (ˈOlic 4:⁠8) Matira ci Hanaan, soˈlin cowa ka tangsol sa a masaysay ko pasangaray, o ngangaˈayho matinako ita ko rihaday. (1 Samuil 1:​16-​18) Ano rihaday ko falocoˈ ita, to cerid mamadoloto a ihkal ko pisimsim no ponoˈ, mataneng ko pisaˈosi.

6. Sapilifokaw to sapafeli ni Yihofa a rihaday, sasamaan ko pidemak hani? (Nengnengen ko coka.)

⁶ Mamidemak kita to maanan hani? Ano maoratay ko falocoˈ iso i, ngitangiten ci Yihofa misimaw tisowanan. Mamisamaan ko demak aki? Padadotoc a mitolon, tangasa matinakoto  no falocoˈ iso ko sapafeli no Kawas a rihaday. (Luka 11:9; 1 Tisalonika 5:​17) Oya misowalan isawni ci Luis ato fafahi ningra ci Anna mafanaˈ to pinaay aca folad ko ˈorip ningra i, samaanay misiˈayaw tonini a demak hani? Sanay cingra: “Itiya i, itini i pipaising ato romaroma pakayraan a misaˈosi, tada pasangarayto. Itini tonini demak, tada masakalimlaan ko mitolonay, parihadayay to falocoˈ niyam.” O sowal ni Luis aci Anna, saliyaliyaw sanay cangra mingitangit a mitolon, misaali ci Yihofaan parihaday to ponoˈ, padipayal to falocoˈ nangra, ira ko taneng ngaˈay ko pisaˈosi, telocto i, malifokay nangra ko pipadama ni Yihofa. Ano tahasiˈayaway kiso to pasangaray a pakayraan, kodaiten aka pisawad a mitolon. Ano mihaen i, mamatinakoto iso ko sapafeli ni Yihofa a rihaday to samaanay misimaw to falocoˈ ato ponoˈ iso.​​—⁠Loma 12:⁠12.

PAPATANEKTEKEN NI YIHOFA KISO

7. Ano tahalifa to pakidemay a sapalifet i, wa ira ko masamaanay a harateng ita alatek?

⁷ Alatek mamisiˈayaw to maanan a pasangaray hani? Ano malifa ko pakidemay a sapalifet i, o falocoˈ, harateng ato pidemak ita cowa ka lecad to kalo romiˈad alatek, tada macariraway ko falocoˈ alatek. Ci Anna sanay ko sowal ningra, ikor mapatay ci Luis i, marariday fahal sanay a ira ko masakenakenaay a falocoˈ. Sanay cingra: “Ano matoled ko falocoˈ ako i, kasiniˈadaanto kako sanay a miharateng. Maketeran nanay kako to nika awa ningra.” Matoˈolan nanay ci Anna, taˈangayay ko saroero, samanen isaˈayaw o adihayay demak sahtoay o ci Luis ko misolimetay, kawra nohatini sato i, sahtoay ci Anna ko mamisaˈosi. Nolatekay, mahecaday toya tahafaliyosay a mimingay tamina, macowacoˈ no riyar a mangoyangoy. Ano hato mamaˈemek no tatiihay falocoˈ kita i, sasamaan ci Yihofa padama kitaanan hani?

8. Mikitini 1 Pitiro 5:​10, mamidemak ci Yihofa to maanan hani?

⁸ Mamidemak ci Yihofa to maanan hani? Mikiˈokay ci Yihofa to papatanekteken Ningra kita. (ˈOsien ko 1 Pitiro 5:10.) O tamina ano tahafaliyos i, latek satapangay a mangoyangoy. Toha sapilowanaw to kangoyangoy, ilaeno no tamina makofatiˈiyan iraay ko mikiriwiˈay a lalosidan, ngangaˈay a milowan to kangoyangoy no tamina, rihaday ko karomakat, hanaca sinowayen ko midakaway a tamdaw. Ora sasinanoten i, o sapilowan to kangoyangoy no tamina a lalosidan, ano romakatto talaˈayaw ngaˈ, satapangay a dademak a mipatanektek to tamina. Malecaday, itini kapasangaran ano padadotoc kita madimadi midoko ci Yihofaan i, o papadamaen ni Yihofa kita patanektek.

9. Misamaanay ano sangaˈayen ita misaka dademak ko sapicekiw a lalosidan i, papadama kitanan tanektek ko falocoˈ? (Nengnengen ko coka.)

⁹ Mamidemak kita to maanan hani? Ano tada macariraway ko falocoˈ iso i, ka pisarocod  mirienang to masasiromaromaay a demak no midokoay. O midemakan iso alatek cowa ka lecad to isaˈayaway ko nika adihay, kawra haratengen, ci Yihofa cowa papidemak tisowanan to caay ka dangar iso a demaken. (Nengnengen ko Luka 21:​1-4.) Padetengen iso a milimasmas ko toki a micekiw ato midotim. Misamaanay hani? Samanen pakaynian ni Yihofa i likakawa Ningra mihadak ko adihayay ngaˈayay a lalakaw ato ika, padama kitaanan padadotoc a tanektek ko falocoˈ. Toha sapikilimaw to matatodongay a lalakaw, ngaˈayay sakadademaken iso ko mihadakan no likakawa no Kawas a sapicekiw a lalosidan, tinakoen JW Library® app, Pirorodan to Mitepangan Cudad no Mikecolay, Pirorodan to Mitepangan Cudad no Misawacayay Tamdaw ni Yihofa. Isawni ya misowalan a Monika sanay cingra, ano pakidem ko roray no falocoˈ ningra i, tangsolay cingra misaka dademak to sapicekiw a lalosidan no likakawa mikilim to lalakaw. Tinakoen, keniˈen ningra ko “maketer,” “misafelitay” anca “madimadiay” sanay a tilid, ikor misaˈicelay cingra micekiw to makilimay a lalakaw, tahira kasayaran no falocoˈ. Sanay cingra: “Satapangho mikilim to lalakaw i, sasifod sanay ko falocoˈ ako. Kawra misongilaˈto kako micekiw to makilimay a lalakaw ikor, hato mitakecanto ni Yihofa kako. Mahapinangay ako ci Yihofa cowa ko kacipinang aca Ningra to nafalocoˈan ako, itiniay Cingra i tatihi a midama takowanan.” Tatano mahaenay a pakayraan ci Yihofa patanektek tisowanan, padama tisowanan misayar to falocoˈ iso.​​—⁠ˈOlic 119:​143, 144.

DADAMAEN NI YIHOFA KISO

10. Ano tahalifa to pakidemay a pasangar i, alatek aira ko masamaanay a piharateng ita hani?

¹⁰ Alatek mamisiˈayaw to maanan a pasangaray hani? Masetiˈ no tada karetengay a pasangaray i, latek malotayen nanay ko falocoˈ ato tireng ita to cecay liyad, mahecaday o madokaˈay a miontoay tamdaw, saˈayaw kalikiay ko kacomikay, nohatini sai sapiˈipiˈiw sanay comikay. Saˈayaw madoloay madangar ko demak, nohatini sai maefiˈay mitamorong. Saˈayaw kahemekan a demak, nohatini sai awaayto ko saloˈingan. Mahecaday kita ci Iliyaan alatek, tiˈenang saho awaayto ko saka lomowadaw, fafotiˈ sanayto. (1 Hongti 19:​5-7) Ano tekeng sato ko falocoˈ ita i, mikiˈokay ci Yihofa to sasamaan padama kitaanan hani?

11. Mikiˈokay ci Yihofa to mamidemak to maanan hani? (ˈOlic 94:⁠18)

¹¹ Mamidemak ci Yihofa to maanan hani? Mikiˈokay Cingra to mamidama kitaanan. (ˈOsien ko ˈOlic 94:18.) Mahecad o cecay madokaˈay a miontoay tamdaw misaaliay to mamidama cingranan ngaˈ ngaˈay lomowad a romakat,  misaaliay kita to sadama, ngaˈ padadotoc tawlik matayal saki Yihofaan. Mikiˈokay ci Yihofa kitaanan, sanay Cingra: ‘Kako o Kawas iso ci Yihofa, mimametay to kawanan a kamay iso, pasowal tisowanan: “Aka ka talaw, papadamaen Ako kiso.” ’ (Isaya 41:13) Matinakoay no Hongti ci Tafiti samaanay ci Yihofa padama cingraanan. Misiˈayaw cingra to sapalifet ato ˈada i, ci Yihofa ‘tano kawanan a kamay midama’ cingranan sanay. (ˈOlic 18:35 ato roma pihongyak.) Nohatini sasamaan ci Yihofa midama kitaanan hani?

12. Ano caayto ka tomesengen kita i, alatek papakaynien ni Yihofa i cimaanan a padama kitaanan hani?

¹² Tohati:niay mikayatan ni Yihofa ko romaroma tamdaw a midama kitanan. Tinakoen, iraay ko cecay liyad caayto ka tomeseng ci Tafiti, o widang ningra ci Yonatan tayraay mikilim cingranan, pakalalok cingranan padama cingranan a tanektek. (1 Samuil 23:​16, 17) O roma tinakoan i, mipiliˈan ni Yihofa ci Ilisa mipadang ci Iliyaan. (1 Hongti 19:​16, 21; 2 Hongti 2:⁠2) Anini, ci Yihofa alatek pakaynian i paro no lomaˈ, widang anoca malohemay malitengay mipadang kitaanan. Nikawrira, ano mararom kita i, sapiliyasaw to tao, saˈamokok sanay ko niyah a cecay, hatiratiraay yaca ko tamdaw. Kawra ano sapilifokaw kita to sadama ni Yihofa i, sasamaan ko demak hani?

13. To sapilifokaw to sapadama ni Yihofa, mamisamaan ko pidemak ita? (Nengnengen ko coka.)

¹³ Mamidemak kita to maanan hani? O mamisaˈicel kita micoˈay to misaˈamokokay to niyah a harateng. Ano saˈamokok sa ko niyah mamadoloto a maromot ko falocoˈ. Misatapangto kita o niyah aca ko miharatengan ato pasangar no niyah, telocto pasangar mataneng ko pisaˈosi. (Taneng 18:⁠1) Manaokaniw, misaaliay kita to sakacecayaw a misateked, mangalef malifa ko karorayan a demak i, misaaliay kita to toki a paselaˈ to niyah. Kawrira, koˈedawto ko toki misaˈamokok ko niyah i, hato minaˈayay to sapadama ni Yihofa. Mihaenay, ano cato ka madoloen i, cadaento ko sapadama no paro no lomaˈ, widang ato malohemay malitengay. Haratengen, pakaynian ni Yihofa cangraanan a midama tisowanan.​​—⁠Taneng 17:17; Isaya 32:​1, 2.

MAMIHINOM CI YIHOFA TISOWANAN

14. Alatek mamalifa ita ko maanan kakokiˈan a pakayraan hani?

¹⁴ Alatek mamisiˈayaw to maanan a pasangaray hani? Nolatekay tada makokiˈan nanay kita. Itini Fangcalay Cudad, madimadiay sikawdan no Kawas somowalay, cangra na misiˈayaway to sapatalaw no ˈada anoca romaroma saroero, carirawan nanay a makokiˈen. (ˈOlic 18:4; 55:​1, 5) Anini, latek mamisiˈayaw to pisafelit no cafay  micudad, cafay matayal, paro no lomaˈ anoca mirikecay a sifo, latek pakayniay i pipaisingan a demakan ira ko katalawan no ˈorip. Itini tonini a pakayraan, mahecaday kita to cecay wawa awaay ko mipadangay cingranan. Ano hatiraay i, sasamaan ci Yihofa padama kitaanan hani?

15. ˈOlic 94:19 mihadakay to maanan sakiˈok?

¹⁵ Mamidemak ci Yihofa to maanan hani? Mamihinom Cingra kitanan, ho rihaday ko falocoˈ ita. (ˈOsien ko ˈOlic 94:19.) Haratengen hena, to cecay a dadaya i papotal makakerengay maˈoraday, kaemangay fafahiyan wawa tada matalawan nanay, cowa ka fotiˈ. Itiya tayraay ko wama ningra, miˈafofo cingranan i falohang tahira kaeholan no fotiˈ ningra. Soˈliˈlin i papotal kamayan makakereng mafitiliˈ, kawra oya kaemangay fafahiyan wawa itiniay i dihekoay a falohang no wama tada rihadayan nanay cingra. Malecaday, ano tahalifa kita to katalawan a sapalifet i, misaaliay to sapiˈafofoaw no kakarayan Wama i falohang Ningra, tahira i karihadayan no falocoˈ ita, ecato ka kokiˈ. Ano hatiraay i, sasamaan kita milifok to sahinom ni Yihofa hani?

16. Sasamaan kita milifok to sahinom ni Yihofa? (Nengnengen ko coka.)

¹⁶ Mamidemak kita to maanan hani? Ceriden a mipalak ko toki ita kalacafay ci Yihofaan, tatodong i, tolonen Cingra halo micekiw to Kimad Ningra. (ˈOlic 77:​1, 12-​14) Mihaen i, ano marawrawen kiso i, tatangsol kiso a mikilim to sapadama no Wama i kakarayan. Pasowalen ci Yihofa to rawraw no falocoˈ ato katalawan iso, ikorto i, tengilen ko pakaynian Ningra i Fangcalay Cudad a sowal tisowanan, mamahapinangto iso to samaanay a mihinom Cingra tisowanan. (ˈOlic 119:28) Ano makokiˈen kiso i, o pina a sowal ilalomaˈ no Fangcalay Cudad alatek mikiriwiˈay a mikowad tisowanan, tinakoen o Yopu, ˈOlic, Taneng a pinapina sinael, ato matiliday i Matay saka 6 fedengan a sowal ni Yis. Tolonen iso ci Yihofa, halo micekiw to Kimad Ningra i, mamatinakoto iso ko pihinom Ningra.

17. Ngaˈayay pakasoˈlinen ita ko maanan?

¹⁷ Ngaˈayay pakasoˈlinen ita, itini katoˈemanan no kaˈorip no tamdaw, wa itini ci Yihofa i tatihi ita. Tahadaˈoc cowa ko mamatoˈol kita. (ˈOlic 23:4; 94:14) Mikiˈokay ci Yihofa to mamisimaw, mamidama ato mamihinom kitanan, patanektek kitanan. Itini Isaya 26:3 sanay somowal ci Yihofaan: ‘Dadipoten Iso ko mitiˈeray Tisowanan a tamdaw, pafelien Iso cangra to midaˈocay a rihaday, samanen mitadiˈecay cangra Tisowanan.’ Mihaenay i, ka pitadiˈec ci Yihofaan, cadaen ko sapadama Ningra tisowanan. Mihaen i, soˈlinto pasangar ko kaˈorip iso, o mamiliyaw a tanektek.