1. Itini i ponoˈ iso o masamaanay ci Yihofa hani?

 NA MAHARATENGAY iso to o samaanay ci Yihofa han? Ano mitolon kiso Cingranan i, masadakay i ponoˈ ko maanan a sasing? Soˈliˈlin cowa ka ˈaraw ita ci Yihofa, nikawrira tano masasiromaay a pakayraan a somowal ko Fangcalay Cudad to o masamaanay ni Yihofa. Sowal no Fangcalay Cudad, ci Yihofa ‘o cidal, o sapatada,’ ‘o sapipalaˈafo a namal’ sanay. (ˈOlic 84:11; Hipray 12:29) Itini kitiraan Ningra hato masadakay ko tediˈ no odoˈ tadaekim ato linkim, ato talakal ni Idek. (Icikil 1:​26-​28) O hatiniay a noka somowal pairaay to sapikangodoaw ita ci Yihofaan, hanaca pairaay to katalaw ita Cingranan.

2. O roma tamdaw hano pasangaran nanay miingid to Kawas hani?

² Cowa ka ˈaraw ita ci Yihofa, mansa pasangaran nanay pakasoˈlin to maolahay Cingra kitanan. O roma tamdaw na co:waho ka tinako ko olah no wama, anoca iraay ko tatiihay a nalifetan, hato cowa ka olah ci Yihofa cangranan sanay a miharateng. Nikawrira, cipinangay ci Yihofa to nafalocoˈan ita, mafanaˈay to misamaanay hano pasangaran nanay kita miingid Cingranan. Toha sakafanaˈaw ita, pakaynian Ningra i Fangcalay Cudad padama kita cipinang to fangcalay capeling Ningra.

3. Hano mamitongal kita to kacipinang to olah ni Yihofa hani?

³ Ano tano cecayen a tilid somowal pakayni ci Yihofaan, samatatodongay i o olah. (1 Yohani 4:⁠8) O olah ci Yihofa, ano maananto ko midemakan Ningra sahtoay naitiniay i olah. O olah ni Yihofa matomesay ko damsay, matomesay ko ˈicel, hanaca maolahayho Cingra to cowa ka olah Cingranan a tamdaw. (Matay 5:​44, 45) Oniya lalakaw mamilengo tada matomesay to olah ci Yihofa. Ano matongal matongal ko kafanaˈ ita ci Yihofaan i, mamatongal ko nika olah ita Cingranan.

TADA MAOLAHAY CI YIHOFA KITANAN

4. Mafanaˈ ci Yihofaan to matomesay ko damsay a Kawas, samaanay ko piharateng iso? (Nengnengen ko coka.)

⁴ ‘Matomesay ko damsay ni Yihofa.’ (Yakop 5:​11) Itini Fangcalay  Cudad, patinakoan ni Yihofa ko Niyah to o sidaˈitay a wina. (Isaya 66:​12, 13) Haratengen hena, o cecay a wina samaanay misalimla a midimokos to kaemingay a wawa no niyah. Damsayay cingra miˈafofo to wawa i cepiˈ, mikalona to wawa misalama, misamadah to ngihaˈ pasowal to wawa. Ano tomangic ko wawa anca adada ko tireng, cowa ko papakihater han ningra. Malecaday, ano taharoray kita i, o dadamsay ci Yihofa a misimaw kitanan. O cecay mitiliday to ˈOlic sanay ko sowal: ‘Ano macariraw kako i, mihinomay Kiso takowanan, parihaday to falocoˈ ako.’​​—⁠ˈOlic 94:⁠19.

5. Pakaynien i tisowanan, o madimadiay a olah ni Yihofa o maanan ko tatodong hani?

⁵ O madimadiay a Kawas ci Yihofa. (ˈOlic 103:⁠8) Ano mararaw kita i, cowa ka sapisawadaw ci Yihofa kitanan. O Israil tamdaw kinapinapinaay a patoled ci Yihofaan, kawra mikiˈokay ci Yihofa to pasasiyoray tamdaw, kamayan Cingra ˈangongol ko olah cangranan. Tinakoen, sanay ko sowal ni Yihofa: ‘O kalimlaan no Mako kiso, patadamaan tisowanan, marariday ko olah Ako i tisowanan.’ (Isaya 43:​4, 5) Ano kitato i, mahaenay ko olah ni Yihofa, tatahadaˈocen ita pakasoˈlin koninian. Soˈlinto pakidem ko raraw ita i, cowa ko mamisawad ci Yihofa kitanan. Edengan ano mikifalocoˈ kita pasasiyor, minokay i tatihi ni Yihofa, o mamatinakoto ita ko midaˈocay a olah Ningra. Mikiˈokay Cingra ‘tataˈangay ko pisodod’ kitanan, ‘paira to sakarihaday’ no mita.​​—⁠Isaya 55:7; Dmak 3:​19.

6. Pakayni to samaanay ci Yihofa minengneng kitanan, mikitini Cikariya 2:8 mananamay ita ko maanan?

⁶ ˈOsien ko Cikariya 2:⁠8. Tangongolay ko olah ni Yihofa kitanan, tada ciharatengay to nafalocoˈan ita, sapidipotaw kitanan. Ano masomad kita i, mararomay Cingra. Mihaenay, ngaˈayayto kita pasayra Cingranan mitolon a pasowal: ‘Nanay dipoten Iso kako, malecad o pidipot to ˈamamosa no mata Iso.’ (ˈOlic 17:⁠8) O mata tada o kalimlaan no tireng, hanaca cowa ka ngaˈay patelasen a micocok. Mihaenay, patinakoan ni Yihofa kita to ˈamamosa no mata Ningra, malecad to pasowalay kitanan: ‘Kamo o finawlan Ako, cima ko midokaˈay tamowanan malecaday o midokaˈay Takowanan, samanen pakayni Takowanan tada o kalimlaan kamo’ sanay.

7. Hano papakasoˈlin kita to maolahay ci Yihofa kitanan hani?

⁷ Halamhamay ci Yihofa kitanan pakasoˈlin, maolahay Cingra kitanan o kahacecay tamdaw. Nikawrira mafanaˈay Cingra, pakayni i malifaay isaˈayaw, pasangaran nanay kita alatek pakasoˈlin to maolahay Cingra kitanan, anoca pakayni masiˈayaway ita nohatini a sapalifet, misatapangay kita cisasa to olah Ningra kitanan alatek. Ano  hatiraay i, sasamaan kita paˈicel to nika pakasoˈlin no falocoˈ Cingranan hani? Nengnengen samaanay ci Yihofa patalahkal to olah ci Yisan, ato manilnilay no fangcalay saocor a Krisciyang ato kitanan a maemin.

SAMAANAY CI YIHOFA PATALAHKAL TO OLAH NINGRA

8. Hano pakasoˈlin ci Yis to maolahay ko kakarayan Wama cingranan hani?

⁸ Makakapot ci Yihofa aci Yisan tada halafinayto. Itini koˈedaway a tatokian, mapalahadayto nangra ko tangongolay noka makakaolah. Ngaˈayay itini Matay 17:5 a maˈosi ita, to samaanay ci Yihofa patalahkal to olah Ningra ci Yisan. Na ngangaˈay ci Yihofa misakantang ko sowal: “O mihaydaan Ako a tamdaw cingra” wa saan. Kawra halamhamay Cingra to sakafanaˈaw ita to hakowaay ko kaolah Ningra ci Yisan, mansa saan ko sowal Ningra: ‘Wawa no Mako, o tada kaolahan Ako kiso.’ Malikoan nanay ci Yihofa ci Yisan, pakayniay to lalahcien ni Yis a demak a malikoen Cingra. (Ifiso 1:⁠7) Cowa ka cisasa ci Yis to olah no Wama cingranan. Itini kemod no falocoˈ ningra, misasoˈlinay a matinako no falocoˈ ningra konini a olah. Mihaenay haw i, kinapinapinaay pasowal cingra to maolahay ko kakarayan a Wama cingranan.​​—⁠Yohani 3:​35; 10:17; 17:⁠24.

9. Samaanay mahapinang ita, tangongolay ko olah ni Yihofa to manilnilay no fangcalay saocor a Krisciyang? (Loma 5:⁠5)

⁹ Patalahkalay ci Yihofa to olah Ningra to manilnilay no fangcalay saocor a Krisciyang. (ˈOsien ko Loma 5:⁠5.) O cecay piˈarawan to Fangcalay Cudad a lalakaw saan ko sowal, ora “taktaken” sanay a tilid paharatengay to tamdaw, o olah ni Yihofa mahecaday o nanom no ˈalo a micefos to falocoˈ no Krisciyang. Onini kasemeran a sapatinako pahapinangay kitanan, o olah ni Yihofa tora manilnilay no fangcalay saocor a Krisciyang tada tangongolayto! O manilnilay no fangcalay saocor a Krisciyang mafanaˈay to maolahay ko Kawas cangranan. (Yuta 1) Hatiraay haw i, tarokos ci Yohani mikifalocoˈay a pasowal: ‘Tada maolahay ko kakarayanay a Wama kitanan, o wawa no Kawas saan minengneng kitanan!’ (1 Yohani 3:⁠1) Oyanan aca manilnilay no fangcalay saocor a tamdaw ko kaolahan ni Yihofa han? Cowa ka hatira, maolahay Cingra kitanan maemin.

10. O manan ko sangaˈayay a wacay to maolahay ci Yihofa kitanan hani?

¹⁰ O manan ko sangaˈayay a wacay to maolahay ci Yihofa kitanan hani? O sapatefoc. Pakayni sapatefoc, patalahkalay ci Yihofa to kasapaan a olah kitanan. (Yohani 3:​16; Loma 5:⁠8) Kinafalahan ni Yihofa ko kalimlaan a Wawa Ningra, pasadak to ˈorip saki tamdamdaw, hongaˈ mahepol ko raraw ita, wangaˈ mala widang Ningra kita. (1 Yohani 4:​10) Ano calepen ita misimsim ko mihadakan ni Yihofa aci Yis a sapatefoc, mamahapinangto tada maolahay Cangra kitanan o kahacecay tamdaw. (Kalatiya 2:​20) Mihadak ci Yihofa to sapatefoc, cowa ko sapitooraw aca to sarikec. O sapatefoc mikitiniay i olah Ningra a sapatelong kitanan. Pakaynien ci Yihofaan o masakalimlaan a tamdaw ci Yis, nikawrira kamayan mihayi ci Yihofa tano nini a Wawa pakayni kitanan a misemsem ato kinafalah to ˈorip, misawacayay konini to tada maolahay ci Yihofa kitanan.

11. Mikitini Yirimiya 31:3 mananamay ita ko maanan?

¹¹ Maˈaraway ita, cowa ka himeden ni Yihofa ko tangongolay a olah Ningra kitanan, ihkalan Ningra patalahkal. (ˈOsien ko Yirimiya 31:⁠3.) Maolahay ci Yihofa kitanan, misolot kitanan tayra i tatihi Ningra. (Nengnengen ko Limoˈot 7:​7, 8.) Ano o cimato, ano o mananto, cowa ko papaliyas to olah no Kawas i kitanan. (Loma 8:​38, 39) Pakayni tonini olah samaanay ko piharateng iso hani? ˈOsien ko ˈOlic saka 23 fedengan, nengnengen o matiniay a olah samaanay a mifiyor ci Tafitian, ato sasamaan padama kitanan konini a olah.

SAMAANAY KO PIHARATENG ISO TO OLAH NI YIHOFA?

12. ˈOlic saka 23 fedengan patalahkalay to maanan?

¹² ˈOsien ko ˈOlic 23:​1-6. Ci Tafiti itini ˈOlic saka 23 fedengan patalahkalay cingra to tanektekay  a pakasoˈlin. Pakasoˈlinay cingra to maolahay ci Yihofa i cingranan, ciharatengayho cingranan. Onini a ˈOlic somowalay, ci Tafiti atoya midimokosay a pakaenay cingranan a Yihofaan tangongolay ko olah nangra i kalalaˈed. Misarocoday mitadiˈec ci Tafiti ci Yihofaan, ira ko sakayat ni Yihofa, rihadayan nanay ko falocoˈ ningra. Mafanaˈay ci Tafiti hakelong no ˈorip no niyah o mamadipot no olah ni Yihofa, hano mihaen cingra a pakasoˈlinen hani?

13. Hano pakasoˈlin ci Tafiti to mamisimaw ci Yihofa cingranan hani?

¹³ ‘Awaay ko kacangoˈotan ako.’ Midimokosan ni Yihofa ko maamaan a saali ni Tafiti, matinakoay ni Tafiti konini a kasongilaˈ a madimokos. Roma i, tangongolay ko kalawidang ni Tafiti aci Yihofa, milifokayho to pihayda ni Yihofa. Mihaenay, pakasoˈlinay cingra ano mifekadto ko maanan noikor, papadadotoc ci Yihofa midimokos cingranan. Awaay ko sasa ni Tafiti to olah ni Yihofa, o hatiniay a noka pakasoˈlin padamaay cingranan miremo to maamaan a carirawan, lipahaken ato marenecen ko falocoˈ ningra.​​—⁠ˈOlic 16:⁠11.

14. Sasamaan ci Yihofa midimokos kitanan hani?

¹⁴ Tada maolahay ci Yihofa kitanan. Ano tahalifa kita to pades i nokaˈorip i, mamangalef Cingra misafalocoˈ a misimaw kitanan. Ci Kelay a 20 mihecaan matayal itini i Pitil. Iraay ko cecay a laliyadan, paro no lomaˈ ningra tatootoor sanay a pakidem ko mafekaday, tada awaayto ko halomaanan ni Kelay. Macongfongto ko wama ningra i, malonay malonayayto ko tireng. O cecay fafahiyan safa ningra mafalahay no kasakopang. O mimingay a singdi no lomaˈ malahdawayto, awaayto ko pikilomaˈan. Pakayni tonini a demak, samaanay ci Yihofa midipot to paro no lomaˈ ni Kelay hani? Sanay ko sowal ni Kelay: “Midipotan ni Yihofa a midimokos ko paro no lomaˈ ako ira ko sakaˈorip to romiˈamiˈad. Kinapinapinaay,  mataˈlifayto ko sapafeli ni Yihofa. Marariday kako mitikol a miharateng, na matinakoay ako ko pisongilaˈ ni Yihofa a midimokos. Onini a malifetay ako minaˈengan ako i falocoˈ, padamaay takowanan padadotoc talaˈayaw itini kapadesan.”

15. Hano ngaˈay ci Tafiti patikol a tariktik hani? (Nengnengen ko coka.)

¹⁵ ‘Patikolan Ningra kako a patariktik.’ Pakayniay i masakenakenaay a pasangar ato sapalifet, nolatekay matoledan nanay ci Tafiti. (ˈOlic 18:​4-6) Kawrira, matinakoay ningra ko olah ato pidimokos ni Yihofa, patikolayto a tariktik. Ano malotayen ci Tafiti i, hato mikeridan ni Yihofa cingra patayra i ‘malohlohay a rengorengosan’ ato ‘adihayay ko nanom a pala’ a pahanhan, telocto i, talifakayto ci Tafiti, padadotoc a tanektek a tariktik.​​—⁠ˈOlic 18:​28-​32.

16. O olah ni Yihofa samaanay padama tisowanan patikol a tariktik?

¹⁶ Malecaday anini, ano misiˈayaw to pakidemay a pasangar ato sapalifet i, ‘cowa ko mamatekop kita, sahtoay o pakayniay i madimadiay a olah ni Yihofa.’ (Radiw no Mararomay 3:​22; Kolosay 1:​11) Nengnengen ko tinakoan no fafahiyan salikaka ci Rakil. Itini kalifongan a tatokian i 2019, mifalahay cingranan ko faˈinay ningra, miliyasayho ci Yihofaan, taˈangayay ko pipasemsem cingranan. Samaanay ci Yihofa midimokos ci Rakilan hani? Sanay cingra: “Soˈliˈlinay matinako ako ko olah ni Yihofa takowanan. Pafeliay Cingra to adihayay ngaˈayay widang padama takowanan, kalacafayay cangra takowanan, pafeliay to kakaenen no mako, tano soci a patikami tano sinael a pakalalok takowanan, masediay a matawa takowanan, marariday pasowal takowanan to midimokosan ni Yihofa kako. Cowa ka tomerep kako a miakoˈid ci Yihofaan, pafeli to ciolahay a taˈangayay paro no lomaˈ.”

17. Ci Tafiti hano ‘cowa ka talaw madokaˈ ’ hani?

¹⁷ ‘Kako i, cowa ka talaw to mamadokaˈ, samanen mikapotay Kiso takowanan.’ Ci Tafiti marariday misiˈayaw to katalawan, misiˈayaw to sapatalaw no ciˈicelay a ˈada. Nikawrira, o olah ni Yihofa parihadayay ci Tafitian. Matinakoay ni Tafiti ko piingid ni Yihofa i tatihi ningra, hato rihadayan nanay ko falocoˈ ni Tafiti. Mihaenay haw i, sanay paˈolic ci Tafiti ci Yihofaan: ‘Paˈoripay Cingra takowanan, palasawad to kihcod a kokiˈ ako.’ (ˈOlic 34:⁠4) Soˈliˈlin matalaway ci Tafiti nolatekay, kawra o olah ni Yihofa padamaay cingranan miremo to kokiˈ.

18. Ano makokiˈen kiso i, pakasoˈlinen to maolahay ci Yihofa tisowanan, samaanay paˈicel tisowanan hani?

¹⁸ Tahalifa to katalawan a demak i, pakasoˈlinen ci Yihofa to maolahay kitanan, sasamaan Cingra  paˈicel kitanan hani? O cecay misakafahay fafahiyan salikaka ci Sosi, cingra ato faˈinay ikor no kinasoˈot ko faˈinayan wawa tada pakidemay ko rarom. Somowalay cingra to nafalocoˈan nangra, sanay: “O patay no faˈinayan wawa mahecaday to makakelengay ko kakarayan, salomaing sanayto ko falocoˈ ato tireng niyam. Kawra o damsay ni Yihofa parihadayay to falocoˈ niyam.” Masowalay i fafekang ci Rakil sanay milomal: “Cecay a dadaya, tada adadaay ko falocoˈ ako, rawraw sanay a matalaw kako, oranto taˈangayan ako ko ngihaˈ a micangacang ci Yihofaan. Itira tora tatokian, tangsolay matinako ako hato o wina ci Yihofa a mipadiˈo to mimingay wawa, misayarayto falocoˈ ako, hato rihaday sanayto kako, ikor sangaˈay sanayto ko fotiˈ ako. Cowa ko mamapawan kako toya malifetay!” Ci Tasos o malohemay malitengay, cingra pakayniay i caka malo sofitay a mapalit to sepat a mihecaan. Itini toniya tatokian, samaanay cingra matinako ko olah ni Yihofa i cingranan hani? Sanay cingra: “O sapafeli ni Yihofa mataˈlifay to misaalian ako. Matongalay ko nika pakasoˈlin no mako, ngaˈayay kako misarocod mitadiˈec ci Yihofaan. Roma i, pakaynian ni Yihofa i fangcalay saocor padama takowanan itini pasangaray a pakayraan milifok to lipahak. Mahapinangayto ako, ano matongal ko pitadiˈec ako ci Yihofaan i, matongalay a matinako ko olah Ningra i takowanan. Mihaenay, itiniho i kapalitan misatapangayto kako malo miceriday a misakafahay.”

INGIDEN KO DAMSAYAY A KAWAS

19. (1) Mafanaˈay kita to maolahay ci Yihofa kitanan, sasamaanto ko pitolon iso hani? (2) O maanan a sinael to paihkalay to olah ni Yihofa, tada misemeray to falocoˈ iso hani? (Nengnengen ko sapatongal lalakaw “ Paihkalay to Damsayay ci Yihofa a Sinael.”)

¹⁹ Oya masowalay i fafekang a nalifetan misawacayay, matomesay ko olah a Kawas ci Yihofa mikapotay kitanan. (2 Korinto 13:11) Ciharatengay Cingra kitanan kahacecay a tamdaw. Papakasoˈlinen ita o ‘madimadiay a olah’ Ningra miceriday a misimaw kitanan. (ˈOlic 32:10) Ano simsimen ita to samaanay Cingra patalahkal to olah kitanan i, mamaˈaraw ko nika ciharateng Ningra kitanan, wa ngaˈayto matongal ko noka piingid Cingranan. Sayaren ita ko falocoˈ a mitolon Cingranan, pasowal Cingranan to hakowaay ko nika pisaali ita to olah Ningra. Polong a cariraw no mita ngaˈayay pasowalen Cingra, samanen pakasoˈlinay kita cowa aca ka cipinang Cingra to falocoˈ ita, hanaca ciharatengay to sapadamaaw kitanan.​​—⁠ˈOlic 145:​18, 19.

20. O olah ni Yihofa samaanay misolot kitanan miingid Cingranan hani?

²⁰ O olah ni Yihofa malecaday to mataringay a namal to kasienawan, misolotay kitanan miingid Cingranan. Tada ciˈicelay ko olah Ningra, tada damsayay. Itini maamaan no kaˈorip sarocoden a mitinako ko patalahkalan ni Yihofa tisowanan a damsayay a olah. Nanay kita maemin patikoen ko olah Ningra, mikitini i kemod no falocoˈ a pasowal to: ‘Maolahay kako ci Yihofaan!’​​—⁠ˈOlic 116:⁠1.