Mafanaˈay Kiso Han?
Mahela ni Filip koya tapang no Iciyopiya i, o masamaanay a paliding ko mikalican noya tapang hani?
Itini Faelohay Hekal Mihongyakan Fangcalay Cudad, o mihongyakan no Krisiya sowal a “paliding” ngaˈayay o masasiromaromaay a paliding ko mitoroˈan. (Dmak 8:28, 29, 38) Ano nengnengen i, mikalican no tapang no Iciyopiya o taˈangayay no efa a paliding, cowa ko sapilood anca sapisiay a tosaay ko kalileng a kaemingay paliding. Hano saan ko sowal hani? Nengnengen ko pina lalangian.
Onini a tapang ˈakawangay ko saaroˈan, maraayay ko rarakaten a miliwko. Onini a tapang ‘o cifadangalay a sikawdan no fafahiyan hongti no Iciyopiya ci Kantaki, misimaway to kihcod a hafay no fafahiyan hongti.’ (Dmak 8:27) Niyaroˈ no nolitengan Iciyopiya mahawpay ko no aniniay a Sotan ato sakatimolay no Icip a pala. Maraayay ko rarakaten miliwko, maedeng adihayay ko miˈorongan noniya tapang a lalosidan. Alatek mikitini satapangan tahira hererekan cowa ko oyanan sa paliding ko mikalican, nikawrira cowa ko kaemingay a paliding ko mikalican ningra. O sapakalic to lafang a paliding i saka 1 hahekalan, iraay ko cifadahongay sepatay ko kalileng no efa a paliding. Cecay mitadtaday to Fangcalay Cudad sanay: “O mahaenay a paliding adihayay ko pakalican a lalosidan, sinowayay ko maroˈay, ngaˈayho miˈorong to tamdaw tayra i maraayay a pala.”
Mahela ni Filip konini a tapang i, miasipay to maloloday a cudad cingra. Sowal no sinael sanay: ‘Miingiday ci Filip to paliding a comikay, matengilay ningra miasipay konini a [tapang] to maloloday a cudad no pairasolay ci Isaya.’ (Dmak 8:30) Pakalicay to lafang a paliding cowa ka hacikay. Samanen manaˈonay ko cikay, mansa ngaˈayay koya tapang i paliding miasip to maloloday cudad, ngaˈayayho malepel ni Filip ko paliding.
Onini a tapang ‘mitahidangay ci Filipan maroˈ i tatihi no niyah.’ (Dmak 8:31) Ano o sapisiay a paliding, tomirengay ko tamdaw i paliding. Kawra ano sapakalic to lafang a paliding, kakahaday ko kamaroˈan i paliding, hato ngaˈayay koya tapang aci Filip malacafay a maroˈ.
Mikitini maˈoningay i Dmak saka 8 fedengan ato romaroma wacay no likisi, mitepangan ita a cudad ano micoka to mikalican nonini tapang a paliding i, o maˈaraway a sasing o taˈangayay paliding no efa, cowa ko sapilood anca sapisiay a kaemingay paliding.