LALENGOEN LALAKAW 4
RADIW 18 Akoˈiday ko Sapatefoc a Sidaˈit
Mikitini i Sapatefoc o Manan ko Mananamay Ita?
‘Onini o paihkalay to olah no Kawas kitanan.’—1 YOHANI 4:9.
KALIMLAAN NO LALAKAW
Nengnengen ko limasmas no sapatefoc, samaanay paihkal to makapahay capeling ni Yihofa aci Yis.
1. Mirienang to Piharatengan to Kinafalah ni Yis a Saˈopo o manan ko mamacada ita a epoc?
O SAPATEFOC o masakalimlaan a sapatelong! (2 Korinto 9:15) Pakayniay kinafalah ni Yis to ˈorip ngaˈ, ngaˈayay mala widang kita aci Yihofaan, ira ko hatokel midaˈoc a maˈorip. Pairaan ni Yihofa ko olah milimasmas tonini, sasongilaˈen ita a miakoˈid Cingra! (Loma 5:8) Sapipadamaaw kitanan padadotoc ira ko miakoˈiday a falocoˈ, misalimla to sapatefoc, palimoˈotay ci Yis kitanan mihecahecaan a malisopsop miharateng to kinafalah ningra.—Luka 22:19, 20.
2. Oniya lalakaw wa milengo to manan hani?
2 2025 miheca, o Piharatengan to Kinafalah ni Yis a Saˈopo wa itini i Saka 4 Folad 12 romiˈad Pieneman a misikay. Wa misongilaˈ kita a misaday mirienang toniya kalimlaan a saˈopo. I ˈayaw ato lalikor noniya saˈopo a folad, pairaen ita ko toki misongilaˈ a midotim a to midemakan ni Yihofa aci Yis kitanan a kihcod, mamacada ita ko adihayay a epoc. Oniya lalakaw wa milengo, pakayni ci Yihofaan aci Yisan, mikitini i sapatefoc o manan ko mananamay ita. Dotoc a lalakaw wa mitadtad, sasamaan kita mikitini i sapatefoc micada to epoc, ato sasamaan paihkal to miakoˈiday falocoˈ.
PAKAYNI CI YIHOFAAN, MIKITINI I SAPATEFOC O MANAN KO MANANAMAY ITA
3. O kapatay no cecay tamdaw hano ngangaˈay paˈorip to masacaˈolay masaefanay a tamdaw hani? (Nengnengen ko coka.)
3 Mikitini sapatefoc mahapinangay ita ci Yihofa o masadafdafay a Kawas. (Limoˈot 32:4) Misamaanay hani? Haratengen hena, misafelit ci Atam to Kawas ikor, parocokan to raraw ato patay kita. (Loma 5:12) Sapipadamaaw kitanan miliyas to raraw ato patay, milimasmasay ci Yihofa, pakayni ci Yisan a mihadak to sapatefoc. Kawra o cecay malefotay a tamdaw hano kinafalahen ko ˈorip no niyah, oha ngangaˈay mapaˈorip ko masacaˈolay masaefanay a tamdaw hani? Tarokos ci Pawlo saan: ‘Pakayniay i picoli no cecay a tamdaw [ci Atam], malo cirarawayto ko ˈalomanay a tamdaw; pakayniay i pidofdof no cecay a tamdaw [ci Yis], ˈalomanay mamala o moecelay a tamdaw.’ (Loma 5:19; 1 Timoti 2:6) Mihaenay, mala koliay no raraw ato patay kita, o pakayniay i malefotay a tamdaw micoliay to Kawas. Ano mahaenay i, sapilifokaw kita to sakatedalaw, misaaliay to malefotay a tamdaw midofdof to Kawas.
Pakayni i cecay a tamdaw, o emin a tamdaw mala o koli no raraw ato patay. Pakayniho i cecay a tamdaw, kita maemin iraay ko hatoki miliyas to raraw ato patay (Nengnengen ko saka 3 fatac)
4. Misamaanay hano caka pafelien ni Yihofa ko teloc ni Atam oya midofdofay Cingranan a tamdaw tahadaˈoc maˈorip?
4 Sakaˈoripaw no mita i, hano kinafalah ci Yis to ˈorip ningra hani? Hano caka pafelien ni Yihofa ko teloc ni Atam oya midofdofay Cingranan a tamdaw tahadaˈoc maˈorip? Pakayni cowa ka lefot a tamdaw, mahaen ko demak hato matatodongay, cisidaˈitay. Kawra pakayni ci Yihofaan i, mahaen ko demak misafelitay to masadafdafay a safalod. Mihaen to demak hato cowa ka raraw ci Atam, o teloc ningra cowa ko ciraraway a tamdaw. ˈArawhan sahtoay cowa ko soˈlinay konini.
5. Hano pakasoˈlinen ita ci Yihofa sahtoay matatodong ko pidemak Ningra?
5 Saharateratengen, ano sawaden ni Yihofa ko masadafdafay a palinian, caka pihadak to sapatefoc a paˈorip ko teloteloc ni Atam tahadaˈoc maˈorip, wa samaanto hani? Ano mahaen ko demak i, ci Yihofa itini romaroma a demak cowa ko mamasadafdaf saan ko harateng no tamdaw, cowato ka pakasoˈlin to sowal Ningra. Tinakoen, o tamdamdaw wa cisasa ci Yihofaan cowa ko mamalaˈosi ko polong a mikiˈokan Ningra. Kawra hamaan a calemcem kita toniya demak, samanen cowa pisaˈosi to haˈaca ci Yihofa mamidofdof to masadafdafay Ningra a palinian, hanaca makalimay a kinafalah to kanonoˈan a Wawa Ningra, mansa pakasoˈlinen ita sahtoay matatodong ko pidemak Ningra.
6. Pakayni sapatefoc samaanay mahapinang ita tada maolahay ci Yihofa kitanan? (1 Yohani 4:9, 10)
6 O sapatefoc padamaay kitanan cipinang to masadafdafay ni Yihofa, mahapinangayho to tangongolay ko olah ni Yihofa kitanan. (Yohani 3:16; ˈosien ko 1 Yohani 4:9, 10.) Mihadakay ci Yihofa to sapatefoc, cowa aca ko tahadaˈoc maˈorip kita, wa ngaˈayho malo paro no lomaˈ Ningra. Haratengen hena, mararaw ci Atam ikor malaplapayto cingra itini taˈangayay paro no lomaˈ ni Yihofa, orato i, o teloteloc ningra cowato ka malo taˈangayay paro no lomaˈ ni Yihofa. Kawra, pakaynian ni Yihofa to sapatefoc a misodod ko raraw ita, hanaca o pakasoˈlinay midofdofayho Cingranan a tamdaw sahtoay ira ko hatoki malo wawa Ningra. Cowa konini aca, nohatiniho ngaˈayay pakayni sapatefoc, ira ko makedecay a kalawidang ci Yihofaan ato salikaka. Soˈlinayto tada maolahay ci Yihofa kitanan!—Loma 5:10, 11.
7. Mikitini macadaay ni Yis a pades hano mahapinang ita to maolahay ci Yihofa kitanan hani?
7 O sowal ni Satan ano tahalifa ko sikawdan no Kawas to pasangar, cowato ko mamitawmec to madimadiay. Sapicoliaw toniya misamangahay, mihayian ni Yihofa ci Yis ˈayaw no patay micada to pisemsem. (Yopu 2:1-5; 1 Pitiro 2:21) Ano haratengen ita ko pakayni kitanan milimasmas ci Yihofa to sapatefoc, taˈangayay ko pisemsem Ningra, wa cipinang to tada maolahay Cingra kitanan. Manengnengay ni Yihofa ko kanonoˈan a Wawa Ningra masamsam no ˈada, malonicay no sasetiˈ no sofitay, salikor mapacekay i hecek, itini i kapadesan palidlid sa a mapatay. (Matay 27:28-31, 39) Oha ngangaˈay congeden ni Yihofa koniya demak. Tinakoen, sanay ko ˈada ni Yis: ‘Ano maolahay ko Kawas cingranan i, wa paˈoripen Ningra nohatini.’ Itiya i, wa ngaˈay ko Kawas mihaen to demak. (Matay 27:42, 43) Kawra, soˈlinto paˈoripen no Kawas cingra, wa awato ko sapatefoc, o awato ko hatokel no mita. Mihaenay i, mihayian ni Yihofa ko kanonoˈan a Wawa miemem to semsem, tahira i patay.
8. Manengneng ni Yihofa ko Wawa Ningra tahacada to pades i, samaanay ko harateng Ningra hani? Tadtaden. (Nengnengen ko coka.)
8 Manengnengay ni Yihofa ko Wawa Ningra tahacada to pades, kawra cowa ka pisikol a padama cingranan, paihkalay to awaay ko olah ni Yihofa han? Cowa. Pahecadan ni Yihofa a capeling misangaˈ kita, iraay ko maolahay a harateng ita, mahecaday ci Yihofaan. Tinakoen, masowalay no Fangcalay Cudad, ‘mararomay’ ‘adadaay ko falocoˈ’ ni Yihofa. (ˈOlic 78:40, 41) Ano hatiraay i, manengneng ni Yihofa ko Wawa Ningra tahacada to pades i, samaanay ko harateng Ningra hani? Haratengen ko tinakoan ni Apraham. Micorcoran ni Yihofa ci Apraham patafang to edengan a wawa ningra ci Isak malo sapatoˈaya. (Satapangan 22:9-12; Hipray 11:17-19) Itiya, kinacecay mitapaˈ ci Apraham wa mapatayto ci Isak, kawra ya mikawaw cingra i, maharatengay iso koniya wama hakowaay ko kesem no falocoˈ ningra hani? Mihaenay, manengneng ni Yihofa ko Wawa Ningra masamsam no tao, salikor mapatayto i, mangalefay ko kararom a maroray ko falocoˈ Ningra!—Nengnengen ko jw.org wangcan Taˈarawan no Pakasoˈlinay Falocoˈ—Ci Apraham, Saka 2 a ika.
Maˈaraw ko kaolahan a Wawa misemsem, adadaay ko falocoˈ ni Yihofa (Nengnengen ko saka 8 fatac)
9. Pakayni to olah ni Yihofa, Loma 8:32, 38, 39 mifanaˈay kitanan to manan hani?
9 O sapatefoc pakahapinangay kitanan awaay ko tamdaw pakafiloay to olah ni Yihofa kitanan. Ano o paro no lomaˈ ita, ngaˈayay a widang, cowa pakafilo to olah ni Yihofa. (ˈOsien ko Loma 8:32, 38, 39.) Maolah kita to niyah, kawra cowa pakafilo to olah ni Yihofa kitanan. Sapidaˈocaw kiso to ˈorip han? Mangalefay ko sapafeliaw ni Yihofa tisowanan to midaˈocay ˈorip. Sapicadaaw kiso to sasodod han? Mangalefay ko sapisododaw ni Yihofa to raraw iso. Hinatalaay Cingra kitanan micada to sapatefoc toniya masakalimlaan a sapatelong, paihkalay to pakasoˈlinay falocoˈ halo mikifalocoˈ a midofdof Cingranan. Oniya sapatefoc a sapatelong, paihkalay to tadamaanay a olah ni Yihofa, kawra pakayni to olah Ningra, anoikor wa itini i faelohay a hekal adihayto ko mamananam ita.—Patnakay 3:11.
PAKAYNI CI YISAN, MIKITINI I SAPATEFOC O MANAN KO MANANAMAY ITA
10. (1) ˈAyaw no kinafalah to ˈorip ci Yis i, pakayni to masamaanay a demak a mararom? (2) Samaanay ci Yis mipatenak to fangcalay ngangan ni Yihofa? (Nengnengen ko sapatongal lalakaw “ Mitawmecay ci Yis to Madimadiay, Mapatenakay ko Fangcalay Ngangan ni Yihofa.”)
10 Ciharatengay ci Yis to makapahay ngangan ni Yihofa. (Yohani 14:31) Mafanaˈay ci Yis to nao pakaditay to Kawas a raraw ko sakapatay, alatek wa mapakadit ko ngangan ni Yihofa, pakararomay cingranan konini. Mihaenay, itini i satolon ningra sanay: ‘Wamaaw ako, ano ngangaˈay i, nanay paliyasen konini a takid takowanan.’ (Matay 26:39) Kawra, madimadiay ci Yis tahira i patay ningra, mapatenakayto ko fangcalay ngangan ni Yihofa.
11. Misamaan mahapinang ita to tangongolay ko olah ni Yis to tamdaw hani? (Yohani 13:1)
11 O sapatefoc pakafanaˈayho kitanan ciharatengay ci Yis to tamdaw, mangalefay ko kaciharateng to nisawawaan ningra. (Taneng 8:31; ˈosien ko Yohani 13:1.) Tinakoen, mafanaˈay ci Yis to pasangaray ko ˈinorong ningra, sapilahciaw to ˈinorong, wa milifet cingra to pades a mapatay. Kawra, kamayan cingra midofdof to araaw ni Yihofa a midemak. Mihaen cingra to demak i, cowa ko sapilahciaw aca to ˈinorong, mangalefay ko pakayniay i olah ningra to tamdaw. Misarocoday ci Yis to mitosilay pakafanaˈay to tamdaw a tayal, misaˈicel mala dademakay no tamdaw. Ya kinafalah to ˈorip toya romiˈad, pananaway to ooˈ no nisawawaan, malalok a patalipaˈelal cangranan, halo pakalalok cangranan. (Yohani 13:12-15) Ya mapacek i hecek cingra a miemem to adada i, kamayan cingra paladaˈ to hatokel no lakoing toya katihiay ningra a mararaway tamdaw, milimasmasho to tamdaw midimokos to wina no niyah ci Mariyaan. (Luka 23:42, 43; Yohani 19:26, 27) Mihaenay, o olah ni Yis cowa ko pakayniay aca i kinafalah to ˈorip a paihkal, o sasowalen ato midemakan i hakelong no ˈorip ningra, paihkalayho to tangongolay ko olah ningra to tamdaw.
12. Nohatini samaanay ci Yis padadotoc pakayni kitanan a midemak?
12 Pakayni kitanan kinafalahay ci Yis to ˈorip, ‘kinacecayay aca’ mapatay pakayni kitanan, wa ngaˈayto tahadaˈoc malahdaw ko raraw ita. (Loma 6:10) Kawra, kinafalah ci Yis to ˈorip ikor, mahererekayto cowa ka saan. Soˈlinay i, tahanini kamayan ci Yis pakayni kitanan a midemak. Hano mahaen ko sowal hani? Padadotocay cingra mipalak to toki ato ˈicel padama kitanan pakayni i sapatefoc tahacada to epoc. Haratengen hena, ci Yis nimaanay nohatini? O Hongti ato Taˈangayay Saysi ita cingra, o fafongohan i kasakopang no Krisciyang. (1 Korinto 15:25; Ifiso 5:23; Hipray 2:17) Ciˈinorongay cingra misaˈopo to manilnilay no fangcalay saocor a Krisciyang ato taˈangayay ˈopo a tamdaw, tahira i kahererekan no taˈangayay padiing ngaˈ malaˈosiay koniya demak. b (Matay 25:32; Marko 13:27) Roma i, misaˈosi cingra toniya salikoray a ˈawaled milifok kita to sapahaled to pakasoˈlinay falocoˈ a kakaenen. (Matay 24:45) I Comaˈol Miheca a Pikowan, wa padadotoc ci Yis midimokos kitanan. Misarocoday ci Yis pakayni kitanan a kinafalah, tada o kalimlaan a sapatelong ni Yihofa cingra!
PADADOTOC MINANAM
13. Sasamaan iso ko demak, ho tangongol ko olah ita ci Yihofa aci Yisan?
13 Padadotoc midotim kiso to na demakan ni Yihofa aci Yis, wa tangongol ko olah ita Cangranan. I ˈayaw ato ikor a folad no Piharatengan to Kinafalah ni Yis a Saˈopo, misongliaˈ kiso miˈosi to maˈoningay i Ratoh a Cudad. Hamaan pakinacecay han a miˈosi, ngaˈay cedengen a miˈosi, halo kilimen ko kaolahan ita ci Yihofaan aci Yisan a lalangian. Roma i, paladaˈenho ko tao to mikingkiwan iso a kimad.
14. Pakayni i ˈOlic 119:97 ato roma pihongyak, sapitongalaw to sakafanaˈ pakayniay i sapatefoc ato roma soˈlinay kimad, samaanen ita ko demak hani? (Nengnengen ko coka.)
14 Ano halafinayto kiso itini i soˈlinay kimad, alatek saan ko piharateng iso: “Pakayni to sapatefoc, masadafdafay no Kawas ato olah, cipinangayto kako, iraayho ko faelohayto a hahapinangen han?” Soˈlinay i, pakayni toniya demak awaay ko tolas a minanam. Mihaenay, samaanen iso ko demak hani? Sakadademaken ko mitepangan no likakawa no Kawas, samanen ilalomaˈ iraay ko kadofahay a lalakaw. Ano cowa ka emin cipinang kiso to roma pitadtad to sinael, oha pacalepen a mikingkiw, ikorto songilaˈen a midotim ko faelohay mahapinangay iso, halo misongilaˈ miharateng to pakayniay ci Yihofaan aci Yisan ato olah Nangra, iraay ko manan faelohay a matinakoay iso.—ˈOsien ko ˈOlic 119:97 ato roma pihongyak.
Soˈlinay halafinay kita itini kimad, wa ngaˈayho padadotoc mitongal to sakafanaˈaw to sapatefoc, naitiya matongal matongal ko miakoˈiday falocoˈ ci Yihofaan aci Yisan (Nengnengen ko saka 14 fatac)
15. Hano padadotoc kita mikilim to odoˈ no sinael hani?
15 Nolatekay, ano mikingkiw kiso cowa ka hela ko faelohay kalimlaan, anca mitemeray tisowanan a kalimlaan, hamaan a matoled. Tinakoen, mikorkoray to ekim a tamdaw wa mihadidi a mipalak to pina tatokian, anca pinaay a romiˈad, ngaˈ mahelaay ko mimingay a ekim. Kawra kamayan cangra a midemak, samanen ora ekim masakalimlaan ko pinengneng nangra. Mikilim kita to odoˈ no sinael mahecadayto, kawra o mahelaay ita a odoˈ no sinael ikakaay to ekim a masakalimlaan. (ˈOlic 119:127; Taneng 8:10) Mansa, ka pihadidi kita, padadotoc a mikingkiw to Fangcalay Cudad.—ˈOlic 1:2.
16. Sasamaan kita mitodong ci Yihofaan aci Yisan?
16 Mikingkiw kiso ikor, mamisaˈicel misakadademak to mananamay iso. Tinakoen, ngaˈayay todongen iso ko masadafdafay ni Yihofa, cowa misakakinih to tamdaw. Ngaˈayayho todongen iso ci Yis, paihkal to olah to kakarayan Wama, makahi pakayni to fangcalay ngangan ni Yihofa miemem to sapalifet. Roma i, ngaˈayay pahecaden iso ci Yis maolah to tao, makahi pakayni to salikaka a midemak, halo fanekfek a mitosil to tamdaw, ho ngaˈay ko tamdaw micada to sapafeli ni Yihofa a odoˈ.
17. Dotoc a lalakaw wa milengo to manan hani?
17 Matongal ko kacipinang ita to epoc no sapatefoc, wa mangalef ko nika olah ita ci Yihofa aci Yisan, mahaen wa matongal ko nika olah Nangra kitanan. (Yohani 14:21; Yakop 4:8) Mihaenay, nanay sakadademaken ita ko sapafeli ni Yihofa a kihcod mitongal to kafanaˈ to sapatefoc. Dotoc a lalakaw wa milengo, mikitini to sapatefoc wa milifok to manan a epoc, ato misamaan kita paihkal to miakoˈiday ci Yihofaan.
RADIW 107 Taˈarawan a Olah no Kawas
a SAPITADTAD A SOWAL: Tatodong no “midotimay” i, misamacayay pacalep a misimsim to cecay a demak.
b Itini Ifiso 1:10 masowalay ni Pawlo saˈopoen ko ‘ikakarayanay,’ atoya masowalay ni Yis i Matay 24:31 ato Marko 13:27 saˈopoen koya ‘mipiliˈan a tamdaw,’ cowa ka hecad koniya tosaay a demak. Tatodong no sowal ni Pawlo, itini cecay a liyad mipiliˈan ni Yihofa ko tamdaw, tano fangcalay saocor a minilnil cangranan, ho malacafay ci Yisan cangra a mala hongti noikor. Tatodong no sowal ni Yis i, itini taˈangayay padiing i, wa corcoren ningra ko coyoh misaˈopo toya maˈoripho a manilnilay no fangcalay saocor a Krisciyang tayra i kakarayan.
