1. Anini o manan ko kaciharatengan no ˈalomanay tamdaw hani?

 MAHAPINANGAY iso han? Anini ˈalomanay tamdaw o niyah aca ko miharatengan. Tinakoen, itini i kacacawmaˈan no wangcan a pakidemay ko pasengi to niyah, ho mapakahemek no ˈalomanay. Kawra, cowa ka ˈaloman ko sapipaˈdilaw ci Yihofaan. Oniya lalakaw wa milengo: Panokay to ˈdil ci Yihofaan o manan ko tatodong? Hano mamihaen ko demak ita hani? Sasamaan kita a panokay to ˈdil ci Yihofaan hani? Cowato ka halafin, sasamaan ci Yihofa paˈdil to ngangan no Niyah hani?

PANOKAYEN KO ˈDIL CI YIHOFAAN O MANAN KO TATODONG?

2. I Sinay a Lotok, samaanay ci Yihofa paihkal to ˈdil no Niyah? (Nengnengen ko coka.)

² Sanay ko Fangcalay Cudad, tadamaanay ci Yihofa, citatodongay a mapaˈdil ato mapakahemek. Miliyas ko Israil to kalakoli no Icip caka halafin i, ci Yihofa tano tadamaanay a pakayraan paihkal to ˈdil no Niyah. Saharateratengen hena: Pinaay soˈot a efan a Israil tamdaw tayra i Sinay a Lotok, mamitengil to o manan ko hasowal ni Yihofa. Itiya i, makakelengay, mafatiliay, matoˈemay ko romiˈad, i taliyok iraayho ko taˈangayay a honi no laepa. Fahal sa, saˈacefel sanay ko lotok, mangerngerayho ko sera. (Kasadakan 19:16-18; 24:17; ˈOlic 68:8) Itiyaay a Israil tamdaw maˈaraw ko taˈangayay ˈdil a ˈicel ni Yihofa, masemeray a fahkaˈen.

3. Panokay to ˈdil ci Yihofaan o manan ko tatodong?

³ Soˈlin, ngaˈayay midemak kita to sapaˈdil ci Yihofaan. O cecay pakayraan i, fanaˈen ko tamdamdaw to ˈicel ato roma makapahay  capeling ni Yihofa. O roma pakayraan i, ano mitiˈer kita to sapadama ni Yihofa malaˈosi ko demak i, panokayen ko ˈdil ci Yihofaan. (Isaya 26:12) Pakayni panokay to ˈdil ci Yihofaan, o Hongti ci Tafiti o ngaˈayay a taˈarawan. Kinacecayay, itiraay cingra i kaˈayaw no Israil kasakopang a mitolon ci Yihofaan: ‘Yihofaaw, tadamaanay, ciˈicelay, makapahay, ˈodingar, kangodoen sahtoay ono Miso, samanen o kakarayan o fafekangay no sera sahtoay ono Miso.’ Ikor, ‘polong a kasakopang pakahemekay ci Yihofaan.’—1 Rayray 29:11, 20.

4. Samaanay ko demak ni Yis a paˈdil ci Yihofaan hani?

⁴ I fafekangho no sera ci Yis i, misaˈicelay paˈdil a pakahemek ci Yihofaan. Padamaay ci Yis to tamdaw a cipinang, o midemakan ningra to kasapaan a ˈicel sahtoay naitiniay ci Yihofaan. (Marko 5:18-20) Maceriday mifanaˈ ci Yis to tamdaw, o sangaˈayay a Wama ci Yihofa. O roma i, o picada ni Yis to tamdaw a pakayraan pakalalokay to tamdaw pakahemek ci Yihofaan. Kinacecayay, itiniay ci Yis i kasaˈopoan pakafanaˈ to tamdaw, ilalomaˈ iraay ko cecay fafahiyan 18 miheca i tireng ningra ko kaloykoy, matakonoay cingra, cowa ka moecel ko tireng. Mafanaˈay ci Yis to roray ningra, sapipadamaaw cingranan, talaˈayaway cingra lopayˈay a pasowal: ‘Fafahiyan, maadahayto kiso, cowato ka lonay.’ Dotoc, ˈametan ni Yis cingra, tangsolayto a moecel ko tireng ningra. Misatapangayto cingra ‘pakahemek to Kawas,’ samanen o Kawas ko miadahay cingranan, masatamdawto ko kaˈorip ningra! (Luka 13:10-13 ato roma pihongyak.) Mahecaday cingranan, adihayay ko lalangian ita panokay to ˈdil ci Yihofaan.

HANO SAPIPAˈDILAW KITA CI YIHOFAAN?

5. O manan ko lalangian ita mikangodo ci Yihofaan?

⁵ Mikangodoay kita ci Yihofaan. Adihayay ko lalangian ita mikangodo ci Yihofaan. O malefotay ko ˈicel a Kawas Cingra, awaay ko tolas no ˈicel. (ˈOlic 96:4-7) O misangaˈan Ningra a kihcod, paihkalay to tadamaanay ko taneng Ningra. Pafeliay Cingra to ˈorip ita, padadotocho midimokos to ˈorip ita. (Paˈarawan 4:11) O madimadiay a Kawas Cingra. (Paˈarawan 15:4) Roma i, midoedoan Ningra ko sowal no Niyah, malaˈosiay maemin ko midemakan. (Yosuwa 23:14) Mihaenay, o pairasolay ci Yirimiya pakahemek ci Yihofaan sanay: “Awaay ko mikikakaay i Tisowanan a citanengay a tamdaw ato hongti no kasakitakit.” (Yirimiya 10:6, 7) Hatiraayto, oha kakangodoen ita ko ikakarayanay a Wama ci Yihofa. Cowa konini aca, citatodongayho to kakaolahen ita Cingra.

6. Hano tangongol ko olah ita ci Yihofaan hani?

⁶ Tangongolay ko olah ita ci Yihofaan. Haratengen hena, o manan a capeling ni Yihofa a maolah kita Cingranan. Matomesay ko siniˈada Ningra, sidaˈit kitanan. (ˈOlic 103:13; Isaya 49:15) Tada siniˈadaay Cingra. Ano maroray kita i, mahecaday Cingra a maroray. (Cikariya 2:8) Talaˈayaway Cingra padama kitanan mafanaˈ Cingranan, mala widang Ningra. (ˈOlic 25:14; Dmak 17:27) Roma i, misapoeneray Cingra. Sowal no Fangcalay Cudad, ‘morohoay Cingra minengneng to kakarayan ato sera, nai sera a palowad to tadancaay a tamdaw.’ (ˈOlic 113:6, 7) Adihayay ko makapahay capeling ni Yihofa, coko sapipakahemekaw kita a paˈdil Cingranan han?—ˈOlic 86:12.

7. Iraay ko hatatodong ita misamaan ko demak hani?

⁷ Makalimay kita mafanaˈ ci Yihofaan ko tao. Anini, ˈalomanay a tamdaw cowa ka fanaˈ to pakayniay ci Yihofaan a kimad. Misamaanay hani? Samanen miyakayakan ni Satan ko makaniway a sasowalen, miapoh to harateng no tamdaw. (2 Korinto 4:4) Papiharatengay to tamdaw to awaay ko olah ni Yihofa, maolahay  mitefoc to tamdaw, papiharatengayho to tamdaw o pades no hekal o Kawas ko pairaay sanay. Kawra, mafanaˈay kita cowa ko mahaenay ko Kawas! Oha ngangaˈay kita padama to tamdaw cipinang to soˈlinay a pakayraan, mikitini paira to ˈdil a pakahemek ci Yihofaan. (Isaya 43:10) ˈOlic 96 fedengan a lalangian o papakahemek ci Yihofaan. Dotoc wa milengo kita toniya ˈolic a lalakaw, nengnengen misamaan kita panokay to ˈdil ci Yihofaan.

SASAMAAN KITA A PANOKAY TO ˈDIL CI YIHOFAAN HANI?

8. Ngaˈayay kita pakayni to manan a demak panokay to ˈdil ci Yihofaan hani? (ˈOlic 96:1-3)

⁸ ˈOsien ko ˈOlic 96:1-3. Ngaˈayay kita pakayni to sasowalen panokay to ˈdil ci Yihofaan. Oniya sinael no ˈOlic pakalalokay kitanan ‘pasayni ci Yihofaan a romadiw,’ ‘pakahemek to fangcalay ngangan Ningra,’ ‘mitenak to milidongay to tamdaw Ningra a ngaˈayay lihaf,’ ato ‘i kalo a kitakit mitenak to ˈdil Ningra.’ Mahaen ko demak ita, wa paˈdil to kakarayan a Wama ci Yihofaan. I lalitenganho, madimadiay midoko ci Yihofaan a tamdaw, sahtoay sapifanaˈaw to masakenakenaay makapahay capeling ni Yihofa to tao, mitenak to na midemakan Ningra a makapahay demak. (Taniil 3:16-18; Dmak 4:29) Anini, mahecaday kita mihaen to demak.

9-10. Mikitini i nalifetan ni Ancilayna o manan ko mananamay iso? (Nengnengen ko coka.)

⁹ Nengnengen ita itini i Padakaay ci Ancilayna a fafahiyan salikaka a milifetan. I katayalan cingra timoloay a midama to ngangan ni Yihofa. Satapang toniya tayal cingra i, matahidangay cingra mirienang to cecay saˈopo. Itini toniya saˈopo, o faelohay a matayalay ngaˈayay misiwkay to niyah, somowal to kaˈorip no niyah. Milimasmasay ci Ancilayna to pina a sasing, ho cipinang ko ˈalomanay, mala Misawacayay Tamdaw ni Yihofa tada mahemekay ko kaˈorip ningra. Kawra, ˈayaw no somowal cingra, o roma cafay matayal sanay, itiniay i Misawacayay Tamdaw ni Yihofa a paro no lomaˈ a lomahad ko niyah, ikor milikafay cingra to pihakelongan no Misawacayay Tamdaw ni Yihofa. Sanay ci Ancilayna: “Itiya, tada marawraway kako, hato mamahadakto ko falocoˈ. Mafanaˈay kako mararaway ko pilikaf ningra ci Yihofaan, saan salalicayan ko falocoˈ no niyah: ‘Terep han ako, anoca talaˈayaw kako midama to makapahay ngangan ni Yihofa han?’”

¹⁰ Malahci pasowal kora cafay matayal,  tangsolay ci Ancilayna i falocoˈ a mitolon, ikor lopayˈay a pasowal cingranan: “Mahecaday kako tisowanan, nano kaemangho itiniay i Misawacayay Tamdaw ni Yihofa a paro no lomaˈ a lomahad. Kawra cowa ka hecad i, nohatiniho o Misawacayay Tamdaw ni Yihofa kako.” Fahkaˈay ko ˈalomanay tamdaw itiya. Kawra rihadayay ci Ancilayna, misatapangay cingra papinengneng to ˈalomanay to mahemekay mirienang to midokoay demak a sasing, halo matatodong a mitadtad to pihakelongan no niyah. (1 Pitiro 3:15) Matengil nora cafay matayal ikor, mafalicayto ko waywayan ningra. Sanay cingra, kaemangho macacawmaˈ to Misawacayay Tamdaw ni Yihofa i, iraay ko kahemekan a demak. Sanay ci Ancilayna: “Tada ngaˈayay ci Yihofa, tatimoloen kako a midama Cingranan ngaˈ. Ngaˈayay midopo to ngangan Ningra, tada kalikoan ako konini.” Ano milikaf ko tao ci Yihofaan, ngaˈayay talaˈayaw kita paˈading a pasowal, panokay to ˈdil Cingranan.

11. Mikitiyaho tahanini, o finawlan no Kawas samaanay a misakadademak to safalod no ˈOlic 96:8 hani?

¹¹ ˈOsien ko ˈOlic 96:8. Pakaynien ita i hafay panokay to ˈdil ci Yihofaan. Mikitiyaho tahanini, o finawlan no Kawas tanonini a pakayraan ko mikangodo a midoko to Kawas. (Taneng 3:9) Tinakoen, pakaynian no Israil i pakiyaho midama to patirengay ato mitomadaw to fangcalay sefi a tayal. (2 Hongti 12:4, 5; 1 Rayray 29:3-9) O roma mikotoday ci Yisan a tamdaw ‘mihadakay to hafay no niyah’ a midama cingranan ato tarokos. (Luka 8:1-3) Saka 1 hahekalan mifekad ko kedal i Yutiya i, o roma Krisciyang pakiyahoay to dafong, padama to tahapadesay a salikaka. (Dmak 11:27-29) Anini, wa ngaˈay kita mihadak to hafay no niyah, panokay to ˈdil ci Yihofaan.

12. O sapakiyaho ita samaanay paˈdil ci Yihofaan? (Nengnengen ko coka.)

¹² Dotoc a nalifetan paihkalay, o sapakiyaho ita wa paˈdil ci Yihofaan. 2020 miheca, mifekaday ko kedal i Cinpapowi, halafinay a padadotoc, oniya kedal milingatay to ˈorip no pinaay soˈot efan a tamdaw, mahawpay ci Poriska fafahiyan salikaka. Soˈlin pasangar ko kaˈorip, padadotocay cingra to pitoloan ato pilimaan malingad a mitosil, i kaˈifowaan no maomahay mahaenay ko demak ningra. Milikafay ko fiyaw cingranan: “Mihaen ko demak wa macahiw a mapatay kiso.” Matomesay ko pakasoˈlinay falocoˈ ni Poriska a pacaˈof: “Cowa ka falahen ni Yihofa ko finawlan no Niyah.” Caka  halafin, macadaay ni Poriska ko sapakiyaho a dafong no likakawa ita. Pakayniay toniya sapakiyaho no salikaka, o likakawa ita ngaˈ iraay ko mihadakan a dafong. Matemeray ko falocoˈ no fiyaw, pasowal ci Poriskaan: “Soˈlinay midipotan no Kawas kiso, sakafanaˈaw kami Cingranan.” Telocto i, pitoay ko fiyaw ningra misatapangay mirienang to saˈopo.

13. Misamaan kita pakayni i waywayan paˈdil ci Yihofaan hani? (ˈOlic 96:9)

¹³ ˈOsien ko ˈOlic 96:9. Pakaynien ita i waywayan panokay to ˈdil ci Yihofaan. Matayalay i fangcalay pakopangan a saysi mamitawmec to makoracay ko tireng ningra. (Kasadakan 40:30-32) Kawra, palalinien i no tireng a makakorac i, masakalimlaan i, itini i waywayan a makorac. (ˈOlic 24:3, 4; 1 Pitiro 1:15, 16) Sanay ko Fangcalay Cudad, hepolen ita ko ‘matelangay a capeling,’ caˈedongen ko ‘faelohay a capeling,’ tatodong i, falahen ita ko kapiliˈan ni Yihofa a harateng ato waywayan, halo misaˈicel a midofdof to pinengneng Ningra a midotim midemak, todongen ko makapahay capeling Ningra. (Kolosay 3:9, 10) Itini sapadama ni Yihofa, soˈlin o mariˈangay ko waywayan a tamdaw wa ngaˈay a mafalic, micaˈedong to faelohay capeling.

14. Mikitini i nalifetan ni Cike o manan ko mananamay iso? (Nengnengen ko coka.)

¹⁴ Nengnengen ko nalifetan ni Cike. Tada o mangilosay mariˈangay mararaway tamdaw cingra, ci “Akoma” hananay no tao cingra. Adihayay ko kasasiroma no raraw ningra, wa patayen ko pisayfang cingranan. I pitala a tatokian, misatapangay cingra malacafay to tayraay i kapalitan mitosil a salikaka minanam to Fangcalay Cudad. Palidlid sanay cingra mihepol to matelangay a capeling, ikor citatodongayto cingra a micada to paputisem. Ya mamipatay cingranan a romiˈad, o roma misimaway to kapalitan a dimeng mamiliyas cingra i, cilosaˈay cangra. O matayalay i kapalitan a sofitay sanay: “Na o samariˈangay i kapalitan a mararaway tamdaw ci Cike, ˈarawhan nohatini o sangaˈayay a tamdaw cingra.” Mapatayto ci Cike ikor no pina romiˈad, tayraay ko pina faˈinayan salikaka i kapalitan misikay to saˈopo, o cecay mapalitay a tamdaw o sakinacecayho a mitengil. Misamaanay hano mirienang cingra toniya saˈopo hani? Samanen maˈaraway ningra ko kafalic ni Cike tada mitemeray cingranan, sakafanaˈaw cingra to sasamaan midoko ci Yihofaan. Oniya nalifetan paihkalay, o ngaˈayay a waywayan ita soˈlinay  wa paˈdil to kakarayan Wama ci Yihofaan!—1 Pitiro 2:12.

CATO KA HALAFIN WA MISAMAAN PAˈDIL CI YIHOFA TO FANGCALAY NGANGAN NO NIYAH HANI?

15. Cato ka halafin i, wa misamaan ko demak ni Yihofa, ho masongilaˈ mapaˈdil ko ngangan no Niyah hani? (ˈOlic 96:10-13)

¹⁵ ˈOsien ko ˈOlic 96:10-13. Cato ka halafin i, wa misamaan paˈdil ci Yihofa to fangcalay ngangan no Niyah hani? O pakaynien i pisawkit Ningra. ˈOlic 96 fedengan salikor a sinael sanay, mala Hongtiayto ci Yihofa, wa o moecelay ko pisawkit Ningra. Wa kalikito misawkit Cingra to Taˈangayay Papilon, samanen padadotocay a mipakadit to fangcalay ngangan Ningra. (Paˈarawan 17:5, 16; 19:1, 2) Itiyato i, pakaˈaraw ko roma tamdaw toniya demak, alatek wa misatapang midama to matatodongay pidokoan. I Armakiton a folaw, wa sawkiten ni Yihofa ko lekakawan ni Satan. Palaˈafoen ni Yihofa ko micoliay Cingranan, mipakaditay to fangcalay ngangan Ningra a tamdaw, halo milidong to maolahay Cingranan, sapipaˈdilaw to ngangan Ningra a tamdaw. (Marko 8:38; 2 Tisalonika 1:6-10) Tahira kahererekan no Comaˈol Miheca Pikowan ni Kristo i, wa masongilaˈto a mapakorac ko fangcalay ngangan ni Yihofa. (Paˈarawan 20:7-10) Itiyato i, ‘o tamdamdaw wa mafanaˈto to ˈdil ni Yihofa, o hatiniay a sifanaˈ wa miˈedef i paro no kakarayan, mahecad to nanom miˈedef i riyar.’—Hapakuk 2:14.

16. Misetekay kiso to falocoˈ misamaan ko demak? (Nengnengen ko coka.)

¹⁶ Ano ikor, o paro no kakarayan o tamdawho maemin sahtoay wa panokay to ˈdil ci Yihofaan. Hinatalaay kita to kairaan nora romiˈad! Kawra ˈayaw nonini i, metmeten ita ko toki paˈdil ci Yihofaan. Sapipakalalokaw kitanan mihaen to demak, o Malohemay Malitengay i Congpo mipiliˈay to ˈOlic 96:8 malo 2025 pakamihecaan a sinael: ‘O ˈdil no fangcalay ngangan ni Yihofa panokayen Cingranan.’