Tonini mihecaan, o likakawa no Kawas midemakay to pinapina kafalic, padamaay to Micekiway to Fangcalay Cudad matongal ko kakedec midoko ci Yihofaan. Tinakoen, to lipalipay Mitolon, Romadiw ato Misawacayay Saˈopo milengoay to cecay sinael, mikitini 1923 miheca misatapang, o lalakaw no Mikecolay misamacayay somowal ato mitadtad tonini a sinael. Roma i, misangaˈay cangra to koyomi, mitolican ko lalengoen to lipalipay saˈopo a sinael, ato raradiwen i notekedan picekiw ato pakalomaˈay pidoko.

Itini saˈopo, o Micekiway to Fangcalay Cudad a Tamdaw mihadakay a “misawacay,” onini mahawpay ko nalifetan i mitosilay, somowal to misamaanay hano miakoˈid ko niyah ci Yihofaan, romadiw to cecay sapakahemek a radiw, pacakat to cecay satolon. Fafahiyan salikaka ci Iwa Pani itiniay i 1923 miheca micada to paputisem, 15 ko mihecaan ningra itiya. Sanay milomal: “Ano sakasomowalaw kiso a misawacay i, ngaˈayay tomireng pasowal: ‘Sapiakoˈidaw kako to Tapang palemed takowanan’ a mahaenay a sowal.” O romaroma faˈinayan salikaka maolahay somowal a misawacay. Sanay ci Pani: “Matoˈasay a faˈinayan salikaka ci Katwin itini saˈopo adihayay ko miakoˈiday to Tapang a sowal, maˈaraw no fafahi ningra hato macalohayto ko misikayay a salikaka, tefing hananay ko faˈinay, aroˈ sanayto cingra.”

Kahacecay kasakopang to folafolad misikayay to mikiriwiˈay a Mitolon, Romadiw ato Misawacayay Saˈopo. Pakayni tonini a saˈopo, Mikecolay saka 1923 miheca saka 4 folad 1 romiˈad (no Padaka) somowalay: “Kalitosa a toki nonini a saˈopo mihadakay a misawacay, somowal to nalifetan a mitosil, ato pakalalok to mitosilay tamdaw. . . . Pakasoˈlinay kami onini a pakalalokay to falocoˈ a saˈopo padamaay to widang matongal ko kakedec.”

Ci Calis Mating faˈinayan salikaka itiniay i Kanata, 19 ko mihecaan itiya, mitosilay no kasakopang, mikitini tonini saˈopo milifokay to epoc. Sanay milomal cingra: “Mikitini tonini saˈopo mananamay ako o maanan ko hasowal i fawahan no cilomaˈay. Itini saˈopo i, marariday a somowal ko tamdaw to nalifetan i mitosilay tayal. Hato mafanaˈay kako itini pitosilan sasamaanen ko hasowal, ato sasamaan pacaˈof to picoli no tao.”

“Pitosilan a romiˈad” micowatay to kakedec no salikaka. Mikecolay saka 1923 miheca saka 4 folad  1 romiˈad (no Padaka) sanay milasil: “Toha sakakedecaw ita malacecay mirienang to mitosilay . . . , saˈosian ko 1923 miheca saka 5 folad 1 romiˈad Pitosaan malo pitosilan a romiˈad. Ikor no folafolad saka cecay no Pitosaan o pitosilan a romiˈad hananay misaˈosi . . . O kahacecay tamdaw o aitini tonini romiˈad mirienang to mitosilay.”

Ano kaemangayto Micekiway to Fangcalay Cudad a Tamdaw i, tawlikay mirienang a mitosil. Fafahiyan salikaka ci Haisel Polfot 16 ko mihecaan itiya, sanay cingra milomal: “Pakafoladay a Salasil mihadakay to sapitosil a sowal, i ponoˈan a miharateng. a Kako ato Akong ˈifowaay to masasiromaay mitosilay tayal.” Kawra ci Polfot malalangay no tao. Sanay cingra: “Cecay kanonoˈan a matoˈasay faˈinayan salikaka milalangay takowanan mitosil. Itiya cowa ka tada cipinang ko romaroma tamdaw, oha mamirienang to mitosilay ko polong a Micekiway to Fangcalay Cudad, mahawpay ko ‘kapah ato limocedan,’ pakahemek to Tadamaanay a Misangaˈay Tapang ita.” (ˈOlic 148:12, 13) Kawra padadotocay ci Polfot mitosil, ikor mirienangay cingra to saka 2 liyad no Kiliyat Picudadan, maocoray tayra i Panama malo mikiriwiˈay manilnil a mitosilay. Salikor mafalicayto koya faˈinayan salikaka, caayto pilalang to kaemangay mirienang to mitosilay tayal.

O taykay padamaay to salikaka makakedec. Adihayay taykay milimasmasay to pitosilan a romiˈad, tinakoen itini i Kanata Winipek a taykay, polong mirienangay tamdaw matahidangay aitini saka 3 folad 31 romiˈad masadak a mitosil. O mahaenay a limasmas pakatengilay ko ˈalomanay to ngaˈayay lihaf, hanaca pairaay to fangcalay minaroˈan. Saka 8 folad 5 romiˈad, roma taykay i Winipek maedeng 7,000 ko mirienangay, o saˈalomanay a mirienangay to taykay i Kanata itiya.

Saka 8 folad 18-26 romiˈad, o finawlan ni Yihofa itini Padaka Kalifornia Losanki misikayay to masakalimlaan a taykay toya mihecaan. ˈAyaw no taykay to pina lipay, mitolicay ko sinfon to sapisinting no taykay. Maedeng 50 ˈofad ko mipalilaman a tancang no Micekiway to Fangcalay Cudad a Tamdaw, pakafitan nangra ko sasinting no taykay itini i kasoling ato notekedan a tosiya.

Saka 8 folad 25 romiˈad Pieneman, salikaka ci Losofo misadakay to “Lopayˈay Siri ato Lotok a  Siri” sanay a kimad. Itini tonini kimad, ihkalay cingra mitadtad tora “lopayˈay siri,” o iraay ko matatodongay waywayan a tamdaw ko mitoroˈan, o aitini cangra i seraay a lakoing midaˈoc a maˈorip. Miˈosian ningra ko “Saparikec” sanay a saˈosi. Onini a saˈosi mirikecay to makaniway Kristokiyo, micoracor to moecelay ko falocoˈ a tamdaw miliyas to ‘Taˈangayay Papilon.’ (Paˈarawan 18:2, 4) Ikor i, ˈifowaay a Micekiway to Fangcalay Cudad a Tamdaw itini paro no hekal mipalilamay to masapatekay ˈofad a tancang nonini saˈosi.

Itini salikoray romiˈad no taykay, maedeng mataˈlifay ko 3 ˈofad ko mitengilay to pakapapotalay kimad no salikaka ci Losofo, lalangian i, “Polong a Kasafinacadan Pasayraay i Armakiton a Romakat, Kawra Masapatekay ˈOfad Tamdaw Anini Tahadaˈocto Cowa ko Mamapatay.” Itiya o Micekiway to Fangcalay Cudad a Tamdaw o ˈaˈaloman ko mirienangay tamdaw sanay miharateng, oranto i, micaliway cangra to faelohayho mipatirengan a ontociyo i Losanki. Sapisongilaˈaw a matengil no tamdaw ko kamok, misaka dademakan ko laepa no ontociyo, o safaelohay a lalosidan konini itiya. O ˈalomanay pakayniay i laciw mitengil to kamok no taykay.

Isaka 1923 miheca, itini Afrika, Iwropa, Intiya ato Katimol a Amilika kalikiay a macowat ko mitosilay. Itini Intiya, faˈinayan salikaka ci Yosif soˈliˈlin mamidimokos to fafahi ato aenem a wawa, kawra mipadangay cingra mitolic to Intiya, Taimier, Tailuku, ato Uer sowal no mitepangan cudad no Fangcalay Cudad.

Itini Sayrariang, Micekiway to Fangcalay Cudad a Tamdaw ci Aiflet Yosif aci Lunate Polaike patikamiay to Niwyok Prokelin Congpo micangacang to sapadama. 1923 miheca saka 4 folad 14 romiˈad, mapacaˈofay ko saali nangra. Sanay ci Aiflet: “Cecay Pieneman a dadaya, macadaay ako ko cecay tingwa.” Taˈangayay ko ngihaˈ nora itingwaay milicay: “O kiso ko patikamiay to Congpo, papiocor cangranan to mitosilay tayni han?” Pacaˈofan ni Aiflet: “Hayi.” Sanay kora itingwaay: “Miocoran nangra kako tayni.” Ora somowalay a tamdaw o faˈinayan salikaka ci Wiliam Polan. Miˈorongay to fafahi ci Antoniya ato tatosa fafahiyan wawa ci Lois aci Losi, naitiniay Kalepiya a malinah, o katahiraho nangra toya romiˈad. Kalikiay, maˈarawayto no salikaka koniya paro no lomaˈ.

Dotoc sanay ko sowal ni Aiflet: “To cila a dafak, kako aci Lunate misikayay to lipalipay noka lalengo to Fangcalay Cudad. Fahal sanay masadak ko cecay takaraway a tamdaw. Ci Wiliam Polan cingra. Fanekfekay ko falocoˈ to soˈlinay kimad, to cila  romiˈad sapikimadawto cingra to pakapapotalay kimad.” Cowa pakaala to cecay folad, maeminayto mapalilam koya miˈorongan no salikaka ci Polan a cudad. Tangsolay a miliyaw miala to 5,000 a cacudadan, caho ka halafin, maeminayto ningra mipalilam kora cudad. Nikawrira, ano maharatengho no tamdaw ko salikaka ci Polan i, o mipaliwalay to cudad cowa ka saan cingranan. Itini halafinay a mihecaan fanekfek noka pidoko ci Yihofaan i, marariday sakadademak to sinael i pikimadan, mankora o Fangcalay Cudad a Polanan hananayto pangangan no tao cingra.

Itiniay i Pamen a fenpo no Towic tada kincoayto, aira ko ingataay no salawacan no Frans a micomod a miˈafas. Oranto i, Micekiway to Fangcalay Cudad a Tamdaw itini Maketepok makilimay ko cecay matatodongay a hapitolican a kitiraan. Saka 6 folad 19 romiˈad, misolimetan no salikaka i hako ko sapitolic lalosidan ato romaroma dafong, coloˈen patayra faelohay fenpo i Maketepok. Macadato no Congpo ko malahciayto micoloˈ a safanaˈ i, saka tosa romiˈad mahadakay i sinfon ko maˈafasayto no Frans ko Pamen sanay a lihaf. Tada miakoˈiday ko salikaka ci Yihofaan mihaen a midipot a padama cangranan.

Itini Pracil, faˈinayan salikaka ci Ciyawce Yangke patirengay to faelohay katayalan no fenpo, misatapang mitepang tono Putawya sowal a Mikecolay. Talacowacowaay cingra mitenak to ngaˈayay lihaf, lalomaˈ no pina folad mapalilamay ningra ko 7,000 a mitepangan a cudad. Kinacecayay, malisoˈay no salikaka ci Yangke ko paro no lomaˈ ni Sara Fokesen. Tada mahemekay ci Sara, samanen nai 1899 miheca misatapangayto cingra miˈosi to Mikecolay, kawra cowaho ka picada to paputisem, patalahkal to nika patafangayto to tireng cingra ci Yihofaan. Ikorto cowa ka halafin, ci Sara ato sasepat wawa ningra salikor micadaayto to paputisem.

O noka falic itini midokoay a demak, padamaay to Micekiway to Fangcalay Cudad a Tamdaw matongal ko kakedec a midoko ci Yihofaan a Kawas. Tahira i hererekan no miheca, Mikecolay 1923 miheca saka 12 folad 15 romiˈad (no Padaka) mikomoday to sowal: “Ihkalay, kasakopang . . . tanektekay ko pakasoˈlin falocoˈ . . . Micaˈedongay kita to sapilood a rikoˈ, fanekfek ato misetek to falocoˈ militemoh to faelohay miheca, lipahak padadotoc a talaˈayaw.”

Pakaynien to Micekiway to Fangcalay Cudad a Tamdaw ko sowal, ikor a mihecaan o kalimlaan a pitekaan a talaˈayaw. Cowa ka raay nai Congpo a Sotaten Potipot, pinaayto a folad ko Pitil a salikaka to mipatirengay a tayal itira. Ora tayal malahciay i satapangan no 1924 miheca, ora mipatirengan a lalosidan papadama to polong masakapotay a salikaka matongal ko kakedec, mipatenak to ngaˈayay lihaf tano cowaho ka sakadademaken a pakayraan itiyaho.