1. Hano pasangaren kita midofdof hani?

 PASANGARAY midofdof saan kiso miharateng han? Na iraay ko mahaenay harateng no Hongti ci Tafiti, mansa saan ko sowal ningra mitolon ci Yihofaan: ‘Cangacangen Kiso paira to makahiay midofdof a harateng i falocoˈ ako.’ (ˈOlic 51:12) Tada maolahay ci Tafiti ci Yihofaan, kawra nolatekay pasangaran nanay patalahkal to midofdofay a waywayan. Mahaenay kita. Misamaanay hani? Saka cecay, hofoc han kita iraayto ko mitowakangay harateng. Saka tosa, nai litengan tahanini, mihalakaay ci Satan mikayhid to tamdaw malecad cingranan mitowakang ci Yihofaan. (2 Korinto 11:3) Saka tolo, o kaˈoripan ita a hekal matomesay to mitowakangay a pinangan, ‘o hatiniay miontingay to tamdaw a pinangan, oyaan itiniay i tireng no mitowakangay a tamdaw.’ (Ifiso 2:2) Mihaenay, o mamisaˈicel kita micoˈay to ciraraway a pinangan, ci Akoma ato nini a hekal, mihaen o ngangaˈayto kita midofdof ci Yihofaan ato paikenan Ningra to fadangalan a tamdaw.

2. ‘Makahiay midofdof’ o manan ko tatodong hani? (Yakop 3:17)

² ˈOsien ko Yakop 3:17. Itini sakayat no Kawas sanay ko sowal ni Yakop, o citanengay a tamdaw ‘makahiay midofdof.’ O manan ko tatodong nonini hani? O mamakahi kita, hanaca makalim midofdof to paikenan ni Yihofa to fadangalan a tamdaw. Manaokaniw, ano misaali ko tamdaw papisafelit kitanan to limoˈot ni Yihofa, caayto ka ciharateng ci Yihofa midofdof kita tora tamdaw.—Dmak 4:18-20.

3. Pakaynien ci Yihofaan, midofdof kita to cifadangalay a tamdaw hano masakalimlaan hani?

³ Palinien to pidofdof to tamdaw, wa ikaka ko kalim ita midofdof ci Yihofaan alatek. Samanen tocerid o malefotay ko mihadakan ni Yihofa a sakayat kitanan. (ˈOlic 19:7) Kawra o wama  wina, tapang no sifo ato malohemay malitengay no kasakopang cowa ka haen. Soˈlin mahaen, o kakarayan a Wama ita kamayan pafeli cangranan to pina a fadangalan. (Taneng 6:20; 1 Tisalonika 5:12; 1 Pitiro 2:13, 14) Midofdof kita toniya paikenan ni Yihofa to fadangalan a tamdaw, malecaday o midofdofay ci Yihofaan. Kawra, ano pasangaran nanay kita micada ato midofdof to pina limoˈot nangra, sasamaan kita ‘makahi midofdof’ hani? Onini a lalakaw mamilengo tonini.

4. ˈAlomanay wawa hano mitowakang to wama wina?

⁴ ˈAlomanay kaemangay ‘mitowakangay to wama wina.’ (2 Timoti 3:1, 2) Misamaanay hani? Harateng no romaroma tamdaw tada makaniway ko wama wina sanay, misaali to wawa papidemak to pina demak, ˈarawhan cowa ka pidemak ko niyah. Harateng no romaroma tamdaw o sapaini no wama wina mataˈlifayto, pakidemay awaay ko kapo sanay. Kaemangay tamdaw, iraay ko mahaenay harateng iso han? Palimoˈotay ci Yihofa to wawa sanay: ‘Ka pakayni kamo i Tapang a midofdof to wama wina, samanen o moecelay konini.’ (Ifiso 6:1) Harateng no ˈalomanay kaemangay pasangaray mihaen to demak sanay. O manan ko papadama tisowanan hani?

5. Ci Yis hano o sangaˈayay taˈarawan pakayni i pidofdof to wama wina hani? (Luka 2:46-52)

⁵ Pakayni i pidofdof to wama wina, ngaˈay kiso pasayra i sangaˈayay taˈarawan ita ci Yisan a minanam. (1 Pitiro 2:21-24) Malefotay a tamdaw ci Yis, kawra o wama wina ningra cowa ko malefotay. Soˈliˈlin mararaway cangra nolatekay, mangalef mioratay ci Yisan, kawra kamayan mikangodo ci Yis cangranan. (Kasadakan 20:12) Nengnengen ko mifekaday a demak i 12 ko mihecaan ni Yis. (ˈOsien ko Luka 2:46-52.) Maharek misalisin ci Yosif aci Mariya tona minokay i, cowa ka fanaˈ to materekayho i Yirusalim ci Yis. Nao mamihapinang cangra to iraayto i tatihi ko polong wawa nangra, o ˈinorong nangra konini. Mahelato nangra ci Yis i, mirorohay ci Mariya ci Yisan tada miafaday cangranan. Na ngangaˈay ci Yis pasowal to o wama wina ko mararaway, nikawrira cowa ka pihaen ko demak ningra, ao tano mikangodoay a pakayraan pacaˈof to wama wina. Nikawrira, ‘cowa ka cipinang ci Yosif aci Mariya to tatodong no sowal ni Yis.’ Ikorto, ‘kamayan midofdof cangranan’ ci Yis.

6-7. Sasamaan ko pidemak no kaemangay tamdaw mamadoloto midofdof to wama wina?

⁶ Kaemangay tamdaw, ano mararaw anca miorat tisowanan ko wama wina iso i, pasangaran nanay kiso midofdof cangranan han? Sasamaan ko pidemak iso hani? Saka 1, haratengen ko nafalocoˈan ni Yihofa. Sowal no Fangcalay Cudad, midofdof kiso to wama wina ‘wa pakahemek to Tapang’ sanay. (Kolosay 3:20) Cowa ka songilaˈ ko kacipinang no wama wina tisowanan han? Anca patirengan nangra a saˈosi no lomaˈan cowa ka tatodong han? Aka calemcem, mafanaˈay ci Yihofa maemin. Maˈaraw Ningra kiso i mahaenay a pakayraan, kamayanho midofdof to wama wina, maedeng o lalipahak Cingra.

⁷ Saka 2, haratengen ko nafalocoˈan no wama wina. Midofdof kiso to wama wina o papalipahak cangranan, mamilifokho to pakasoˈlin nangra. (Taneng 23:22-25) Roma i, o kalalaˈed iso cangranan mamatongal ko kakedec. Itiniay i Pilis faˈinayan salikaka ci Alisanta sanay: “Ano micerid kako mitoor to sowal no wama wina midemak ikor, matongalay ko kangaˈay no kalalaˈed niyam, o pakayraan no paro no lomaˈ matongalayto ko kadihko ato karihaday.” b Saka 3,  haratengen, ano minanam kiso midofdof anini, wa ira ko maanan a sadama noikor. Itiniay i Pracil faˈinayan salikaka ci Pawlo sanay: “Minanam midofdof to wama wina, padamaay takowanan midofdof ci Yihofaan ato romaroma cifadangalay a tamdaw.” Misaˈicelay somowal ko Fangcalay Cudad, midofdof to wama wina taˈangayay ko pifiyor to hanoikor no mita. Sowal no sinael: ‘Mihaen o mamalaˈosi ko demak iso, halafin ko kaˈorip i fafekang no sera.’—Ifiso 6:2, 3.

8. ˈAlomanay kaemangay tamdaw hano makahi midofdof to wama wina hani?

⁸ Mahapinangay no ˈalomanay kaemangay midofdof to wama wina pairaay to adihayay a epoc. Ci Loisa itiniay i Pracil, maˈaraw ningra ko ˈalomanay malecaday ko mihecaan cingranan a tamdaw iraayto ko soci, cowa ka cipinang cingra hano cowa ka pihayi ko wama wina miˈaca cingra to soci. Ikor mahapinangay ningra mihaen ko demak no wama wina o mamidipot cingranan. Sowal ningra pakayni saˈosi no wama wina cowa ko mikecengay saan ko pinengneng, ao mamidipot to ˈorip a safakec han ko pinengneng. Itiniay i Padaka a kaemangay fafahiyan salikaka ci Ilisapay latekay pasangaran nanay midofdof to wama wina, sanay cingra: “Ano caka cipinang kako to hano patireng ko wama wina to cecay saˈosi no lomaˈan i, miharatengay kako to saˈosi nangra isalakat samaanay midipot takowanan.” Fafahiyan salikaka ci Monika i Arminiya sanay, ano midofdof cingra to wama wina i, ikakaay ko kangaˈay no minaroˈan.

9. Pakayni pidofdof to sarikec ˈalomanay tamdaw samaanay ko pinengneng?

⁹ Panganganan no Fangcalay Cudad ko sifo no hekal to ‘cifadangalay no hekal.’ (Loma 13:1) Harateng no ˈalomanay ira ko sifo o ngaˈayay, hanaca o dadofdofen ko patirengan no sifo ko pina sarikec. Kawra o cecay sarikec ano cowa ka tatodong anca pakidemay ko saali, caayto ka ciharateng cangra sapidofdofaw. Tinakoen o pasataay, o cecay safanaˈ, o cecay kitakit i Iwropa kalicecay no sepat a milicayan sanay miharateng: “O romaroma sapasata ano cowa ka tatodong saan kiso miharateng, hamaanto pasataen iso sanay.” Mansa o sapasata no finawlan nonini a kitakit maˈesalay ko kalicecay no tolo.

10. Soˈlin cowa ka olah kita to cecay a sarikec, hano kamayan midofdof kita hani?

¹⁰ Somowalay ko Fangcalay Cudad, o sifo no hekal ci Satan ko mikowanay, pairaay to adihayay a pades no tamdaw, cato ka halafin papalaˈafoento no Kawas. (ˈOlic 110:5, 6; Patnakay 8:9; Luka 4:5, 6) Pasowalayho ko Fangcalay Cudad kitanan, ‘o cima ko misafelitay to cifadangalay i, o misafelitay to limasmas no Kawas.’ Nohatini mihayian no Kawas ko sifo no hekal mikowan to cecay liyad, pakayniay sapairaaw to rihaday no lekakawa, makalimay ko Kawas midofdof kita to sifo. Mihaenay ano o tatodong no sifo a lalifoken i, ‘papatikolen’  no mita, mahawpay ko pasataay, mikangodo ato midofdof to sifo. (Loma 13:1-7) O cecay sarikec cowa ka tatodong saan kita miharateng alatek, midofdof toniya sarikec kaafadanto, anca matekesay ko ˈaca. Kawra kakamayan kita midofdof to sifo, samanen o sapalimoˈot ni Yihofa konini. O saali no sifo kitanan ano cowa pisafelit to rikec ni Yihofa, o dadofdofen no mita.—Dmak 5:29.

11-12. Mikitini Luka 2:1-6, soˈliˈlin kaafadan ni Yosif aci Mariya midofdof to cecay sarikec, kawra kamayan cangra samaanay ko pidemak? Samaanayto ko teloc? (Nengnengen ko coka.)

¹¹ Ci Yosif aci Mariya itini cowa ko kangaˈayan a pakayraan i, kamayan makahi midofdof to cifadangalay no hekal, ngaˈayay nanamen ita ko taˈarawan nangra. (ˈOsien ko Luka 2:1-6.) Cipoyapoy ci Mariya maedeng 9 folad i, hongti no Loma ci Aukustus milasilay to sarikec, misaali to polong finawlan no kitakit minokay i nalacolan mitingki to ngangan. Tada miafaday ci Yosifan aci Mariyaan konini, samanen raromakat cangra to 150 kongli tayra i Piclihim mitingki, i fatad macokacokay i lotok. Pakayni ci Mariyaan tada marorayay a romakat. Cingra ato itiyaday a wawa wa ira ko katalawan han? Itini fatad no lalan ano mahofocto ci Mariya samaanto hani? Ora poyapoy ningra o mamalo Misiya noikor! Pakayni tonini ci Yosif aci Mariya o cacalemcem alatek. Wa hawad sato cangra midofdof to sifo wa ngaˈay han?

¹² Soˈliˈlin iraay ko lalangian ni Yosif aci Mariya calemcem, nikawrira kamayan cangra midofdof to sifo. Mihaenay hato palemedan ni Yihofa cangra, cowa ko karihaked aca ni Mariya tahira i Piclihim, mahofocayho to tanektekay a wawa. Matatodongayto ko sapairasol no Fangcalay Cudad!—Mika 5:2.

13. Midofdof kita to sifo papaira to manan haepoc i salikaka?

¹³ Midofdof kita to cifadangalay no hekal, o papaira to haepoc no niyah ato salikaka. Misamaanay hani? Cecay lalangian i, cowato ko papakayni kita i pisafelit to rikec a masayfang no sifo. (Loma 13:4) Roma lalangian i, wa ira ko ngaˈayay ngangan i pinengneng no sifo to Misawacayay Tamdaw ni Yihofa. Tinakoen,  ˈayaw no pina miheca, i Nayciliya itini kasaˈopoan a tatokian micomoday ko sofitay i Hongti Kitakit Kasaˈopoan, sapikilimaw to misafelitay to pasataay a tamdaw. Kawra o mikeriday a tapang no sofitay palimoˈotay to sofitay miliyas, saan ko sowal: “O Misawacayay Tamdaw ni Yihofa cowa pisafelit to pasataay.” O kahacecay iso midofdof to sarikec, wa ngaˈay patado to finawlan ni Yihofa milifok to ngaˈayay ngangan, o hatiniay ngaˈayay ngangan itini noikoran a cecay romiˈad, papadama to salikaka milifok to sadipot.—Matay 5:16.

14. O manan ko padamaay to cecay fafahiyan salikaka ‘makahi a midofdof’ to cifadangalay no hekal hani?

¹⁴ Nikawrira, latekay cowa ka makahi kita midofdof to cifadangalay no hekal alatek. Fafahiyan salikaka ci Ciyawanna i Padaka sanay: “Pakayni takowanan pasangaray midofdof, samanen o papina paro no lomaˈ ako na cowa ka sadafdaf ko macadaay i sifo.” Kawra misaˈicelay ci Ciyawanna mifalic to harateng no niyah. Samaanay ko pidemak ningra hani? Saka cecay, cowato piˈosi cingra to misafelitay to sifo a sowal itini i wangcan. (Taneng 20:3) Saka tosa, mitolonay cingra micangacang to sapadama ni Yihofa cingranan eca ka halamham to sakafalicaw no sifo, ao mitadiˈecay ci Yihofaan. (ˈOlic 9:9, 10) Saka tolo, miˈosiay cingra to pakayniay misatenokay a saaroˈan a lalakaw no likakawa no Kawas. (Yohani 17:16) Nohatini samanay ko harateng ni Ciyawanna hani? Sowal ningra mikangodo ato midofdof to sifo pairaay to ‘soˈlinay a rihaday no falocoˈ’ ningra.

15. Latekay hano pasangaran nanay kita midofdof to sakayat no likakawa ni Yihofa?

¹⁵ Palimoˈotay ci Yihofa kitaanan midofdof to mikeriday i kasakopang a tamdaw. (Hipray 13:17) O ˈAˈideman ita ci Yis o malefotay, kawra misaka dademakan ningra a tamdaw cowa ko malefotay. Midofdof cangranan cowa ko madoloay saan kita miharateng alatek, ano palimoˈot cangra kitaanan midemak to cowa ko kaolahan ita a demak i, papasangar to midofdof. Tarokos ci Pitiro kinacecayay pasangaran nanay midofdof. Itiya, palimoˈotay ko coyoh ci Pitiroan komaen to heci no pina pinaˈorip. Kawra tooren ko Rikec ni Mosi, cowa ka korac konini pinaˈorip. Oranto i, cowa ka kinacecay aca minaˈay ci Pitiro to coyoh, ao kinatoloay a minaˈay! (Dmak 10:9-16) Misamaanay hani? Samanen cowa ka hecad to pinangan ningra konini a demak, cowa ka cipinang cingra to hano mihaen ko sakayat no coyoh. Haratengen hena, mikayatay ci Pitiroan o malefotay a coyoh, pasangaranho midofdof ci Pitiro, papidofdofen kita to cowa ka lefot a tamdaw, maedeng ikakaay ko pasangar!

16. Soˈliˈlin sanay ko harateng no tarokos ci Pawlo macadaay ningra a sakayat cowa ka tatodong, kawra kamayan cingra samaanay ko pidemak hani? (Dmak 21:23, 24, 26)

¹⁶ Latekay miharateng ko tarokos ci Pawlo to pina sakayat cowa ka tatodong, kawra kamayan cingra ‘makahi midofdof.’ Nengnengen ko cecay tinakoan. O romaroma Yutaya Krisciyang matengilay ko sapaoraf saan ko sowal, o sapasifanaˈ ni Pawlo to Yutaya tamdaw ‘misafelitay to Sarikec ni Mosi,’ sanay. (Dmak 21:21) Oranto i, o malohemay malitengay no Yirusalim palimoˈotay ci Pawloan miˈorong to sepat a tamdaw tayra i fangcalay sefi midemak to sakakorac, mihaen mamafanaˈto ko ˈalomanay tamdaw midofdofay ci Pawlo to Rikec ni Mosi. Soˈliˈlin cowa ka raraw ko demak ni Pawlo, hanaca mafanaˈay cingra cowato ko mamidofdof ko Krisciyang to Rikec ni Mosi, kamayan cingra kaliki a mitoor tonini sakayat midemak. Saka 2 romiˈad, ‘miˈorongay cingra toya papina tamdaw malingad, malacafay midemak to sakakorac a demak.’ (ˈOsien ko Dmak 21:23, 24, 26.) Makahiay ci Pawlo midofdof, telocto micowatay to kakedec no kasakopang.—Loma 14:19, 21.

17. Mikitini nalifetan ni Setifeni mananamay iso ko maanan?

 ¹⁷ Fafahiyan salikaka ci Setifeni pasangaran nanay micada to misaˈosian no fenpo saan ko harateng. Na itiniay i roma ko sowal a kapot cingra ato faˈinay lipahak a mitosil, kawra ikor palasawadan no fenpo konini a kapot, hanaca manilnilay cangra raramod patikol tayra i tano wina a sowal a kasakopang. Sanay ko sowal ni Setifeni: “Cowa ka hemek kako, awaay ko taˈangayay pisaali no wina a sowal a kilac saan ko harateng ako.” Soˈliˈlin hatira, kamayan cingra midama to misaˈosian no fenpo. Sanay cingra: “Ikor mahapinangay ako tada citanengay koniya saˈosi. Itini faelohay a kasakopang, o paro no lomaˈ no romaroma salikaka cowa ko Misawacayay Tamdaw ni Yihofa, mikiriwiˈay kami ciharateng tonini a salikaka, malecad o wama wina nangra, padamaayho kako to cecay miliyaway mitosil a fafahiyan salikaka, malacafay cingranan minanam to Fangcalay Cudad. Roma i, adihayayto ko toki ako a mikingkiw. Misarocoday kako patalahkal to midofdofay waywayan, mansa tada rihadayay ko falocoˈ.”

18. Midofdof papaira to maanan a haepoc?

¹⁸ Ngaˈay kita minanam a midofdof. Ci Yis cowa ka itini ngaˈayay a pakayraan, ao ‘itiniay i kapadesan minanam to midofdofay.’ (Hipray 5:8) Malecad ci Yisan, marariday kita itini pasangaray a pakayraan minanam a midofdof. Tinakoen, satapang no 2019 a lifong a tatokian, macadaay ita ko sakayat misawad to itini Hongti Kitakit a Kasaˈopoan a saˈopo ato pakalomalomaˈay a mitosil. Pasangaray nanay kiso midofdof han? Kawra, kamayan kiso misaˈicel midofdof. Cowa ko kiso aca ko madipotay, matongal ko kakedec iso to salikaka, hanaca pakahemekayho ci Yihofaan. O macadaay ita a sapahatatanam papadama kitanan itini taˈangayay padiing a tatokian makahi micada to sakayat no likakawa no Kawas, mihaen o mamadipotto ko ˈorip no mita.—Yopu 36:11.

19. Hano makalim kiso patalahkal to midofdofay a waywayan hani?

¹⁹ Oniya lalakaw mananamay ita, midofdof pairaay to kadofahay a sapalemed. Kawra mipiliˈ kita midofdof ci Yihofaan, sakakaay a lalangian i, maolahay kita Cingranan, makalimay pakahemek Cingranan. (1 Yohani 5:3) Adihayay ko midemakan ni Yihofa i kitaanan, tahadaˈocto cowa ko mamaemin ita patiko. (ˈOlic 116:12) Ngangaˈay kita midofdof Cingranan ato nipafelian Ningra to fadangalan a tamdaw. Mihaen ko demak paihkalay to citanengay kita, o citanengay a tamdaw o papakahemek ci Yihofaan.—Taneng 27:11.